ᓲᓗᒨᓂᐅᑉ ᐃᓐᖏᕈᓯᖏᑦ 6
6
ᐊᕐᓁᑦ
1ᓇᒡᓕᒋᔧᑦ ᓇᒧᓐᖓᕐᓯᒪᖕᒫᑦ?
ᐊᕐᓇᓂᑦ ᐱᐅᓂᕐᐹᖑᔪᑎᑦ,
ᓇᒡᓕᒋᔧᑦ ᓇᒧᓐᖓᐅᓐᓂᕐᒪᑦ?
ᕿᓂᕆᐊᖃᑎᒋᔪᒪᒐᑦᑎᒋᑦ.
ᐊᕐᓇᖅ
2ᓇᒡᓕᒋᔭᕋ ᐱᕈᕐᓰᕕᖕᒥᓄᑦ ᐂᓯᒪᕗᖅ,
ᐱᕈᕐᑐᓄᑦ ᓂᖀᑦ ᐃᓚᐅᕈᑎᒃᓴᖏᓐᓄᑦ ᒪᒪᕐᑐᓄᑦ,
ᓰᐱᖁᑎᒥᓂᒃ ᐰᕐᓯᔭᕐᑐᕐᓯᒪᕗᖅ ᐱᕈᕐᓰᕕᖁᑎᒥᓂ,
ᓄᓇᕋᕐᓂᒡᓗ ᓕᓕᓂᒃ ᑲᑎᕐᓱᐃᔭᕐᑐᕐᓯᒪᓪᓗᓂ.
3ᓇᒡᓕᒋᔭᒪ ᐱᒋᕚᒐ, ᐱᒋᒋᓪᓗᒍᓗ;
ᓰᐱᖁᑎᓂ ᓂᕆᑎᑉᐰᑦ ᐱᕈᕐᑐᑦ ᓕᓖᑦ ᐊᑯᕐᖓᓐᓂ.
ᐃᓐᖏᕈᓰᑦ ᑕᓪᓕᒪᖓᑦ
ᐊᖑᑦ
4ᓇᒡᓕᒋᔮᒃ, ᐃᓂᖁᓇᕐᑐᐊᓘᕗᑎᑦ ᑎᕐᔭᒦᑦᑐᑦ ᐃᒡᓗᒐᓮᑦ ᐃᓂᖁᓇᕐᓂᖏᑎᑐᑦ,
ᔨᕉᓴᓕᒻᑐᑦ ᐱᐅᑎᒋᕗᑎᑦ,
ᑕᑯᒥᓇᕐᑐᐊᓘᕗᑎᑦ ᐅᓇᑕᕐᑐᒃᓮᑦ ᐅᓄᕐᑐᑦ ᓮᒻᒪᑎᓕᔭᕐᑐᑦ ᑕᑯᒥᓇᕐᓂᖏᑎᑐᑦ.
5ᑕᑯᓐᓇᓐᖏᓚᐅᓐᖓ, ᐃᔨᖕᓄᑦ ᓵᓚᐅᓕᕋᒪ,
ᓄᔭᕐᑎᑦ ᒎᑦᓯᑎᑐᑦ ᕿᕐᓂᕐᑕᑎᑐᑦ ᑕᑯᒥᓇᕐᑎᒋᕗᑦ,
ᖃᖅᑲᒥᑦ ᒋᓕᐊᑎᒥᑦ ᐊᖅᑲᕐᑎᕐᑐᑎᑐᑦ.
6ᑭᒍᑎᑎᑦ ᓰᐲᑦ ᐊᕐᓇᓪᓗᖏᑎᑐᑦ ᓴᓕᓯᒪᔪᑎᑐᑦ ᑍᒤᑉᐳᑦ
ᐅᐊᓴᕐᑕᐅᕕᖕᒥᑦ ᖃᑭᕋᑖᕐᑐᑎᑐᑦ,
ᐃᒡᓗᒌᒃᓗᑎᒃ ᐊᑭᓕᕇᑦᓯᐊᕐᐳᑦ.
7ᐅᓗᐊᒃᑭᒃ ᐸᒪᒍᕌᓐᑎᑐᑦ ᐊᕕᒃᓯᒪᔪᑎᑐᑦ ᐊᐅᐸᕐᑎᒋᕘᒃ,
ᒪᑐᐊᕐᓄᑦ ᑕᓕᓯᒪᔫᒃ.
8ᐊᖓᔪᖅᑲᕐᔪᐊᖅ ᓄᓕᐊᖃᕐᐸᑦ 60ᓂᒃ, ᐊᕐᓇᖁᑎᖃᕐᓗᓂᓗ 80ᓂᒃ,
ᐅᐃᒡᒐᓱᖕᓂᒡᓗ ᐊᖑᒻᒧᑦ ᑲᒪᒋᔭᐅᓚᐅᕐᓯᒪᖏᑦᑐᓂᒃ ᓈᓴᒐᒃᓴᐅᖏᑦᑐᓂᒃ.
9ᑑᕕᖁᑎᒐᓕ, ᓈᒻᒪᑦᓯᐊᕐᑐᑐᐊᖁᑎᒐ,
ᑖᓐᓇᑑᓪᓗᓂ ᐊᓯᖃᓐᖏᓚᖅ,
ᐊᓈᓇᖓᑕ ᓇᒡᓕᒋᔭᖓ,
ᑖᑦᓱᒥᖓ ᐃᕐᓂᓚᐅᕐᑑᑉ ᐱᓐᓇᕆᔭᖓ,
ᐊᕐᓁᑦ ᑕᑯᒐᒥᑦᔪᒃ ᓮᒻᒪᕐᑎᑕᐅᓯᒪᓂᕋᕐᐹᑦ,
ᐊᖓᔪᖅᑳᕐᔪᐊᓪᓗ ᓄᓕᐊᖏᑕ ᐊᕐᓇᖁᑎᖏᑕᓗ ᐅᐱᒋᕚᑦ.
10ᑭᓇᐅᓇ ᑕᑯᓐᓇᕐᑐᖅ ᐅᓪᓛᑐᑦ ᖃᐅᓕᕐᑐᑐᑦ?
ᑕᖅᑭᕐᑐᑦ ᑕᑯᒥᓇᕐᑎᒋᔪᖅ, ᓯᕿᓂᕐᑐᓪᓗ ᖃᐅᒪᑎᒋᓪᓗᓂ,
ᐅᓇᑕᕐᑐᒃᓴᓮᑦ ᐅᓄᕐᑐᑦ ᓮᒻᒪᑎᓕᔭᕐᑐᑦ ᑕᑯᒥᓇᕐᓂᖏᑎᑐᑦ?
11ᐊᖅᑲᕐᑎᓚᐅᕐᐳᖓ ᖃᖅᑲᒥᑦ ᓇᐹᕐᑐᓄᑦ ᖃᖅᑯᐊᒐᓂᒃ ᐱᕈᕐᕕᐅᕙᒃᑐᓄᑦ,
ᐱᕈᓕᕐᑐᓂᒃ ᓇᕐᓴᒥ ᑕᑯᔪᒪᓪᓗᖓ,
ᒍᕅᑉᓯᓪᓗ ᕔᓂᓕᒃᓴᒥ ᐱᕈᓕᕐᒪᖔᑕ,
ᐹᒪᒍᕌᓂᒃᓮᓪᓗ ᓄᓇᕋᖏᑦ ᓄᐃᓕᕐᒪᖔᑕ.
12ᐅᑦᔨᕈᓱᓐᖏᑎᓪᓗᖓ, ᑲᔪᖏᕐᓂᕐᒪ
ᐊᖓᔪᖅᑳᕐᔪᐊᑉ ᐃᑭᒪᕝᕕᖏᑕ ᐊᒃᓴᓗᐊᓖᑦ
ᐊᑯᓐᓂᖓᓃᑦᑑᔮᕐᑎᓕᓚᐅᕐᐹᖓ.
ᐊᕐᓁᑦ
13ᐅᑎᕆ, ᐅᑎᕆᑦ, ᓲᓚᒤᑎᐅᔪᑎᑦ,
ᐅᑎᕆᑦ, ᐅᑎᕆᑦ, ᑕᑯᓐᓇᒃᑲᓐᓂᕈᒪᒐᑦᑎᒋᑦ.
ᐊᕐᓇᖅ
ᓱᖕᒪᑦ ᑕᑯᔪᒪᕕᑦ ᓲᓚᒥᐅᑕᒥᒃ?
ᑖᓂᓯᕐᑐᑐᑦ ᐅᓇᑕᕐᑐᒃᓮᑦ ᒪᕐᕈᐃᑦ ᐊᑯᓐᓂᖓᒎᑦ?
Currently Selected:
ᓲᓗᒨᓂᐅᑉ ᐃᓐᖏᕈᓯᖏᑦ 6: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
