ᐃᓐᖏᕈᑎᑦ 71
71
ᒥᓮᐊᓯᐅᑉ ᐊᑕᓂᐅᓂᖓ ᓯᓚᕐᔪᐊᕐᒥ ᓂᕐᑐᕐᓇᕐᓂᖓᓗ
ᓲᓗᒨᓂᐅᑉ ᐃᓐᖏᕈᑖ
1ᐊᑕᓃᖅ, ᐃᓕᖕᓄᑦ ᕿᒫᒐᒪ;
ᑲᓐᖑᓇᕐᑐᒦᑎᓚᐅᕐᓯᒪᑦᑍᓕᓐᖓ!
2ᐃᓱᐊᕐᑐᓕᓂᕐᓄᑦ ᓴᐳᑎᓚᐅᓐᖓ ᐊᓐᓇᐅᑎᓗᖓᓗ;
ᓯᐅᑏᑦ ᒪᓂᓚᐅᕈᒃ ᐅᕙᓐᓄᑦ, ᐱᐅᓕᓗᖓᓗ!
3ᕿᒫᕕᒃᓴᕆᓚᒋᑦ ᓲᖑᔪᖅ, ᑍᒫᓐᖓᑦ ᐅᑎᕐᑕᕐᕕᒃᓴᕋ;
ᐱᖁᔨᓗᑎᑦ ᐱᐅᓕᓚᐅᓐᖓ, ᕾᕐᑐᕆᒐᒃᑭᑦ ᓴᐳᑦᔭᐅᕕᒃᓴᕆᓪᓗᑎᓪᓗ.
4ᒎᑎᒐ, ᐊᓐᓇᐅᑎᓚᐅᓐᖓ, ᐱᐅᖏᑦᑐᓕᔪᑦ ᐊᒡᒐᖏᓐᓂᑦ,
ᐃᓱᐊᖏᑦᑐᓕᔪᑦ ᐊᒡᒐᖏᓐᓂᑦ ᓂᑲᒍᓱᖏᑦᑐᓂᓪᓗ.
5ᓂᕆᐅᒋᔭᖃᐅᑎᒋᒐᒃᑭᑦ, ᐃᕝᕕᑦ ᐊᑕᓃᖅ,
ᑕᑎᒋᕚᒋᑦ ᐊᑕᓃᖅ, ᑍᒪᓐᖓᑦ ᐃᓅᓱᒃᑑᓂᓐᓂᑦ.
6ᐃᓕᖕᓄᑦ ᒪᑭᑕᑎᑕᐅᕗᖓ ᐃᓅᓕᕐᓂᓐᓂᑦ;
ᐊᓈᓇᒪ ᐃᒡᓕᐊᖓᓂᑦ ᐊᓂᑎᓚᐅᕋᕕᖓ.
ᑍᒪᓐᖓᑦ ᓂᕐᑐᐃᓐᓇᕐᓂᐊᕐᐸᒋᑦ.
7ᐅᓄᕐᑐᓄᑦ ᑲᒪᓂᐊᕈᑕᐅᕙᒃᐳᖓ,
ᐃᕝᕕᓪᓕ ᓴᓐᖏᔫᓪᓗᑎᑦ ᕿᒫᕕᒃᓴᕆᕙᒋᑦ.
8ᖃᓂᕋ ᑕᑕᑎᑉᐸᑦ ᐃᓕᖕᓂᒃ ᓂᕐᑐᐃᓂᕐᒥᒃ,
ᐱᓐᓇᕐᓇᕐᓂᕐᔪᐊᕐᓄᓪᓗ ᖃᐅᑕᒫᑦ.
9ᐃᒃᓯᓐᓇᕐᑍᓕᓐᖓ ᐃᓄᑐᖃᐅᓕᕐᓂᓐᓄᑦ;
ᕿᒪᒃᑍᓕᓐᖓ ᑎᒥᒐ ᓄᑭᑭᑦᑑᓕᕐᐸᑦ.
10ᐊᑭᕋᕐᑐᕐᑎᒪ ᐅᖃᕐᓂᕐᓘᑎᒋᖕᒪᖓ,
ᐅᕙᓐᓂᒃ ᐃᓱᒪᒃᓴᕐᓯᐅᖃᑎᒌᒃᐳᑦ ᑐᖁᑦᓱᒪᓪᓗᖓ.
11ᐅᖃᕐᓗᑎᒡᓗ, “ᒎᑎᐅᑉ ᕿᒪᒃᐹ;
ᐊᑏ ᑲᑐᑎᓗᒍ ᓵᓚᒋᓚᕗᑦ, ᓴᐳᑦᔨᔨᒃᓴᖃᕈᓐᓃᕐᑐᕐᖑᓇ.”
12ᒎᑏ, ᐅᖓᓯᖕᓂᐊᕐᓇᒃ ᐅᕙᓐᓂᑦ;
ᒎᑎᒐ, ᑐᐊᕕᕐᓗᑎᑦ ᐃᑲᔪᕆᐊᓚᐅᓐᖓ!
13ᓇᓗᓕᕐᑎᓚᐅᒃᑭᑦ, ᓄᖑᓪᓗᒋᓪᓗ ᐃᓅᓯᓐᓂᒃ ᐊᑭᕋᕐᑐᕐᑎᐅᔪᑦ;
ᐅᓕᒃᓯᒪᓚᐅᒃᑭᑦ ᑲᓐᖑᓱᖕᓂᕐᒥᒃ ᐅᐱᒋᔭᐅᖏᓐᓂᕐᒥᒡᓗ.
14ᐅᕙᖓᓕ ᑍᒪᓐᖓᑦ ᓂᕆᐅᖕᓂᐊᕐᐳᖓ,
ᓂᕐᑐᕈᒪᕙᒋᓪᓗ ᑍᒪᓐᖓᑦ ᐊᖏᓕᕙᓪᓕᐊᔪᒥᒃ.
15ᖃᓂᓐᓄᑦ ᐅᖃᐅᓯᕆᔪᒪᕙᕋ ᐃᓱᐊᕐᑐᓕᓃᑦ,
ᐱᐅᓕᒃᓯᓃᓪᓗ ᐅᓪᓗᖅ ᓈᓗᒍ,
ᖃᖓᒃᑯᑦ ᐃᓱᓕᕝᕕᒃᓴᖃᕐᒪᖔᑕ ᖃᐅᔨᒪᖏᓐᓇᒪ.
16ᑍᒤᓕᐅᕈᒪᕗᖓ ᐊᑕᓂᐅᑉ ᒎᑎᐅᑉ ᓴᓐᖏᓂᖓ ᐊᑐᕐᓗᒍ;
ᐃᓱᐊᕐᑐᓕᓃᑦ ᓂᓪᓕᐊᑦᔪᑎᒋᔪᒪᕙᕋ, ᐃᕝᕕᑐᐊᖅ ᐊᓯᖃᖏᓐᓇᕕᑦ.
17ᒎᑏ, ᐊᔪᕆᕐᑐᕋᕕᖓ ᑍᒪᓐᖓᑦ ᐃᓅᓱᒃᑑᓂᓐᓂᑦ,
ᐱᓂᐊᕐᓂᑎᓪᓗ ᑲᒪᓇᕐᑐᑦ ᓱᓕ ᐅᓪᓗᒥ ᐅᖃᐅᓯᕆᕙᒃᑲ.
18ᓱᓕᓗ ᐃᓄᑐᖃᐅᓕᕈᒪ ᓂᐊᖁᕋᓗ ᖃᑯᕐᑕᐅᓕᕐᐸᑦ,
ᒎᑏ, ᕿᒪᖕᓂᐊᕐᓇᖓ, ᐊᔪᒐᖃᖏᓐᓂᕐᓂᒃ ᐅᖃᐅᓯᖃᓚᐅᖅᑳᕐᑎᓐᓇᖓ
ᐱᔪᓐᓇᕐᓂᕐᓂᒡᓗ ᑭᖑᕚᕇᓕᒫᓄᑦ ᐃᓅᔪᒫᕐᑐᓄᑦ.
19ᓱᓕᓗ ᐃᓱᐊᕐᑐᓕᓃᑦ ᖁᑦᓯᓗᐊᕐᒪᑦ ᕿᓚᖕᒥ ᒎᑏ.
ᐊᖏᔪᐊᓗᖕᓂᒃ ᑲᒪᓇᕐᑐᓕᓂᕐᓂᒃ ᐱᓇᓱᐊᕐᓯᒪᕗᑎᑦ,
ᒎᑏ, ᑭᓇ ᐃᓕᖕᓂᒃ ᐊᑦᔨᖃᕐᐹ?
20ᖃᐅᔨᑎᓚᐅᕐᐸᕐᒪ ᐊᖏᔪᓂᒃ ᐱᔭᕆᐊᑐᔪᓂᒡᓗ ᐅᖁᒤᒃᓴᐅᑎᓂᒃ,
ᒪᑭᑎᓐᓂᐊᕆᕙᕐᒪ; ᖃᑭᑎᓐᓂᐊᕐᓗᖓᓗ ᓄᓇᐅᑉ ᐃᑎᓂᕐᐹᖓᓂᑦ.
21ᐊᔪᖏᓐᓂᕋ ᓱᓕ ᐊᖏᔪᕈᕐᑎᒃᑲᓐᓂᕐᓂᐊᕐᐸᑦ,
ᓮᒻᒪᕐᑎᒃᑲᓐᓂᕐᓂᐊᕆᕙᕐᒪᓗ.
22ᓱᓕ ᕼᐊᕐᐱᒧᑦ ᓂᕐᑐᕈᒪᕙᒋᑦ ᓱᖁᓯᔪᐃᑦᑑᓃᑦ ᐱᓪᓗᒍ, ᒎᑎᒋᒐᒃᑭᑦ;
ᐃᓐᖏᕈᒪᕗᖓ ᐃᓕᖕᓄᑦ ᓂᕐᑐᕐᓗᑎᑦ ᑯᑭᑦᑕᐸᐅᑎᐅᔭᒥᒃ ᐊᑐᕐᓗᖓ,
ᐃᓴᕆᐊᓕᑎᑦ ᐃᑦᔪᕐᓁᑦᑐᖁᑎᒋᖕᒪᑎᑦ.
23ᖃᓂᕋ ᕾᒐᓛᕐᓂᐊᕐᐳᖅ ᖁᕕᐊᓱᖕᓂᐊᕐᒧᑦ,
ᐃᓕᖕᓄᑦ ᐃᓐᖏᓕᕈᒪ ᓂᕐᑐᕐᓗᑎᑦ;
ᑕᕐᓂᓐᓄᓪᓗᑦᑕᐅᖅ ᐱᐅᓕᓚᐅᕐᑕᕐᓄᑦ.
24ᐅᖃᕋᓗ ᓂᓪᓕᐊᓂᐊᕆᕗᖅ ᐃᓱᐊᕐᑐᓕᓂᕐᓂᒃ ᐅᓪᓗᖅ ᓈᓗᒍ;
ᐊᑭᕋᒃᑲ ᑲᓐᖑᓱᒃᑎᑕᐅᖕᒪᑕ ᓇᓗᓕᕐᓗᑎᒡᓗ ᐅᕙᓐᓂᒃ ᐋᓐᓂᕐᓯᔪᒪᔪᑦ.
Currently Selected:
ᐃᓐᖏᕈᑎᑦ 71: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
