ᐃᓐᖏᕈᑎᑦ 35
35
ᐊᑕᓂᖅ ᐊᑭᓂᐊᕐᑎᐅᕗᖅ ᐃᓄᖁᑎᓂ ᐱᓪᓗᒋᑦ
ᑍᕕᑎᐅᑉ ᐃᓐᖏᕈᑖ
1ᐊᑕᓃᖅ, ᐊᑭᕋᕐᑐᕐᑎᒃᑲ ᐊᑭᕋᕐᑐᒃᑭᑦ;
ᐅᕙᓐᓂᒃ ᐅᓇᑕᕐᑐᑦ ᐅᓇᑕᖃᑎᒋᒃᑭᑦ.
2ᓴᐴᓗᑍᑦ ᐊᖏᔪᖅ ᓴᐴᓗᑍᓪᓗ ᒥᑭᔪᖅ ᑎᒍᓗᒋᑦ,
ᓂᑯᕕᓪᓗᑎᑦ ᐃᑲᔪᓕᓐᖓ.
3ᓇᐅᒃᑯᑏᓪᓗ ᑎᒍᓗᒍ, ᓄᖅᑲᕐᑎᓚᐅᒃᑭᑦ ᐅᕙᓐᓂᒃ ᒪᓕᒃᑐᑦ.
ᑕᕐᓂᕋ ᐅᖃᐅᑎᓚᐅᕈᒃ, “ᐃᓕᖕᓄᑦ ᐱᐅᓕᔨᐅᕗᖓ.”
4ᑲᓐᖑᓱᒃᑎᑕᐅᓕᕐᓕᑦ ᐅᐱᓐᓇᕈᓐᓃᕐᓗᑎᒡᓗ ᐅᕙᓐᓂᒃ ᑐᖁᑦᓯᔪᒪᔪᑦ;
ᐅᑎᒧᑦ ᓵᑎᑕᐅᓕᑦ, ᓇᓗᓕᕐᑎᑕᐅᓗᑎᒡᓗ ᐅᕙᓐᓂᒃ ᐋᓐᓂᕐᓯᓇᓱᐊᕐᑐᑦ.
5ᓂᐊᖂᔭᒃᓮᑦ ᓴᓂᖏᑎᑐᑦ ᑎᒃᑕᐅᓕᕐᓕᑦ ᐊᓄᕆᒧᑦ,
ᐊᑕᓂᐅᓪᓗ ᐂᖏᓕᖓᑕ ᕿᒫᑎᓪᓕᒋᑦ.
6ᐊᖅᑯᑎᖏᓪᓗ ᑖᕐᑑᓕᕐᓕᑦ ᓯᐊᕐᕆᑖᕐᓗᑎᒡᓗ,
ᐊᑕᓂᐅᓪᓗ ᐂᖏᓕᖓᑕ ᒪᓕᒡᓕᒋᑦ.
7ᐱᑦᔪᑎᖃᕋᑎᒃ ᓄᓗᐊᓂᒃ ᐃᔨᕐᓯᓯᒪᖕᒪᑕ
ᐃᑎᕐᓴᒥ ᓄᓗᐊᕐᑎᑦᓱᒪᓪᓗᖓ,
ᐱᑦᔪᑎᒃᓴᖃᕋᑎᒡᓗ ᐃᑎᕐᓴᓕᐅᓚᐅᕐᐳᑦ ᑐᖁᑦᓱᒪᓪᓗᖓ.
8ᐊᓯᕈᕐᑕᐅᓇᕐᑐᒧᑦ ᓂᕆᐅᓇᖏᑦᑐᒧᑦ ᑎᑭᑕᐅᓕᑦ,
ᓄᓗᐊᓄᓪᓗ ᐃᔨᕐᑐᐊᒥᓄᑦ ᓇᖕᒥᓂᖅ ᐱᔭᕆᓕᕐᓕᑦ;
ᐊᓯᕈᕐᓇᕐᑐᒧᑦ ᑍᑯᖓᓪᓗᐊᖅ ᑲᑕᓕᕐᓕᑦ.
9ᑕᕐᓂᕋ ᖁᕕᐊᓲᑎᖃᕐᓂᐊᕐᐳᖅ ᐊᑕᓂᕐᒥᒃ;
ᐱᐅᓕᔭᐅᓂᕐᒥᒡᓗ ᖁᕕᐊᓲᑎᖃᕐᔪᐊᕐᓂᐊᕐᐳᖅ.
10ᓴᐅᓂᓕᒫᒃᑲ ᐅᖃᕈᒫᕐᐳᑦ, “ᐊᑕᓃᖅ, ᑭᓇᒥᒃ ᐊᑦᔨᖃᕐᐲᑦ?
ᓴᐳᑦᔨᒐᕕᑦ ᐊᔪᓗᐊᕐᑐᒥᒃ ᓵᓚᒋᔨᒋᔭᖓᓂᑦ,
ᐃᓛᒃ, ᐊᔪᕐᓴᕐᑐᑦ ᐱᖃᖏᑦᑐᓪᓗ ᓴᐳᑎᕙᑎᑦ ᑎᒡᓕᒐᕐᕕᒋᔨᖏᓐᓂᑦ.”
11ᓂᑲᒍᓱᖏᑦᑐᑦ ᐅᖃᕆᐊᕐᑐᕐᐳᑦ ᖃᐅᔨᓚᐅᕐᓂᕋᕐᓗᑎᒃ;
ᐊᐱᖅᑯᑎᖃᕐᓗᑎᒡᓗ ᐅᕙᓐᓄᑦ ᑲᐅᔨᓚᐅᓐᖏᑕᓐᓂᒃ.
12ᐱᐅᖏᑦᑐᐊᓗᖕᓂᒡᓗ ᐊᑭᓕᕐᐰᑦ ᐱᓂᐊᕐᓂᒃᑲ ᐱᐅᔪᑦ,
ᑕᕐᓂᕋᓗ ᖁᕕᐊᓱᓐᖏᑎᑉᐹᑦ.
13ᐅᕙᖓᓕ ᖃᓂᒪᓕᕌᖓᑕ ᐊᓐᓄᕌᒥᒃ ᓂᕈᒥᖏᑦᑐᒥᒃ ᐊᑎᕙᒃᐳᖓ,
ᒥᑭᓕᑎᕐᓗᖓᓗ ᓂᕆᑦᑍᓕᓪᓗᖓ;
ᑐᒃᓯᐊᕐᓂᕋᓕ ᐅᑎᓚᐅᕐᐳᖅ ᐅᕙᓐᓄᑦ.
14ᕿᒃᓵᓂᕐᒧᑦ ᐱᓱᕋᔭᓕᕐᐳᖓ,
ᓲᕐᓗ ᐱᖃᓐᓇᕆᔭᑦᑐᑦ ᖃᑕᓐᖑᑎᑦᑐᓪᓘᓐᓃᑦ;
ᐅᑯᖓᒻᒪᕆᒃᐳᖓᓗ, ᓲᕐᓗ ᐊᓈᓇᓐᓂᒃ ᐱᑦᔪᑎᑲᕐᑐᑐᑦ.
15ᑖᒃᑯᐊᓕ ᖃᓄᐃᓐᓇᕐᑐᒦᒃᑯᒪ ᖁᕕᐊᓲᑎᒋᕚᑦ, ᑲᑎᓪᓗᑎᒡᓗ;
ᐊᑭᕋᕐᑐᕈᒪᔪᑦ ᑲᑎᑦᔪᑎᒋᕚᖓ, ᐊᓕᒃᑐᕐᑐᑎᑑᕐᐹᖓᓗ ᓄᖅᑲᕐᓂᐊᕋᑎᒃ.
16ᒎᑎᖃᖏᑦᑐᑎᑐᑦ ᓂᑲᒍᓱᒐᑎᒃ ᒥᑕᐅᑎᖃᕐᐳᑦ;
ᑮᓇᕐᓗᐊᕿᕝᕕᒋᕚᖓᓗ ᑭᒍᑎᑎᒃ ᑮᒻᒥᓪᓗᒋᑦ.
17ᐊᑕᓃᖅ, ᖃᓄᖅ ᐊᑯᓂᐅᑎᒋᔪᒥᒃ ᑕᑯᓐᓇᑐᐃᓐᓇᕐᓂᐊᕐᐲᑦ?
ᓴᐳᑎᓚᐅᓐᖓ ᐊᓯᕈᐃᓇᓱᐊᕐᓂᖏᓐᓂᑦ, ᐃᓅᓯᕋᓗ ᐱᐅᓕᓗᒍ ᓔᔭᓂᑦ.
18ᖁᔭᒋᓂᐊᕐᐸᒋᑦ ᐃᓄᒋᐊᒃᑐᕐᔪᐊᑦ ᑲᑎᒪᔪᑦ ᐊᑯᕐᖓᓐᓂ;
ᐃᓄᒋᐊᒃᑐᕐᔪᐊᑦ ᑲᑎᓐᖓᔪᑦ ᐊᑯᕐᖓᓐᓂ ᓂᕐᑐᕐᓂᐊᕐᐸᒋᑦ.
19 #
ᐃᓐᖏᕈᑦ 69:4; ᔪᐊᓇᓯ 15:25. ᐱᑦᔪᑎᒋᓗᖓ ᖁᕕᐊᓲᑎᖃᕐᑎᑦᑍᓕᒃᑭᑦ ᐅᕙᓐᓂᒃ ᐱᑦᔪᑎᒃᓴᖃᕋᑎᒃ ᐊᑭᕋᕐᑐᕐᑐᑦ;
ᐆᒥᓱᖕᓂᕐᒧᓪᓗ ᐃᔨᒥᖕᓂᒃ ᓯᑯᓐᖏᓪᓚᒃᑎᑦᑍᓕᒃᑭᑦ
ᐅᕙᓐᓂᒃ ᐆᒥᓱᒃᑐᑦ ᓱᓇᐅᖏᑦᑐᒧᑦ.
20ᓮᒪᓇᕐᑐᓂᒃ ᐅᖃᐅᓯᒃᓴᖃᓐᖏᓚᑦ, ᐅᐃᕕᕐᕆᒃᓯᑦᔪᑎᓂᒡᓕ ᐃᓱᒪᓕᐅᕐᐳᑦ
ᓄᓇᒥ ᓂᐱᖃᕋᑎᒃ ᐃᓅᔪᓄᑦ.
21ᖃᓂᕐᒥᖕᓂᒡᓗ ᐂᑦᑕᕐᓗᑎᒃ ᐅᕙᓐᓄᑦ ᐅᖃᕐᐳᑦ,
“ᐋᕼᐊ, ᐋᕼᐊ, ᐃᔨᑦᑎᓐᓄᑦ ᓇᖕᒥᓂᖅ ᑕᑯᕙᕗᑦ.”
22ᐊᑕᓃᖅ, ᑕᒪᑐᒥᖓ ᑕᑯᓯᒪᕗᑎᑦ, ᓂᐰᑦᑑᓂᐊᕐᓇᒃ.
ᐊᑕᓃᖅ, ᐅᖓᓯᖕᓂᐊᕐᓇᒃ ᐅᕙᓐᓂᑦ.
23ᐊᐅᓚᑦᔭᓕᕆᑦ, ᑐᐸᒃᓯᒪᓗᑎᓪᓗ ᓴᐳᑎᓗᖓ!
ᐅᓇᑕᓚᐅᕆᑦ ᐱᑦᔪᑎᒋᓗᖓ, ᐊᑕᓂᕋ ᒎᑎᒐᓗ.
24ᑕᒻᒪᖏᓐᓂᓐᓂᒃ ᓇᓗᓁᕐᓯᓚᐅᕆᑦ ᐃᓱᐊᕐᑐᓕᓃᑦ ᒪᓕᒡᓗᒍ;
ᐅᕙᓐᓂᒃ ᖁᕕᐊᓲᑎᖃᖁᓇᒋᑦ.
25ᐃᓱᒪᖁᓇᒋᑦ, “ᐋᕼᐊ, ᑍᒤᑦᑐᕆᔭᕗᑦ ᐊᓱᐃᓛᖑᕗᖅ!”
ᐃᒫᒡᓗ ᐅᖃᖁᓇᒋᑦ, “ᓵᓚᒋᓯᒪᕙᕗᑦ.”
26ᑲᓐᖑᓇᕐᑐᒦᓕᕐᓕᑦ ᐊᑕᐅᑦᓯᒃᑯᑦ ᓇᓗᓕᕐᓇᕐᑐᒦᓪᓗᑎᒃ
ᐋᓐᓂᐊᓂᓐᓂᒃ ᖁᕕᐊᓱᒍᑎᖃᕐᑐᓕᒫᑦ;
ᐊᓐᓄᕌᓯᒪᓕᕐᓕᑦ ᑲᓐᖑᓱᒃᑎᑕᐅᓂᕐᒥᒃ ᐅᐱᒋᔭᐅᖏᓐᓂᕐᒥᒡᓗ
ᐃᒻᒥᖕᓂᒃ ᐊᖏᔪᕈᕐᑎᑦᑐᓕᒫᑦ ᐱᑦᔪᑎᒋᓪᓗᖓ.
27ᓱᓕᓂᕐᒪᓕ ᓇᓗᓁᕐᑕᐅᓂᖓᓂᒃ ᖁᕕᐊᓲᑎᑲᕐᑐᑦ,
ᓂᐱᖅᑯᕐᑐᓗᑎᒃ ᖁᕕᐊᓱᒡᓕᑦ ᓯᕆᓗᑎᒡᓗ;
ᑍᒪᓐᖓᓪᓗ ᓂᓪᓕᐊᓗᑎᒃ, “ᐊᑕᓂᖅ ᐊᖏᔪᕈᕐᑎᑕᐅᓕ,
ᐱᔨᒥ ᖃᓄᐃᖏᑦᓯᐊᕐᓂᖓᓂᒃ ᖁᕕᐊᓲᑎᖃᕐᑐᖅ.”
28ᐅᖃᕋ ᓂᓪᓕᐊᓂᐊᕐᐳᖅ ᐃᓱᐊᕐᑑᓂᕐᓂᒃ,
ᓂᕐᑐᕐᓇᕐᓂᕐᓂᒡᓗ ᐅᓪᓗᖅ ᓈᓗᒍ.
Currently Selected:
ᐃᓐᖏᕈᑎᑦ 35: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
