Sang’hano za Wasenga 5

Anania na Safila wovwiza

1Hakala na munhu imwe yokemigwa Anania na mwehe wake yokemigwa Safila wagula mgunda wao. 2Anania kasola sente chidodo ziyapatile na kuzifisa kuno mwehe wake yoimanya mbuli iyo na sente zisigale kazigala kwa watumigwa wa Mulungu. 3Baho Petulo kamuuza,“Anania, habali kumwing'ha nyafasi Mwenembago yaulongoze moyo wako na kukutenda umvwizile Muhe wa Mulungu kwa kufisa sente chidogo zuupatile kwakugula mgunda wako? 4Vuukalile ung'hali hunaugula mgunda uo ukala wako, na vuumalile kuugula sente izo ziupatile zikala zako, ivo habali kugesa kutenda mbuli iyo? Humvwizile munhu ila kumvwizila Mulungu!” 5Anania viyahulike ivo, kagwa hasi kadanganika. Wanhu wose viwahulike mbuli izo wadumba ng'hani. 6Wabwanga wavika, wauzinga lukuli lwake kwa sitili, amala wamulava kunze na wamuwanda. 7Amala vigabitile masaa madatu, mwehe wake nayo kengila mbali hachimanyile chija chilawilile. 8Petulo kamulongela, “Nongele! zino izo sente zose zumpatile vumgulile mgunda wenu?”

Nayo mwehe wa Anania kedika,“Enaa iyo izo.”

9Petulo kamlongela, “Habali gweye na mulume wako muitogolela kumgeza Muhe wa Mndewa? Tegeleza! Waja wabwanga waitile kumuwanda mulume wako sambi wahaulwivi, nawo wokusola na gweye ivija.” 10Safila viyahulike ivo kagwa hamagulu ga Petulo na kudanganika, waja wabwanga viwengile wamvika kamala kudanganika, ivo wamlava kunze wamuanda behi na mulume wake. 11Bumbila da wanhu wamtogole Yesu na wanhu wamwenga viwahulike mbuli iyo wadumba ng'hani.

Watumigwa wa Mulungu wohonya wanhu wengi

12Wasenga wa Mulungu wasang'hana miujiza na miuzonza mingi mwa wanhu. Wamtogole Kilisito wakala woiting'hanila hamwe muluhelengo lwa Selemani. 13Habule munhu imwenga yoyose yagezile kuilumba nao, mbali wanhu wose wawalongelela goya. 14Bumbila da wanhu wamtogole Mndewa, wongezeka ng'hani walume kwa wake. 15Hata wanhu wakala wowagala watamu wao muinzila na kuwagoneza mmakomwa na mikeka ili Petulo yahabita sisila jake diwagubike watamu wao na kuwahonya. 16Wanhu wengi wavika kulawa mzikae zili behi na Yelusalemu wawagala watamu na wanhu wambule vinyamkela na wose wahonyigwa.

Wasenga wa Mulungu wodununzigwa

17Labaho, mkulu wa Walava nhambiko na wayage wakalile bumbila dimwe na Masadukayo wawaonela maya wasenga wa Mulungu. 18Baho wawagoga waja wasenga wa Mulungu na kuwagela mdigeleza. 19Mbali ichilo mtumigwa wa kwa Mulungu kavugula lwivi lwa geleza kawalava kunze kawalongela, 20“Gendeni mkeme mui ng'anda ya Mulungu mkawalongele wanhu mbuli zose za ugima wa kuilumba na Yesu kulibule uhelelo.” 21Wasenga wa Mulungu watogola, wengila Haing'anda ya Mulungu imitondo ng'hani, wasonga kufunda.

Mkulu wa Walava nhambiko na wayage viwavikile, wakema mting'hano wa chitala chikulu na wavele wose wa Izilaeli amala wawalagiza wanhu kudigeleza wawagale waja wasenga wa Mulungu. 22Mbali waja wamilizi wa ng'anda ya Mulungu viwavikile kudigeleza hawawavikile wasenga wa Mulungu, kwaivo wabwela kugala usenga kwa wavele wa chitala. 23Walonga, “Chivika geleza dihindigwa na wamilizi wema wokwimila lwivi. Mbali vichivugule hachimvikile munhu yoyose mng'anda. 24Mkulu wa wamilizi wa ng'anda ya nhambiko na wakulu wa Walava nhambiko viwahulike mbuli iyo wakanganya ng'hani, hawamanyile choni chiwalawilile waja wasenga. 25Amala keza munhu imwe kawalongela, “Waja wanhu imuwafungile mdigeleza, vino sambi wa Muing'anda ya Mulungu wofunda wanhu.” 26Kilongozi wa ng'anda ya Mulungu hamwe na wanhu wake waita Kuing'anda ya Mulungu kuwasola wasenga. Mbali hawawagogile kwa kuwaswangiza kwavija wadumba wanhu seke wawatoe mabwe. 27Wemilizi wao wawagala wasenga wa Mulungu haulongozi wa chitala, mkulu wa Walava nhambiko kawalongela, 28Chiwakomhokela seke mfunde kwazina da munhu ino mbali mogendelela kupwililisa mafundo genu Yelusalemu yose, monda ioneke kua cheye iyo chanduso cha ifa yake.”

29Baho Petulo, na waja wasenga wamwenga wedika, “Cholondeka chimtegeleze Mulungu kubita munhu. 30Mulungu wa wasaho zetu kamzilibula Yesu, ija mweye imukomile kwa kumuwamba mumsalaba. 31Mulungu kamwinula mbaka ubanzi wa kutogoligwa wa Mulungu yawe kilongozi na mlohozi yawatende wanhu wa Izilaeli waleke malozo ili yawalekesele malozo gao. 32Cheye chiona mbuli iyo viilawila na Muhe wa Mulungu ija Mulungu yaweng'ile waja wamtegeleze, nayo kogangamiza mbuli iyo.” 33Wanhu wose wakalile mkija chitala wagwa ludoko mbaka walonda wawakome waja watumigwa wa Mulungu. 34Mbali Falisayo imwe yokemigwa Gamalieli iyo kakala mfundaji wa ndagizi na kutogoligwa na wanhu wose, kema haulongozi wa chitala, kalonda waja watumigwa tanhu walavigwe kunze. 35Baho kawalongela waja wakulu wa chitala, mweye wanhu wa Izilaeli, “Itiganyeni kwambuli zino, gaja gamlonda kuwatendela wanhu wano. 36Milao midodo ibitile, halawila munhu imwe zina jake Teuda kolonga kuwa iyo munhu mkulu na wakala kama mia nne vino wamuwinza. Mbali kakomigwa na waja wose wamuwinzile wapwililika na mbuli yake imalila baho. 37Amala kalawilila Yuda munhu wa Galilaya, chipindi cha kupeta wanhu nayo kalongoza bumbila da wanhu walemile ulongozi wa Kilumi, nayo kakomigwa na wajalusona wake wapwililika. 38Sambi nowalakileni, sekemuwatendele mbuli ihile wanhu wano ila walekeni munhu yahaisonga mbuli ino hebu sang'hano yao hagendelela. 39Ila yahawa isongigwa na Mulungu, hamdaha kuwakimila wanhu wano. Badili yake mokua kama moihuma na Mulungu!”

Baho waitogolela nayo.

40Baho wawakema waja wasenga wabwele mng'anda mchitala, wawalagiza wawalibule miboko, na kuwazuma seke wabwelele kufunda kaidi kwa zina da Yesu, amala wawaleka wasegele. 41Ivo wasenga waja walawa kunze mchitala weli na ndeng'helelo kwavija Mulungu kaweng'ha nhogolwa kwa kuwaleka wapate chinyala kwambuli ya zina da Yesu. 42Chila zua wagendelela kufunda na kuligula Usenga Unogile kua Yesu iyo Kilisito Haing'anda ya Mulungu na mzing'anda za wanuhu.

Currently Selected:

Sang’hano za Wasenga 5: KBV

Highlight

Copy