ᐃᓐᖏᕈᑎᑦ 106
106
ᐃᓴᕆᐊᓕᒥᐅᑦ ᐊᔪᕐᓂᕐᒥᓂᒃ ᐃᓱᒪᒋᔪᓐᓁᕐᕕᐅᓂᖓᑕ ᖁᕕᐊᓇᕐᓂᖓ
1 #
ᑯᕉᓂᑲ ᓯᕗᓪᓖᑦ 16:34; ᑯᕉᓂᑲ ᐂᑉᐸᖏᑦ 5:13; 7:3; ᐄᓱᕋ 3:11; ᐃᓐᖏᕈᑦ 100:5; 107:1; 118:1; 136:1; ᔨᕆᒤᐊ 33:11. ᐊᑕᓂᖅ ᓂᕐᑐᕐᓯᐅᒃ! ᐊᑕᓂᖅ ᖁᔭᒋᓯᐅᒃ, ᐱᐅᔫᖕᒪᑦ;
ᓇᒡᓕᖕᓂᖓ ᓱᕐᕋᔪᐃᑦᑑᖕᒪᑦ ᐃᓱᖃᖏᑦᑐᒧᑦ.
2ᑭᐊ ᐊᑕᓂᐅᑉ ᐱᓂᐊᕐᓂᕐᔪᐊᖏᑦ ᐊᑕᖏᕐᓗᒋᑦ ᐅᖃᐅᑎᒋᔪᓐᓇᕐᐰᑦ?
ᑖᑦᓱᒪᓗ ᓂᕐᑐᕐᑕᐅᔪᒃᓴᐅᓂᖓ ᐊᑕᖏᕐᓗᒍ ᑭᐊ ᓴᖅᑭᑎᑦᓱᓐᓇᕐᐸᐅᒃ?
3ᖁᕕᐊᓱᒍᑎᒃᓴᖃᕐᐳᑦ ᐊᑦᔨᒌᒃᑎᑦᓯᔪᑦ,
ᓈᒻᒪᓈᕐᑐᒥᒃᓗ ᑍᒪᓐᖓᑦ ᐱᓇᓱᐊᖃᑦᑕᕐᑐᖅ!
4ᐊᑕᓃᖅ ᐃᖅᑲᐅᒪᓐᖓ ᐃᓄᖁᑎᖕᓄᑦ ᓮᒻᒪᕐᕕᖃᕐᓃᑦ ᒪᓕᒡᓗᒍ:
ᓴᐳᑎᓕᕈᕕᒋᑦ ᐱᖃᓯᐅᑎᓂᐊᕐᐸᕐᒪ;
5ᑕᑯᔪᓐᓇᖁᓪᓗᖓ ᓂᕈᐊᕐᓯᒪᔭᕐᐱᑦ ᖃᑭᕙᓪᓕᐊᓂᖏᓐᓂᒃ,
ᐃᓅᖃᑎᒌᒡᔪᐊᖁᑎᕕᑦ ᖁᕕᐊᓱᓕᕐᓂᖏᓐᓄᑦ ᖁᕕᐊᓱᖃᑕᐅᔪᓐᓇᖁᓪᓗᖓ,
ᓂᕐᑐᐃᖃᑕᐅᔪᓐᓇᖁᓪᓗᖓ ᑭᖑᕐᖑᔨᔪᖁᑎᑎᑦ ᐃᓚᒋᓗᒋᑦ.
6ᐊᔪᕐᑐᓕᓚᐅᕐᐳᒍᑦ ᓯᕗᓕᕆᓚᐅᕐᑕᕗᑦ ᐃᓚᒋᓪᓗᒋᑦ;
ᓈᒻᒪᖏᑦᑐᓕᒻᒪᕆᒃᓯᒪᕗᒍᑦ, ᐱᐅᖏᑦᑐᓕᓯᒪᓪᓗᑕᓗ.
7 #
ᒨᓯᓯ ᐂᑉᐸᖏᑦ 14:10-12. ᓯᕗᓕᕆᓚᐅᕐᑕᕗᑦ ᑐᑭᓯᓚᐅᓐᖏᓚᑦ ᐄᑦᔨᑉᑎᒥ ᑲᒪᓇᕐᑐᓕᓂᕆᓚᐅᕐᑕᕐᓂᒃ;
ᐃᖅᑲᐅᒪᓚᐅᓐᖏᓚᑦ ᓇᒡᓕᒍᓱᖕᓂᕐᓄᑦ ᐱᓂᐊᕐᓂᕆᖃᑦᑕᓚᐅᕐᑕᕐᓂᒃ;
ᐊᑭᕋᕐᑐᓚᐅᕐᐳᓪᓕ ᖁᑦᓯᖕᓂᕐᐹᖑᔪᒥᒃ ᐃᒪᕐᒥ ᐊᐅᐸᓗᒃᑕᒥ.
8ᓱᓕᓕ ᐱᐅᓕᓚᐅᕐᐰᑦ ᐊᑎᓂ ᐱᑦᔪᑎᒋᓪᓗᒍ,
ᐱᔪᓐᓇᕐᓂᕐᔪᐊᓂ ᖃᐅᔨᔭᐅᑎᑦᓱᒪᓪᓗᒍ.
9 #
ᒨᓯᓯ ᐂᑉᐸᖏᑦ 14:21-31. ᐃᒪᖅ ᐊᐅᐸᓗᒃᑕᖅ ᐅᖃᐅᑎᖕᒪᒍ, ᑕᕝᕙ ᐃᒤᕈᑎᕗᖅ;
ᑕᓯᐅᓚᐅᕐᐰᑦ ᐃᑎᔪᕐᔪᐊᒃᑯᑦ, ᓲᕐᓗ ᓄᓇᒃᑯᑦ ᓴᓗᐊᒪᔪᒃᑯᑦ.
10ᐱᐅᓕᓚᐅᕐᐰᑦ ᐆᒥᒋᔨᖏᑕ ᐱᓇᓱᐊᕐᓂᖏᓐᓂᑦ,
ᓴᐳᑎᓪᓗᒋᓪᓗ ᐊᑭᕋᕐᑐᕐᑎᖏᑕ ᐱᔪᓐᓇᕐᓂᖏᓐᓂᑦ.
11ᐃᒪᕐᔪᐊᓪᓗ ᐅᓕᓚᐅᕐᐰᑦ ᐊᑭᕋᕐᑐᕐᑎᖏᑦ:
ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᑕᖃᓚᐅᓐᖏᓚᖅ.
12 #
ᒨᓯᓯ ᐂᑉᐸᖏᑦ 15:1-21. ᑕᕝᕙ ᑖᑦᓱᒪ ᐅᖃᐅᓯᖏᑦ ᐅᒃᐱᕆᓕᕐᐰᑦ;
ᐃᓐᖏᕐᓯᓚᐅᕐᐳᑦ ᑖᑦᓱᒥᖓ ᓂᕐᑐᐃᓕᕐᓗᑎᒃ.
13ᑖᑦᓱᒪᓕ ᐱᓂᐊᕐᓂᖏᑦ ᐳᐃᒍᑦᓴᐅᑎᒋᓚᐅᕆᕔᑦ;
ᐱᓇᓱᐊᓕᓚᐅᕆᕗᑦ ᑖᑦᓱᒥᖓ ᖃᐅᔨᒋᐊᕐᕕᖃᓚᐅᕋᑎᒃ.
14 #
ᒨᓯᓯ ᓯᑕᒪᖏᑦ 11:4-34. ᐊᖏᔪᕐᔪᐊᒥᒡᓕ ᐃᒃᓯᒎᕐᓂᖃᓕᓚᐅᕐᐳᑦ ᐃᓄᖃᖏᑦᑐᒥ,
ᒎᑎᓗ ᐆᒃᑐᓚᐅᕐᐹᑦ ᓱᓇᖃᔪᐃᑦᑐᒥ.
15ᑖᑦᓱᒪᓗ ᑐᓂᓯᕕᒋᓚᐅᕐᐰᑦ ᐱᔪᒪᔭᖏᓐᓂᒃ;
ᖃᓂᒻᒪᓯᕐᒥᒡᓗ ᓴᓗᒃᑎᓐᓇᕐᑐᒥᒃ ᑎᑭᑕᐅᑎᓪᓗᒋᑦ.
16 #
ᒨᓯᓯ ᓯᑕᒪᖏᑦ 16:1-35. ᒨᓯᓯᒥᒃ ᓯᒡᒐᑦᔨᓚᐅᕐᐳᑦ ᐃᓄᖃᖏᑦᑐᒥ ᑕᖕᒫᕐᓯᒪᓪᓗᑎᒃ,
ᐂᕉᓂᒥᒡᓗ ᐊᑕᓂᐅᑉ ᐃᑦᔪᕐᓁᑦᑐᖁᑎᖓᓂᒃ.
17ᓄᓇ ᒪᒃᐱᕐᓗᓂ ᐄᓯᓚᐅᕐᐳᖅ ᑖᑕᓐᒥᒃ,
ᓴᐅᔭᐅᓪᓗᑎᒡᓗ ᐃᐱᕋᒻ ᐃᓚᒋᔭᖏᓪᓗ.
18ᐃᑯᒪᑦᑕᐅᖅ ᐃᑯᐊᓪᓔᓚᐅᕐᐳᖅ ᐃᓚᒋᔭᖏᓐᓂᒃ;
ᐃᑯᒪᐅᑉ ᐆᓚᐅᕐᐰᑦ ᐱᐅᖏᑦᑐᑦ.
19 #
ᒨᓯᓯ ᐂᑉᐸᖏᑦ 32:1-14. ᓄᕐᕋᓐᖑᐊᒥᒃ ᓴᓇᓚᐅᕐᐳᑦ ᓄᓇᒥ ᕼᐆᕆᑉᒥ,
ᑐᒃᓯᐊᕐᕕᒋᓚᐅᕐᐹᓪᓗ ᐊᐅᒪᑎᓪᓗᒍ ᑯᕕᔭᐅᓯᒪᔪᖅ.
20ᒎᑎᐅᓪᓗ ᓂᕐᑐᕐᓇᕐᓂᕐᔪᐊᖓ ᐃᓇᖏᕐᑕᐅᑎᓚᐅᕐᐹᑦ
ᐃᒻᒧᒃᓯᐅᒐᐅᑉ ᐸᖕᓂᖓᑕ ᐊᑦᔨᓐᖑᐊᖓᓄᑦ ᐃᕕᒐᕐᓂᒃ ᓂᕆᖃᑦᑕᕐᑐᒧᑦ.
21ᒎᑎ ᐱᐅᓕᔨᒋᓚᐅᕐᑕᑎᒃ ᐳᐃᒍᓚᐅᕐᐹᑦ,
ᐊᖏᔪᕐᔪᐊᕌᓗᖕᒥᒃ ᐄᑦᔨᑉᑎᒥ ᐱᓇᓱᐊᓚᐅᕐᑐᖅ.
22ᑲᒪᓇᕐᑐᐊᓗᖕᓂᒃ ᐱᓕᕆᓚᐅᕐᒪᑦ ᓄᓇᒥ ᕼᐋᒥᒥ,
ᓯᕘᕋᓕᕐᓇᕐᑐᓂᒡᓗ ᐊᐅᓚᑦᓯᓚᐅᕐᐳᖅ ᐃᒪᕐᒥ ᐊᐅᐸᓗᒃᑕᒥ.
23ᑍᒤᒻᒪᑦ ᐅᖃᓚᐅᕐᐳᖅ ᑖᒃᑯᓂᖓ ᓄᖒᑦᓯᔪᒪᓕᕐᓗᓂ,
ᓂᕈᐊᕐᓯᒪᔭᖓᓕ ᒨᓯᓯ ᒎᑎᐅᑉ ᓵᖓᓂ ᓂᑯᕕᓚᐅᕐᐳᖅ,
ᓂᓐᖓᐅᒪᓂᖓ ᓴᖑᑎᓪᓗᓂᐅᒃ, ᓄᖒᑦᓯᖁᓇᒍ ᑖᒃᑯᓂᖓ.
24 #
ᒨᓯᓯ ᓯᑕᒪᖏᑦ 14:1-35. ᑕᕝᕙ ᓄᓇᑦᓯᐊᕚᓗᒃ ᓇᕐᕈᒋᓕᓚᐅᕆᕚᑦ,
ᐊᖏᕈᑎᒋᓚᐅᕐᑕᖏᑦ ᐅᒃᐱᕆᓚᐅᓐᖏᓐᓇᒥᒋᑦ:
25ᑐᐱᕐᒥᖕᓃᖏᓐᓇᓚᐅᕐᐳᑦ ᓈᒻᒪᒃᓴᖏᓐᓂᕐᒧᑦ ᐅᖃᓗᕿᓪᓗᑎᒃ,
ᐊᑕᓂᐅᓪᓗ ᓂᐱᖓᓂᒃ ᓈᓚᓚᐅᓐᖏᓚᑦ.
26ᑍᒤᒻᒪᑦ ᓵᕝᕕᒋᓚᐅᕐᐰᑦ ᐅᕐᓕᕐᑐᕐᓗᒋᑦ,
ᑐᖁᑎᑦᓱᒪᓪᓗᒋᑦ ᐃᓄᖃᖏᑦᑐᒥ,
27 #
ᒨᓯᓯ ᐱᖓᔪᖏᑦ 26:33. ᑭᖑᕚᖏᑦ ᓯᐊᒻᒪᕐᑎᑦᓱᒪᓪᓗᒋᑦ ᐃᓅᖃᑎᒌᒡᔪᐊᓄᑦ,
ᓄᓇᓄᓪᓗ ᓇᒧᑐᐃᓐᓇᖅ ᓯᐊᒻᒪᕐᑎᑦᓱᒪᓪᓗᒋᑦ.
28 #
ᒨᓯᓯ ᓯᑕᒪᖏᑦ 25:1-13. ᐃᒻᒥᖕᓂᒃᑕᐅᖅ ᐃᓚᓕᐅᑎᓚᐅᕐᐳᑦ ᐰᓕ-ᐱᐅᕆᒧᑦ,
ᓂᕆᓪᓗᑎᒡᓗ ᑐᓂᕐᕈᑕᐅᓯᒪᔪᓂᒃ ᑐᖁᖓᔪᓄᑦ ᒎᑎᓐᖑᐊᓄᑦ.
29ᑍᒤᓕᐅᕐᓂᕐᒥᖕᓄᑦ ᐊᑕᓂᖅ ᓂᓐᖓᒃᓴᓚᐅᕐᐹᑦ:
ᐋᓐᓂᐊᓇᕐᑐᕐᔪᐊᓄᓪᓗ ᑲᑉᐱᐊᓇᕐᑐᓄᑦ ᑎᑭᑕᐅᓚᐅᕐᐳᑦ.
30ᑕᕝᕙ ᐱᓂᕼᐋᓯ ᑎᑭᓐᓇᒥ ᑕᒪᒃᑯᓂᖓ ᓱᒋᐊᕐᓯᕗᖅ:
ᑕᕝᕙ ᐋᓐᓂᐊᓇᕐᑐᖅ ᓄᖅᑲᕐᑎᑕᐅᕗᖅ.
31ᑕᒪᓐᓇᓗ ᐱᓂᕼᐊᓯᒧᑦ ᐱᓂᐊᑦᓯᐊᕐᓂᐅᓂᕋᕐᑕᐅᓚᐅᕐᐳᖅ
ᑍᒪᓐᖓᓂᑦ ᑭᖑᕚᕇᒃᐸᓪᓕᐊᔪᓂᑦ ᐃᓱᖃᖏᑦᑐᒧᑦ.
32 #
ᒨᓯᓯ ᓯᑕᒪᖏᑦ 20:2-13. ᐃᒪᕐᒥᒃ ᑯᕕᓕᕐᑎᑕᐅᔪᒥ ᒥᕆᐸᒥ ᐊᑕᓂᖅ ᓂᓐᖓᒃᓴᓚᐅᕆᕚᑦ,
ᒨᓯᓯ ᐊᑲᐅᓐᖏᓕᐅᕈᑎᖃᓕᓚᐅᕐᐳᖅ ᑖᒃᑯᓄᖓ ᑍᒤᑎᑕᐅᔪᒥᒃ.
33ᒨᓯᓯ ᓂᓐᖓᒃᑎᑕᐅᓚᐅᕐᒪᑦ ᑖᒃᑯᓄᖓ,
ᐅᐸᓗᐃᓂᕐᒧᑦ ᐃᒃᐱᒍᓱᓪᓗᐊᕋᓂ ᐅᖃᑲᒻᒪᓚᐅᕐᐳᖅ.
34 #
ᐃᓗᐊᕐᓮᔩᑦ 2:1-3; 3:5,6. ᐃᓅᖃᑎᒌᒡᔪᐊᑦ ᓄᖑᓚᐅᓐᖏᓔᑦ,
ᐊᑕᓂᕐᒧᑦ ᓄᖑᑕᐅᖁᔭᐅᓚᐅᕋᓗᐊᕐᑎᓪᓗᒋᑦ:
35ᐃᓅᖃᑎᒌᒡᔪᐊᓄᓪᓕ ᐃᓚᓕᐅᑎᓚᐅᕐᐳᑦ ᐂᑉᐸᕐᑖᖃᑦᑕᓕᕐᓗᑎᒃ,
ᐃᓕᓐᓂᐊᕐᕕᒋᓗᒋᓪᓗ ᐱᓇᓱᐊᕐᓂᖏᓐᓂᒃ.
36ᒎᑎᓐᖑᐊᖏᓐᓄᑦ ᑐᒃᓯᐊᖃᑕᐅᖃᑦᑕᓕᓚᐅᕐᐳᑦ:
ᑕᒪᑐᒧᖓᓗ ᑕᕝᕙ ᓂᒐᕐᑎᑕᐅᑦᔪᑎᖃᓚᐅᕐᐳᑦ.
37 #
ᐊᑕᓃᑦ ᐂᑉᐸᖏᑦ 17:17. ᐃᕐᓂᑎᒃ ᐸᓂᑎᒡᓗ ᑐᓂᕐᕈᓯᕈᑎᒋᓚᐅᕐᐰᑦ
ᐊᓂᕐᓂᕐᓗᖕᓄᑦ ᓵᑖᓇᓯᓄᑦ,
38 #
ᒨᓯᓯ ᓯᑕᒪᖏᑦ 35:33. ᐸᓯᔭᒃᓴᐅᖏᑦᑐᒥᒃ ᐊᐅᖕᒥᒃ ᑯᕕᓯᓚᐅᕐᐳᑦ,
ᐊᒡᓛᑦ ᐃᕐᓂᖏᑦᑕ ᐸᓂᖏᑦᑕᓗ ᐊᐅᖏᓐᓂᒃ,
ᑐᓂᕐᕈᓯᖃᑦᑕᓕᓚᐅᕐᒪᑕ ᑬᓇᓂᒥᐅᑦ ᒎᑎᓐᖑᐊᖏᓐᓄᑦ:
ᓄᓇᓗ ᓇᕐᕈᓇᕐᓯᑎᑕᐅᓚᐅᕐᐳᖅ ᐊᐅᖕᒧᑦ.
39ᐃᒻᒥᖕᓂᒃ ᐱᓂᐊᕐᓂᕐᒥᖕᓄᑦ ᓴᓗᒪᔪᓐᓃᕐᑎᓚᐅᕐᐳᑦ,
ᐊᓯᓐᓂᐊᓚᐅᕐᐳᓪᓗ ᓇᖕᒥᓂᖅ ᐱᓂᐊᕐᓂᕐᒥᒍᑦ.
40 #
ᐃᓗᐊᕐᓮᔩᑦ 2:14-18. ᑍᒤᒻᒪᑦ ᐊᑕᓂᐅᑉ ᓂᓐᖓᓂᖓ ᐱᒋᐊᓯᓚᐅᕐᐳᖅ ᐃᓄᖁᑎᒥᓄᑦ,
ᓇᕐᕈᒋᓕᕐᓗᒋᓪᓗ ᓇᖕᒥᓂᖅ ᑭᖑᕐᖑᑦᔨᔨᖁᑎᒋᔭᓂ.
41ᐃᓅᖃᑎᒌᒡᔪᐊᑦ ᐱᔪᓐᓇᕐᓂᖏᓐᓄᑦ ᑐᓂᓚᐅᕐᐰᑦ;
ᐆᒥᒋᔨᖏᑕᓗ ᐊᐅᓚᓕᕐᓗᒋᑦ.
42ᐆᒥᒋᔨᖏᑕᓗ ᐅᖁᒤᒃᓴᕐᑎᓚᐅᕐᐰᑦ,
ᐱᔪᓐᓇᕐᓂᖏᓐᓄᑦ ᑐᓂᔭᐅᓯᒪᓕᕐᒪᑕ.
43ᐅᓄᕐᑐᐃᓱᕐᓗᒋᑦ ᓴᐳᑎᖃᑦᑕᓚᐅᕐᐰᑦ;
ᑭᓯᐊᓂᓕ ᐱᓂᐊᕐᓂᕐᒥᒍᑦ ᐊᑭᕋᕐᑐᖃᑦᑕᓚᐅᕐᐳᑦ ᑖᑦᓱᒥᖓ,
ᐱᐅᖏᑦᑐᓕᐅᕐᓂᕐᒥᖕᓄᑦ ᓴᓐᖐᓕᑎᑕᐅᖃᑦᑕᓚᐅᕐᐳᑦ.
44ᑭᓯᐊᓂᓕ ᐅᖁᒤᒃᓴᕐᓂᖏᑦ ᐃᒃᐱᒋᕔᑦ,
ᑐᒃᓯᐊᕐᓂᖏᑦ ᑐᓴᕋᒥᒋᑦ:
45ᑖᒃᑯᐊ ᐱᑦᔪᑎᒋᓪᓗᒋᑦ ᐊᖏᖃᑎᖃᕐᓯᒪᓂᓂ ᐃᖅᑲᐅᒪᓚᐅᕐᐹ,
ᓇᒡᓕᒍᓱᖕᓂᕐᔪᐊᓂ ᐱᑦᔪᑎᒋᓪᓗᒍ ᖃᕿᐊᓕᕐᕕᒋᓚᐅᕐᐰᑦ.
46ᓂᑲᒋᔭᐅᓕᕐᑎᓚᐅᕐᐰᓪᓗ ᑕᒤᓐᓄᑦ
ᓵᓚᐅᓪᓗᑎᒃ ᐊᐅᓪᓚᕈᑦᔨᔨᒋᓚᐅᕐᑕᖏᓐᓄᑦ.
47 #
ᑯᕉᓂᑲ ᓯᕗᓪᓖᑦ 16:35,36. ᐱᐅᓕᓚᐅᕐᑎᒍᑦ, ᐊᑕᓃᖅ ᒎᑎᕗᑦ,
ᑲᑎᕐᓱᓚᐅᕐᑎᒍᓪᓗ ᐃᓅᖃᑎᒌᒡᔪᐊᑦ ᐊᑯᕐᖓᓐᓂᑦ,
ᐊᑎᕐᓂᒃ ᐃᑦᔪᕐᓁᑦᑐᒥᒃ ᖁᔭᓕᑦᔪᑎᖃᓕᖁᓪᓗᑕ,
ᓂᕐᑐᐃᓕᖁᓪᓗᑕᓗ ᓂᕐᑐᕐᑕᐅᔪᒃᓴᐅᓃᑦ ᒪᓕᒡᓗᒍ.
48ᓂᕐᑐᕐᑕᐅᓕ ᐊᑕᓂᖅ ᐃᓴᕆᐊᓕᑎᒃᑯᑦ ᒎᑎᖓᑦ
ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ:
ᐃᓄᓕᒫᓪᓗ ᐅᖃᕐᓕᑦ, “ᐋᒦᓐ!”
ᐊᑕᓂᖅ ᓂᕐᑐᕐᑕᐅᓕ!
Currently Selected:
ᐃᓐᖏᕈᑎᑦ 106: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
