ᐃᓐᖏᕈᑎᑦ 37
37
ᐃᓱᐊᕐᑐᑦ ᐊᑭᓕᕐᑕᐅᓂᒃᓴᖏᑦ ᐱᐅᖏᑦᑐᓕᔪᓪᓗ ᑲᑉᐱᐊᓇᕐᑐᒦᓐᓂᒃᓴᖏᑦ
ᑍᕕᑎᐅᑉ ᐃᓐᖏᕈᑖ
1ᐊᔪᕐᑐᓕᔪᑦ ᐃᓱᒫᓘᑎᒋᓂᐊᕐᓇᒋᑦ,
ᑐᓱᒋᓂᐊᕐᓇᒋᓪᓗ ᐱᐅᖏᑦᑐᒥᒃ ᐱᓇᓱᐊᕐᐸᒃᑐᑦ.
2ᐃᕕᒃᓱᒃᑲᑎᑐᑦ ᓇᑲᑕᐅᓴᕅᓐᓂᐊᕐᒪᑕ,
ᓄᓇᕋᕐᑎᑐᓪᓗ ᑐᖑᔪᕐᑐᑎᑐᑦ ᑐᖁᓕᓴᕅᓐᓂᐊᕐᒪᑕ.
3ᐊᑕᓂᖅ ᑕᑎᒋᒍᒃ, ᐱᐅᔪᓂᒡᓗ ᐱᓂᐊᕐᓗᑎᑦ;
ᓄᓇᒥ ᐃᓂᖃᕐᑎᓪᓗᑎᑦ ᑲᑉᐱᐊᓇᖏᑦᑐᒥ ᐃᓅᖁᓪᓗᑎᑦ ᓱᖁᓯᔪᐃᑦᑑᓂᖓᓂ.
4ᖁᕕᐊᒋᔭᖃᕆᓪᓗ ᐊᑕᓂᕐᒥᒃ,
ᐆᒻᒪᑎᕕᑦ ᑕᕝᕙ ᐱᔪᒪᔭᖏᓐᓂᒃ ᑐᓂᓯᕕᒋᓂᐊᕐᐹᑎᑦ.
5ᐱᓂᐊᕐᓂᑎᑦ ᐊᑕᓂᕐᒧᑦ ᑐᓂᒃᑭᑦ, ᑕᑎᒋᓗᒍᓗ,
ᑕᕝᕙ ᑖᑦᓱᒪ ᑲᔪᓯᑎᓐᓂᐊᕐᐰᑦ.
6ᐃᓱᐊᕐᑐᓕᓃᑦ ᑕᕝᕙ ᐅᓪᓛᑉ ᖃᐅᓕᕐᓂᖓᑐᑦ ᖃᐅᒻᒪᒃᑎᓐᓂᐊᕐᐹ,
ᐃᖅᑲᕐᑐᐃᑦᓯᐊᕐᓃᓪᓗ ᐅᓪᓗᓪᓗᐊᑉ ᖃᐅᒪᑦᓯᐊᕐᓂᖓᑐᑦ.
7ᐊᑕᓂᕐᒥ ᐃᓂᓪᓚᖓᓕᕆᑦ,
ᕿᓄᐃᓵᕐᓗᑎᓪᓗ ᐅᑕᖅᑭᑦᓯᐊᕆᑦ ᑖᑦᓱᒥᖓ;
ᐱᓂᐊᕐᓗᖕᓂᕐᒥᖕᓂᒃ ᑲᔪᓯᑎᑦᓯᔪᑦ ᐃᓱᒫᓗᓕᕈᑎᒋᑦᑍᓕᒃᑭᑦ
ᐅᕝᕙᓗ ᐱᐅᖏᑦᑐᒥᒃ ᐱᓇᓱᐊᕐᑐᑦ ᑲᔪᓯᓂᕆᔭᖏᑦ.
8ᓂᓐᖓᐅᒪᓂᐊᕐᓇᒃ, ᓂᓐᖓᐅᒪᔮᕐᓂᕐᓗ ᐊᑐᕐᓂᐊᕐᓇᒍ;
ᐃᓱᒪᔮᕐᓂᐊᕐᓇᒃ ᐃᓕᖕᓂᒃ ᐊᑲᐅᖏᑦᑐᒧᑦ ᑎᑭᑕᐅᑎᖁᓇᒃ.
9ᐱᐅᖏᑦᑐᓕᓂᕐᒥᒃ ᐱᓂᐊᕐᓂᖃᕐᑐᑦ ᐊᕕᑕᐅᔪᒫᕐᒪᑕ;
ᐊᑕᓂᕐᒥᒡᓕ ᐅᑕᖅᑭᔪᑦ, ᓄᓇᒥᒃ ᑭᖑᕐᖑᑦᔨᔪᒫᕐᐳᑦ.
10ᐊᑯᓂᐅᖏᑦᑐᖅ ᐱᐅᖏᑦᑐᓕᔪᑦ ᐱᑕᖃᕈᓐᓃᕈᒫᕐᒪᑕ;
ᐊᒡᓛᑦ ᐃᓂᒋᓚᐅᕐᑕᖏᓐᓄᑦ ᕿᓂᑦᓯᐊᕋᓗᐊᕈᕕᑦ ᑕᕝᕙᓃᑦᓱᒫᓐᖏᓚᑦ.
11 #
ᒫᑎᐅᓯ 5:5. ᒥᑭᓕᑎᕐᓯᒪᔪᑦ ᓄᓇ ᑭᖑᕐᖑᑎᔪᒫᕐᐹᑦ,
ᖁᕕᐊᓱᒍᒫᕐᓗᑎᒡᓗ ᓮᒪᓇᕐᑐᒥᒃ ᐊᖏᔪᒥᒃ.
12ᐱᐅᖏᑦᑐᓕᔪᑦ ᐃᓱᒪᒃᓴᕐᓯᐅᕐᐳᑦ ᐃᓱᐊᕐᑐᓕᔪᓂᒃ ᐊᑭᕋᕐᑐᕈᒪᓪᓗᑎᒃ,
ᑭᒍᑎᑎᒃ ᑮᒻᒥᕔᑦ ᑖᒃᑯᓄᖓ.
13ᐊᑕᓂᐅᓪᓕ ᐃᔪᕆᕔᑦ ᐱᐅᖏᑦᑐᓕᔪᑦ,
ᑕᑯᓐᓈᕋᒥ ᐅᓪᓗᒃᓴᖓᓂᒃ ᓇᓪᓕᐅᑎᔪᒫᕐᑐᒥᒃ.
14ᐱᐅᖏᑦᑐᓕᔪᑦ ᓴᕕᒡᔪᐊᒥᖕᓂᒃ ᐊᒧᓯᕗᑦ ᐱᑎᒃᓯᑎᒡᓗ ᕿᓗᓯᒪᕔᑦ,
ᐊᔪᕐᓴᕐᑐᑦ ᐱᖃᖏᑦᑐᓪᓗ ᐅᕐᕈᑎᑦᓱᒪᓪᓗᒋᑦ,
ᑐᖁᑦᓱᒪᓪᓗᒋᓪᓗ ᓱᓕᑦᓯᐊᕐᑐᒥᒃ ᐃᓅᔪᑦ.
15ᓴᕕᒡᔪᐊᖏᓪᓕ ᐆᒻᒪᑎᒥᖕᓄᑦ ᓇᖕᒥᓂᖅ ᑲᑉᐳᑎᔪᒫᕐᐳᑦ,
ᐱᑎᒃᓯᖏᓪᓗ ᓇᑲᑦᓱᒫᕐᐳᑦ.
16ᐃᓱᐊᕐᑑᑉ ᐱᒋᔭᖏᑦ ᐅᓄᖏᑦᑐᑦ,
ᐱᐅᓂᕐᓴᐅᕗᑦ ᐱᐅᖏᑦᑐᓕᔪᑦ ᐅᓄᕐᑐᑦ ᐊᒃᓗᐃᑦᔪᑎᒋᔭᖏᓐᓂᑦ ᐅᓄᕐᑐᓂᑦ.
17ᐱᐅᖏᑦᑐᓕᔪᑦ ᑕᓕᖏᑦ ᓇᑲᑕᐅᔪᒫᕐᐳᑦ,
ᐊᑕᓂᐅᓪᓕ ᓴᐳᑎᓂᐊᕐᐰᑦ ᐃᓱᐊᕐᑐᑦ.
18ᐊᑕᓂᐅᑉ ᐃᓱᐊᕐᑐᑦ ᐅᓪᓗᖏᑦ ᖃᐅᔨᒪᕔᑦ,
ᑭᖑᕐᖑᑎᔭᖏᓪᓗ ᓄᖑᔪᒫᓐᖏᓚᑦ ᐃᓱᖃᖏᑦᑐᒧᑦ.
19ᐅᓪᓗᐃᑦ ᖁᕕᐊᓇᖏᑦᑐᑦ ᓇᓪᓕᐅᑎᒃᐸᑕ ᑲᓐᖑᓱᒃᑎᑕᐅᓂᐊᓐᖏᓚᑦ,
ᑳᖕᓇᕐᑐᕐᔪᐊᖃᕐᐸᓪᓗ ᑳᓕᕐᓂᐊᓐᖏᓚᑦ.
20ᐱᐅᖏᑦᑐᓕᔪᓪᓕ ᐊᓯᕈᕈᒫᕐᐳᑦ;
ᐊᑕᓂᐅᓪᓗ ᐊᑭᕋᕐᑐᕐᑎᖏᑦ ᐊᓯᕈᕈᒫᕆᕗᑦ.
21ᐱᐅᖏᑦᑐᓕᔪᑦ ᐊᑐᕐᑐᐊᕐᐳᑦ ᐅᑎᕐᑎᑦᓯᓇᑎᒡᓗ,
ᐃᓱᐊᕐᑐᓪᓕ ᓂᑲᒍᓱᖕᓂᕐᒥᒃ ᐱᓇᓱᐊᕐᐳᑦ ᑐᓂᓯᔪᒪᓪᓗᑎᒡᓗ.
22ᐊᑕᓂᐅᑉ ᓮᒻᒪᕐᑎᑕᖏᑦ ᓄᓇᒥᒃ ᑭᖑᕐᖑᑦᔨᔪᒫᕐᐳᑦ,
ᓮᒻᒪᕐᑎᖏᑕᖏᓪᓕ ᐊᕕᑕᐅᔪᒫᕐᐳᑦ.
23ᐊᖑᑎᐅᑉ ᐃᓱᐊᕐᑑᑉ ᐊᓪᓗᕐᓂᖏᑦ ᐊᑕᓂᐅᑉ ᐋᖅᑭᒃᓯᒪᕔᑦ,
ᐊᖅᑯᑎᓂᓗ ᖁᕕᐊᒋᕚ.
24ᐹᓪᓚᒃᑲᓗᐊᕈᓂ, ᐃᒋᑕᐅᑦᓯᐊᒻᒪᕆᖕᓂᐊᓐᖏᓚᖅ,
ᐊᑕᓂᐅᑉ ᐊᒡᒐᒥᓄᑦ ᒪᑭᑕᑎᒻᒪᒍ.
25ᐃᓅᓱᒃᑑᓚᐅᕐᐳᖓ, ᒫᓐᓇᓕ ᐃᑦᑑᓕᕋᒪ;
ᓱᓕ ᐃᓱᐊᕐᑐᒥᒃ ᖁᔭᓈᕐᑕᐅᔪᒥᒃ ᖃᐅᔨᓚᐅᓐᖏᓚᖓ,
ᑭᖑᕚᖏᓪᓗ ᐃᑲᔪᕐᑕᐅᔪᒪᓗᑎᒃ ᕿᓄᒋᐊᖃᕐᓂᐊᓐᖏᓚᑦ.
26ᑍᒪᓐᖓᑦ ᐊᓐᓂᕈᓱᓐᖏᓚᑦ, ᐊᑐᕐᑎᑦᓯᔪᒪᕙᒡᓗᑎᒡᓗ;
ᑭᖑᕚᖏᓪᓗ ᓮᒻᒪᕐᑎᓯᒪᕗᑦ.
27ᐱᐅᖏᑦᑐᓕᓂᖅ ᑐᓄᓕᕈᒃ, ᐱᐅᔪᒥᒡᓗ ᐱᓇᓱᐊᓕᕐᓗᑎᑦ;
ᐃᓱᖃᖏᑦᑐᒧᑦ ᑕᕝᕙ ᐃᓅᓂᐊᕐᐳᑎᑦ.
28ᐊᑕᓂᐅᑉ ᐃᖅᑲᕐᑐᐃᑦᓯᐊᕐᓂᖅ ᖁᕕᐊᒋᕚ,
ᐃᑦᔪᕐᓁᑦᑐᖁᑎᓂ ᐊᓚᕐᓂᐊᓐᖏᓔᑦ; ᓴᐳᑎᓂᐊᕐᐰᑦ ᐃᓱᖃᖏᑦᑐᒧᑦ,
ᐱᐅᖏᑦᑐᓕᔪᓪᓕ ᑭᖑᕚᖏᑦ ᐃᓱᓕᑎᑕᐅᓂᐊᕐᐳᑦ.
29ᐃᓱᐊᕐᑐᓪᓕ ᓄᓇ ᑭᖑᕐᖑᑎᔪᒫᕐᐹᑦ, ᐃᓂᒋᓗᒍᓗ ᐃᓱᖃᖏᑦᑐᒧᑦ.
30ᐃᓱᐊᕐᑐᑦ ᖃᓂᖏᑦ ᓂᓪᓕᐊᕗᑦ ᓯᓚᑐᓂᕐᒥᒃ,
ᐅᖃᖏᓪᓗ ᓂᓪᓕᐊᕗᑦ ᐃᖅᑲᕐᑐᐃᑦᓯᐊᕐᓂᕐᒥᒃ.
31ᒎᑎᖓᑕ ᐱᖁᔭᖏᑦ ᐆᒻᒪᑎᖓᓃᒻᒪᑕ;
ᐱᓱᒡᓗᓂ ᐊᓪᓗᕐᓂᖏᑦ ᖁᐂᔭᕿᓐᓂᐊᓐᖏᓚᑦ.
32ᐱᐅᖏᑦᑐᓕᔪᑦ ᖃᐅᔨᓴᕐᐳᑦ ᐃᓱᐊᕐᑐᓂᒃ ᕿᓂᕐᐳᓪᓗ ᑐᖁᑦᓱᒪᓪᓗᒋᑦ.
33ᐊᑕᓂᐅᑉ ᓴᒃᑯᓐᓂᐊᖏᓔᑦ ᐊᒡᒐᒥᓂᑦ,
ᐸᓯᔭᒃᓴᐅᑎᓐᓂᐊᓐᖏᓛᓗ ᐃᖅᑲᕐᑐᕐᑕᐅᒃᐸᑦ.
34ᐊᑕᓂᖅ ᐅᑕᖅᑭᒍᒃ, ᐊᖅᑯᑎᖓᓃᑦᓮᓐᓇᕐᓗᑎᓪᓗ,
ᑕᕝᕙ ᐊᖏᔪᕈᕐᑎᓐᓂᐊᕐᐹᑎᑦ ᓄᓇᒥᒃ ᑭᖑᕐᖑᑦᔨᑎᓐᓂᐊᕐᒪᑎᑦ.
ᑕᑯᔪᒫᕐᐳᑎᓪᓗ ᐱᐅᖏᑦᑐᓕᔪᑦ ᐃᓚᒋᔭᐅᔪᓐᓁᕐᑎᑕᐅᑎᓪᓗᒋᑦ.
35ᑕᑯᓯᒪᕗᖓ ᐱᐅᖏᑦᑐᓕᔪᑦ ᐱᔪᓐᓇᕐᓂᖃᕐᔪᐊᕐᑎᓪᓗᒋᑦ,
ᐱᕈᑦᓯᐊᕐᑐᑎᑐᑦ ᓯᐊᒻᒪᕐᓗᑎᒃ ᓇᐹᕐᑐᑐᑦ ᐃᓂᑐᖃᕐᒥᓂ ᐱᕈᕐᑐᑎᑐᑦ.
36ᐊᓂᒍᕐᒪᓪᓕ, ᑕᑯᒋᑦ ᐱᑕᖃᕈᓐᓃᕐᐳᖅ;
ᓱᓕ ᕿᓂᓚᐅᕐᐸᕋ, ᓇᓂᔭᐅᔪᓐᓇᓚᐅᓐᖏᓚᕐᓕ.
37ᐊᖑᑦ ᐸᓯᔭᒃᓴᐅᖏᑦᑐᖅ ᕿᒥᕐᕈᒍᒃ,
ᑕᑯᓐᓇᕈᒡᓗ ᓱᓕᑦᓯᐊᕐᑐᒥᒃ ᐃᓅᓯᖃᕐᑐᖅ.
ᐃᓅᑉ ᑖᑦᓱᒪ ᓯᕘᓂᖓ ᓮᒪᓂᐅᖕᒪᑦ.
38ᐱᐅᖏᑦᑐᓕᔪᑦ ᐊᑕᐅᑦᓯᒃᑯᑦ ᐊᓯᕈᕐᑕᐅᔪᒫᕐᒪᑕ;
ᐱᐅᖏᑦᑐᓕᔪᑦ ᓯᕗᓂᒃᓴᖏᑦ ᑭᐱᔭᐅᔪᒫᕐᐳᑦ.
39ᐃᓱᐊᕐᑐᓪᓕ ᐱᐅᓕᔭᐅᓂᖓᑦ ᐊᑕᓂᕐᒥᑦ ᐱᕗᖅ;
ᓄᑭᖃᐅᑎᒋᕚᑦ ᐅᖁᒤᑦᑐᖃᕐᑎᓪᓗᒍ.
40ᐊᑕᓂᐅᑉ ᐃᑲᔪᕐᐰ ᓴᐳᑎᓪᓗᒋᓪᓗ;
ᐱᐅᖏᑦᑐᓕᔪᓂᑦ ᓴᐳᑎᓂᐊᕐᐰᑦ,
ᐱᐅᓕᓗᒋᓪᓗ, ᑖᑦᓱᒥᖓ ᑕᑎᖃᕐᒪᑕ.
Currently Selected:
ᐃᓐᖏᕈᑎᑦ 37: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
