ᐃᓐᖏᕈᑎᑦ 78
78
ᒎᑎᐅᑉ ᐱᑦᓯᐊᕐᓂᖓ ᐃᓴᕆᐊᓕᑎᓄᑦ ᐊᑭᕋᕐᑐᕐᑐᓄᑦ
ᐊᓴᐸᐅᑉ ᐃᓐᖏᕈᑖ
1ᐃᓄᖁᑎᒃᑲ, ᓈᓚᓚᐅᕆᑦᓯ ᐱᖁᔭᓐᓂᒃ;
ᓯᐅᑎᓯ ᒪᓂᓚᐅᕐᓯᐅᒃ ᖃᓂᕐᒪ ᐅᖃᐅᓯᖏᓐᓄᑦ!
2 #
ᒫᑎᐅᓯ 13:35. ᖃᓂᕋ ᐂᑦᑕᕐᓂᐊᕋᒃᑯ ᐊᑦᔨᐅᔪᒥᒃ ᐅᖃᕐᓗᖓ;
ᐅᖃᐅᓯᖃᕐᓂᐊᕋᒪ ᐃᔨᕐᓯᒪᔪᓂᒃ ᑍᑦᓱᒪᓂᑐᖃᖅ ᐱᓚᐅᕐᑐᓂᒃ.
3ᑐᓴᓚᐅᕐᓯᒪᔭᑦᑎᓐᓂᒃ ᖃᐅᔨᒪᔭᑦᑎᓐᓂᒡᓗ,
ᓯᕗᓕᑦᑕ ᐅᖃᐅᓯᕆᓯᒪᔭᖏᓐᓂᒃ ᐅᕙᑦᑎᓐᓄᑦ.
4ᑕᒪᒃᑯᐊ ᐃᔨᕐᓯᒪᓂᐊᓐᖏᓚᕗᑦ ᕿᑐᕐᖓᖏᓐᓄᑦ,
ᑭᖑᕚᓄᑦ ᐃᓅᔪᒫᕐᑐᓄᑦ ᐅᖃᐅᓯᐅᓕᑦ
ᐊᑕᓂᐅᑉ ᐱᓐᓇᕐᓇᕐᑐᕐᔪᐊᑦ ᐱᓂᐊᕐᓯᒪᔭᖏᑦ,
ᓴᓐᖏᔫᓂᖓ, ᐱᓂᐊᕐᓂᖏᓪᓗ ᑲᒪᓇᕐᑐᑦ ᐱᓂᐊᖃᑦᑕᕐᓯᒪᔭᖏᑦ.
5ᔧᑯᒧᑦ ᐱᓂᐊᕐᑕᐅᖁᔭᓂ ᓇᓗᓁᕐᓯᒪᖕᒪᒋᑦ,
ᐃᓴᕆᐊᓕᓗ ᐱᖁᔭᓕᐅᓚᐅᕐᒪᒍ,
ᐱᖁᓚᐅᕐᒪᒋᓪᓗ ᓯᕗᓕᕕᓂᕐᐳᑦ,
ᕿᑐᕐᖓᒥᖕᓂᒃ ᑕᒪᒃᑯᓂᖓ ᐊᔪᕆᕐᑐᐃᖁᓪᓗᒋᑦ;
6ᑭᖑᕚᑦ ᐃᓅᔪᒫᕐᑐᑦ ᑕᒪᒃᑯᓂᖓ ᖃᐅᔨᒪᖁᓪᓗᒋᑦ,
ᕿᑐᕐᒊᑦ ᐃᓅᔪᒫᕐᑐᑦ, ᑖᒃᑯᐊᑦᑕᐅᖅ ᑕᒪᒃᑯᓂᖓ
ᐅᖃᐅᓯᖃᖁᓪᓗᒋᑦ ᕿᑐᕐᖓᒥᖕᓄᑦ,
7ᓯᕗᒧᑦ ᓂᕆᐅᒋᔭᖃᓕᖁᓪᓗᒋᑦ ᒎᑎᒥᒃ,
ᒎᑎᐅᓪᓗ ᐱᓂᐊᕐᓂᖏᓐᓂᒃ ᐳᐃᒍᖁᓇᒋᑦ,
ᐱᖁᔭᖏᓐᓂᒡᓗ ᐱᓯᒤᓐᓇᖁᓪᓗᒋᑦ;
8ᓯᕗᓕᕐᒥᒃᑎᑐᓪᓗ ᑍᒤᖁᓇᒋᑦ,
ᓯᑎᔫᓗᑎᒃ ᐊᑭᕋᕐᑐᕐᓗᑎᒡᓗ ᑭᖑᕚᕇᑦ ᐱᖁᓇᒋᑦ,
ᑭᖑᕚᕇᑎᑐᑦ ᐆᒻᒪᑎᒥᖕᓂᒃ ᐃᓱᐊᕐᓯᑎᑦᓯᓚᐅᖏᑦᑐᑎᑐᑦ,
ᐊᓂᕐᓂᖏᓪᓗ ᒎᑎᒧᑦ ᐊᑐᕆᐊᓕᖕᒥᖕᓂᒃ ᑲᔪᓯᑎᑦᓯᓚᐅᖏᑦᑐᑎᑐᑦ.
9ᐃᕗᕅᒥᐅᑉ ᕿᑐᕐᖓᖏᑦ, ᓱᒋᐅᑎᓕᔭᕐᒪᑕ ᐱᑎᒃᓯᓂᒃ ᑎᒍᒥᐊᕐᓗᑎᒃ,
ᐅᑎᕆᐊᓕᕆᑦᓯ ᐅᓪᓗᒥ ᐅᓇᑕᕆᐊᕐᓯᒪᕝᕕᒋᔭᑦᓯᓐᓂᑦ.
10ᒎᑎᐅᑉ ᐊᖏᖃᑎᒌᒍᑎᒋᓯᒪᔭᖓᓂᒃ ᒪᓕᓚᐅᖏᒻᒪᑕ;
ᐱᖁᔭᖏᓪᓕ ᒪᓕᒡᓗᒋᑦ ᐃᓅᔪᒪᓚᐅᓐᖏᓚᑦ,
11ᐱᓂᐊᕐᓂᕆᓯᒪᔭᖏᓪᓗ ᐳᐃᒍᓚᐅᕐᐰᑦ
ᑲᒪᓇᕐᑐᓕᓂᖏᓪᓗᑕᐅᖅ ᑖᒃᑯᓄᖓ ᑕᑯᒃᓴᐅᑎᓚᐅᕐᑕᖏᑦ.
12 #
ᒨᓯᓯ ᐂᑉᐸᖏᑦ 7:8—12:32. ᑲᒪᓇᕐᑐᑦ ᐱᓂᐊᕐᓂᕆᓚᐅᕐᑕᖏᑦ ᓯᕗᓕᕕᓂᖏᑕ ᑕᒃᑯᐊᓂ,
ᓄᓇᒥ ᐄᑦᔨᑉᑎᒥ, ᓇᑎᕐᓇᒥᓗ ᔪᐊᓐᒥᒃ ᐊᑎᓕᖕᒥ.
13 #
ᒨᓯᓯ ᐂᑉᐸᖏᑦ 14:21,22. ᐃᒪᕐᕕᒃ ᐊᕕᓚᐅᕐᐹ, ᑕᒪᐅᓇᓗ ᑕᓯᐅᕐᓗᒋᑦ ᐊᓂᒍᐃᑎᓚᐅᕐᐰᑦ;
ᐃᒪᕐᓗ ᕿᑲᕐᑎᓚᐅᕐᐹ ᓇᖏᕐᑐᑐᑦ ᐳᕐᑐᓯᓯᒪᓪᓗᓂ.
14 #
ᒨᓯᓯ ᐂᑉᐸᖏᑦ 13:21,22. ᐅᓪᓘᑎᓪᓗᒍ ᑕᓯᐅᓚᐅᕐᐰᑦ ᓄᕗᔭᒃᑯᑦ,
ᐅᓐᓄᐊᕐᓗ ᓈᓪᓗᒍ ᐃᑯᒪᒧᑦ ᐃᑯᐊᓚᔪᒧᑦ.
15ᐃᓄᖃᖏᑦᑐᒥ ᕾᕐᑐᐃᑦ ᐊᕕᓚᐅᕐᐰᑦ,
ᐃᒥᕐᑎᓪᓗᒋᓪᓗ ᐊᒥᒐᖏᑦᑐᒥᒃ ᐃᑎᔪᒥᑦ ᐱᔪᑎᑐᑦ.
16 #
ᒨᓯᓯ ᐂᑉᐸᖏᑦ 17:1-7; ᒨᓯᓯ ᓯᑕᒪᖏᑦ 20:2-13. ᕾᕐᑐᒥᑦ ᑰᓕᕐᑎᓚᐅᕆᕚ, ᐃᒪᕐᓗ ᑰᓕᓚᐅᕐᐳᖅ ᑰᒃᑎᑐᑦ.
17ᓱᓕᓕ ᐊᖏᓂᕐᓴᒥᒃ ᐊᔪᕐᑐᓕᓚᐅᕐᐳᑦ ᑖᑦᓱᒧᖓ,
ᐊᑭᕋᕐᑐᕐᓗᑎᒃ ᖁᑦᓯᖕᓂᕐᐹᖑᔪᒥᒃ ᓱᓇᖃᔪᐃᑦᑐᒦᓪᓗᑎᒃ.
18 #
ᒨᓯᓯ ᐂᑉᐸᖏᑦ 16:2-15; ᒨᓯᓯ ᓯᑕᒪᖏᑦ 11:4-23,31-35. ᒎᑎ ᐆᒻᒪᑎᒥᒃᑎᒍᑦ ᐆᒃᑐᓚᐅᕐᐹᑦ
ᓂᕿᒃᓴᒥᒃ ᒪᒪᕆᔭᒥᖕᓂᒃ ᕿᓄᕕᒋᓪᓗᒍ.
19ᐃᓛᒃ, ᓂᓪᓕᐊᓚᐅᕐᐳᑦ ᒎᑎᒥᒃ ᓈᒻᒪᒃᓴᕋᑎᒃ:
ᐅᖃᕐᓗᑎᒃ, “ᒎᑎ ᓂᕆᔭᒃᓴᓂᒃ ᐊᑐᐃᓐᓇᕈᐃᔪᓐᓇᕐᐹ ᐃᓄᖃᖏᑦᑐᒥ?
20ᕾᕐᑐᖅ ᐊᓇᐅᖕᒪᒍ, ᐃᒥᖅ ᑰᓕᓚᐅᕐᐳᖅ, ᐊᒥᒐᖏᑦᑐᒥᒡᓗ ᑰᓕᕐᓗᓂ.
ᓂᕿᒃᓴᒥᒃᑕᐅᖅ ᑐᓂᓯᔪᓐᓇᕆᕚ?
ᐃᓄᖁᑎᓂ ᓂᕿᑐᐃᓐᓇᕐᒥᒃ ᓂᕿᒃᓴᖃᕐᑎᑦᓱᓐᓇᕆᕔ?”
21ᑕᒪᓐᓇ ᐊᑕᓂᐅᑉ ᑐᓴᕋᒥᐅᒃ ᓂᓐᖓᓚᐅᕐᐳᖅ;
ᐃᑯᒪᖃᓕᕐᓗᓂᓗ ᔧᑯ ᐊᑭᕋᕐᑐᕐᓗᒍ,
ᓂᓐᖓᐅᒪᓂᕐᓗ ᑎᑭᓚᐅᕆᕗᖅ ᐃᓴᕆᐊᓕᒧᑦ,
22ᒎᑎᒥᒃ ᐅᒃᐱᓚᐅᖏᒻᒪᑕ, ᐱᐅᓕᒃᓯᓂᖓᓂᒡᓗ ᑕᑎᖃᕋᑎᒃ.
23ᑭᓯᐊᓂ ᐱᖁᔨᓚᐅᕐᐳᖅ ᐹᓃᑦᑐᓂᒃ ᓄᕗᔭᓂᒃ,
ᕿᓚᐅᓪᓗ ᐅᒃᑯᐊᖏᑦ ᒪᑐᐃᕐᓗᒋᑦ,
24 #
ᔪᐊᓇᓯ 6:31. ᓯᓚᓗᒃᑐᑐᑦ ᑲᑕᒐᕐᑎᑦᓯᓚᐅᕐᐳᖅ ᒫᓇᒥᒃ ᓂᕿᒃᓴᖏᓐᓂᒃ,
ᑐᓂᓯᕕᒋᓗᒋᓪᓗ ᓂᐊᖂᔭᒥᒃ ᕿᓚᖕᒥᑦ ᐱᔪᒥᒃ.
25ᐃᓄᐃᑦ ᓂᕆᓚᐅᕐᐳᑦ ᐂᓐᖏᓖᑦ ᓂᕿᖏᓐᓂᒃ,
ᑐᓂᓯᕕᒋᓪᓗᒋᑦ ᓂᕿᒃᓴᓂᒃ ᐊᒥᒐᖏᑦᑐᓂᒃ.
26ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐊᓄᕆ
ᕿᓚᖕᓂᑦ ᐱᔪᖅ ᐊᓄᕌᕐᑎᓚᐅᕐᐹ,
ᐱᔪᓐᓇᕐᓂᕐᒥᓄᓪᓗ ᐅᓪᓗᓪᓗᐊᑉ ᓇᓛᓂᑦ ᐊᓄᕌᕐᑎᓗᒍ;
27ᓯᓚᓗᒃᑐᑐᑦ ᓂᕿᒃᓴᒥᑦ ᑲᑕᒐᕐᕕᒋᕔᑦ ᐳᔪᕐᓗᒃᑎᑐᑦ,
ᑎᖕᒥᐊᓂᒡᓗ ᐃᒪᐅᑉ ᓯᓈᓃᑦᑐᑎᑐᑦ ᓯᐅᕋᕐᑎᑐᑦ ᐅᓄᕐᑎᒋᔪᓂᒃ;
28ᑲᑕᒐᕐᑎᓪᓗᒋᓪᓗ ᑕᖕᒫᕐᓯᒪᔪᑦ ᐊᑯᓐᓂᖓᓄᑦ,
ᐃᓂᒋᔭᖏᑕ ᐊᕙᑎᓕᒫᖏᓐᓄᑦ.
29ᓂᕆᓚᐅᕐᐳᓪᓗ ᐊᕿᐊᑦᑐᕐᓗᑎᒃ, ᐱᔪᒪᔭᖏᓐᓂᒃ ᑐᓂᓯᕕᒋᓚᐅᕐᒪᒋᑦ.
30ᑳᒍᓐᓃᓚᐅᕐᑎᓐᓇᒋᑦ ᓱᓕ,
ᓂᕆᔭᒥᖕᓂᒃ ᓱᓕ ᐅᖁᒻᒥᐊᖏᓐᓇᕐᑎᓪᓗᒋᑦ,
31ᒎᑎᐅᑉ ᓂᓐᖓᐅᒪᓂᖓᓄᑦ ᑎᑭᑕᐅᓚᐅᕐᐳᑦ,
ᑐᖁᓪᓗᒋᓪᓗ ᓴᓐᖏᓂᕐᐹᖏᑦ,
ᐅᕐᕈᑎᓚᐅᕐᐰᓪᓗ ᐃᓴᕆᐊᓕᑏᑦ ᐊᔪᖏᓐᓂᕐᐹᖏᑦ.
32ᑍᒤᓕᐅᕋᓗᐊᕐᒪᑦ ᓱᓕ ᐊᔪᕐᑐᓕᓚᐅᕐᐳᑦ;
ᐅᒃᐱᕈᓱᓚᐅᓐᖏᓚᑦ ᐱᓂᐊᕐᓂᖏᓐᓂᒃ ᑲᒪᓇᕐᑐᓂᒃ.
33ᑍᒤᒻᒪᑦ ᐅᓪᓗᖏᑦ ᓄᖑᑎᓚᐅᕐᐰᑦ ᐳᔪᕐᑎᑐᑦ,
ᐊᕐᕌᒍᖃᕐᑎᓚᐅᕐᐰᓪᓗ ᑲᑉᐱᐊᓇᕐᑐᓂᒃ.
34ᑐᖁᑎᑦᓯᑐᐊᕐᒪᓪᓕ, ᐊᓯᖏᑦ ᑖᑦᓱᒥᖓ ᕿᓂᓕᓚᐅᕐᐳᑦ;
ᖃᕿᐊᓕᕐᓗᑎᒃ ᐊᔪᐃᓐᓇᕐᓗᑎᒡᓗ ᒎᑎ ᕿᓂᓕᕐᓗᒍ.
35ᐃᖅᑬᓕᕐᓗᑎᒡᓗ ᒎᑎ ᕾᕐᑐᕆᒐᒥᑦᔪᒃ,
ᒎᑎ ᖁᑦᓯᖕᓂᕐᐹᖑᔪᖅ ᓴᐳᑦᔨᔨᒋᒐᒥᑦᔪᒃ.
36ᑭᓯᐊᓂᓕ ᐃᓚᓐᓂᕐᓴᕐᕕᒋᕚᑦ ᖃᓂᕐᒥᖕᓄᑦ,
ᐅᖃᕐᒥᖕᓄᓪᓗ ᓴᒡᓗᕝᕕᒋᓪᓗᒍ ᓱᓕᓇᑎᒃ.
37 #
ᐋᐴᓯᑕᓖᑦ 8:21. ᐆᒻᒪᑎᖏᑦ ᑖᑦᓱᒧᖓ ᑍᒫᑦᓮᓐᓈᖏᒻᒪᑕ;
ᐊᖏᖃᑎᒌᒍᑎᖏᓐᓂᒡᓗ ᒪᓕᑦᓯᐊᓚᐅᕋᑎᒃ.
38ᑖᓐᓇᓕ, ᓇᒡᓕᒍᓱᖕᓂᕐᒥᒃ ᑕᑕᓐᓇᒥ,
ᐊᔪᕐᓂᖏᓐᓂᑦ ᐃᓱᒪᒋᔪᓐᓁᕐᕕᒋᓚᐅᕐᐰᑦ, ᐊᓯᕈᕐᓇᒋᓪᓗ;
ᐅᓄᕐᑐᐃᓱᕐᓗᓂ ᓂᓐᖓᐅᒪᓂᓂ ᓄᖅᑲᕐᑎᖃᑦᑕᓚᐅᕐᐹ,
ᓂᓐᖓᐅᒪᓂᓕᒫᓂᓗ ᐊᑕᖏᕐᓗᒍ ᓴᖅᑭᑎᓚᐅᓐᖏᓛ.
39ᐃᖅᑲᐅᒪᓚᐅᕋᒥ ᑖᒃᑯᐊ ᑎᒥᑐᐃᓐᓇᐅᖕᒪᑕ,
ᐊᓄᕆᑎᑐᑦ ᑎᑭᓚᐅᕐᓗᓂ ᐊᓂᒍᕐᑐᑎᑐᑦ ᐅᑎᕐᓂᐊᕋᓂᓗ.
40ᐊᑯᓔᑦᑐᒥᒃ ᐊᑭᕋᕐᑐᖃᑦᑕᓚᐅᕐᐹᑦ ᐃᓄᖃᖏᑦᑐᒥ,
ᕿᒃᓵᑎᑉᐸᒡᓗᒍᓗ ᓱᓇᖃᔪᐃᑦᑐᒥ!
41ᑍᒪᓐᖓᑦ, ᑍᒪᓐᖓᑦ, ᒎᑎ ᐆᒃᑐᖃᑦᑕᓚᐅᕐᐹᑦ,
ᓂᓐᖓᒃᓴᕐᓗᒍᓗ ᐃᓴᕆᐊᓕᑎᑦ ᐃᑦᔪᕐᓁᑦᑐᖁᑎᖓᑦ.
42ᐱᔪᓐᓇᕐᓂᖓ ᐃᖅᑲᐅᒪᓚᐅᖏᓐᓇᒥᑦᔪᒃ;
ᐅᕝᕙᓗ ᐅᓪᓗᐃᑦ ᐃᓚᖏᓐᓂ ᐊᑭᕋᒥᖕᓂᑦ ᓴᐳᑎᔭᐅᓚᐅᕐᓯᒪᓂᕐᒥᖕᓂᒃ.
43ᐱᓂᐊᕐᓃᑦ ᓇᓗᓁᒃᑯᑍᑦ ᐱᓂᐊᓚᐅᕐᑕᖏᑦ ᐄᑦᔨᑉᑎᒥ,
ᑲᒪᓇᕐᑐᓕᓂᖏᓪᓗ ᓄᓇᒥ ᔪᐊᓐᒥ;
44 #
ᒨᓯᓯ ᐂᑉᐸᖏᑦ 7:17-21. ᑍᑦᓱᒪᓂᓗ ᑰᑦ ᐊᐅᓐᖑᕐᑎᓚᐅᕐᓯᒪᖕᒪᒋᑦ,
ᑰᖕᓂᑦ ᐃᒥᕈᓐᓁᓪᓕᓚᐅᕐᓯᒪᕗᑦ.
45 #
ᒨᓯᓯ ᐂᑉᐸᖏᑦ 8:20-24;
ᒨᓯᓯ ᐂᑉᐸᖏᑦ 8:1-6. ᖁᐱᕐᕈᐃᓪᓗ ᑎᖏᓲᑦ ᐅᓄᕐᑐᕐᔪᐊᑦ ᑎᑭᑎᓚᐅᕐᐰᑦ, ᑖᒃᑯᓂᖓ ᓂᕆᔪᒪᔪᑦ,
ᓈᕌᔩᓪᓗ, ᓄᓇᖏᓐᓂᒃ ᓱᒃᑯᑎᕆᓚᐅᕐᑐᑦ.
46 #
ᒨᓯᓯ ᐂᑉᐸᖏᑦ 10:12-15. ᐱᕈᕐᓯᐊᖏᓪᓗ ᖁᐱᕐᕈᓄᑦ ᓂᕆᔭᐅᑎᓚᐅᕐᐰᑦ,
ᐊᒃᓱᕈᕐᓗᑎᒡᓗ ᐱᓇᓱᐊᓚᐅᕐᑕᖏᑦ ᐱᒡᓕᕐᑕᐅᔮᕐᑐᓄᑦ ᓂᕆᔭᐅᓪᓗᑎᒃ.
47 #
ᒨᓯᓯ ᐂᑉᐸᖏᑦ 9:22-25. ᕔᓂᒃᓴᓂᒡᓗ ᐱᕈᕐᓰᕕᖏᑦ ᓇᑕᖅᑯᕐᓇᓄᑦ ᐊᓯᕈᕐᑕᐅᑎᓚᐅᕐᐰᑦ,
ᓇᐹᕐᑐᓪᓗ ᓯᑲᒧᐊᕐᒥᒃ ᐊᑎᓖᑦ ᓂᒡᓚᓱᖕᒧᑦ ᑐᖁᓕᑎᓪᓗᒋᑦ.
48ᐃᒻᒧᒃᓯᐅᒐᖁᑎᖏᑦ ᓇᑕᖅᑯᕐᓇᓄᑦ ᑐᖁᓚᐅᕆᕔᑦ,
ᓰᐱᖁᑎᖏᓪᓗ ᖃᐅᒻᒪᓪᓚᖕᒧᑦ ᐱᔭᐅᑎᓪᓗᒋᑦ.
49ᓴᖅᑭᑎᑦᓯᕕᒋᓪᓗᒋᓪᓗ ᓂᓐᖓᖕᓂᕐᒥ ᓴᓐᖏᔫᓂᖓᓂᒃ,
ᓂᓐᖓᐅᒪᓂᕐᔪᐊᕐᒥᒃ, ᐃᓕᕋᓇᕐᓂᕐᒥᒃ, ᑲᑉᐱᐊᓇᕐᓂᕐᒥᒡᓗ,
ᐂᓐᖏᓖᓂᒡᓗ ᑐᖁᕅᔪᓂᒃ ᑎᓕᓯᕕᒋᓪᓗᒋᑦ.
50ᓂᓐᖓᐅᒪᓂᓂ ᐊᖅᑯᑎᓕᐅᓚᐅᕐᐹ;
ᑕᕐᓂᖏᑦ ᓴᐳᑎᓚᐅᓐᖏᓔᑦ ᑐᖁᒥᑦ,
ᐃᓅᓯᖏᓪᓕ ᑐᓂᓚᐅᕐᐰᑦ ᐋᓐᓂᐊᓇᕐᑐᓄᑦ.
51 #
ᒨᓯᓯ ᐂᑉᐸᖏᑦ 12:29. ᐃᕐᓂᐊᖑᖅᑳᕐᓯᒪᔪᑦ ᐃᕐᓂᖏᑦ ᐄᑦᔨᑉᑎᒥ ᑐᖁᕋᓚᐅᕐᐰᑦ,
ᐃᕐᓂᐊᖑᖅᑳᕐᑐᑦ ᓴᓐᖏᔫᑦᔪᑎᒃᓮᑦ ᕼᐋᒥᐅᑉ ᑭᖑᕚᖏᓐᓂ.
52 #
ᒨᓯᓯ ᐂᑉᐸᖏᑦ 13:17-22. ᐃᓄᖁᑎᓂᓕ ᐊᐅᓪᓚᕐᑎᓚᐅᕐᐰᑦ ᓰᐱᑎᑐᑦ ᓯᕗᓕᕐᓗᒋᑦ,
ᑕᓯᐅᓚᐅᕐᐰᓪᓗ ᐃᓄᖃᖏᑦᑐᒥ ᓰᐱᑎᑐᑦ ᑲᑎᓐᖓᔪᑎᑐᑦ;
53 #
ᒨᓯᓯ ᐂᑉᐸᖏᑦ 14:26-28. ᓯᕗᓕᓚᐅᕐᐰᑦ ᖃᓄᐃᓐᓇᖏᑦᑐᑎᒍᑦ, ᑕᕝᕙ ᑲᑉᐱᐊᓱᓚᐅᓐᖏᓚᑦ;
ᐃᒪᕐᕕᐅᓪᓕ ᓵᓚᒋᓚᐅᕐᐰᑦ ᐊᑭᕋᕐᑐᕐᑎᖏᑦ.
54 #
ᒨᓯᓯ ᐂᑉᐸᖏᑦ 15:17; ᔮᓱᐊ 3:14-17. ᑎᑭᑎᓚᐅᕐᐰᑦ ᓄᓇᖁᑎᒥᓄᑦ ᐃᑦᔪᕐᓁᑦᑐᒧᑦ,
ᖃᖅᑲᖃᐅᕐᑐᒧᑦ ᑕᓕᕐᐱᖕᒥᓄᑦ ᑎᒍᓚᐅᕐᑕᒥᓄᑦ.
55 #
ᔮᓱᐊ 11:16-23. ᐃᓅᖃᑎᒌᒡᔪᐊᑦ ᐊᐅᓪᓚᕐᑎᓚᐅᕐᐰᑦ ᐃᓄᖁᑎᒥ ᓵᖏᓐᓂᑦ,
ᓄᓇ ᐆᒃᑐᕋᐅᑎᒃᑯᑦ ᓇᓗᓁᕐᓯᒪᔪᖅ ᑐᓐᓂᕐᓴᐅᑎᒋᓪᓗᒍ ᓄᓇᑖᕆᔭᐅᖁᓪᓗᒍ ᑭᖑᕐᖑᑎᔭᐅᔪᑎᑐᑦ,
ᐃᓴᕆᐊᓖᓪᓗ ᑭᖑᕚᕇᑦ ᐊᖏᕐᕋᕐᑖᕐᑎᓚᐅᕐᐰᑦ ᓄᓇᒥ ᑕᒫᓂ.
56 #
ᐃᓗᐊᕐᓮᔩᑦ 2:11-15. ᓱᓕᓕ ᐆᒃᑐᕋᓚᐅᕐᐳᑦ ᓂᓐᖓᒃᓴᕐᓗᒍᓗ ᒎᑎ ᖁᑦᓯᖕᓂᕐᐹᖑᔪᖅ,
ᐱᖁᔭᖏᓪᓗ ᒪᓕᓚᐅᓐᖏᓔᑦ.
57ᑐᓄᑦᓯᓚᐅᕐᐳᓪᓕ ᓯᕗᓕᕕᓂᕐᒥᒃᑎᑐᑦ ᑲᔪᓯᔪᓐᓃᕐᓗᑎᒃ;
ᓴᖑᓚᐅᕐᐳᓪᓗ ᐱᑎᒃᓯᐅᑉ ᖃᕐᔪᖓᑐᑦ ᑐᑭᒧᐊᖏᑦᑐᑐᑦ.
58ᓂᓐᖓᒃᓴᓚᐅᕐᐹᑦ ᑐᒃᓯᐊᕐᕕᓕᐊᒥᖕᓄᑦ ᐳᕐᑐᔪᑦ ᖄᖏᓐᓃᑦᑐᓄᑦ;
ᓯᖕᓇᑎᓚᐅᕐᐹᓪᓗ ᓴᓇᓐᖑᐊᕐᓯᒪᔪᓄᑦ ᒎᑎᓐᖑᐊᓄᑦ.
59ᒎᑎᓕ ᑕᒪᑐᒥᖓ ᑐᓴᕋᒥ, ᐊᒃᓱᐊᓗᒃ ᓂᓐᖓᓚᐅᕐᐳᖅ,
ᐃᓴᕆᐊᓖᓪᓗ ᓇᕐᕈᒋᓕᕐᓗᒋᑦ ᖁᔭᓈᑦᓯᐊᓚᐅᕐᐰᑦ.
60 #
ᔮᓱᐊ 18:1; ᔨᕆᒤᐊ 7:12-14; 26:6. ᑐᐱᕐᔪᐊᖅ ᑐᒃᓯᐊᕐᕕᒃ ᓮᓗᐊᒦᑦᑐᖅ ᕿᒪᓚᐅᕐᐹ,
ᑐᐱᓕᐊᕆᓚᐅᕐᑕᓂ ᓇᔪᒐᕆᔪᒪᓪᓗᒍ ᐃᓄᐃᑦ ᐊᑯᕐᖓᓐᓂ.
61 #
ᓴᒧᐃᓕ ᓯᕗᓪᓖᑦ 4:4-22. ᓴᓐᖏᓂᕐᒥᓄᑦ ᑎᒍᔭᐅᓯᒪᕕᖕᒧᑦ ᐊᐅᓪᓚᕈᑦᔭᐅᑎᓚᐅᕐᐰᑦ,
ᐱᓐᓇᕐᓇᕐᓂᖓᑕᓗ ᓇᓗᓁᒃᑯᑕᖓ ᐊᑭᕋᖏᓐᓄᐊᕐᑕᐅᑎᓪᓗᒍ.
62ᐃᓄᖁᑎᓂ ᓴᕕᒡᔪᐊᒧᑦ ᐱᔭᐅᑎᓚᐅᕐᐰᑦ,
ᐱᒋᔭᓂ ᑐᖁᑕᐅᑎᓪᓗᒋᑦ ᓂᓐᖓᐅᑎᓚᐅᕋᒥᒋᑦ.
63ᐊᖑᑎᑦ ᐃᓅᓱᒃᑐᑦ ᐃᑯᒪᒧᑦ ᓄᖑᑕᐅᓚᐅᕐᐳᑦ,
ᐅᐃᒡᒐᓱᖁᑎᖏᓪᓗ ᐅᐃᒃᓴᖃᕈᓐᓃᕐᓗᑎᒃ.
64ᑐᓂᕐᕈᓯᕐᑎᑦᓯᔨᖁᑎᖏᑦ ᓴᕕᒡᔪᐊᒧᑦ ᐅᕐᕈᑎᑕᐅᓚᐅᕐᐳᑦ,
ᐅᐃᒡᒐᕐᓂᖁᑎᖏᓪᓗ ᕿᒃᓵᖕᓂᕐᒧᑦ ᐅᒡᒍᐊᓚᐅᓐᖏᓚᑦ.
65ᐊᑕᓂᕐᓕ ᓯᓂᖕᓂᕐᒥᑦ ᑐᐸᒃᑐᑎᑐᑦ ᑍᒤᓕᓚᐅᕐᐳᖅ,
ᐊᖑᑎᑐᓪᓗ ᓴᓐᖏᔪᑐᑦ ᕔᓂᑐᕐᓯᒪᔪᑐᑦ ᓂᓪᓕᐊᓕᓚᐅᕐᐳᖅ.
66ᐊᑭᕋᕐᑐᕐᑎᓂ ᐊᓇᐅᓕᕐᓗᒋᑦ ᐊᑭᓂᐊᓚᐅᕐᐰᑦ;
ᑍᒤᓕᖕᒊᓐᓇᕐᓂᐊᓕᕐᑐᒥᒃ ᑲᓐᖑᓇᕐᑐᒦᓕᕐᑎᓪᓗᒋᑦ.
67ᓱᓕᓗ ᔫᓯᐱᐅᑉ ᑐᐱᖓ ᓇᕐᕈᒋᓚᐅᕐᐹ,
ᐃᕗᕅᒥᐅᓪᓗ ᑭᖑᕚᖏᑦ ᓂᕈᐊᕆᓚᐅᓐᖏᓔᑦ.
68ᔫᑕᐅᓪᓕ ᑭᖑᕚᖏᑦ ᓂᕈᐊᓚᐅᕐᐰᑦ,
ᖃᖅᑲᕐᓗ ᓮᐅᓂ, ᖁᕕᐊᒋᔭᓂ.
69ᐃᑦᔪᕐᓁᑦᑐᕕᖁᑎᓂ ᓴᓇᔭᐅᑎᑉᐹ ᐳᕐᑐᔪᒥ ᕿᓚᖕᒦᑦᑐᑐᑦ,
ᓄᓇᕐᔪᐊᑐᑦ, ᐊᑦᑕᕐᓁᓕᓯᒪᔪᑐᑦ ᐃᓱᖃᖏᑦᑐᒧᑦ.
70 #
ᓴᒧᐃᓕ ᓯᕗᓪᓖᑦ 16:11,12; ᓴᒧᐃᓕ ᐂᑉᐸᖏᑦ 7:8; ᑯᕉᓂᑲ ᓯᕗᓪᓖᑦ 17:7. ᑍᕕᑎᓗ ᐱᔨᓂ ᓂᕈᐊᓚᐅᕆᕚ, ᓰᐱᓕᕆᕕᖓᓂᑦ ᑎᒍᓪᓗᒍ;
71ᓰᐱᓂᑦ ᐊᕐᓇᓪᓗᖕᓂᒃ ᐃᕐᓂᐅᕐᑐᓂᒃ ᒪᓕᑲᑕᒃᕕᖓᓂᑦ,
ᔧᑯᒧᑦ ᐃᓄᖁᑎᖏᓐᓄᓪᓗ ᓰᐱᓕᕆᔨᐅᖁᓪᓗᒍ,
ᐃᓴᕆᐊᓕᒃᑯᓪᓗ ᑖᑦᓱᒧᖓ ᑭᖑᕐᖑᑎᔭᐅᖁᓪᓗᒋᑦ.
72ᑍᒤᒻᒪᑦ ᓰᐱᖁᑎᒥᑐᑦ ᑲᒪᒋᓚᐅᕐᐰᑦ ᐆᒻᒪᑎᒥ ᐱᔪᓐᓇᕐᓂᖓᓄᑦ,
ᑕᓯᐅᕐᓗᒋᓪᓗ ᐊᒡᒐᖕᒥ ᐊᔪᖏᓐᓂᖏᑦ ᒪᓕᒡᓗᒋᑦ.
Currently Selected:
ᐃᓐᖏᕈᑎᑦ 78: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
