ᓲᓗᒨᓂᐅᑉ ᐃᓐᖏᕈᓯᖏᑦ 5
5
ᐊᖑᑦ
1ᐱᕈᕐᓰᕕᖁᑎᓐᓄᑦ ᕾᕗᖓ, ᓇᔮᒃ, ᓄᓕᐊᒃᓵᒃ,
ᒨᕆᖁᑎᒃᑲ ᓂᕿᓄᓪᓗ ᒪᒪᕐᓴᐅᑎᖁᑎᒃᑲ ᑲᑎᑉᐸᒃᑲ;
ᕼᐊᓂᐅᑉ ᐃᓂᖏᑦ ᓂᕆᕙᒃᑲ ᕼᐊᓂ ᓂᕆᖃᓯᐅᑎᓪᓗᒍ,
ᕔᓂᖁᑎᓐᓂᒃ ᐃᒥᕐᐳᖓ ᐃᒻᒧᖁᑎᓐᓂᒡᓗ.
ᐊᕐᓁᑦ
ᐃᓚᓐᓇᕆᔭᒃᑳ, ᓂᕆᒋᑦᓯ! ᐃᒥᕐᓗᓯᓗ,
ᐊᖏᔪᒥᒃ ᐃᒥᕆᑦᓯ, ᓇᒡᓕᒋᔭᐅᔪᓯ.
ᐃᓐᖏᕈᓰᑦ ᓯᑕᒪᖓᑦ
ᐊᕐᓇᖅ
2ᓯᓂᓚᐅᕐᐳᖓ ᐆᒻᒪᑎᒐᓕ ᓯᓂᓚᐅᓐᖏᓚᖅ.
ᓇᒡᓕᒋᔭᕋ ᐅᒃᑯᐊᓐᓂ ᐊᕕᓗᕐᑕᕐᑐᖅ,
ᐊᖑᑦ
“ᐅᒃᑯᐃᕈᑎᓐᖓ, ᓇᔭᒐ, ᓇᒡᓕᒋᔭᕋ,
ᑑᕕᖁᑎᒐ, ᑕᒤᑎᒍᑦ ᓈᒻᒪᑦᓯᐊᕐᑐᖁᑎᒐ;
ᓂᐊᖁᕋ ᒪᓴᒃᓯᒪᖕᒪᑦ ᓯᓚᐅᑉ ᕿᐅᒃᑲᖓᓂᖓᓄᑦ,
ᓄᔭᒃᑲ ᐅᓐᓄᐊᑉ ᖃᐅᓯᕐᓂᖓᓄᑦ ᐃᑦᑎᖃᓕᕐᒪᑕ.”
ᐊᕐᓇᖅ
3ᐅᓕᒐ ᐲᕐᓯᒪᓕᕋᒃᑯ,
ᓱᖕᒪᑦ ᐊᑎᒃᑲᓐᓂᕆᐊᖃᕐᐸᕌ?
ᐃᑎᒐᒃᑲ ᐅᐊᓴᓚᐅᕋᒃᑭᑦ;
ᓱᖕᒪᑦ ᐃᑉᐸᓕᕐᑎᒃᑲᓐᓂᕆᐊᖃᕐᐸᒃᑳ?
4ᓇᒡᓕᒋᔨᒪ ᐅᑯᐊᑉ ᐊᖕᒪᔪᖓ ᐊᒡᒐᒥᓄᑦ ᑲᐅᖕᒪᒍ,
ᐃᓗᒪ ᐃᑎᓂᕐᐹᖓᓄᑦ ᐅᖓᒋᓕᕐᐸᕋ.
5ᒪᑭᑉᐳᖓ ᓇᒡᓕᒋᔨᒐ ᐅᒃᑯᐃᕈᑎᔭᕐᑐᕐᓗᒍ,
ᐊᒡᒐᒃᑲ ᑯᑐᓕᕐᐳᑦ ᒨᕆᒥᒃ,
ᒨᕆᒧᓪᓗ ᐊᒡᒐᒃᑲ ᖃᐅᓯᕐᑎᑦᓯᕗᑦ ᓴᓐᓂᕈᐊᑉ ᑎᒍᓕᖓᓂᒃ.
6ᓇᒡᓕᒋᔨᒐ ᐅᒃᑯᐃᕈᑎᒐᒃᑯ,
ᕿᒪᕉᑎᔭᕇᕐᓂᕋᒥ ᑕᒫᓃᓐᖏᓚᖅ.
ᓄᑮᕐᔫᒥᓚᐅᕐᐳᖓ ᓂᐱᖓ ᑐᓴᕈᒪᒐᓗᐊᕐᓗᒍ.
ᕿᓂᓚᐅᕋᓗᐊᕐᐸᕋ ᓇᓂᓇᒍᓗ;
ᕾᒐᓛᕋᓗᐊᕋᒃᑯ, ᑭᐅᓚᐅᓐᖏᓛᖓ.
7ᑕᕝᕙ ᐃᒡᓗᒐᓴᖕᓂ ᖃᐅᔨᓴᕐᑎᓄᑦ ᐅᐸᒃᑕᐅᕗᖓ,
ᑖᒃᑯᓇᓐᖓᑦ ᐋᓐᓂᕐᓯᕐᑕᐅᓪᓗᖓ ᐃᑭᓕᕐᑕᐅᕗᖓ;
ᖃᐅᔨᓴᕐᑏᑦ ᐊᕙᓗᕐᔪᐊᒥ ᐅᓕᓐᓂᒃ ᐊᕐᓵᕐᐹᖓ.
8ᔨᕉᓴᓕᒥᐅᑦ ᐸᓂᖏᑦ, ᐊᖏᒻᒪᕆᖁᕙᑦᓯ,
ᓇᒡᓕᒋᔨᒐ ᓇᓂᒍᑦᓯᐅᒃ,
ᐅᖃᐅᑎᔪᒫᕐᐸᓯ ᐅᖓᓂᕐᒧᒡᒎᕐᖎ ᑭᐱᓕᕋᒪ.
ᐊᕐᓁᑦ
9ᓇᒡᓕᒋᔩᑦ, ᐊᓯᒥᓂᑦ ᓇᒡᓕᒍᓱᑦᓯᐊᕈᓐᓇᕐᓂᕐᓴᐅᖕᒫᑦ?
ᐊᕐᓇᓂᑦ ᐃᓂᖁᓇᕐᓂᕐᐹᖑᔪᑎᑦ,
ᓇᒡᓕᒋᔩᑦ ᐊᓯᒥᓂᑦ ᓇᒡᓕᒍᓱᑦᓯᐊᕈᓐᓇᕐᓂᕐᓴᐅᖕᒫᑦ?
ᑍᒫᒃ ᐅᕙᑦᑎᓐᓂᒃ ᐊᖏᒻᒪᕆᖁᔨᕖᑦ?
ᐊᕐᓇᖅ
10ᓇᒡᓕᒋᔭᕋ ᑕᑯᒥᓇᕐᐳᖅ ᖃᓄᐃᖏᑦᓯᐊᕐᓗᓂᓗ,
ᐊᑦᔨᖃᓐᖏᓚᖅ ᐊᖑᑎᓂᑦ 10,000ᓂᑦ.
11ᓂᐊᖁᖓ ᒎᓗᑎᑐᑦ ᐱᐅᓂᕐᐹᑎᑐᑦ ᑍᒤᑉᐳᖅ;
ᓄᔭᖏᓪᓗ ᐃᕿᓱᓕᕈᔫᕗᑦ, ᑐᓗᒐᕐᑎᑐᑦ ᕿᕐᓂᕐᑕᐅᓪᓗᑎᒃ.
12ᐃᔨᖏᒃ ᑑᕕᑎᑐᑦ ᑍᒤᑉᐴᒃ, ᑰᑉ ᓴᓂᐊᓃᑦᑐᑐᑦ,
ᐃᒻᒧᖕᒧᑦ ᐅᐊᓴᕐᓯᒪᔪᑎᑐᑦ, ᐋᖅᑭᑦᓯᐊᕐᓯᒪᓪᓗᑎᒡᓗ.#5:12 ᐃᔨᖏᒃ ᑑᕕᑎᑐᑦ ᑍᒤᑉᐴᒃ ᑐᑭᖃᕈᓐᓇᕐᑐᖅ ᐃᔩᖕᓂᒃ ᑕᑯᒥᓇᕐᑑᖕᓂᒃ. ᑰᑉ ᓴᓂᐊᓃᑦᑐᑐᑦ ᑐᑭᖃᕈᓐᓇᕐᑐᖅ ᖁᕝᕕᐅᕐᓂᕐᒥᒃ. ᐃᒻᒧᖕᒧᑦ ᐅᐊᓴᕐᓯᒪᔪᑎᑐᑦ ᑐᑭᖃᕈᓐᓇᕐᑐᖅ ᐃᔨᖏᒃ ᖃᑯᑦᓯᐊᕐᑑᒃ ᖃᑯᕐᑕᐅᓂᖏᒃ ᐋᖅᑭᑦᓯᐊᕐᓯᒪᓪᓗᑎᒃ
13ᐅᓗᐊᖏᒃ ᐱᕈᕐᓰᕕᖕᒥ ᐱᕈᕐᑐᑎᑐᑦ ᓂᕿᒧᑦ ᐃᓚᒃᓴᑎᑐᑦ ᑎᐱᑦᓯᐊᕆᒃᑎᒋᕘᒃ.
ᖃᓂᖓᑕᓗ ᓯᓈ ᓄᓇᕋᕐᑐᑦ ᓕᓕᑐᑦ ᑍᒤᑉᐳᖅ,
ᑯᑐᒃᓗᓂ ᑎᐱᑦᓯᐊᕆᒃᑐᒥᒃ ᒧᕆᒥᒃ.
14ᑕᓕᖏᒃ ᒎᓗᑎᑐᑦ ᐊᓂᖓᑦᓯᐊᕐᑎᒋᕘᒃ,
ᐅᔭᕋᖕᓂᒃ ᐱᐅᔪᓂᒃ ᑕᕐᓴᖃᐅᕐᓗᑎᒃ,
ᑎᒥᖓ ᑑᒑᕐᑎᑐᑦ ᕾᕋᑦᑐᑎᑐᑦ ᑍᒤᑉᐳᖅ,
ᐅᔭᕋᖕᓂᒃ ᓴᕔᕆᓂᒃ ᑕᕐᓴᖃᐅᕐᓗᑎᒃ.
15ᓂᐅᖏᒃ ᐅᔭᕋᒃᑎᑐᑦ ᐊᓚᐹᔅᑕᕆᑐᑦ ᓇᐹᕘᒃ,
ᒎᓘᖕᓂᒃ ᑐᓐᖓᕕᖃᕐᓗᑎᒃ.
ᑕᐅᑦᑐᖃᕐᓗᓂᓗ ᓕᐸᓇᓂᑐᑦ,
ᓇᐹᕐᑐᑎᑐᑦ ᓰᑕᕆᑐᑦ ᐱᐅᑎᒋᓪᓗᑎᒃ.
16ᖃᓂᖓ ᒪᒪᕐᐳᖅ,
ᐃᓛᒃ ᑕᒤᑎᒍᑦ ᐱᔪᒥᓇᕐᐳᖅ.
ᓇᒡᓕᒋᔭᕋ ᑍᒤᑉᐳᖅ ᑖᓐᓇ ᐃᓚᓐᓈᕆᔭᕋ,
ᔨᕉᓴᓕᒥᐅᑦ ᐸᓂᖏᑦ ᐅᖃᐅᑎᕙᑦᓯ.
Currently Selected:
ᓲᓗᒨᓂᐅᑉ ᐃᓐᖏᕈᓯᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
