ᐃᓐᖏᕈᑎᑦ 73
73
ᐅᖃᓕᒫᒊᑦ ᐱᖓᔪᖏᑦ
ᐃᓐᖏᕈᑎᑦ 73ᒥᑦ—89ᒧᑦ
ᒎᑎᐅᑉ ᓈᒻᒪᓈᕐᑐᒥᒃ ᐱᓇᓱᐊᕐᓂᖓ
ᐊᓴᐸᐅᑉ ᐃᓐᖏᕈᑖ
1ᓱᓕᔪᒥᒃ ᐃᓛᒃ ᒎᑎ ᐱᑦᓯᐊᕐᐳᖅ ᐃᓴᕆᐊᓕᓂᒃ,
ᐃᑦᔪᕐᓁᑦᑐᓂᒃ ᐆᒻᒪᑎᓕᖕᓂᒃ.
2ᐅᕙᖓᓕ, ᐃᑎᒐᒃᑲ ᐹᓪᓚᑲᓴᓚᐅᕐᐳᑦ;
ᐊᓪᓗᕐᓂᒃᑲᓗ ᖁᐂᔭᕿᑲᓴᓚᐅᕐᐳᑦ.
3ᐱᐅᔪᕆᔪᓂᒃ ᑐᓱᓚᐅᕋᒪ,
ᑕᑯᒐᒪ ᐱᐅᖏᑦᑐᓕᔪᑦ ᐊᔪᕐᓴᖏᑦᓯᐊᕐᓂᖏᓐᓂᒃ.
4ᑐᖁᕕᒃᓴᒥᖕᓂᒃ ᑲᑉᐱᐊᓱᖏᒻᒪᑕ,
ᑎᒥᖏᓪᓗ ᖃᓄᐃᖏᑦᓯᐊᕐᓗᑎᒃ ᓴᓐᖏᔫᓪᓗᑎᒃ.
5ᐃᓱᐊᖏᑦᑐᕐᓯᐅᓐᖏᓚᑦ ᐃᓄᐃᑦ ᐊᓯᖏᑎᑐᑦ;
ᖃᓂᒪᒐᔪᓐᖏᓚᓪᓘᓐᓃᑦ ᐃᓄᐃᑦ ᐊᓯᖏᑎᑐᑦ.
6ᑍᒤᒻᒪᑦ ᐱᐅᔪᕆᓂᖅ ᐱᐅᓴᐅᑎᑐᑦ ᐅᔭᒥᒋᕚᑦ;
ᑲᑉᐱᐊᓇᕋᓱᐊᕐᓂᕐᒥᒃ ᐅᓕᒃᓯᒪᕗᑦ ᐊᓐᓄᕌᕐᓯᒪᔪᑎᑐᑦ.
7ᐊᔪᕐᓴᖏᓐᓂᕐᒧᑦ ᑮᓇᖏᑦ ᐳᕕᑦᑐᑐᑦ ᑍᒤᑉᐳᑦ,
ᐆᒻᒪᑎᒥᒍᑦ ᐱᔪᒪᔭᖏᑕ ᐅᖓᑖᓂ ᐱᖃᕐᐳᑦ.
8ᐃᓅᖃᑎᒥᖕᓂᒃ ᒥᑕᐅᑎᒃᓴᕐᓗᑎᒃ ᐱᐅᖏᑦᑐᓂᒃ ᓂᓪᓕᐊᕗᑦ;
ᑲᑉᐱᐊᓱᒃᑎᑕᐅᔪᑦ ᐱᐅᔪᕆᑦᔪᑎᒋᓪᓗᒋᑦ ᐅᖃᖃᑎᒌᒃᐳᑦ.
9ᕿᓔᑦ ᐊᑭᕋᕐᑐᕐᓗᒋᑦ ᓂᓪᓕᐊᕗᑦ,
ᐅᖃᖏᓪᓗ ᓇᒧᑐᐃᓐᓇᖅ ᐱᓱᒃᑐᑎᑐᑦ ᓄᓇᒥ ᑍᒤᑉᐳᑦ.
10ᑍᒤᒻᒪᑦ ᐃᓄᐃᑦ ᑖᒃᑯᓄᖓ ᓵᑉᐳᑦ ᓂᕐᑐᕐᓗᒋᓪᓗ;
ᐸᓯᔭᒃᓴᐅᓂᕐᒥᒡᓗ ᓇᓂᓯᖏᓐᓇᒥᒃ ᓈᓚᒃᐳᑦ ᑖᒃᑯᓂᖓ.
11ᐅᖃᕐᓗᑎᒡᓗ, “ᖃᓄᖅ ᒎᑎ ᖃᐅᔨᒪᔪᓐᓇᕐᐹ?
ᖁᑦᓯᖕᓂᕐᐹᖑᔪᖅ ᖃᐅᔨᔪᓐᓇᕐᓂᐊᕋᓗᐊᕐᐹ?”
12ᑕᑯᒋᑦ, ᑖᒃᑯᐊ ᐱᐅᖏᑦᑐᑦ ᑍᒤᓕᐅᕐᐳᑦ;
ᐃᓱᒪᒥᖕᓂᒃ ᐃᓅᔪᑦ, ᐊᔪᕐᓴᕈᓐᓃᕐᐸᓪᓕᐊᓗᑎᒡᓗ.
13ᐃᓛᓕ, ᑕᒪᐅᖓᑐᐃᓐᓇᖅ ᐆᒻᒪᑎᒐ ᐃᑦᔪᕐᓁᑎᓚᐅᕐᐸᕋ,
ᐊᒡᒐᒃᑲᓗ ᐅᐊᓴᓚᐅᕐᐸᒃᑲ ᐸᓯᔭᒃᓴᐅᖏᓐᓂᕐᒧᑦ.
14ᐅᓪᓗᖅ ᓈᓪᓗᒍ ᐃᓱᒪᔮᕐᑎᑕᐅᓚᐅᕐᐳᖓ,
ᐅᓪᓛᑕᒫᓪᓗ ᐸᓯᔭᐅᓂᕐᒧᑦ ᓱᒋᐊᕐᑕᐅᕙᒃᓗᖓ.
15ᐅᖃᓚᐅᕈᒪ, “ᐃᒫᒃ ᐅᖃᓛᕐᓂᐊᕐᐳᖓ,”
ᑕᕝᕙ ᓱᓕᖏᑦᑐᒥᒃ ᐅᖃᕋᔭᕐᐳᖓ ᕿᑐᕐᖓᕕᑦ ᑭᖑᕚᖏᓐᓄᑦ.
16ᐃᓱᒪᓕᕌᖓᒪ ᑕᒪᑐᒥᖓ ᑐᑭᓯᔪᒪᓪᓗᖓ,
ᐅᕙᓐᓄᑦ ᐊᔪᕐᓇᓗᐊᕐᐸᓚᐅᕐᐳᖅ ᑕᒪᓐᓇ,
17ᑭᓯᐊᓂ ᒎᑎᐅᑉ ᐃᑦᔪᕐᓁᑦᑐᕕᖁᑎᖓᓄᑦ ᐃᑎᕋᒪ;
ᑕᕝᕙ ᐃᓱᓕᕝᕕᒃᓴᖏᑦ ᑐᑭᓯᓕᑍᓐᓇᓚᐅᕐᐸᒃᑲ.
18ᐃᓛᒃ ᓱᓕᔪᒥᒃ ᐃᓕᕙᑎᑦ ᖁᐂᑦᑖᕐᓇᕐᑐᓄᑦ;
ᐃᒋᓪᓗᒋᓪᓗ ᑲᑕᖁᓪᓗᒋᑦ ᐊᓯᕈᕐᑕᐅᕕᖕᒧᑦ.
19ᑕᕝᕔᓐᓇᖅ ᐊᑯᓂᐅᖏᑦᑐᖅ ᐊᓯᕈᕐᑕᐅᕗᑦ,
ᐊᑕᖏᕐᓱᑎᒃ ᓄᖑᑕᐅᕗᑦ ᑲᑉᐱᐊᓇᕐᑐᒧᑦ.
20ᓲᕐᓗ ᓯᓐᓇᒃᑑᒪᒥᑦ ᑐᐸᒃᑐᑐᑦ ᑍᒤᑉᐳᑦ,
ᑍᒫᒃ ᐊᑕᓃᖅ ᒪᑭᒃᑯᕕᑦ, ᑕᐅᑦᑐᖏᑦ ᐊᓯᐅᔪᒫᕐᐳᑦ.
21ᑍᒫᒃ ᑕᕐᓂᕋ ᕿᒃᓵᓚᐅᕐᐳᖅ, ᐆᒻᒪᑎᒃᑯᓪᓗ ᐋᓐᓂᕐᓱᖓ.
22ᓯᓔᑦᑑᓚᐅᕋᒪ ᖃᐅᔨᒪᓇᖓᓗ,
ᓂᕐᔪᑎᑎᑐᑦ ᖃᐅᔨᒪᓚᐅᓐᖏᓚᖓ ᐃᓕᖕᓂᒃ.
23ᐃᓕᖕᓄᓪᓕ ᖃᓂᑦᑑᖏᓐᓇᓚᐅᕐᐳᖓ;
ᐊᒡᒐᒃᑯᑦ ᑕᓕᕐᐱᒃᑯᑦ ᑎᒍᒥᐊᓚᐅᕋᕕᖓ.
24ᑕᓯᐅᕋᕕᖓ ᐅᖃᐅᑦᔪᐃᖃᑦᑕᕐᓂᒃᑯᑦ,
ᐱᓐᓇᕐᓇᕐᑐᕐᔪᐊᒧᓪᓗ ᐃᓚᓕᐅᕈᒫᕋᕕᖓ.
25ᑭᓇᒥᒃ ᐊᓯᖕᓂᒃ ᕿᓚᖕᒥ ᐱᖃᕐᐳᖔ? ᐃᕝᕕᑑᕗᖅ,
ᐊᓯᖕᓂᒃ ᐱᔪᒪᔭᓐᓂᒃ ᓄᓇᒥ ᐱᑕᖃᓐᖏᓚᖅ.
26ᑎᒥᒐ ᐆᒻᒪᑎᒐᓗ ᐊᔪᓕᓕᕋᓗᐊᕐᐴᒃ,
ᒎᑎᓕ ᐆᒻᒪᑎᒪ ᓴᓐᖏᔫᑦᔪᑎᒋᕚ ᐱᔪᓐᓇᐅᑎᒋᓪᓗᒍᓗ ᐃᓱᖃᖏᑦᑐᒧᑦ.
27ᐃᓛᒃ ᐃᓕᖕᓂᑦ ᐅᖓᓯᒃᑐᑦ ᑖᒃᑯᐊ ᐊᓯᐅᔪᒫᕐᐳᑦ;
ᓄᖑᑎᑦᓱᒫᕋᕕᒋᑦ ᐃᓕᖕᓂᒃ ᕿᒤᓪᓗᑎᒃ ᐊᓯᓐᓂᐊᕐᓯᒪᔪᑦ.
28ᐅᕙᓐᓄᓪᓕ ᐱᐅᕗᖅ ᒎᑎᒧᑦ ᖃᓂᑦᑑᓗᖓ;
ᐊᑕᓂᖅ ᒎᑎ ᕿᒫᕕᒃᓴᓕᐊᕆᓯᒪᒐᒃᑯ,
ᐅᖃᐅᓯᖃᕈᓐᓇᖁᓪᓗᖓ ᐱᓇᓱᐊᕐᓂᕆᓯᒪᔭᓕᒫᕐᓂᒃ.
Currently Selected:
ᐃᓐᖏᕈᑎᑦ 73: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
