ᐃᓐᖏᕈᑎᑦ 45
45
ᒥᓮᐊᓯᐅᑉ ᓄᓕᐊᒃᓴᖓᑕᓗ ᑲᑦᔮᕐᓇᕐᓂᕐᔪᐊᖓ
ᐃᓐᖏᕐᑏᑦ ᑲᒪᔨᖓᓐᓄᑦ ᑰᕋᐅᑉ ᐃᕐᓂᖏᑕ ᐃᓐᖏᕈᑖ ᐅᖓᓂᕐᒧᑦ
1ᐆᒻᒪᑎᒐ ᑕᑕᑉᐳᖅ ᐅᖃᐅᓯᒃᓴᒥᒃ ᐱᐅᔪᒥᒃ;
ᑎᑎᖅᑲᓂᒡᓗ ᐊᑐᐊᕐᓯᕗᖓ ᐊᖓᔪᖅᑳᕐᔪᐊᖅ ᐱᑦᔪᑎᒋᓪᓗᒍ;
ᐅᖃᕋ ᑎᑎᕋᑦᓯᐊᕈᓐᓇᕐᑐᑐᑦ ᑍᒤᑉᐳᖅ.
2ᐊᖑᑎᓕᒫᓂᑦ ᐊᖑᑎᑦᓯᐊᖑᓂᕐᐹᖑᕗᑎᑦ;
ᐱᑦᓯᐊᕈᓐᓇᕐᓂᖅ ᑯᕕᔭᐅᓯᒪᕗᖅ ᖃᓂᕐᓄᑦ;
ᑍᒤᒻᒪᑦ ᒎᑎᐅᑉ ᓮᒻᒪᕐᑎᑉᐹᑎᑦ ᐃᓱᖃᖏᑦᑐᒧᑦ.
3ᓴᕕᒡᔪᐊᑦ ᐴᖓᓄᑦ ᐃᓕᓕᕈᒃ ᕿᑎᕐᓄᑦ, ᐊᔪᖏᑦᑐᕐᔪᐊᖑᔪᑎᑦ,
ᑕᑯᒥᓇᕐᑐᐊᓘᓕᕆᑦ ᐅᐱᓐᓇᕐᑐᕐᔪᐊᖑᓗᑎᓪᓗ.
4ᐃᑭᒪᓗᑎᑦ ᐃᖏᕐᕋᓕᕆᑦ ᐊᖓᔪᖅᑳᕐᔪᐊᖑᓂᕐᐱᑦ
ᐅᐱᓐᓇᕐᓂᖓᓄᑦ ᓵᓚᖃᕐᓂᕐᓄᑦ ᓱᓕᓂᕐᒧᓪᓗ,
ᒥᑭᒡᓕᑎᕐᓯᒪᓂᕐᓗ, ᐃᓱᐊᕐᑐᓕᓂᕐᓗ ᐱᑦᔪᑎᒋᓗᒋᑦ;
ᐊᒡᒐᑎᓪᓗ ᑕᓕᕐᐲᑦ ᑲᒪᓇᕐᑐᕐᔪᐊᓂᒃ ᐱᓇᓱᐊᓕᕐᓕᑦ.
5ᖃᕐᔪᑎᑦ ᐃᐱᒃᑑᕗᑦ ᐆᒻᒪᑎᒧᑦ ᐊᖓᔪᖅᑳᕐᔪᐊᑉ ᐊᑭᕋᖏᓐᓄᑦ;
ᐃᓄᐃᑦ ᐅᕐᕈᕗᑦ ᐱᔪᓐᓇᕐᓂᕐᓄᑦ.
6 #
ᐄᑉᕈᐃᓄᑦ 1:8,9. ᒎᑏ, ᐃᒃᓯᕙᐅᑕᕐᔪᐊᑦ ᑍᒤᓕᖓᓂᐊᕐᐳᖅ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ;
ᐊᖓᔪᖅᑳᕐᔪᐊᕐᓯᐅᑎᓗ ᐊᔭᐅᑉᐱᐊᑦ ᐃᖅᑲᕐᑐᐃᑦᓯᐊᕐᓂᕐᒧᑦ
ᐊᔭᐅᑉᐱᐊᕆᓂᐊᕐᐸᑦ ᐊᑕᓂᐅᕕᖕᓂ.
7ᓇᓛᒎᕐᓂᖅ ᖁᕕᐊᒋᕙᑦ ᐱᐅᖏᑦᑐᓕᓂᕐᓗ ᐆᒥᒋᓪᓗᒍ;
ᑍᒤᒻᒪᑦ ᒎᑎᐅᑉ, ᒎᑎᕕᑦ ᐅᕐᓱᕐᑎᓚᐅᕐᐹᑎᑦ,
ᐅᕐᓱᒧᑦ ᖁᕕᐊᓱᖕᓂᕐᒧᑦ ᐃᓚᒋᔭᕐᓂᑦ ᐱᑎᑕᐅᓂᕐᓴᐅᓪᓗᑎᑦ.
8ᐊᓐᓄᕌᑎᑦ ᑎᐱᑎᕐᓯᒪᕗᑦ ᒧᕆᒥᒃ ᐋᓘᒥᒡᓗ ᑳᓯᐊᒥᒡᓗ.
ᐊᖓᔪᖅᑳᕐᔪᐊᑉ ᐃᒡᓗᖏᓐᓂᑦ ᑑᒑᓂᒃ ᐱᐅᓴᕐᓯᒪᔪᓂᑦ,
ᓄᖃᕐᑎᓕᖕᓂᓪᓗ ᓂᓪᓕᐊᑦᔪᑎᓂᑦ, ᖁᕕᐊᓱᒃᑎᑕᐅᕗᑎᑦ.
9ᐊᖓᔪᖅᑳᕐᔪᐊᑉ ᐸᓂᖏᑦ ᐃᓚᒋᔭᐅᕗᑦ ᐊᕐᓇᓄᑦ ᐅᐱᒋᔭᐅᔪᓄᑦ;
ᑕᓕᕐᐱᖕᓃᑉᐳᕐᓗ ᑯᐃᓐ, ᐊᑐᕐᑐᖅ ᒎᓗᓂᒃ ᐅᐱᕼᐃᒥᐅᑕᓂᒃ.
10ᐊᖓᔪᖅᑳᕐᔪᐊᑉ ᓄᓕᐊᒃᓴᖓ, ᓈᓚᒋᑦ,
ᐃᓱᒪᑦᓯᐊᕆᑦ ᓯᐅᑏᒃᑭᒡᓗ ᒪᓂᓗᒋᒃ;
ᐃᓅᖃᑎᑎᑦ ᐳᐃᒍᕐᓗᒋᑦ, ᓇᖕᒥᓂᕐᓗ ᐃᓚᑎᑦ;
11ᐃᓂᖁᓇᕐᓃᑦ ᐱᓪᓗᒍ ᐊᖓᔪᖅᑳᕐᔪᐊᑉ ᐊᖏᔪᒥᒃ ᐱᔪᒪᓂᐊᕐᒪᑎᑦ;
ᐊᖓᔪᖅᑳᕆᒐᕕᐅᒃ ᐅᐱᒋᒍᒃ.
12ᑍᕆᒥᐅᑦ ᐸᓂᖏᑦ ᑎᑭᓐᓂᐊᕐᐳᑦ ᑐᓂᕐᕈᑎᒥᒃ ᓇᒃᓴᕐᓗᑎᒃ;
ᐃᓄᐃᑦ ᐊᔪᕐᓴᖏᑦᑐᑦ ᐃᓕᖕᓄᑦ ᐱᑦᓯᐊᕐᕕᐅᔪᒪᓂᐊᕐᐳᑦ.
13ᐊᖓᔪᖅᑳᕐᔪᐊᑉ ᐸᓂᖓ ᐃᓂᖁᓇᕐᑐᐊᓘᕗᖅ,
ᐊᖓᔪᖅᑳᕐᔪᐊᑉ ᐃᒡᓗᖓᓂ.
ᐊᓐᓄᕌᖓ ᒎᓗᒥᑦ ᓴᓇᓯᒪᕗᖅ.
14ᐊᖓᔪᖅᑳᕐᔪᐊᒧᑦ ᐃᑎᕐᑎᑕᐅᓂᐊᕐᐳᖅ
ᐊᓐᓄᕌᕐᓯᒪᓗᓂ ᑕᕐᓴᖃᕐᑐᒥᒃ ᐅᓄᕐᑐᓂᒃ;
ᐃᓅᓱᒃᑐᓪᓗ ᐅᐃᒡᒐᓱᐃᑦ, ᑖᑦᓱᒥᖓ ᒪᓕᒃᑐᑦ
ᕾᑎᑕᐅᓂᐊᕐᐳᑦ ᐃᓕᖕᓄᑦ.
15ᖁᕕᐊᓱᒡᓗᑎᒃ ᐊᓕᐊᓁᒍᓱᒡᓗᑎᒡᓗ ᕾᑎᑕᐅᓂᐊᕐᐳᑦ;
ᐃᑎᕐᓗᑎᒡᓗ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ.
16ᐃᕐᓂᑎᑦ ᐊᑖᑕᕕᑦ ᐃᓂᖓᓃᑦᓱᒫᕐᐳᑦ,
ᓄᓇᕐᔪᐊᓕᒫᒥᓗ ᐊᖓᔪᖅᑳᕐᔪᐊᒧᑦ ᑐᖓᓕᐅᑎᑦᓱᒫᕐᐸᑎᑦ.
17ᐊᑏᓪᓗ ᐃᖅᑲᐅᒪᔭᐅᑎᑦᓱᒪᕙᕋ ᑭᖑᕚᕆᓂ ᑕᒤᓐᓂ;
ᑍᒤᒻᒪᑦ ᐃᓄᖕᓄᑦ ᓂᕐᑐᕐᑕᐅᔪᒫᕐᐳᑎᑦ
ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.
Currently Selected:
ᐃᓐᖏᕈᑎᑦ 45: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
