ᓲᓗᒨᓂᐅᑉ ᐃᓐᖏᕈᓯᖏᑦ 3
3
1ᐅᓐᓄᒃᑯᑦ ᐃᒡᓕᓐᓃᓪᓗᖓ,
ᐅᖓᔭᕋ ᕿᓂᓚᐅᕐᐸᕋ;
ᕿᓂᕋᓗᐊᕐᓗᒍ ᓇᓂᓚᐅᓐᖏᓚᕋ;
ᕾᖁᒐᓗᐊᕋᒃᑯ ᑭᐅᓚᐅᓐᖏᓚᖅ.
2“ᒫᓐᓇ ᒪᑭᓪᓗᖓ ᐃᒡᓗᒐᓴᖕᓂ ᕿᓂᕈᒪᓕᕐᐸᕋ,
ᐊᖅᑯᑎᓂ ᐊᖅᑯᑏᓪᓗ ᐱᕕᑐᓂᖏᓐᓂ;
ᐅᖓᔭᕋ ᕿᓂᕐᓂᐊᕐᐸᕋ.”
ᕿᓂᕋᓗᐊᕋᒃᑯ, ᓇᓂᓐᖏᓚᕋ.
3ᐅᓐᓄᐊᒃᑯᑦ ᖃᐅᔨᓴᕐᑎᑦ ᑲᑎᒐᒃᑭᑦ,
ᐃᒡᓗᒐᓴᖕᓂ ᐱᓱᑲᑕᒃᑎᓪᓗᒋᑦ.
ᐊᐱᕆᕙᒃᑲ, “ᐅᖓᔭᕋ ᑕᑯᓚᐅᕐᐱᓯᐅᒃ?”
4ᕿᒪᕋᑖᕐᓗᒋᓪᓗ, ᐅᖓᔭᕋ ᓇᓂᕙᕋ,
ᐃᕿᓐᓇᒃᑯ, ᓴᑯᑦᓱᒪᔪᓐᓃᕐᐸᕋ,
ᐊᓈᓇᒪ ᐃᒡᓗᖓᓄᐊᕈᑎᓚᐅᖅᑳᕐᓇᒍ,
ᐃᒡᓗᕈᓯᕐᒧᑦ ᕿᑐᕐᖓᒃᓴᕐᑖᖑᕕᒋᓚᐅᕐᑕᓐᓄᑦ.
5ᔨᕉᓴᓕᒥᐅᑦ ᐸᓂᖏᑦ ᐊᖏᒻᒪᕆᖁᕙᑦᓯ;
ᒐᓯᐅᓖᑦ ᑐᒃᑐᖓᔪᓪᓗ ᐊᖅᑯᑎᒋᓗᒋᑦ,
ᐸᒡᕕᓴᖁᓇᓯ ᑲᒪᖁᓇᓯᓗ ᓇᒡᓕᒃᑎᒌᖕᓂᖅ ᓈᒻᒪᒃᓯᖏᓐᓂᖓᓂ.
ᐃᓐᖏᕈᓰᑦ ᐱᖓᔪᖓᑦ
ᐊᕐᓇᖅ
6ᑭᓇᐅᓇ ᐃᓄᖃᖏᑦᑐᒥᑦ ᑎᑭᑉᐸ?
ᐳᔫᕐᑐᑎᑐᑦ ᖁᒻᒧᐊᒃᑐᑎᑐᑦ ᓲᕐᓗ,
ᑎᐱᑦᓯᐊᕆᒃᓴᕐᓯᒪᓪᓗᓂ ᒧᕆᒥᒃ, ᕗᕌᑭᓐᓯᓐᓯᒥᒃᓗ,
ᓂᐅᕕᕐᑎᑦᓯᔨᐅᕙᒃᑐᑦ ᑎᐱᑦᓯᐊᕆᒃᓴᐅᑎᖁᑎᓕᒫᖏᓐᓄᑦ.
7ᑕᑯᒋᑦ, ᓲᓗᒨᓂᐅᑉ ᐊᑭᕋᕐᑕᐅᕕᐊ ᑕᕝᕙ,
ᐅᓇᑕᕐᑐᒃᓴᓂᑦ ᐊᔪᖏᑦᑐᓂᑦ 60ᓂᑦ ᐊᕙᓗᔭᐅᓯᒪᔪᖅ,
ᐃᓴᕆᐊᓕᑎᑦ ᐅᓇᑕᕐᑐᒃᓴᖁᑎᖏᑕ ᐊᔪᖏᓐᓂᕐᐹᖁᑎᖏᓐᓂᑦ.
8ᑕᒪᕐᒥᒃ ᓴᕕᒃᔪᐊᖃᕐᐳᑦ,
ᐅᓇᑕᕐᓂᕐᒥᒡᓗ ᖃᐅᔨᒪᑦᓯᐊᕐᓗᑎᒃ,
ᑕᒪᕐᒥᒃ ᓴᓂᕋᖏᑎᒍᑦ ᓴᕕᒡᔪᐊᒥᒃ ᓂᕕᖓᔪᖃᕐᐳᑦ,
ᐅᓐᓄᐊᑉ ᐃᓕᒪᓇᕐᓂᖓ ᐱᑦᔪᑎᒋᓪᓗᒍ.
9ᐊᖓᔪᖅᑳᕐᔪᐊᖅ ᓲᓗᒨᓂ ᐃᑭᒪᕕᖕᒥᓂᒃ ᓴᓇᔭᐅᑎᑦᓯᓯᒪᕗᖅ;
ᕿᔪᖕᓂᒃ ᓕᐸᓇᓂᒥᑦ ᐱᓯᒪᔪᓂᒃ.
10ᓇᐸᔪᖏᑦ ᓯᐅᓪᕕᕆᐅᕗᑦ,
ᐄᒐᖓᕝᕕᖓ ᒎᓘᓪᓗᓂ, ᐃᒃᓯᕙᐅᑕᖓ ᐊᐅᑉᐸᕆᒃᑑᕗᖅ;
ᐃᓗᐊ ᑕᑯᒥᓇᕐᑐᐊᓗᖕᒥᒃ ᓴᓇᔭᐅᓯᒪᕗᖅ ᔨᕉᓴᓕᐅᑉ ᐊᕐᓇᖏᓐᓂᑦ.
11ᐂᓕᕆᑦᓯ, ᓮᐅᓂᐅᑉ ᐸᓂᖏᑦ, ᑕᑯᔭᕐᑐᓕᕐᓯᐅᒃ ᐊᖓᔪᖅᑳᕐᔪᐊᖅ ᓲᓗᒨᓂ,
ᐊᖓᔪᖅᑳᕐᔪᐊᕐᓯᐅᑎᒥᒃ ᓇᓴᕐᓯᒪᔪᖅ ᐊᓈᓇᖓᑕ ᐊᑎᑎᓚᐅᕐᑕᖓᓂᒃ
ᐅᓪᓗᒥ ᑲᑎᑎᑕᐅᕕᖓᓂ,
ᐆᒻᒪᑎᖓ ᖁᕕᐊᓱᑦᓯᐊᕐᑎᓪᓗᒍ.
Currently Selected:
ᓲᓗᒨᓂᐅᑉ ᐃᓐᖏᕈᓯᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
