ᐃᓐᖏᕈᑎᑦ 49
49
ᓯᓔᑦᑐᑦ ᑕᑎᒋᔭᖏᑦ
ᐃᓐᖏᕐᑏᑦ ᑲᒪᔨᖏᓐᓄᑦ ᑰᕋᐅᑉ ᐃᕐᓂᖏᑕ ᐃᓐᖏᕈᑖ
1ᐃᓄᓕᒫᖑᔪᓯ, ᐅᓇ ᑐᓴᕐᓯᐅᒃ!
ᓈᓚᒋᑦᓯ ᓄᓇᕐᔪᐊᕐᒥ ᓄᓇᖃᕐᑐᓕᒫᖑᔪᓯ,
2ᐊᔪᕐᑐᓪᓗ ᐊᔪᖏᑦᑐᓪᓗ, ᐊᒃᓗᐃᑦᑐᓪᓗ ᐊᒃᓗᔪᓪᓗ ᐊᑕᐅᑦᓯᒃᑯᑦ.
3ᖃᓂᕋ ᓂᓪᓕᐊᓂᐊᕐᒪᑦ ᐅᖃᐅᓯᕐᓂᒃ ᓯᓚᑐᔪᓂᒃ.
ᐆᒻᒪᑎᒐᓗ ᐃᓱᒪᒃᓴᕐᓯᐅᕈᑎᓂᒃ ᑐᓂᓯᓂᐊᕐᒪᑦ ᑐᑭᓯᑦᔪᑎᒃᓴᓂᒃ.
4ᓯᐅᑎᒐ ᒪᓂᔪᒪᕙᕋ ᐅᖃᐅᓯᐅᖃᑦᑕᕐᓯᒪᔪᒧᑦ;
ᕼᐋᕐᐱᒧᑦ ᓄᖃᕐᓯᕋᓕᖕᒧᑦ ᓇᓗᓁᕈᒪᕙᕋ ᐅᖃᐅᓯᖅ ᐃᔨᕐᓯᒪᔪᖅ.
5ᓱᖕᒪᑦ ᐅᓪᓗᓂᒃ ᐱᐅᖏᑦᑐᓂᒃ ᓯᕘᕋᔭᕆᐊᖃᕐᐳᖓ,
ᐱᐅᖏᑦᑐᓕᓂᕐᒧᑦ ᐅᐃᕕᕆᒃᓯᔪᓂᑦ ᑬᕙᓪᓚᒃᑕᐅᓯᑎᓪᓗᖓ?
6ᐊᔪᕐᓴᖏᓐᓂᕐᒥᖕᓂᒃ ᑕᑎᖃᕐᑐᑦ
ᐃᓄᒋᐊᒃᑐᓂᓗ ᐊᒃᓗᐃᓐᓂᕐᒥᖕᓂᒃ ᐱᐅᔪᕆᑦᔪᑎᖃᕐᑐᑦ.
7ᓇᓪᓕᐊᑦ ᐃᓅᓯᕐᒥᓂᒃ ᐱᐅᓕᒃᓯᔪᓐᓇᓐᖏᓚᖅ,
ᐃᓅᓯᖓᑕᓗ ᐅᑎᕐᑎᑕᐅᑦᔪᑎᒃᓴᖓᓂᒃ ᒎᑎᒧᑦ ᑐᓂᓯᔪᓐᓇᕋᓂ,
8ᐊᑭᑐᓗᐊᕐᒪᑦ ᑕᕐᓂᖏᑕ ᐱᐅᓕᔭᐅᑦᔪᑎᒃᓴᖏᑦ,
ᐊᑭᓕᐅᑎᔪᒃᓮᓪᓗ ᑍᒪᓐᖓᑦ ᓈᒻᒪᖏᒻᒪᑕ.
9ᑍᒫᒃ ᑕᕝᕙ ᐃᓅᔭᕆᐊᖃᕐᐳᖅ ᐃᓱᖃᖏᑦᑐᒧᑦ,
ᐃᑎᕐᓵᓗᖕᒥᒡᓗ ᖃᐅᔨᓐᖏᓮᓐᓇᕐᓗᓂ.
10ᑕᑯᓐᓇᕐᒪᑕ ᓯᓚᑐᔪᑦᑕᐅᖅ ᑐᖁᓂᖏᓐᓂᒃ;
ᑍᒫᒃᑕᐅᖅ ᓯᓔᑦᑐᑦ ᐃᓕᓯᒤᑦᑐᓪᓗ ᑐᖁᒋᕗᑦ,
ᐊᒃᓗᐃᑦᔪᑎᑎᒃ ᕿᒪᒡᓗᒋᑦ ᐊᓯᒥᖕᓄᑦ.
11ᐃᓗᕕᕐᑎᒃ ᑍᒪᓐᖓᑦ ᐃᓂᒋᓂᐊᕐᐰᑦ ᐃᓱᖃᖏᑦᑐᒧᑦ,
ᐃᓂᒋᓂᐊᕐᐰᓪᓗ ᑭᖑᕚᕇᑦ ᓈᓴᒐᒃᓴᐅᖏᑦᑐᑦ ᑎᑭᓪᓗᒋᑦ;
ᓄᓇᑎᒡᓗ ᐊᑎᖃᕐᑎᑉᐰᑦ ᓇᖕᒥᓂᖅ ᐊᑎᕐᒥᖕᓂᒃ.
12ᑍᒤᒻᒪᑦ ᐃᓄᒃ ᐅᐱᓐᓇᕐᑑᒐᓗᐊᕐᓗᓂ ᑍᒤᑦᓮᓐᓇᕈᓐᓇᓐᖏᓚᖅ;
ᐆᒪᔪᑦ ᐊᑦᔨᒋᕔᑦ ᑐᖁᕙᒃᑐᑦ.
13ᑍᒫᒃ ᑕᕝᕙ ᓯᓔᑦᑐᑦ ᐱᐅᓯᖓᑦ,
ᒪᓕᒃᑎᖏᑕᓗ, ᐅᖃᐅᓯᕆᕙᒃᑕᖏᓐᓂᒃ ᓈᒻᒪᒃᓴᕐᑐᑦ. ᓰᓚ
14ᓰᐱᑎᑐᑦ ᑐᖁᖓᔪᑦ ᐃᓂᖓᓂ ᐃᓂᒃᓴᖃᕐᐳᑦ;
ᑐᖂᑉ ᓂᕿᒋᔪᒫᕐᐰᑦ;
ᓱᓕᑦᓯᐊᕐᑐᓪᓕ ᐊᖓᔪᖅᑳᖑᔪᒫᕐᐳᑦ ᑖᒃᑯᓄᖓ ᐅᓪᓛᒥ;
ᐃᓂᖁᓇᕐᓂᖏᑦ ᓱᕈᕈᒫᕐᐳᑦ ᐃᓗᕕᕐᒥ,
ᐊᔪᖏᓐᓂᕆᓚᐅᕐᑕᑎᒃ ᐅᖓᓯᒋᓕᕐᓗᒋᑦ.
15ᒎᑎᐅᓪᓕ ᑕᕐᓂᕋ ᐅᑎᕐᑎᑦᓱᒫᕐᐹ
ᐃᓗᕕᐅᑉ ᐱᔪᓐᓇᕐᓂᖓᓂᑦ, ᐃᓚᓕᐅᕈᒫᕐᓗᖓᓗ. ᓰᓚ
16ᑲᑉᐱᐊᓱᖕᓂᐊᕐᓇᒃ ᑭᓇ ᐊᒃᓗᐃᑦᑑᓕᕋᓗᐊᕐᐸᑦ,
ᐃᒡᓗᖃᓕᕋᓗᐊᕐᐸᓪᓘᓐᓃᑦ ᑕᑯᒥᓇᕐᑐᐊᓗᖕᒥᒃ;
17ᑐᖁᒍᓂᓕ ᓱᓇᒥᒡᓘᓐᓃᑦ ᓇᒃᓴᕐᓂᐊᖏᒻᒪᑦ;
ᐱᐅᔪᐊᓘᓂᖓᑕᓗ ᒪᓕᖕᓂᐊᓐᖏᓛ.
18ᐃᓅᓂᕐᒥᓂ ᐃᒻᒥᓂᒃ ᓮᒻᒪᕐᑎᓯᒪᓂᕋᕐᐳᖅ
ᐊᔪᕐᓴᓐᖏᓕᕈᕕᑦ ᐃᓄᖕᓂᑦ ᓂᕐᑐᕐᑕᐅᓂᐊᕋᕕᑦ,
19ᐊᑖᑕᖓᑕ ᑭᖑᕚᖏᓐᓂ ᐃᓚᓕᐅᑎᔭᕐᑐᕐᓂᐊᐳᖅ;
ᖃᐅᒪᔪᒥᒃ ᑕᑯᓂᐊᕈᓐᓃᕐᓗᑎᒃ.
20ᐃᓄᒃ ᐅᐱᒋᔭᐅᔪᖅ, ᓱᓕ ᖃᐅᔨᓐᖏᓚᖅ,
ᓂᕐᔪᑎᑦ ᐊᑦᔨᒋᕔᑦ ᑐᖁᕙᒃᑐᑦ.
Currently Selected:
ᐃᓐᖏᕈᑎᑦ 49: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
