ᐃᓐᖏᕈᑎᑦ 65
65
ᒎᑎᒥᒃ ᓂᕐᑐᐃᓂᖅ ᐱᐅᓕᔨᐅᓂᖓ ᐱᒃᓴᖃᕐᑎᑦᓯᓂᖓᓗ ᐱᓪᓗᒋᑦ
ᑍᕕᑎᐅᑉ ᐃᓐᖏᕈᑖ
1ᒎᑏ, ᓂᕐᑐᕐᑕᐅᓂᐅᑉ ᐅᑕᖅᑭᕚᑎᑦ ᓮᐅᓂᒥ;
ᐃᓕᖕᓄᓪᓗ ᐊᖏᒻᒪᕆᒍᑕᐅᓯᒪᔪᑦ ᐱᓂᐊᕈᑕᐅᔪᒫᕐᐳᑦ.
2ᑐᓵᔪᑎᑦ ᑐᒃᓯᐊᕐᓂᕐᓂᒃ,
ᑎᒥᖃᕐᑐᓕᒫᑦ ᐃᓕᖕᓄᑦ ᕾᔪᒫᕐᐳᑦ.
3ᐱᐅᖏᑦᑐᓕᓂᕐᒧᑦ ᓵᓚᐅᓯᒪᓕᕐᑎᓪᓗᑕ,
ᓈᒻᒪᖏᑦᑐᓕᓂᑦᑕ ᐃᓱᒪᒋᔭᐅᔪᓐᓁᕐᑕᐅᑦᔪᑎᒃᓴᖏᓐᓂᒃ ᑐᓂᓯᕗᑎᑦ.
4ᐃᓄᒃ ᖁᕕᐊᓱᒍᑎᒃᓴᖃᕐᐳᖅ ᓂᕈᐊᕐᑍᑦ, ᐊᐅᓚᑦᓯᓂᕐᓄᓪᓗ ᐃᓕᔧᑦ,
ᐃᓂᖃᖁᓪᓗᒍ ᐃᒡᓗᕕᑦ ᑐᕐᓲᖓᓂ.
ᑕᕝᕙ ᓈᒻᒪᒃᓯᔪᒫᕐᐳᒍᑦ ᐃᒡᓗᕕᑦ ᐱᐅᔪᐊᓘᓂᖓᓄᑦ,
ᑐᒃᓯᐊᕐᕕᒡᔪᐊᒥ ᐃᑦᔪᕐᓁᑦᑐᖁᑎᖕᓂ!
5ᐱᓂᐊᕐᓂᕐᔪᐊᒃᑯᑦ ᑲᒪᓇᕐᑐᑎᒍᑦ ᐃᓱᐊᕐᑐᓕᓂᒃᑯᓪᓗ ᑭᐅᒐᑦᑎᒍᑦ,
ᒎᑏ ᐱᐅᓕᔭᐅᕕᕗᑦ, ᓂᕆᐅᖕᓂᖃᕈᑎᒋᔭᐅᕗᑎᑦ ᓄᓇᕐᔪᐊᕐᒥᐅᓕᒫᓂᑦ,
ᓄᓇᕐᔪᐊᑉ ᐃᓱᐊ ᑎᑭᓪᓗᒍ, ᐃᒪᕐᔪᐊᓪᓗ ᐅᖓᓯᖕᓂᕐᐹᖏᓐᓄᑦ;
6ᖃᖅᑬᑦ ᓴᓇᓚᐅᕐᐸᑎᑦ ᐱᔪᓐᓇᕐᓂᕐᓄᑦ,
ᐊᔪᒐᖃᖏᓐᓂᕐᒥᒡᓗ ᐊᓐᓄᕌᕐᓯᒪᕗᑎᑦ.
7ᐃᒪᕐᔪᐃᑦ ᒥᕿᑦᑕᕐᕙᓗᖏᑦ ᓂᐸᖏᕐᑎᑉᐸᑎᑦ,
ᐃᖏᐅᓕᖕᓂᖏᑕ ᒥᑭᑦᑕᕐᕙᓗᒡᔪᐊᖏᑦ,
ᐃᓅᖃᑎᒌᓪᓗ ᐅᐃᒪᔮᕐᓂᖏᑦ ᓄᖅᑲᕐᑎᑉᐸᑎᑦ.
8ᐅᖓᓯᖕᓂᕐᐹᓂᓗ ᐃᓂᖃᕐᑐᑦ ᓇᓗᓁᒃᑯᑕᑎᑦ ᑲᑉᐱᐊᒋᕔᑦ;
ᐅᓪᓛᑉ ᐅᓐᓄᐊᓪᓗ ᐃᖏᕐᕋᓂᖏᑦ ᖁᕕᐊᓱᒃᑎᑉᐸᑎᑦ.
9ᓄᓇᕐᔪᐊᖅ ᑕᑯᔭᕐᑐᕐᐸᑦ ᐃᒻᒥᕐᑐᕐᓗᒍᓗ,
ᐊᖏᔪᒥᒡᓗ ᐊᔪᕐᓴᓐᖏᑎᕐᔪᐊᕐᓗᒍ;
ᒎᑎᐅᑉ ᑰᖁᑎᖓ ᐃᒪᕐᒥᒃ ᑕᑕᑉᐳᖅ;
ᓂᕿᒃᓴᖃᕐᑎᑦᓯᓪᓗᑎᓪᓗ, ᑕᒪᓐᓇ ᐅᐸᓗᖎᔭᕐᓯᒪᒐᕕᐅᒃ.
10ᐱᕈᕐᓰᕕᖕᒥ ᐃᑎᕐᓮᑦ ᐃᒻᒥᕐᑐᑦᓯᐊᕐᐸᑎᑦ,
ᐃᑎᕐᓮᓪᓗ ᒪᓂᕋᓐᖑᕐᑎᓪᓗᒋᑦ;
ᐊᕿᓕᑎᕐᓗᒍᓗ ᓯᓚᓗᖕᒧᑦ, ᐱᕈᕐᐸᓪᓕᐊᔪᓪᓗ ᓮᒻᒪᕐᑎᑉᐸᑎᑦ.
11ᐊᕐᕌᒍ ᓂᐊᖂᓯᕐᐸᑦ ᐱᑦᓯᐊᕐᓂᕐᓂᒃ,
ᐊᒃᓴᓗᐊᓕᖕᒧᑦ ᐊᖅᑯᓵᕐᑕᑎᑦ ᑯᑐᒃᐳᑦ ᐊᒥᒐᕐᓯᖏᓐᓂᕐᒥᒃ.
12ᐃᓄᖃᖏᑦᑐᒥ ᓇᑎᕐᓁᑦ ᑯᓯᕐᕕᒋᕙᑎᑦ,
ᑕᕝᕙ ᐱᖑᐊᕐᔪᐃᑦ ᖁᕕᐊᓱᓕᕐᐳᑦ ᓇᓂᓕᒫᖅ.
13ᓇᑎᕐᓁᑦ ᑕᑕᑉᐳᑦ ᓰᐱᓂᒃ ᐊᓐᓄᕌᕐᑕᐅᓯᒪᔪᑎᑐᑦ;
ᓇᕐᓮᑦ ᑕᑕᒃᑭᕗᑦ ᐱᕈᕐᑐᓂᒃ ᓂᐊᖂᔭᒃᓴᓂᒃ,
ᕾᒐᓛᕐᐳᑦ ᖁᕕᐊᓱᖕᓂᕐᒧᑦ, ᐃᓐᖏᖃᑎᒌᒡᓗᑎᒡᓗ.
Currently Selected:
ᐃᓐᖏᕈᑎᑦ 65: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
