ᐃᓐᖏᕈᑎᑦ 44
44
ᐅᑎᕐᑎᑕᐅᓂᐅᑉ ᐃᖅᑲᐅᒪᔭᐅᓂᖓ ᓇᕐᕈᒋᔭᐅᓂᕐᒦᓪᓗᓂ
ᐃᓐᖏᕐᑏᑦ ᑲᒪᔨᖓᓐᓄᑦ ᑰᕋᐅᑉ ᐃᕐᓂᖏᑕ ᐃᓐᖏᕈᑖ
1ᒎᑏ, ᓯᐅᑎᑦᑎᓐᓄᑦ ᑐᓴᓚᐅᕐᐳᒍᑦ,
ᐊᑖᑕᑦᑕ ᐅᓂᒃᑳᕐᕕᒋᓚᐅᕐᒪᑎᒍᑦ,
ᐱᓂᐊᕐᓂᕕᓂᕐᓂᒃ ᑍᒃᑯᐊ ᐃᓅᑎᓪᓗᒋᑦ ᑍᑦᓱᒪᓂᐊᓗᒃ.
2ᐃᓅᖃᑎᒌᒡᔪᐊᑦ ᐊᒡᒐᖕᓄᑦ ᐊᐅᓪᓚᕐᑎᓚᐅᕋᕕᒋᑦ,
ᐊᑖᑕᕗᓪᓗ ᓄᓇᒃᓴᖏᓐᓄᐊᕐᑎᓪᓗᒋᑦ;
ᐃᓄᐃᑦ ᓵᓚᒋᓚᐅᕐᐸᑎᑦ ᐊᐅᓪᓚᕐᑎᓪᓗᒋᓪᓗ.
3ᓄᓇᒥᒃ ᑎᒍᓯᓚᐅᖏᒻᒪᑕ ᓇᖕᒥᓂᖅ ᓴᕕᒡᔪᐊᖏᑕ ᐱᔪᓐᓇᕐᓂᖏᓐᓄᑦ,
ᓇᖕᒥᓂᕐᓘᓐᓃᑦ ᐊᒡᒐᖕᒥᖕᓄᑦ ᓴᐳᑎᓚᐅᓐᖏᓚᑦ;
ᐃᕝᕕᓪᓕ ᑭᓯᐊᓂ ᐊᒡᒐᖕᓄᑦ ᑕᓕᕐᐱᖕᓄᑦ,
ᑮᓇᕐᐱᓪᓗ ᖃᐅᒪᓂᖓᓄᑦ, ᖁᕕᐊᒋᓚᐅᕋᕕᒋᑦ.
4ᐊᖓᔪᖅᑳᔪᐊᕆᕙᒋᑦ, ᒎᑎᒋᓪᓗᑎᓪᓗ;
ᓵᓚᖃᐅᑦᔨᕗᑎᓪᓗ ᔧᑯᒥᒃ.
5ᐃᕝᕕᑦ ᐃᑲᔪᕐᑎᒋᓗᑎᑦ ᐊᑭᕋᕗᑦ ᓵᓚᒋᓂᐊᕐᐸᕗᑦ;
ᐊᑏᑦ ᐊᑐᕐᓗᒍ ᑐᓪᓕᕋᕐᓂᐊᕐᐸᕗᑦ ᐅᕙᑦᑎᓐᓂᒃ ᐊᑭᕋᕐᑐᕋᓱᐊᕐᑐᑦ.
6ᐱᑎᒃᓯᒐ ᑕᑎᒋᓂᐊᖏᓐᓇᒃᑯ, ᓴᕕᒡᔪᐊᒪᓗ ᓴᐳᑎᓂᐊᖏᒻᒪᖓ.
7ᐃᕝᕕᓪᓕ ᐊᑭᕋᑦᑎᓐᓂᑦ ᓴᐳᑎᕙᑦᑎᒍᑦ,
ᑲᓐᖑᓇᕐᑐᒦᑎᑉᐸᑎᓪᓗ ᐅᕙᑦᑎᓐᓂᒃ ᐆᒥᓱᒃᑐᑦ.
8ᒎᑎᒥᒃ ᓂᕐᑑᑎᖃᕐᐳᒍᑦ ᐅᓪᓗᖅ ᓈᓪᓗᒍ,
ᐊᑏᓪᓗ ᓂᕐᑐᕐᐸᕗᑦ ᐃᓱᖃᖏᑦᑐᒧᑦ. ᓰᓚ
9ᑭᓯᐊᓂ ᓇᕐᕈᒋᓯᒪᒐᑦᑎᒍᑦ, ᑲᓐᖑᓇᕐᑐᒦᑎᓪᓗᑕᓗ,
ᐅᓇᑕᕐᑐᒃᓴᖁᑎᕗᓪᓗ ᐅᓇᑕᕆᐊᕌᖓᑕ ᐃᓚᒋᓐᖏᓚᑎᑦ.
10ᐅᓇᑕᕐᓂᕐᒥ ᕿᒫᑎᑕᐅᑎᑉᐸᑦᑎᒍᑦ ᐊᑭᕋᑦᑎᓐᓂᑦ,
ᐆᒥᒋᔨᕗᓪᓗ ᐱᖁᑎᑦᑎᓐᓂᒃ ᐱᑖᕐᑐᕐᐳᑦ.
11ᓰᐱᑎᑐᑦ ᓂᕿᒃᓴᑎᑐᑦ ᑐᓂᓚᐅᕐᐸᑦᑎᒍᑦ,
ᓯᐊᒻᒪᕐᑎᓪᓗᑕᓗ ᐃᓅᖃᑎᒌᒡᔪᐊᓄᑦ.
12ᐃᓄᖁᑎᑎᑦ ᓂᐅᕐᕈᑎᒋᓚᐅᕐᐸᑎᑦ ᐊᑭᑭᓐᓂᕐᐹᒧᑦ,
ᓂᐅᕐᕈᑎᒋᒐᓗᐊᕋᕕᒋᑦ ᑮᓇᐅᔭᓕᐅᕈᑎᒃᓴᐅᓚᐅᓐᖏᓚᑦ.
13ᐃᓅᖃᑎᑦᑎᓐᓄᑦ ᓇᕐᕈᓇᕐᑎᓚᐅᕐᐸᑦᑎᒍᑦ,
ᒥᑕᐅᑎᒃᓴᓐᖑᕐᓗᑕᓗ ᐊᓖᒃᑯᑎᒃᓴᓐᖑᕐᓗᑕᓗ ᐃᓄᖕᓄᑦ ᐊᕙᑎᑦᑎᓐᓃᑦᑐᓄᑦ.
14ᐃᔪᕆᔭᒃᓴᓐᖑᕐᐳᒍᑦ ᐃᓅᖃᑎᒌᒡᔪᐊᓄᑦ,
ᐃᓕᕿᑕᒫᕈᑕᐅᓕᕐᓗᑕᓗ ᒥᑕᐅᑕᐅᓂᕐᒧᑦ ᐃᓄᖕᓄᑦ.
15ᓇᕐᕈᓇᕐᓂᕋ ᑍᒪᓐᖓᑦ ᓵᓐᓃᑉᐳᖅ,
ᑮᓇᕐᒪᓗ ᑲᓐᖑᓇᕐᓂᖓᑕ ᐅᓕᒃᓯᒪᕚᖓ.
16ᓱᐊᒃᑐᑦ ᓂᓐᖓᐅᒪᔪᓪᓗ ᓂᐱᖏᓐᓄᑦ,
ᐊᑭᕋᕐᑐᕐᑎᓐᓂᑦ ᐊᑭᓂᐊᕈᒪᔪᓂᓪᓗ.
17ᑕᒪᒃᑯᓄᖓ ᑍᒤᑦᑐᓄᑦ ᑎᑭᑕᐅᕗᒍᑦ; ᐃᓕᖕᓂᒡᓕ ᐳᐃᒍᓐᖏᓚᒍᑦ,
ᐊᖏᖃᑎᒌᒍᑎᒋᓯᒪᔭᕐᓂᒡᓗ ᓱᓕᖏᓪᓗᑕ ᐱᓇᓱᐊᕐᓯᒪᓐᖏᓚᒍᑦ.
18ᐆᒻᒪᑎᕗᑦ ᐅᑎᕆᐊᕐᓯᒪᓐᖏᓚᑦ,
ᐃᑎᒐᕗᓪᓘᓐᓃᑦ ᐊᖅᑯᑎᖕᓂᒃ ᕿᒤᓯᒪᓐᖏᓚᑦ;
19ᓯᖁᒥᑦᑎᐊᕐᓯᒪᒐᑦᑎᒍᑦ ᔮᑯᓄᑦ ᑎᕆᒐᓂᐊᖑᔮᕐᑐᓄᑦ ᐃᓂᒋᔭᐅᓕᕐᓗᑕ,
ᐅᓕᒃᓯᒪᒐᑦᑎᒍᓪᓗ ᑐᖂᑉ ᑕᕐᕋᓕᓂᖓᓄᑦ.
20ᒎᑎᑦᑕ ᐊᑎᖓ ᐳᐃᒍᕋᔭᕈᑦᑎᒍ,
ᐊᒡᒐᕗᓪᓘᓐᓃᑦ ᐃᓵᖓᒐᔭᓚᐅᕈᑦᑎᒍ ᐊᓯᑦᑕ ᒎᑎᖏᓐᓄᑦ,
21ᒎᑎ ᖃᐅᔨᒐᔭᓐᖏᓛᖅ?
ᖃᐅᔨᒪᖕᒪᑦ ᐆᒻᒪᑎᐅᑉ ᐃᔨᕐᓯᒪᔭᖏᓐᓂᒃ.
22 #
ᕉᒪᒥᐅᓄᑦ 8:36. ᐱᑦᔪᑎᒋᓪᓗᑎᑦ ᐅᓪᓗᖅ ᓈᓪᓗᒍ ᑐᖁᑕᐅᕗᒍᑦ.
ᓰᐱᑎᑐᑦ ᐱᔭᐅᕗᒍᑦ ᑐᖁᑕᐅᔭᕐᑐᕐᑐᑎᑐᑦ.
23ᑐᐸᓕᕆᑦ! ᓱᖕᒪᑦ ᓯᓂᒃᐲᑦ ᐊᑕᓃᖅ?
ᒪᑭᓕᕆᑦ! ᐃᒃᓯᓐᓇᕐᑍᓕᑎᒍᑦ ᐃᓱᖃᖏᑦᑐᒧᑦ.
24ᓲᖅ ᑮᓁᑦ ᐃᔨᕐᓯᒪᕕᐅᒃ,
ᐳᐃᒍᕐᓯᒪᓪᓗᑎᓪᓗ ᓴᐱᕐᓇᕐᑐᒦᓐᓂᑦᑎᓐᓂᒃ
ᐅᖁᒤᑦᑐᒦᓐᓂᑦᑎᓐᓂᒡᓗ?
25ᑕᕐᓂᕗᑦ ᐅᑯᖓᕗᑦ ᓄᓇᒧᑦ;
ᑎᒥᕗᓪᓗ ᑐᓐᖓᕗᑦ ᒪᓂᖅᑲᒧᑦ.
26ᒪᑭᓕᕆᑦ ᐃᑲᔪᕐᓗᑕᓗ,
ᐅᑎᕐᑎᓚᐅᕐᑎᒍᑦ ᓇᒡᓕᖕᓂᕐᓄᑦ ᓱᖁᓯᔪᐃᑦᑐᒧᑦ.
Currently Selected:
ᐃᓐᖏᕈᑎᑦ 44: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
