ᔨᐸᓁᐊᐅᑉ ᐊᒡᓚᖏᑦ 1
1
1 #
ᐊᑕᓃᑦ ᐂᑉᐸᖏᑦ 22:1—23:30; ᑯᕉᓂᑲ ᐂᑉᐸᖏᑦ 34:1—35:27. ᐊᑕᓂᐅᑉ ᐅᖃᐅᓯᖓ ᔨᐸᓁᐊᒧᑦ ᑎᑭᑉᐳᑦ ᑯᓯᐅᑉ ᐃᕐᓂᖓᓄᑦ, ᑯᔅ ᐊᑖᑕᖃᕐᐳᖅ ᒋᑕᓔᐊᒥᒃ, ᒋᑎᓔᐊᓗ ᐊᑖᑕᖃᕐᐳᖅ ᐊᒪᕅᔭᒥᒃ, ᐊᒪᕅᐊᓗ ᐊᑖᑕᖃᕐᐳᖅ ᕼᐃᓯᑬᐊᒥᒃ, ᑍᑦᓱᒪᓂ ᔫᓮᐊ ᐋᒪᓐᓇᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥ.
ᐅᓪᓗᖅ ᐊᑕᓂᐅᑉ ᐃᖅᑲᕐᑐᐃᓂᖓ
2ᐊᑕᓂᖅ ᐅᖃᕐᐳᖅ, “ᐃᓘᓐᓇᑦᓯᐊᑎᒃ ᓄᖑᓪᓗᒋᑦ ᓄᓇᒦᑦᑐᑦ ᐊᓯᕈᕈᒫᕐᐸᒃᑲ. 3ᐃᓄᓕᒫᑦ ᐆᒪᔪᓕᒫᓪᓗ ᓄᖑᑦᓱᒫᕐᐸᒃᑲ; ᑎᖕᒥᐊᑉ ᕿᓚᐅᑉ ᐊᑖᓃᑦᑐᑦ, ᐃᖃᓗᐃᓪᓗ ᑕᕆᐅᕐᒦᑦᑐᑦ ᓄᖑᑦᓱᒫᕆᕙᒃᑲ. ᐊᔪᕐᑐᓕᔪᖅ ᓵᓚᒋᔪᒫᕐᐸᒃᑲ; ᐃᓄᐃᑦ ᓄᓇᕐᔪᐊᕐᒦᑦᑐᓕᒫᑦ ᓄᖑᑦᓱᒫᕐᐸᒃᑲ.” ᐊᑕᓂᖅ ᐅᖃᕐᐳᖅ.
4“ᐊᒡᒐᓐᓄ ᓱᒋᐊᕈᒫᕐᐸᒃᑲ ᔫᑕᒥᐅᑦ, ᔨᕉᓴᓕᒥᐅᓕᒫᓪᓗ; ᐰᓕᐅᓪᓗ ᐊᒥᐊᒃᑯᓕᒫᖏᑦ ᓄᖑᑦᓱᒫᕐᐸᒃᑲ ᑕᒫᓐᖓᑦ, ᒎᑎᓐᖑᐊᓖᓪᓗ ᑐᓂᕐᕈᓯᕐᑎᑦᓯᖏᑦ ᐊᑎᖏᑦ ᓄᖑᑎᑦᓱᒫᕐᐸᒃᑲ. 5ᑐᒃᓯᐊᕐᐸᒃᑐᓪᓗ ᕿᓚᐅᑉ ᐊᑖᓃᑦᑐᓄᑦ ᐃᒡᓗᒥᑦᑕ ᖄᖏᓐᓂ; ᐹᒻᒪᒃᑎᕐᐸᒃᑐᓪᓗ ᐅᖃᕕᒃᓗᑎᒃ ᐊᑕᓂᕐᒧᑦ ᒧᓛᒃᒥᒃ ᒎᑎᓐᖑᐊᒥᒃ ᐱᖃᓯᐅᑦᔨᓪᓗᑎᒃ. 6ᐊᑕᓂᖕᒥᒡᓗ ᕿᒤᓯᒪᔪᑦ ᒪᓕᒃᑐᕕᓂᐅᒐᓗᐊᕐᓗᑎᒃ, ᐊᑕᓂᕐᒥᒡᓗ ᕿᓂᖏᑦᑐᑦ ᖃᐅᔨᓇᓱᐊᖏᑦᑐᓪᓗ.”
7ᓂᐰᓕᕆᑦᓯ ᐊᑕᓂᐅᑉ ᒎᑎᐅᑉ ᓵᖓᓂ! ᐊᑕᓂᐅᑉ ᐅᓪᓗᖓ ᑎᑭᓕᕐᒪᑦ; ᐊᑕᓂᖅ ᑐᓂᕐᕈᑎᒃᓴᒥᓂᒃ ᐊᑐᐃᓐᓇᕈᐃᓯᒪᓕᕐᒪᑦ ᕾᖁᓯᒪᔭᓂᓗ ᐃᑦᔪᕐᓁᑎᑉᐰᑦ. 8“ᐅᓪᓗᕐᓗ ᓇᓪᓕᐅᑎᒃᐸᑦ ᐊᑕᓂᐅᑉ ᑐᓂᕐᕈᓯᕐᕕᐊ, ᐊᖓᔪᖅᑳᑦ ᐊᖓᔪᖅᑳᕐᔪᐊᓪᓗ ᐃᕐᓂᖏᑦ ᓱᒋᐊᕈᒫᕐᐸᒃᑲ, ᐊᑐᕐᑐᓪᓗ ᐃᓅᖃᑎᒃᓴᔭᕆᓐᖏᑕᖏᑕ ᒎᑎᓐᖑᐊᓖᑦ ᐊᓐᓄᕌᖏᓐᓂᒃ. 9ᐅᓪᓗᖅ ᓇᓪᓕᐅᑎᒃᐸᑦ ᐃᑎᕐᑕᕐᕕᒃᑯᑦ ᐊᓪᓗᕐᑐᓕᒫᑦ ᓱᒋᐊᕈᒫᕐᐸᒃᑲ, ᐊᖓᔪᖅᑳᒥᓗ ᐃᒡᓗᖓᓄᐊᖅᑬᔪᑦ ᐱᕋᔭᖕᓂᕐᒥᒃ ᐅᐃᕕᕆᒃᓯᓂᕐᒥᒡᓗ.
10“ᐅᓪᓗᖅ ᓇᓪᓕᐅᑎᒃᐸᑦ,” ᐊᑕᓂᖅ ᐅᖃᕐᐳᖅ, “ᕿᐊᓂᖅ ᑐᓴᕐᓴᐅᔪᒫᕐᐳᖅ ᐃᑎᕐᑕᕐᕕᖕᒥᑦ ᐃᖃᓗᖕᒥᒃ ᐊᑎᓕᖕᒥᑦ, ᐅᒡᒍᐊᕐᓂᕐᒧᓪᓗ ᕿᐊᓂᖅ ᑐᓴᕐᓴᐅᔪᒫᕐᐳᖅ ᐃᒡᓗᒐᓮᑦ ᓄᑖᕕᓂᐅᓂᖓᓂᑦ, ᑲᑕᒐᕐᕙᓗᐃᓪᓗ ᐱᖑᕐᓂᑦ ᓂᐱᖅᑯᑐᔪᐊᓘᔪᒫᕐᐳᑦ. 11ᐅᒡᒍᐊᕐᓂᕐᒧᑦ ᕿᐊᓕᕆᑦᓯ ᒧᐊᕐᑖᒥᐅᖑᔪᓯ, ᑕᐅᕐᓯᔨᓕᒫᑦ ᓄᖑᑕᐅᖕᒪᑕ; ᓯᐅᓪᕙᓂᒡᓗ ᐅᖁᒤᓐᓂᕐᓯᐅᕐᑎᓕᒫᑦ ᓄᖑᑕᐅᖕᒪᑕ.
12“ᑕᒪᓐᓇ ᐊᑐᓕᕐᐸᑦ ᔨᕉᓴᓕᒻ ᕿᓂᕐᕕᒋᔪᒫᕐᐸᕋ ᓇᓂᕈᐊᓄᑦ, ᓱᒋᐊᕈᒫᕐᐸᒃᑲᓗ ᐃᒻᒥᖕᓂᒃ ᓈᒻᒪᒐᓱᒋᔪᑦ ᐱᔪᓐᓇᕋᓱᒋᔪᓪᓗ, ᐆᒻᒪᑎᒥᒍᓪᓗ ᐃᓱᒪᔪᑦ, ‘ᐊᑕᓂᖅ ᐱᐅᔪᓂᒃ ᐱᐅᖏᑦᑐᓂᒡᓘᓐᓃᑦ ᐱᓇᓱᐊᕐᓂᐊᓐᖏᓚᖅ.’ 13ᑍᒤᒻᒪᑦ ᐱᖁᑎᖏᑦ ᐊᕐᓵᕐᓂᒐᐅᔪᒫᕐᐳᑦ, ᐃᒡᓗᖏᓪᓗ ᓯᖁᑦᑎᕐᑕᐅᔪᒫᕐᐳᑦ ᓱᓇᐅᔪᓐᓁᕐᓗᑎᒃ. ᐃᒡᓗᓕᐅᕈᒫᕐᐳᑦ ᐃᓂᒋᓂᐊᓐᖏᑕᒥᖕᓂᒃ; ᕔᓂᒃᓴᓕᐅᕈᒫᕐᐳᑦ ᐃᒥᕐᓂᐊᓐᖏᑕᒥᖕᓂᒃ.”
14ᐊᑕᓂᐅᑉ ᐅᓪᓗᕐᔪᐊᖓ ᖃᒡᓕᓕᕐᐳᖅ, ᖃᓪᓕᕗᖅ ᑎᑭᑦᓴᐅᑎᒋᓕᕐᓗᓂᓗ; ᐊᑕᓂᐅᑉ ᐅᓪᓗᖓᑕ ᓂᐱᖓ ᖃᓯᓕᓇᕐᐳᖅ, ᑕᕝᕙᓂ ᐊᖑᑏᑦ ᐊᔪᖏᑦᑐᐊᓗᐃᑦ ᓂᐱᓕᐊᓘᔪᒫᕐᐳᑦ. 15ᐅᓪᓗᖅ ᓂᓐᖓᐅᓯᕐᒧᑦ ᐅᓪᓗᕆᔭᐅᔪᒫᕐᐳᖅ, ᐅᖁᒤᑦᑑᓗᓂ ᐃᓱᒪᔮᕐᓇᕐᓗᓂᓗ, ᓯᖁᑦᑎᕐᑕᐅᓂᕐᑕᖃᕈᒫᕐᐳᖅ ᓄᖑᕈᑦᔭᐅᓂᕐᑕᖃᕐᓗᓂᓗ, ᑖᕐᑑᔪᒫᕐᐳᖅ ᖁᕕᐊᓇᖏᓪᓗᓂᓗ, ᓄᕗᔭᖃᕈᒫᕐᐳᖅ ᑖᕐᔪᖓᓗᓂᓗ. 16ᐅᓪᓘᔪᒫᕐᐳᖅ ᓂᓪᓕᐊᕕᐅᓗᓂ ᑎᑦᑐᓚᐅᑎᓄᑦ ᐅᓇᑕᕐᑐᓪᓗ ᓂᐱᖏᓐᓄᑦ, ᐅᓇᑕᕐᓂᐅᔪᒫᕐᐳᖅ ᐃᒡᓗᒐᓴᖕᓂᒃ ᐊᕙᓗᕐᔪᐊᓕᖕᓂᒃ ᐳᕐᑐᔪᓂᒡᓗ ᓇᐸᔪᓂᒃ.
17ᐃᓄᐃᑦ ᐃᓱᒪᔮᕐᓇᕐᑐᓄᑦ ᑎᑭᑕᐅᑎᑦᓱᒫᕐᐸᒃᑲ, ᐱᓱᓕᕈᒫᕐᐳᑦ ᑕᐅᑐᖏᑦᑐᑎᑐᑦ, ᐊᔪᕐᑐᓕᓚᐅᕐᒪᑕ ᐊᑕᓂᕐᒧᑦ; ᐊᐅᖏᑦ ᑯᕕᔭᐅᔪᒫᕐᐳᑦ ᐃᒥᕐᑎᑐᑦ, ᑎᒥᖏᓪᓗ ᐊᓇᕐᑎᑐᑦ ᑍᒤᓕᕈᒫᕐᐳᑦ.
18ᓯᐅᓪᕕᕆᖁᑎᖏᑕ ᒎᓗᖁᑎᖏᑕᓘᓐᓃᑦ ᐱᐅᓕᔭᐅᔪᓐᓇᕈᒫᓐᖏᓔᑦ ᐊᑕᓂᐅᑉ ᓂᓐᖓᐅᓯᖓᑕ ᐅᓪᓗᖓᓂ. ᓄᓇᕐᔪᐊᓕᒫᖅ ᓄᖑᑕᐅᔪᒫᕐᐳᖅ ᓯᒡᒐᑦᔨᓂᕐᒥᓄᑦ ᓂᓐᖓᐅᒪᓂᖓᑕ ᐃᑯᐊᓚᓂᖓᓄᑦ; ᑲᑉᐱᐊᓇᒃᑲᓐᓂᕐᕕᖃᖏᑦᑐᒧᑦ ᑕᕝᕔᓐᓇᖅ ᓄᖑᑦᓱᒫᕐᐰᑦ ᓄᓇᕐᔪᐊᕐᒥᐅᓕᒫᑦ.
Currently Selected:
ᔨᐸᓁᐊᐅᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
