ᐃᓐᖏᕈᑎᑦ 107
107
ᐅᖃᓕᒫᒊᑦ ᑕᓪᓕᒪᖏᑦ
ᐃᓐᖏᕈᑎᑦ 107ᒥᑦ—150ᒧᑦ
ᓂᕐᑐᐃᓂᖅ ᒎᑎᐅᑉ ᐱᐅᔫᓂᖓᓂᒃ
1 #
ᑯᕉᓂᑲ ᓯᕗᓪᓖᑦ 16:34; ᑯᕉᓂᑲ ᐂᑉᐸᖏᑦ 5:13; 7:3; ᐄᓱᕋ 3:11; ᐃᓐᖏᕈᑦ 100:5; 106:1; 118:1; 136:1; ᔨᕆᒤᐊ 33:11. ᐊᑕᓂᖅ ᖁᔭᒋᓯᐅᒃ, ᐱᐅᔫᖕᒪᑦ:
ᓇᒡᓕᖕᓂᖓᓗ ᐃᓱᖃᖏᑦᑐᒧᑦ ᑐᕌᖓᓪᓗᓂ.
2ᐊᑕᓂᐅᑉ ᐱᐅᓕᓯᒪᔭᖏᑦ ᑍᒫᒃ ᐅᖃᕐᓕᑦ,
ᐊᑭᕋᕐᑐᕐᑎᖏᓐᓂᑦ ᐱᐅᓕᓚᐅᕐᑕᖏᑦ;
3ᓄᓇᓂᓪᓗ ᑲᑎᕐᓱᓚᐅᕐᑕᖏᑦ,
ᓯᕿᓂᐅᑉ ᓄᐃᕕᐊᓂᑦ, ᓂᐱᕕᐊᓂᓪᓗ,
ᐅᓐᓄᐊᓪᓗᐊᒥᑦ ᐅᓪᓗᓪᓗᐊᒥᓪᓗ.
4ᓱᓇᖃᔪᐃᑦᑐᒥ ᓇᒧᑐᐃᓐᓇᖅ ᐃᖏᕐᕋᖃᑦᑕᓚᐅᕐᑐᑦ ᑐᕌᕐᑕᖃᕋᑎᒃ;
ᐃᒡᓗᒐᓴᖕᓂᒃ ᐃᓂᒃᓴᕆᔪᓐᓇᕐᑕᒥᖕᓂᒃ ᓇᓂᓯᓚᐅᕋᑎᒃ.
5ᑳᒡᓗᑎᒃ ᐃᒥᕈᒃᓗᑎᒡᓗ,
ᑕᕐᓂᖏᑦ ᐱᕐᓕᓕᕐᓗᑎᒃ ᓄᑮᕈᑎᓚᐅᕐᐳᑦ.
6ᑕᕝᕙ ᐊᑕᓂᕐᒧᑦ ᓂᓪᓕᐊᓕᕐᐳᑦ ᐊᑲᐅᖏᑦᔪᑎᒋᔭᒥᖕᓂᑦ,
ᑖᑦᓱᒪᓗ ᓴᐳᑎᕔᑦ ᐊᒃᓱᕈᕐᓂᖏᓐᓂᑦ ᐊᓂᑎᓪᓗᒋᑦ.
7ᑕᓯᐅᓚᐅᕐᐰᓪᓗ ᐊᖅᑯᑎᒃᑯᑦ ᑕᒻᒪᕐᓇᖏᑦᑐᒃᑯᑦ,
ᐃᒡᓗᒐᓴᖕᓄᑦ ᑎᑭᐅᑎᖁᓪᓗᒋᑦ ᐃᓂᒃᓴᕆᔪᓐᓇᕐᓂᐊᓕᕐᑕᒥᖕᓄᑦ.
8ᑖᒃᑯᐊ ᐊᑕᓂᖅ ᖁᔭᒋᓕᑦᔪᒃ ᓇᒡᓕᒍᓱᑦᓮᓐᓇᕐᓂᖓ ᐱᓪᓗᒍ,
ᐱᓂᐊᕐᓂᖏᓪᓗ ᑲᒪᓇᕐᑐᑦ ᐃᓄᐃᑦ ᕿᑐᕐᖓᖏᓐᓄᑦ ᐱᑦᔪᑎᒋᓗᒋᑦ!
9ᑖᑦᓱᒪ ᑕᕐᓂᖅ ᐃᒥᕈᒃᑐᖅ ᐃᒥᕈᐃᕐᑎᒻᒪᒍ,
ᑕᕐᓂᕐᓗ ᑳᒃᑐᖅ ᐊᕿᐊᑦᑐᕐᑎᓪᓗᓂᐅᒃ ᐱᐅᔪᓂᒃ.
10ᑖᕐᑐᒥ ᐃᒃᓯᕙᔪᑦ ᑐᖂᓪᓗ ᑕᕐᕋᓕᓂᖓᓃᑦᑐᑦ,
ᕿᓚᒃᓱᕐᑕᐅᓯᒪᔪᑦ ᐋᓐᓂᐊᑎᑕᐅᓂᕐᒧᑦ ᓴᕕᕋᔭᖕᓄᓪᓗ;
11ᒎᑎᐅᑉ ᐅᖃᐅᓯᖏᓐᓂᒃ ᐊᑭᕋᕐᑐᓚᐅᕐᓂᕐᒥᖕᓄᑦ,
ᓇᕐᕈᓚᐅᕐᓗᑎᒡᓗ ᖁᑦᓯᖕᓂᕐᐹᖑᔫᑉ ᐅᖃᐅᑦᔪᐃᓂᖏᓐᓂᒃ:
12ᑖᒃᑯᐊ ᐆᒻᒪᑎᖏᑦ ᒥᑭᒡᓕᓕᕐᑎᑕᐅᕗᑦ ᐅᖁᒤᑦᑐᒦᓕᕐᓗᑎᒃ;
ᐅᕐᕈᕗᑦ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᕈᓐᓃᕐᓗᑎᒃ.
13ᑕᕝᕙ ᐊᑕᓂᕐᒧᑦ ᓂᓪᓕᐊᓕᕐᐳᑦ ᐊᑲᐅᖏᑦᔪᑎᒋᔭᒥᖕᓂᑦ,
ᑖᑦᓱᒪᓗ ᓴᐳᑎᕔᑦ ᐊᒃᓱᕈᕐᓂᖏᓐᓂᑦ ᐊᓂᑎᓪᓗᒋᑦ.
14ᑖᑦᓱᒪ ᐊᓂᑎᑉᐰᑦ ᑖᕐᑐᒥᑦ ᑐᖂᓪᓗ ᑕᕐᕋᓕᓂᖓᓂᑦ,
ᓯᖁᒥᓪᓗᒋᓪᓗ ᕿᓚᒃᓯᒪᐅᑎᖏᑦ ᓯᖃᓪᓕᕔᑦ.
15ᑖᒃᑯᐊ ᐊᑕᓂᖅ ᖁᔭᒋᓂᐊᕐᐹᑦ ᓇᒡᓕᒍᓱᐃᓐᓇᕐᓂᖓ ᐱᑦᔪᑎᒋᓪᓗᒍ,
ᐱᐅᔪᐊᓗᖕᒥᒡᓗ ᐱᓇᓱᐊᕐᓯᒪᓂᖓ ᐃᓄᐃᑦ ᕿᑐᕐᖓᖏᓐᓄᑦ ᐱᑦᔪᑎᒋᓗᒍ!
16ᐅᒃᑯᐊᑦ ᑲᓐᓄᔧᑦ ᓯᖁᒥᒻᒪᒋᑦ,
ᓴᕕᕋᔧᓪᓗ ᓴᓐᓂᕈᐊᑦ ᓇᑲᓪᓗᒋᑦ ᒪᕐᕉᓕᕔᑦ.
17ᓯᓔᑦᑐᑦ ᐅᖁᒤᑦᑐᒦᑎᑉᐳᑦ ᐊᔪᕐᑐᓕᓂᕐᒥᖕᓄᑦ,
ᐱᐅᖏᑦᑐᓕᓂᕐᒥᒡᓗ ᐃᓅᓂᕐᒥᖕᓄᑦ ᐋᓐᓂᐊᓇᕐᑐᒦᑎᑉᐳᑦ.
18ᑕᕐᓂᖏᑦ ᓇᕐᕈᓚᐅᕐᒪᑕ ᑕᒤᓐᓂᒃ ᓂᕿᓪᓚᕆᐅᔪᓂᒃ;
ᑐᖂᑉ ᐃᑎᕐᑕᕐᕕᖓᓄᑦ ᐃᒻᒥᖕᓂᒃ ᖃᓂᒡᓕᑎᓚᐅᕐᐳᑦ.
19ᑕᕝᕙ ᐊᑕᓂᕐᒧᑦ ᓂᓪᓕᐊᓕᕐᐳᑦ ᐊᑲᐅᖏᑦᔪᑎᒋᔭᒥᖕᓂᑦ,
ᑖᑦᓱᒪᓗ ᓴᐳᑎᕔᑦ ᐊᒃᓱᕈᕐᓂᖏᓐᓂᑦ ᐊᓂᑎᓪᓗᒋᑦ.
20ᑖᑦᓱᒪ ᐅᖃᐅᓯᓂ ᑎᓕᕚ, ᐋᖅᑭᒡᓗᒋᓪᓗ,
ᓴᐳᑎᓪᓗᒋᓪᓗ ᑐᖁᒥᑦ.
21ᑖᒃᑯᐊ ᐊᑕᓂᖅ ᖁᔭᒋᓂᐊᕐᐹᑦ ᓇᒡᓕᒍᓱᐃᓐᓇᕐᓂᖓ ᐱᑦᔪᑎᒋᓪᓗᒍ,
ᐱᐅᔪᐊᓗᖕᒥᒡᓗ ᐱᓇᓱᐊᕐᓯᒪᓂᖓ ᐃᓄᐃᑦ ᕿᑐᕐᖓᖏᓐᓄᑦ ᐱᑦᔪᑎᒋᓗᒍ!
22ᑐᓂᕐᕈᓯᕐᑐᒃᓴᐅᕗᑦ ᖁᔭᓕᑦᔪᑎᒃᓴᒧᑦ ᑐᓂᕐᕈᓯᕐᓂᕐᒥᒃ,
ᐱᓂᐊᕐᓂᖏᓪᓗ ᐅᓂᒃᑲᐅᑎᒋᓗᒋᑦ ᐃᓐᖏᕐᓂᐊᕐᐳᑦ ᖁᕕᐊᓱᒡᓗᑎᒃ.
23ᐃᓚᖏᑦ ᐅᒥᐊᕐᔪᐊᒃᑯᑦ ᐃᒪᕐᐱᒃᔪᐊᒧᐊᖃᑦᑕᕐᐳᑦ,
ᐃᒪᕐᐱᒃᔪᐊᒥᑦ ᑮᓇᐅᔭᓕᐅᕈᑎᓴᓕᐅᕋᓱᐊᕐᓗᑎᒃ;
24ᐊᑕᓂᐅᑉ ᐱᓂᐊᕐᓂᖏᓐᓂᒃ ᑕᑯᓚᐅᕐᐳᑦ,
ᑲᒪᓇᕐᑐᓕᓂᖏᓐᓂᒡᓗ ᐃᒪᕐᐱᖕᒥ ᐃᑎᔪᒥ.
25ᑖᓐᓇ ᐱᖁᔨᖕᒪᑦ, ᑕᕝᕙ ᐊᓄᕌᓕᕐᐳᖅ ᐊᖅᑯᓇᓕᕐᓗᓂ,
ᐃᖏᐅᓕᐊᓗᐃᓪᓗ ᒪᑭᓯᕗᑦ ᐃᒪᕐᐱᖕᒥ.
26ᑕᕝᕙ ᖁᒻᒧᐊᒃᑎᑕᐅᕗᑦ ᕿᓚᖕᒧᑦ, ᐊᒻᒪ ᑲᑕᓕᕆᕗᑦ ᐃᑎᓂᕐᒧᑦ:
ᑕᕝᕙ ᑕᕐᓂᖏᑦ ᐊᐅᒃᑎᑕᐅᓕᕐᐳᑦ ᓇᖏᐊᕐᓂᕐᒧᑦ.
27ᐋᖓᔮᕐᑐᑎᑐᑦ ᐅᕐᕈᔮᕐᐳᑦ ᐊᐳᑲᓪᓚᖃᑦᑕᕐᓗᑎᒡᓗ,
ᖃᓄᕐᑑᕈᓐᓇᕐᓂᓕᒫᖏᓪᓗ ᐃᓱᓕᓪᓗᑎᒃ.
28ᑕᕝᕙ ᐊᑕᓂᕐᒧᑦ ᓂᓪᓕᐊᓕᕐᐳᑦ ᐊᑲᐅᖏᑦᔪᑎᒋᔭᒥᖕᓂᑦ,
ᑖᑦᓱᒪᓗ ᓴᐳᑎᕔᑦ ᐊᒃᓱᕈᕐᓂᖏᓐᓂᑦ ᐊᓂᑎᓪᓗᒋᑦ.
29ᑕᕝᕙ ᐊᖅᑯᓇᕐᔪᐊᖅ ᐃᑯᓪᓚᕐᑎᑉᐹ,
ᐃᖏᐅᓕᐊᓗᐃᓪᓗ ᓄᖅᑲᕐᓗᑎᒃ.
30ᑕᕝᕙ ᐃᑯᓪᓚᕐᒪᑦ ᖁᕕᐊᓱᓕᕐᐳᑦ;
ᑖᑦᓱᒪᓗ ᑭᓴᕐᕕᑦᓯᐊᕆᒃᑐᒧᑦ ᑕᓯᐅᕐᐰᑦ ᐅᐸᒍᒪᔭᖏᓐᓄᑦ.
31ᑖᒃᑯᐊ ᐊᑕᓂᖅ ᖁᔭᒋᓂᐊᕐᐹᑦ ᓇᒡᓕᒍᓱᐃᓐᓇᕐᓂᖓ ᐱᑦᔪᑎᒋᓪᓗᒍ,
ᐱᐅᔪᐊᓗᖕᒥᒡᓗ ᐱᓇᓱᐊᕐᓯᒪᓂᖓ ᐃᓄᐃᑦ ᕿᑐᕐᖓᖏᓐᓄᑦ ᐱᑦᔪᑎᒋᓗᒍ!
32ᑖᓐᓇ ᐊᖏᔪᕈᕐᑎᑕᒃᓴᕆᕚᑦ ᐃᓄᐃᑦ ᑲᑎᓐᖓᓂᖓᓐᓂ,
ᓂᕐᑐᕐᓗᒍᓗ ᐊᖓᔪᖅᑳᑦ ᑲᑎᓐᖓᓂᖏᓐᓂ.
33ᑖᑦᓱᒪ ᑰᑦ ᓱᓇᖃᕈᓐᓃᕐᑎᑉᐰᑦ,
ᓄᓇᐅᓪᓗ ᐃᓗᐊᓂᑦ ᑰᒃᑐᑦ ᐸᓂᕐᑎᓪᓗᒋᑦ;
34ᓄᓇᓗ ᐱᕈᕐᑐᖃᑦᓯᐊᕐᑐᖅ ᐱᕈᕐᕕᐅᔪᓐᓁᓪᓕᑎᑉᐹ ᑕᕆᐅᕈᕐᓗᓂ,
ᑕᕝᕙᓂ ᓄᓇᖃᕐᑐᑦ ᐱᐅᖏᑦᑐᓕᓂᖏᑦ ᐱᑦᔪᑎᒋᓪᓗᒋᑦ.
35ᓱᓇᖃᔪᐃᑦᑐᖅ ᑕᓯᖃᐅᓕᕐᑎᑉᐹ,
ᓄᓇᓗ ᐸᓂᕐᑐᖅ ᐃᓗᐊᓂᑦ ᑰᖃᓕᕐᑎᑉᐹ.
36ᑳᒃᑐᑦ ᑕᕝᕙᓂ ᓄᓇᖃᓕᕐᑎᑉᐰᑦ,
ᐃᒡᓗᒐᓴᒡᔪᐊᓕᐅᖁᓪᓗᒋᑦ ᐃᒡᓗᖃᕐᕕᒃᓴᒥᖕᓂᒃ;
37ᐱᕈᕐᓰᕕᖕᓂ ᑲᓐᖓᕐᓱᐃᕗᑦ, ᕔᓂᓕᒃᓴᓂᒡᓗ ᑲᓐᖓᕐᓱᐃᓪᓗᑎᒃ,
ᑲᑎᕐᓱᐃᔪᓐᓇᖁᓪᓗᒋᑦ ᐱᕈᕐᑐᓂᒃ ᖃᓄᐃᑦᑐᑐᐃᓐᓇᓕᒫᓂᒃ.
38ᓮᒻᒪᕐᑎᓚᐅᕆᕔᑦ ᐃᓄᒋᐊᒃᑐᕐᔪᐊᓐᖑᕐᑎᓪᓗᒋᑦ;
ᐆᒪᔪᖁᑎᖏᓪᓗ ᐃᒻᒧᒃᓯᐅᒊᑦ ᖃᑦᓰᓐᓇᕈᕐᐸᓪᓕᐊᓚᐅᓐᖏᓚᑦ.
39ᐱᕖᕈᑦᔭᐅᓪᓗᑎᒃ ᓱᓇᐅᔪᓐᓃᕐᑎᑕᐅᖕᒪᑕ ᐅᖁᒤᒃᓴᕐᑎᑕᐅᓂᕐᒧᑦ,
ᐋᓐᓂᐊᑎᑕᐅᓂᕐᒧᑦ ᕿᒃᓵᒃᑎᑕᐅᓂᕐᒧᓪᓗ.
40ᑍᒤᓕᐅᕆᔪᑦ ᐊᖓᔪᖅᑳᕐᔪᐊᑦ ᓈᕕᑦᓯᕕᒋᕔᑦ ᓇᕐᕈᓇᕐᑎᑕᐅᓂᕐᒥᒃ,
ᐃᓄᖃᖏᑦᑐᒥᓗ ᐱᓱᕋᔭᓕᕐᐳᑦ ᓇᒧᑐᐃᓐᓇᖅ ᐊᖅᑯᑎᖃᖏᑦᑐᒥ.
41ᐊᔪᕐᓴᕐᑐᖅ ᖃᑭᑎᑉᐹ ᐅᑯᒤᒃᓴᕐᑎᑕᐅᓂᕐᒥᑦ,
ᕿᑐᕐᖓᖏᓪᓗ ᐃᓄᒋᐊᒃᓯᑎᑉᐰᑦ ᑲᑎᓐᖓᔪᑎᑐᑦ ᐆᒪᔪᖁᑎᒋᔭᐅᔪᑎᑐᑦ.
42ᐃᓱᐊᕐᑐᓕᔪᑦ ᑕᕝᕙ ᑕᒪᑐᒥᖓ ᑕᑯᓂᐊᕐᐳᑦ ᖁᕕᐊᓱᖕᓂᐊᕐᓗᑎᒡᓗ,
ᐱᐅᖏᑦᑐᓕᒫᓪᓗ ᓂᐸᖏᕐᑎᑕᐅᓂᐊᕐᐳᑦ.
43ᓇᓪᓕᐊᑦ ᑕᕝᕙ ᓯᓚᑐᔪᖅ, ᑕᒪᒃᑯᓂᖓ ᐃᓱᒪᒃᓴᕐᓯᐅᕈᑎᖃᕐᓂᐊᕐᐳᖅ,
ᖃᐅᔨᓂᐊᕐᓗᑎᒡᓗ ᐊᑕᓂᐅᑉ ᓇᒡᓕᒍᓱᖕᓂᖓᓂᒃ ᓱᖁᓯᔪᐃᑦᑐᒥᒃ.
Currently Selected:
ᐃᓐᖏᕈᑎᑦ 107: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
