ᔪᐊᓇᓯᐅᑉ ᑕᑯᑎᑕᐅᓂᖏᑦ 3
3
ᐅᒃᐱᕐᑑᖃᑎᒌᓄᑦ ᓵᕐᑏᓯᒥᐅᓄᑦ ᐅᖃᐅᓰᑦ
1“ᓵᕐᑏᓯᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ:
“‘ᐅᖃᐅᓰᑦ ᐅᑯᐊ ᐱᕗᑦ, ᒎᑎᐅᑉ ᐊᓂᕐᓂᖏᓐᓂᒃ 7ᓂᒃ ᐱᖃᕐᑐᒥᑦ ᐅᓪᓗᕆᐊᓂᒡᓗ 7ᓂᒃ ᐱᖃᕐᑐᒥᑦ. ᐱᓂᐊᕐᓂᑎᑦ ᖃᐅᔨᒪᕙᒃᑲ; ᐅᒃᐱᕐᓂᒃᑯᑦ ᐆᒪᓂᕋᕐᑕᐅᒐᕕᑦ, ᑐᖁᖓᒐᓗᐊᕐᑎᓪᓗᑎᑦ. 2ᑐᐸᓕᕆᑦ, ᓱᓕ ᐱᓯᒪᔧᑦ ᓲᖑᓯᑎᓕᕈᒃ ᑐᖁᑦᓯᐊᒻᒪᕆᓚᐅᖏᓐᓂᖓᓂ, ᖃᐅᔨᒐᒃᑭᑦ ᐱᓇᓱᐊᕐᓂᑎᑦ ᒎᑎᒪ ᓵᖓᓂ ᓱᓕ ᓈᒻᒪᒃᓯᓯᒪᖏᒻᒪᑕ. 3#ᒫᑎᐅᓯ 24:43,44; ᓘᑲᓯ 12:39,40; ᑕᑯᑎ 16:15.ᐃᖅᑬᓕᕆᑦ ᐃᓕᖕᓄᑦ ᐊᔪᕆᕐᑑᑕᐅᓯᒪᔪᓂᒃ ᑐᓴᕐᓯᒪᔭᕐᓂᒡᓗ; ᓈᓚᒡᓗᒋᑦ, ᖃᕿᐊᓕᕆᑦ. ᑐᐸᖕᓂᐊᖏᒃᑯᕕᑦ, ᑎᒡᓕᒃᑎᑐᑦ ᑎᑭᓐᓂᐊᕐᐸᒋᑦ, ᖃᐅᔨᒪᓂᐊᓐᖏᓚᑎᓪᓗ ᖃᖓ ᑎᑭᕝᕕᒋᓂᐊᕐᑕᓐᓂᒃ. 4ᓵᕐᑏᓯᒥᐅᓪᓕ ᐃᓚᖏᑦ ᐅᓄᖏᑦᑐᑦ ᐊᓐᓄᕌᒥᖕᓂᒃ ᓴᓗᒪᔪᓐᓃᕐᑎᑦᓯᓯᒪᓐᖏᓚᑦ, ᑖᒃᑯᐊ ᐱᓱᖃᑎᒋᔪᒫᕐᐹᖓ ᖃᖁᕐᑕᒥᒃ ᐊᓐᓄᕌᕐᓯᒪᓗᑎᒃ, ᑍᒤᑦᑐᒥᒃ ᐊᓐᓄᕌᕐᑎᑕᐅᓂᕐᒥᒃ ᐱᔪᓐᓇᕐᓯᖕᒪᑕ. 5#ᒨᓯᓯ ᐂᑉᐸᖏᑦ 32:32,33; ᐃᓐᖏᕈᑦ 69:28; ᑕᑯᑎ 20:12; ᒫᑎᐅᓯ 10:32; ᓘᑲᓯ 12:8.ᓵᓚᖃᕐᑐᑦ ᖃᑯᕐᑕᓂᒃ ᐊᓐᓄᕌᕐᑕᐅᔪᒫᕐᒪᑕ, ᐊᑎᖏᓪᓗ ᐲᕐᓂᐊᓐᖏᓚᒃᑲ ᐃᓅᓯᕾᓐᓇᕈᒫᕐᑐᑦ ᐊᑎᖃᕐᕕᖏᓐᓂᑦ; ᐊᑖᑕᒪ ᐂᖏᓖᖁᑎᖏᑕᓗ ᓵᖓᓂ ᐊᑎᖏᑦ ᐅᖃᐅᓯᕆᔪᒪᕙᒃᑲ.
6“‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”
ᐅᒃᐱᕐᑑᖃᑎᒌᓄᑦ ᐱᓚᑕᐅᓪᕕᐊᒥᐅᓄᑦ ᐅᖃᐅᓰᑦ
7 #
ᐂᓮᐊᓯ 22:22; ᔫᐱ 12:14. “ᐱᓚᑕᐅᓪᕕᐊᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓄᑦ ᑎᑎᕋᕆᑦ:
“‘ᐅᖃᐅᓰᑦ ᐅᑯᐊ ᐱᕗᑦ ᐃᑦᔪᕐᓁᑦᑑᔪᒥᑦ, ᓱᓕᔪᒥᑦ, ᐅᒃᑯᐃᕈᑎᒥᒃ ᐱᓯᒪᔪᒥᑦ ᑍᕕᑎᐅᑉ ᐅᒃᑯᐃᕈᑎᖓᓂᒃ, ᐅᒃᑯᐊᖅ ᐅᒃᑯᐃᕐᐸᒍ ᑭᓇᒧᓪᓘᓐᓃᑦ ᐅᑯᐊᕐᑕᐅᓂᐊᓐᖏᓚᖅ, ᐅᒃᑯᐊᕐᐸᒍ ᑭᓇᒧᓪᓘᓐᓃᑦ ᐅᒃᑯᐃᕐᑕᐅᓂᐊᓐᖏᓚᖅ. 8ᐱᓂᐊᕐᓂᑎᑦ ᖃᐅᔨᒪᕙᒃᑲ. ᑕᑯᒋᑦ, ᓯᕗᓂᕐᓃᑦᑐᒥᒃ ᐅᒃᑯᐊᒥᒃ ᐅᒃᑯᐃᕈᑎᓚᐅᕐᐸᒋᑦ, ᑭᓇᒧᓪᓘᓐᓃᑦ ᐅᒃᑯᐊᕐᑕᐅᓂᐊᖏᑦᑐᒥᒃ; ᖃᐅᔨᒪᕙᒋᑦ ᒥᑭᔪᒥᒃ ᐱᔪᓐᓇᕐᓂᖃᕋᕕᑦ, ᐅᖃᐅᓯᕋᓗ ᐱᓯᒤᓐᓇᕐᐸᑦ ᐊᑎᕋᓗ ᒥᓯᐊᕈᑎᒋᓯᒪᓇᒍ. 9#ᐂᓮᐊᓯ 49:23; 60:14; ᐂᓮᐊᓯ 43:4.ᑕᑯᒋᑦ, ᑍᒃᑯᐊ ᓵᑖᓇᓯᐅᑉ ᑲᑎᒪᕕᖁᑎᖓᓃᑦᑐᑦ ᔫᑎᐅᓂᕋᕐᑐᑦ ᔫᑎᐅᓇᑎᒡᓗ, ᓴᒡᓗᔪᑦ ᑕᑯᒋᑦ, ᐃᓕᖕᓄᑦ ᐱᑎᓐᓂᐊᕐᐸᒃᑲ ᓵᖕᓄᓪᓗ ᐹᒻᒪᒃᑎᓪᓗᒋᑦ, ᖃᐅᔨᑎᓪᓗᒋᑦ ᓇᒡᓕᒋᒐᒃᑭᑦ. 10ᐅᖃᐅᓯᒃᑲ ᒪᓕᒡᓗᒋᑦ ᕿᓄᐃᓵᓚᐅᕋᕕᑦ, ᓴᐳᑎᓯᒪᓂᐊᕐᐸᒋᑦ ᐆᒃᑐᕐᑕᐅᓇᕐᑐᓂᑦ ᓯᓚᕐᔪᐊᕐᒥᐅᓕᒫᓄᑦ ᑎᑭᑦᓱᒫᕐᑐᓂᑦ, ᐆᒃᑐᕐᑕᐅᖁᓪᓗᒋᑦ ᓄᓇᕐᔪᐊᕐᒦᑦᑐᑦ.
11“‘ᐊᑯᓂᐅᖏᑦᑐᖅ ᑎᑭᓐᓂᐊᕐᐳᖓ; ᐱᒋᔧᑦ ᐱᓯᒪᑦᓯᐊᕈᒃ, ᐋᑕᐅᖁᓇᒃ ᓵᓚᖃᐅᑎᒃᓴᕐᓂᒃ ᓂᐊᖂᑎᒥᒃ. 12#ᑕᑯᑎ 21:2; ᐂᓮᐊᓯ 62:2; 65:15.ᓵᓚᖃᕐᑐᖅ, ᓱᑲᓐᖑᕐᑎᑦᓱᒪᕙᕋ ᒎᑎᒪ ᑐᒃᓯᐊᕐᕕᒡᔪᐊᖁᑎᖓᓂ; ᑖᑦᓱᒪᓗ ᕿᒪᓚᐅᕐᓯᒪᓂᐊᓐᖏᓛ, ᐊᑎᓕᐅᕐᕕᒋᓂᐊᕐᐸᕋᓗ ᒎᑎᒪ ᐊᑎᖓᓂᒃ, ᒎᑎᒪᓗ ᐃᒡᓗᒐᓴᒡᔪᐊᖁᑎᖏᓐᓂᒃ, ᔨᕉᓴᓕᒥᒃ ᓄᑖᒥᒃ ᕿᓚᖕᒥᑦ ᐊᖅᑲᕈᒫᕐᑐᒥᒃ ᒎᑎᓐᓂᑦ ᐱᔪᒥᒃ, ᐊᑎᓕᐅᕐᕕᒋᓂᐊᕆᕙᕋᓗ ᐊᑎᓐᓂᒃ ᓄᑖᒥᒃ.
13“‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”
ᐅᒃᐱᕐᑑᖃᑎᒌᓄᑦ ᓚᐅᑏᓯᐊᒥᐅᓄᑦ ᐅᖃᐅᓰᑦ
14 #
ᓲᓗᒨᓂ 8:22. “ᓚᐅᑏᓯᐊᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ:
“‘ᐅᖃᐅᓰᑦ ᐅᑯᐊ ᐂᒦᓐᖑᔪᒥᑦ ᐱᕗᑦ, ᓱᖁᓯᔪᐃᑦᑑᓪᓗᓂ ᓱᓕᔪᒥᒃ ᓇᓗᓁᕐᓯᔨᒥᑦ, ᐱᒋᐊᕐᓂᐅᔪᒥᑦ ᒎᑎᐅᑉ ᐱᓐᖑᕐᑎᓯᒪᔭᖏᓐᓂᑦ. 15ᐱᓂᐊᕐᓂᑎᑦ ᖃᐅᔨᒪᕙᒃᑲ; ᓂᒡᓕᓇᕐᓇᒡᓗ ᐆᓇᕐᓇᒡᓗ ᑍᒤᑦᑑᒐᕕᑦ. ᐋᖅᑭᒋᐊᖁᕙᒋᑦ ᓇᓪᓕᐊᓐᓄᑐᐃᓐᓇᖅ ᓂᒡᓕᓗᑎᑦ ᐆᓇᕐᓯᓗᑎᓪᓘᓐᓃᑦ! 16ᓂᕈᒥᑐᐃᓐᓇᕋᕕᓪᓕ, ᓂᒡᓕᓇᕐᓇᒡᓗ ᐆᓇᕐᓇᒡᓗ, ᖃᓂᓐᓂᑦ ᐅᕆᐊᕈᒫᕐᐸᒋᑦ! 17ᐅᖃᕐᐳᑎᑦ, ᐊᔪᕐᓴᓐᖏᑑᕗᖓ, ᐱᖁᑎᖃᑦᓯᐊᕐᓗᖓ, ᑭᓐᖒᒪᔭᖃᕈᓐᓃᕐᓗᖓᓗ; ᖃᐅᔨᒪᓐᖏᓚᑎᓪᓕ ᐊᔪᕐᓴᕐᓂᕐᓂᒃ, ᑕᑯᑦᓱᓇᕐᑐᐊᓘᓂᕐᓂᒃ,#3:17 ᑮᓇᓐᖑᓇᑑᒐᕕᑦ ᐊᔪᕐᓴᕐᐳᑎᑦ, ᑕᐅᑐᖏᑦᑑᓪᓗᑎᑦ, ᐊᓐᓄᕌᖃᕐᓇᒡᓗ. 18ᑍᒤᒻᒪᑦ ᐅᖃᐅᑎᕙᒋᑦ, ᓂᐅᕕᖁᓪᓗᑎᑦ ᒎᓗᒥᒃ ᐅᕙᓐᓂᑦ ᒎᓗᓪᓚᕆᖕᒥᒃ ᐃᑯᒪᒧᑦ ᐱᐅᖏᓐᓃᔭᕐᑕᐅᓯᒪᔪᒥᒃ, ᐊᔪᕐᓴᕈᓐᓃᖁᓪᓗᑎᑦ, ᐊᓐᓄᕌᕐᓗᑎᓪᓗ ᖃᑯᕐᑕᒥᒃ ᐊᓐᓄᕌᖃᖏᓐᓂᕐᒧᑦ ᑲᓐᖑᓇᕐᓃᑦ ᓴᖅᑭᔮᕈᓐᓃᖁᓪᓗᒍ, ᐃᔨᓯᐅᒻᒧᓪᓗ ᐃᔩᒃᑭᒃ ᒥᖑᐊᕐᓗᒋᒃ, ᑕᐅᑐᓕᕐᓂᐊᕋᕕᑦ. 19#ᓲᓗᒨᓂ 3:12; ᐄᑉᕈᐃᓄᑦ 12:6.ᓇᒡᓕᒋᔭᒃᑲ ᐃᓂᕐᑎᕐᓗᒋᑦ ᓱᒋᐊᖃᑦᑕᕐᐸᒃᑲ; ᑍᒤᒻᒪᑦ ᑲᑦᓱᖕᒊᓪᓗᑎᑦ ᖃᕿᐊᓕᕆᑦ. 20ᑕᑯᒋᑦ, ᒪᑐᒦᑉᐳᖓ ᑎᒡᓗᒃᑐᕐᓗᖓᓗ, ᓂᐱᓐᓂᒃ ᑐᓴᕐᑐᖃᕐᐸᑦ ᒪᑐᐃᕈᑦᔭᐅᒍᒪ, ᑕᑦᓱᒧᖓ ᐃᑎᕐᓂᐊᕐᐳᖓ ᓂᕆᖃᑎᒋᓂᐊᕐᐸᕋ, ᑖᑦᓱᒪᓗ ᓂᕆᖃᑎᒋᓗᓂᖓ. 21ᓵᓚᖃᕐᑐᖅ, ᐃᒃᓯᕙᖃᑎᒋᔪᒫᕐᐸᕋ ᐃᒃᓯᕙᐅᑕᕐᔪᐊᓐᓂ, ᓵᓚᖃᕐᓯᒪᒐᒪᑦᑕᐅᑦ ᐊᑖᑕᒐ ᐃᒃᓯᕙᖃᑎᒋᓕᕋᒃᑯ ᐃᒃᓯᕙᐅᑕᕐᔪᐊᖓᓂ.
22“‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”
Currently Selected:
ᔪᐊᓇᓯᐅᑉ ᑕᑯᑎᑕᐅᓂᖏᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
