ᓲᓗᒨᓂᐅᑉ ᐃᓐᖏᕈᓯᖏᑦ 4
4
ᐊᖑᑦ
1ᑕᑯᒋᑦ ᐃᓂᖁᓇᕐᑐᐊᓘᕗᑎᑦ ᓇᒡᓕᒋᔮᒃ!
ᐱᐅᒋᐊᓗᑦᓴᕐᐸᒋᑦ!
ᐃᔩᒃᑭᒃ ᑑᕕᑎᑐᑦ ᐱᐅᑎᒋᕘᒃ ᒪᑐᐊᕐᐱᑦ ᖁᓛᒍᑦ.
ᓄᔭᕐᑎᑦ ᒎᑦᓯᑎᑐᑦ ᕿᕐᓂᕐᑕᑎᑐᑦ ᑕᑯᒥᓇᕐᑎᒋᕗᑦ,
ᖃᖅᑲᒥᑦ ᒋᓕᐊᑎᒥᑦ ᐊᖅᑲᕐᑎᕐᑐᑎᑐᑦ.
2ᑭᒍᑎᑎᑦ ᓰᐲᑦ ᐊᕐᓇᓪᓗᖏᑎᑐᑦ ᓴᓕᓯᒪᔪᑎᑐᑦ ᑍᒤᑉᐳᑦ
ᐅᐊᓴᕐᑕᐅᕕᖕᒥᑦ ᖃᑭᕋᑖᕐᑐᑎᑐᑦ,
ᐃᒡᓗᒌᒃᓗᑎᒃ ᐊᑭᓕᕇᑦᓯᐊᕐᐳᑦ, ᑭᓐᖏᖃᕋᑎᒡᓗ.
3ᖃᓂᕐᐱᑦ ᓯᓈ ᓄᕕᕐᓵᒃᓴᑎᑐᑦ ᐊᐅᑉᐸᕆᒃᑐᑐᑦ ᑍᒤᑉᐳᖅ,
ᖃᓃᓪᓗ ᑕᑯᓪᓗᒍ ᓇᒡᓕᖕᓇᕐᐳᖅ.
ᐅᓗᐊᒃᑭᒃ ᐸᒪᒍᕌᓐᑎᑐᑦ ᐊᕕᒃᓯᒪᔪᑎᑐᑦ ᐊᐅᐸᕐᑎᒋᕘᒃ,
ᒪᑐᐊᕐᓄᑦ ᑕᓕᓯᒪᔫᒃ.
4ᖁᖓᓰᑦ ᑍᕕᑎᐅᑉ ᖃᐅᔨᓴᕐᕕᖁᑎᖓᑐᑦ ᐳᕐᑐᔪᑐᑦ ᑍᒤᑉᐳᖅ,
ᐅᓇᑕᐅᑎᒃᑯᕕᖁᑎᖓᑐᑦ,
ᑕᕝᕙᓂ ᐅᓇᑕᕐᑐᒃᓮᑦ ᓴᐴᓗᑕᖏᑦ 1,000ᐃᑦ ᓂᕕᖓᕗᑦ,
ᐅᓇᑕᕐᑐᒃᓮᑦ ᐊᔪᖏᑦᑐᑦ ᓴᐴᓗᑕᖏᑦ.
5ᐃᕕᐊᖐᑭᒃ ᓄᕐᕌᖕᓂᒃ ᒪᕐᕈᖕᓂᒃ ᒥᒃᓯᖃᕐᐴᒃ,
ᒐᔨᐊᓕᐅᑉ ᒪᕐᕈᓕᐊᖏᖕᓂᒃ,
ᐱᕈᕐᑐᐃᑦ ᓕᓖᑦ ᐊᑯᕐᖓᓐᓂ ᓂᕆᓇᓱᒃᑑᖕᓂᒃ.
6ᖃᐅᒻᒪᒃᐸᓪᓕᐊᓕᕐᐸᑦ, ᑖᕐᓂᕐᓗ ᓄᖑᓕᕐᓗᓂ,
ᖃᖅᑲᒧᑦ ᐂᔪᒪᕗᖓ ᒨᕆᖃᕐᑐᒧᑦ,
ᐱᖑᖕᒧᓪᓗ ᕗᕌᑭᓐᓯᓐᓯᖃᕐᑐᒧᑦ.
7ᓇᒡᓕᒋᔮᒃ, ᐊᒃᓱᐊᓗᒃ ᐃᓂᖁᓇᕋᕕᑦ,
ᓇᐅᒃᑯᑐᐃᓇᖅ ᓇᕐᕈᓇᕐᓂᖃᓐᖏᓚᑎᑦ!
8ᓄᓕᐊᒃᓵᒃ, ᓕᐸᓈᓂᒥᑦ ᐊᐅᓪᓚᖃᑎᒋᓚᐅᓐᖓ,
ᓕᐸᓇᓂᒥᑦ ᐊᐅᓪᓚᖃᑎᒋᓗᖓ.
ᐊᒫᓇᐅᑉ ᖄᖓᓂᑦ ᐊᐅᓪᓚᕐᓗᓄᒃ,
ᓯᓂᐊᕆᐅᑉ ᖄᖓᓂᑦ ᕼᐊᕐᒪᓂᐅᓪᓗ ᖄᖓᓂᑦ,
ᓛᔧᓪᓗ ᓯᑎᖏᓐᓂᑦ, ᓕᐸᕐᑦᓗ ᐃᓂᖏᓐᓂᑦ ᖃᖅᑲᓂᑦ.
9ᐆᒻᒪᑎᒐ ᐊᐅᓚᑦᔭᒃᓯᒪᒐᕕᐅᒃ, ᓇᔮᒃ, ᓄᓕᐊᒃᓵᒃ;
ᐆᒻᒪᑎᒐ ᐊᐅᓚᑦᔭᒃᑎᓯᒪᒐᕕᐅᒃ ᑕᑯᓴᕐᓂᑐᐃᓐᓇᕐᓄᑦ,
ᐅᔭᒥᒃᐱᓪᓗ ᐱᐅᓴᐅᑎᖓᑕ ᐃᓚᖓᓐᓄᑦ.
10ᓇᒡᓕᖕᓃᑦ ᒪᒪᕐᑐᐊᓘᖕᒪᑦ, ᓇᔮᒃ, ᓄᓕᐊᒃᓵᒃ!
ᓇᒡᓕᖕᓃᑦ ᒪᒪᕐᓂᕐᓴᐅᕗᖅ ᕔᓂᒥᑦ,
ᐅᕐᓱᕐᑎᕈᑎᕕᓪᓗ ᑎᐱᖓ ᒪᒪᕐᓂᕐᓴᐅᕗᖅ ᑎᐱᑦᓯᐊᕆᒃᑐᓂᑦ ᑕᒤᓐᓂᑦ!
11ᓄᓕᐊᒃᓵᒃ, ᖃᓃᑦ ᑯᓯᕐᐳᖅ ᓰᕐᓇᕐᑐᒥᒃ,
ᕼᐊᓂ ᐃᒻᒧᒡᓗ ᐅᖃᕐᐱᑦ ᐊᑖᓃᑉᐴᒃ;
ᐊᓐᓄᕌᕕᑦ ᑎᐱᖓ ᓕᐸᓇᓂᐅᑉ ᑎᐱᖓᑐᑦ ᑍᒤᑉᐳᖅ.
12ᐱᕈᕐᓰᕕᒃᑐᑦ ᐊᑦᑐᖏᕐᓯᒪᔪᑎᑐᑦ ᑍᒤᑉᐳᖅ, ᓇᔭᒐ, ᓄᓕᐊᒃᓴᕋ,
ᐱᕈᕐᓰᕕᒃᑐᑦ ᐊᑦᑐᖏᕐᓯᒪᔪᑐᑦ, ᐳᐂᓚᕕᒃᑐᑦ ᓯᒥᒃᓯᒪᔪᑐᑦ.
13ᓇᐹᕐᑐᖁᑎᑎᑦ ᑐᑭᓕᕇᑦ ᐸᐅᕐᖓᓖᑦ ᐹᒪᒍᕌᓂᒃ
ᐱᐅᓂᕐᐹᓂᒃ ᐸᐅᕐᖓᖃᕐᐳᑦ,
ᑎᐱᑦᓯᐊᕆᒃᑐᓂᒃ ᕼᐃᓇᓂᒃ ᓈᕐᑎᓂᒡᓗ,
14ᓈᕐᑎᓪᓗ, ᓵᕗᕌᓃᓪᓗ, ᑳᓚᒨᓰᓪᓗ, ᓯᓇᒤᓪᓗ,
ᓇᐹᕐᑐᓕᒫᓪᓗ ᕗᕌᖕᑭᓐᓯᓐᓯᓂᒃ ᐱᕈᕐᕕᐅᕙᒃᑐᑦ,
ᒧᕇᓪᓗ, ᐋᓘᐃᓪᓗ, ᓂᕿᒧᓪᓗ ᐃᓚᒃᓮᑦ ᒪᒪᕐᑐᓕᒫᑦ,
ᐃᓕᖕᓂ ᐱᕈᕐᐳᑦ.
15ᐱᕈᕐᓰᕕᖕᒥ ᐳᐂᓚᕗᑎᑦ,
ᐃᒥᕐᑕᕐᕕᒃ ᐆᒪᔪᒥᒃ ᐃᒪᓕᒃ,
ᑰᒃᑐᖅ ᓕᐸᓇᓂᐅᑉ ᑰᖏᓐᓂᑦ.
ᐊᕐᓇᖅ
16ᑐᐸᓕᕆᑦ, ᐊᓄᕇ ᐅᓐᓄᐊᓪᓗᐊᒥᑦ ᐱᔪᑎᑦ,
ᐊᓄᕇᓗ ᐅᓪᓗᓪᓗᐊᑉ ᓇᓛᓂᑦ ᐱᔪᑎᑦ,
ᐱᕈᕐᓰᕕᖁᑎᒐ ᓱᐴᓕᕈᒃ, ᑎᐱᑦᓯᐊᖓ ᓯᐊᒻᒪᖁᓪᓗᒍ ᐅᖓᓯᒃᑐᒧᑦ.
ᓇᒡᓕᒋᔭᕋ ᐱᕈᕐᓰᕕᖁᑎᒥᓄᑦ ᕾᓂᐊᕐᒪᑦ,
ᐸᐅᕐᖓᖏᓐᓂᒡᓗ ᒪᒪᕐᓂᕐᐹᓂᒃ ᓂᕆᓗᓂ.
Currently Selected:
ᓲᓗᒨᓂᐅᑉ ᐃᓐᖏᕈᓯᖏᑦ 4: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
