ᐃᓐᖏᕈᑎᑦ 72
72
ᒥᓮᐊᓯᐅᑉ ᓂᕐᑐᕐᓇᕐᓗᓂ ᐊᑕᓂᐅᓂᖓ ᓯᓚᕐᔪᐊᕐᒥᐅᓄᑦ
ᐃᓐᖏᕈᑦ ᓲᓗᒨᓂᐅᑉ ᐃᓐᖏᕈᑖ
1ᒎᑏ, ᐃᖅᑲᕐᑐᐃᑦᓯᐊᕐᓂᕐᓂᒃ ᐊᖓᔪᖅᑳᕐᔪᐊᖅ ᑐᓂᓯᕕᒋᒍᒃ,
ᐊᖓᔪᖅᑳᕐᔪᐊᓪᓗ ᐃᕐᓂᖓ ᐃᓱᐊᕐᑐᓕᓂᕐᓂᒃ ᑐᓂᓯᕕᒋᓗᒍ.
2ᐃᓄᖁᑎᖕᓂᒃ ᐱᓇᓱᐊᕐᕕᖃᖁᓪᓗᒍ ᐃᓱᐊᕐᑐᒥᒃ,
ᐊᔪᕐᓴᕐᑐᖁᑎᑎᓪᓗ ᐊᑦᔨᒌᒃᑐᒥᒃ ᐱᓇᓱᐊᕐᕕᐅᖁᓪᓗᒋᑦ.
3ᖃᖅᑬᑦ ᐱᕙᓪᓕᕐᓇᕐᑎᑦᓯᖁᓪᓗᒋᑦ ᐃᓄᖕᓄᑦ,
ᐱᖑᐊᕐᔪᐃᓪᓗ, ᐃᓱᐊᕐᓯᑎᑦᓯᔪᓐᓇᖁᓪᓗᒋᑦ.
4ᐊᑦᔨᒌᒃᑎᑦᓯᔪᓐᓇᖁᓪᓗᒍ ᐃᓄᖕᓂᒃ ᐊᔪᕐᓴᕐᑐᓂᒃ;
ᐱᒃᓴᖃᖏᑦᑐᓪᓗ ᕿᑐᕐᖓᖏᓐᓂᒃ ᓴᐳᑦᔨᔪᒫᕐᐳᖅ,
ᐅᖁᒤᒃᓴᕐᑎᑦᓯᔪᓪᓗ ᓵᓚᒋᔪᒫᕐᐰᑦ.
5ᐃᓅᔪᒫᕐᐳᖅ ᓯᕿᓂᐅᑉ ᐱᑕᖃᕐᓂᖓᓂ,
ᑕᖅᑭᐅᓪᓗ ᐱᑕᖃᕐᓂᖓᓂ, ᑭᖑᕚᖑᖃᑎᒌᓕᒫᓂ!
6ᐊᖅᑲᕈᒫᕐᐳᖅ ᓯᓚᓗᒃᑎᑐᑦ ᐱᕈᕐᑐᓄᑦ,
ᓯᓚᓗᒃᑎᑐᑦ ᓄᓇᒥᒃ ᖃᐅᓯᕐᑎᑦᓯᔪᑎᑐᑦ.
7ᑖᑦᓱᒪ ᐅᓪᓗᖏᓐᓂ ᐃᓱᐊᕐᑐᑦ ᐱᕈᑦᓯᐊᕐᑐᑎᑐᑦ ᑍᒤᑦᓱᒫᕐᐳᑦ,
ᓮᓕᓂᖃᕐᓗᑎᒡᓗ ᐊᒥᒐᖏᑦᑐᒥᒃ, ᑕᖅᑭᐅᑉ ᐱᑕᖃᕈᓐᓃᕐᓂᖓ ᑎᑭᓪᓗᒍ.
8 #
ᓴᑲᕅᐊ 9:10. ᐊᖓᔪᖅᑲᐅᕕᖃᕈᒫᕐᐳᖅ ᐃᒪᕐᐱᖕᒥᑦ ᐃᒪᕐᐱᖕᒧᑦ ᑎᑭᓪᓗᒍ,
ᑰᖕᒥᓪᓗ ᐃᕗᕅᑎᒥᑦ ᓄᓇᕐᔪᐊᑉ ᐃᓱᐊ ᑎᑭᓪᓗᒍ.
9ᐃᓄᖃᖏᑦᑐᒥ ᐃᓂᖃᕐᑐᑦ ᓵᖓᓂ ᐅᑯᔪᒫᕐᐳᑦ,
ᐊᑭᕋᖏᑕᓗ ᐳᔪᕐᓗᒃ ᐊᓗᒃᑐᕈᒫᕐᐹᑦ.
10ᐊᖓᔪᖅᑳᕐᔪᐊᑦ ᑖᕐᓯᓯᒥᐅᑦ ᐅᖓᓯᒃᑐᒥᐅᓪᓗ ᑐᓂᕐᕈᑎᓂᒃ ᕾᑦᓯᔪᒫᕐᐳᑦ;
ᐊᖓᔪᖅᑳᕐᔪᐊᓪᓗ ᓰᐸᒥᐅᑦ ᓰᕙᒥᐅᓪᓗ ᑐᓂᕐᕈᑎᒥᖕᓂᒃ ᐋᑦᓯᔪᒫᕐᐳᑦ.
11ᐊᖓᔪᖅᑳᕐᔪᐊᓕᒫᑦ ᓵᖓᓂ ᐹᒻᒪᒃᑎᕈᒫᕐᐳᑦ,
ᐃᓅᖃᑎᒌᒡᔪᐊᓕᒫᓪᓗ ᐱᔨᑦᓯᕈᒫᕐᐹᑦ.
12ᐱᒃᓴᖃᖏᑦᑐᑦ ᓂᓪᓕᐊᓕᕐᐸᑕ ᓴᐳᑎᔪᒫᕐᒪᒋᑦ,
ᐊᔪᕐᓴᕐᑐᓪᓗ ᐃᑲᔪᕐᑎᒃᓴᖃᖏᑦᑐᓪᓗᑦᑕᐅᖅ.
13ᐊᒃᓗᔪᑦ ᐱᒃᓴᖃᖏᑦᑐᓪᓗ ᓂᑲᒋᔪᒫᕐᐰᑦ,
ᐱᒃᓴᖃᖏᑦᑐᓪᓗ ᑕᕐᓂᖏᑦ ᐱᐅᓕᔪᒫᕐᐰᑦ.
14ᐃᓅᓯᖏᑦ ᓴᐳᑎᔪᒫᕐᐰᑦ ᐅᖁᒤᒃᓴᕐᑎᑕᐅᓂᕐᒥᑦ ᑲᑉᐱᐊᓱᒃᑎᑕᐅᓂᕐᒥᓪᓗ;
ᐃᓅᓯᖏᑦ ᐊᓐᓂᕐᓇᕐᑑᔪᒫᕐᒪᑕ ᑕᐅᑐᒃᑕᖓᒍᑦ.
15ᑖᓐᓇ ᐃᓅᔪᒫᕐᐳᖅ, ᒎᓗᐃ ᓰᐸᒥᑦ ᑐᓂᔭᐅᔪᒫᕐᐳᑦ ᑖᑦᓱᒧᖓ;
ᑐᒃᓯᐅᑦᔭᐅᑦᓮᓐᓇᕈᒫᕐᐳᖅ, ᖃᐅᑕᒫᓪᓗ ᓂᕐᑐᕐᑕᐅᔪᒫᕐᐳᖅ.
16ᐊᒥᒐᖏᑦᑐᓂᒃ ᐱᕈᕐᑐᓂᒃ ᓂᑭᒃᓴᖃᕈᒫᕐᐳᖅ ᓄᓇᒥ,
ᖃᖅᑬᑦ ᖄᖏᓐᓂ ᐱᕈᕐᑐᑦ ᐊᐅᓚᔪᒫᕐᐳᑦ ᓕᐸᓇᓂᑐᑦ;
ᐃᒡᓗᒐᓴᒡᔪᐊᓪᓗ ᐱᕈᕐᐸᓪᓕᐊᔪᒫᕐᐳᑦ ᐃᕕᒃᓱᒐᕐᑎᑐᑦ ᓄᓇᒦᑦᑐᑐᑦ.
17ᑖᑦᓱᒪ ᐊᑎᖓ ᐳᐃᒍᕐᑕᐅᓂᐊᓐᖏᓚᖅ ᐃᓱᖃᖏᑦᑐᒧᑦ;
ᐅᐱᒋᔭᐅᔪᒫᕐᐳᕐᓗ ᓯᕿᓂᕐᑐᑦ ᐊᑯᓂᐅᑎᒋᔪᒥᒃ!
ᐃᓄᐃᓪᓗ ᓮᒻᒪᕐᑎᑕᐅᔪᒫᕐᐳᑦ ᑖᑦᓱᒧᖓ;
ᐃᓅᖃᑎᒌᒡᔪᐊᓕᒫᓪᓗ ᓮᒻᒪᕐᑎᑕᐅᓯᒪᔪᒥᒃ ᑍᔪᒫᕐᐹᑦ.
18ᐊᑕᓂᖅ ᓂᕐᑐᕐᑕᐅᓕ, ᐃᓴᕆᐊᓕᑎᑦ ᒎᑎᖓᑦ,
ᑲᒪᓇᕐᑐᓂᒃ ᑖᓐᓇ ᑭᓯᒥ ᐱᓂᐊᕐᓂᖃᕐᑐᖅ.
19ᐊᑎᖓᓗ ᐱᓐᓇᕐᓇᕐᑐᖅ ᓂᕐᑐᕐᑕᐅᓕ ᐃᓱᖃᖏᑦᑐᒧᑦ!
ᓄᓇᕐᔪᐊᓕᒫᖅ ᑕᑕᓪᓕ ᑖᑦᓱᒪ ᑲᑦᔮᕐᓇᕐᓂᖓᓂᒃ! ᐋᒦᓐ ᐊᒻᒪ ᐋᒦᓐ.
20ᑍᕕᑎᐅᑉ ᑐᒃᓯᐊᕐᓂᖏᑦ, ᔨᓯᐅᑉ ᐃᕐᓂᖓᑕ ᐃᓱᓕᑉᐳᑦ.
Currently Selected:
ᐃᓐᖏᕈᑎᑦ 72: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
