ᐃᓐᖏᕈᑎᑦ 104
104
ᓂᕐᑐᐃᓂᖅ ᐱᓐᖑᕐᑎᑦᓯᔨᒥᒃ
1ᑕᕐᓃᒃ, ᐊᑕᓂᖅ ᓂᕐᑐᕈᒃ!
ᐊᑕᓃᖅ ᒎᑎᒐ ᐊᖏᔪᕐᔪᐊᖑᕗᑎᑦ;
ᐊᓐᓄᕌᕐᓯᒪᕗᑎᑦ ᐅᐱᓐᓇᕐᓂᕐᒥᒃ ᐊᖓᔪᖅᑳᕐᔪᐊᖑᓂᕐᒥᒡᓗ,
2ᐃᓕᖕᓂᒃ ᐅᓕᒃᓯᒪᕗᑎᑦ ᖃᐅᒪᔪᒥᒃ ᐊᓐᓄᕌᕆᓪᓗᒍ,
ᕿᓚᒃ ᐃᓯᕕᑉᐸᑦ ᑐᐱᕐᑎᑐᑦ ᑖᓗᑕᕐᑎᑐᓪᓗ.
3ᐃᒪᐅᑉ ᖄᖓᓂ ᐃᑳᖓᔪᓂᒃ ᑐᓐᖓᕕᓕᐅᕐᓯᒪᕗᖅ ᐃᓂᒃᓴᕆᔭᒥᓂᒃ,
ᓄᕗᔧᑦ ᓴᓇᓚᐅᕐᐰᑦ ᐊᒃᓴᓗᐊᖃᕐᑎᓪᓗᒋᑦ ᕿᒧᒃᓯᐅᑎᒋᔪᒪᓪᓗᒋᑦ,
ᐃᑭᒪᖃᑦᑕᕐᐳᖅ ᐊᓄᕆᐅᑉ ᐃᓴᕈᖏᓐᓂ,
4 #
ᐄᑉᕈᐃᓄᑦ 1:7. ᐂᖏᓕᖁᑎᓂ ᐊᓂᕐᓂᓐᖑᕐᑎᓚᐅᕐᐰᑦ,
ᐱᓇᓱᐊᕐᑎᖁᑎᓂᓗ ᐃᑯᒪᐅᓪᓗᑎᒃ ᐃᑯᐊᓚᔪᓐᖑᕐᑎᓪᓗᒋᑦ.
5ᓄᓇᕐᔪᐊᖅ ᐃᓕᓚᐅᕐᐸᑦ ᑐᓐᖓᕕᒃᓴᖏᓐᓄᑦ,
ᐊᐅᓚᑦᔭᒃᑕᐅᖁᓇᒍ ᐃᓱᖃᖏᑦᑐᒧᑦ.
6ᐅᓕᓚᕐᐸᑦ ᐃᒪᕕᖕᒧᑦ ᐃᑎᔪᒧᑦ ᐊᓐᓄᕌᓕᐅᕐᓗᒍ;
ᐃᒪᕐᔪᐊᑦ ᖃᖅᑬᑦ ᖄᖓᒎᓕᕐᑎᓪᓗᒋᑦ.
7ᓱᐊᒃᑲᕕᒋᑦ ᑕᕝᕙ ᕿᒫᕗᑦ;
ᑲᓪᓗᖁᑎᕕᑦ ᓂᐱᖓᓄᑦ ᐅᐃᒪᔮᕐᓗᑎᒃ ᕿᒪᒃᓯᕗᑦ.
8ᒪᔪᕋᕐᓗᑎᒃ ᖃᖅᑲᓄᑦ, ᖃᖅᑲᓂᑦ ᑰᓕᕐᐳᑦ ᓇᕐᓴᓄᑦ,
ᑕᒪᐅᖓ ᐃᒥᕐᒧᑦ ᐃᓂᒃᓴᓕᐊᕆᓯᒪᔭᕐᓄᑦ.
9ᑭᒡᓕᓕᐅᕆᓯᒪᕗᑎᑦ ᐃᒥᕐᒧᑦ ᖄᖏᕐᑕᐅᖁᓐᖏᑕᕐᓂᒃ,
ᐃᒪᕐᔪᐊᑦ ᐅᓕᒃᓯᒋᐊᓪᓚᖁᓇᒋᑦ ᓄᓇᕐᔪᐊᕐᒥᒃ.
10ᓄᓇᐅᑉ ᐃᓗᐊᓂᑦ ᑰᖕᓂᐊᕐᑐᓂᒃ ᓇᕐᓴᓄᑦ ᑎᓕᓯᓯᒪᕗᑎᑦ;
ᖃᖅᑬᑦ ᐊᑯᓐᓂᖏᓐᓂ ᑰᒍᓐᓇᖁᓪᓗᒋᑦ.
11ᐃᒥᕐᑎᑦᓯᖁᓪᓗᒋᑦ ᐆᒪᔪᓕᒫᓂᒃ ᓇᑎᕐᓇᒦᑦᑐᓂᒃ;
ᓯᐅᑎᖅᑯᕐᑐᔪᑦ ᓄᔪᐊᕐᑐᑦ ᐃᒻᒥᖕᓂᒃ ᐃᒥᕈᐃᖁᓪᓗᒋᑦ.
12ᑕᒫᓂ ᓇᐹᕐᑐᓂ ᕿᓚᐅᑉ ᑎᖕᒥᐊᖏᑦ ᐊᖏᕐᕋᖃᕆᕗᑦ;
ᓂᑦᔮᖃᑦᑕᕐᐳᑦ ᓇᐹᕐᑐᐃᑦ ᐊᕙᓚᖓᔪᖏᓐᓂ.
13ᖃᖅᑬᑦ ᐃᒥᕐᑖᕐᑎᖃᑦᑕᕐᐸᑎᑦ ᖁᑦᓯᒃᑐᒥᑦ ᐃᓂᒋᔭᕐᓂᑦ;
ᓄᓇᕐᔪᐊᖅ ᓈᒻᒪᒃᓯᑎᑕᐅᕗᖅ ᐱᓇᓱᐊᕐᓂᕐᐱᑦ ᐱᕈᕐᑎᑕᖏᓐᓄᑦ.
14ᐃᕕᒃᓱᒃᑲᓂᒃ ᐱᕈᕐᑎᑦᓯᕗᑎᑦ ᐃᒻᒧᒃᓯᐅᒐᕐᓄᑦ,
ᐱᕈᕐᑐᓂᒃ ᐱᕈᕐᑎᑦᓯᒋᕗᑎᑦ ᐃᓄᐃᑦ ᐊᑐᒐᒃᓴᖏᓐᓂᒃ,
ᓂᕿᒃᓴᓂᒃ ᓴᖅᑭᑎᑦᓯᖁᓪᓗᒋᑦ ᓄᓇᕐᔪᐊᕐᒥᑦ ᐱᔪᓂᒃ,
15ᕔᓂ ᐃᓅᑉ ᐆᒻᒪᑎᖓᓂᒃ ᖁᕕᐊᓱᒃᑎᑦᓯᖁᓪᓗᒍ,
ᓇᐹᕐᑑᓪᓗ ᐅᕐᓱᖓ ᑮᓇᖓᓂᒃ ᓴᓗᒪᑎᑦᓯᖁᓪᓗᒍ,
ᓂᐊᖂᔭᕐᓗ ᐃᓅᑉ ᐆᒻᒪᑎᖓᓂᒃ ᓲᖑᓂᖅᑳᕐᑎᑦᓯᖁᓪᓗᒍ.
16ᐊᑕᓂᐅᑉ ᓇᐹᕐᑐᖁᑎᖏᑦ ᐃᒪᕾᓐᓇᑯᓪᓗᒋᑦ,
ᓕᐸᓇᓂᐅᑉ ᓇᐹᕐᑐᖏᑦ ᓰᑕᕆᒥᒃ ᐊᑎᓖᑦ ᐃᓕᓚᐅᕐᐰᑦ,
17ᑕᕝᕙᓂ ᑎᖕᒥᐊᑦ ᐅᓪᓗᓕᐅᕐᐳᑦ;
ᑎᖕᒥᐊᑦ ᓂᐅᑯᑖᓕᑦ ᓯᑐᐊᕆᒃᓂᒃ ᐊᑎᓖᑦ
ᑕᕝᕙᓂ ᐊᖏᕐᕋᖃᕐᐳᑦ ᓇᐹᕐᑐᓂ ᑐᖑᔪᐃᓐᓇᕐᑐᓂ.
18ᖃᖅᑬᑦ ᐳᕐᑐᔪᑦ ᓄᔪᐊᕐᑐᓄᑦ ᒎᑦᓯᓄᑦ ᐃᓂᒃᓴᕆᔭᐅᕗᑦ;
ᐅᔭᕋᓱᒡᔪᐃᑦ ᕿᒫᕕᒃᓴᐅᕗᑦ ᐆᒪᔪᓄᑦ ᒥᑭᔫᑎᓄᑦ ᐹᑦᔭᓄᑦ.
19ᑕᖅᑭᖅ ᓴᓇᓯᒪᕙᑦ ᓇᓗᓁᒃᑯᑕᐅᖁᓪᓗᒍ ᓇᓪᓕᐅᓐᓂᕐᓄᑦ;
ᓯᕿᓂᖅ ᖃᐅᔨᒪᕗᖅ ᖃᖓᒃᑯᑦ ᓂᐱᕕᒃᓴᖃᕐᒪᖔᕐᒥ.
20ᑖᕐᑐᒥᒃ ᐋᖅᑭᒃᓯᓯᒪᕗᑎᑦ ᐅᓐᓄᐊᖑᖁᓪᓗᒍ,
ᑕᕝᕙ ᓇᐹᕐᑐᓂ ᐃᓂᓕᓕᒫᑦ ᐊᓂᓕᕐᐳᑦ.
21ᓛᔧᑦ ᐅᕕᒃᑲᖏᑦ ᖃᓕᖑᐊᖃᑦᑕᕐᐳᑦ ᐆᒪᔪᕋᓱᒃᓗᑎᒃ,
ᓂᕿᒃᓴᕐᓯᐅᕐᓗᑎᒃ ᒎᑎᒥᓐᖔᕐᑐᓂᒃ.
22ᓯᕿᓂᖅ ᓄᐃᖕᒪᑦ ᑲᑎᓕᕐᐳᑦ
ᓯᑎᒥᖕᓄᑦ ᓯᓂᒋᐊᕐᑐᓕᕐᓗᑎᒃ,
23ᑕᕝᕙ ᐃᓄᒃ ᓴᓇᔭᕐᑐᓕᕐᐳᖅ
ᐱᓇᓱᐊᕐᓂᐊᓕᕐᓗᓂ ᐅᓐᓄᒧᑦ ᑎᑭᓪᓗᒍ.
24ᐊᑕᓃᖅ, ᐱᓂᐊᕐᓂᑎᑦ ᐊᖏᔪᕐᔪᐊᖑᕗᑦ!
ᑕᒪᕐᒥᒃ ᓯᓚᑐᓂᕐᓄᑦ ᐋᖅᑭᒃᓯᒪᕙᑎᑦ.
ᓄᓇᕐᔪᐊᖅ ᑕᑕᑉᐳᖅ ᐆᒻᒪᕐᑎᓯᒪᔭᕐᓂᒃ.
25ᐃᒪᕕᒃ ᐊᖏᔪᕐᔪᐊᖑᕗᖅ ᓴᓂᒧᑐᔪᕐᔪᐊᖑᓪᓗᓂᓗ,
ᑕᕝᕙᓂᓗ ᓈᓴᒐᒃᓴᐅᖏᑦᑐᓂᒃ ᐆᒪᔪᕐᑕᖃᕐᐳᖅ,
ᐆᒪᔪᓂᒃ ᐊᑦᔨᒌᖏᑦᑐᓂᒃ ᒥᑭᔪᓂᒃ ᐊᖏᔪᓂᒡᓗ.
26 #
ᔫᐱ 41:1; ᐃᓐᖏᕈᑦ 74:14; ᐂᓮᐊᓯ 27:1. ᑕᕝᕙᓂ ᐅᒥᐊᕐᔪᐊᑦ ᐃᖏᕐᕋᖃᑦᑕᕐᐳᑦ;
ᓕᕔᐊᑖᓂᓗ ᑕᕝᕙᓂ ᐊᐅᓚᖃᑦᑕᕆᕗᖅ ᐆᒪᔪᕐᔪᐊᖅ ᓴᓇᓯᒪᔧᑦ.
27ᑕᒪᒃᑯᐊᓕᒫᑦ ᐃᓕᖕᓂᒃ ᑕᑎᖃᖃᑦᑕᕐᐳᑦ,
ᓂᕿᒃᓴᕐᑖᕐᑎᑕᐅᔪᒪᓪᓗᑎᒃ ᓇᓪᓕᐅᓃᑦ ᓈᒻᒪᒃᓯᔭᕌᖓᑕ.
28ᑐᓂᓯᔭᕅᒐᕕᒋᑦ, ᑕᕝᕙ ᑲᑎᕐᓱᐃᓕᕐᐸᒃᐳᑦ;
ᐊᒡᒐᑎᑦ ᐃᓯᕕᑎᒐᕕᒋᑦ, ᑕᕝᕙ ᓂᕆᔭᒃᓴᕐᑖᖃᑦᑕᕐᐳᑦ ᓈᒻᒪᒃᓯᑎᑕᐅᓪᓗᑎᒃ.
29ᑮᓁᑦ ᑕᓕᑎᑐᐊᕋᕕᐅᒃ, ᑕᕝᕙ ᑲᑉᐱᐊᓱᓕᕐᐳᑦ;
ᐊᓂᕐᓂᖏᑦ ᑎᒍᑐᐊᕋᕕᒋᑦ, ᑕᕝᕙ ᑐᖁᕗᑦ ᐅᑎᕐᓗᑎᒡᓗ ᓄᓇᒧᑦ.
30ᐊᓂᕐᓃᑦ ᑎᓕᒐᕕᐅᒃ, ᑕᕝᕙ ᐱᓐᖑᕐᑎᑕᐅᕗᑦ;
ᓄᓇᕐᔪᐊᓪᓗ ᓴᖅᑭᔮᕐᓂᖓ ᓄᑖᓐᖑᕐᑎᑉᐸᑦ.
31ᐊᑕᓂᐅᑉ ᓂᕐᑐᕐᓇᕐᓂᖓ ᐃᓱᖃᖏᑦᑐᒧᑦ ᑍᒤᓕᖓᓕ,
ᐊᑕᓂᐅᑉ ᐱᓂᐊᕐᓂᓂ ᖁᕕᐊᒋᓕᒋᑦ.
32ᓄᓇᕐᔪᐊᖅ ᑕᑯᓴᕐᒪᒍ, ᑕᕝᕙ ᓴᔪᒃᐱᓗᓕᕐᐳᖅ,
ᖃᖅᑬᑦ ᐊᒃᑐᕐᒪᒋᑦ ᑕᕝᕙ ᐳᔫᓕᕐᐳᑦ.
33ᐊᑕᓂᕐᒧᑦ ᐃᓐᖏᖃᑦᑕᕐᓂᐊᕐᐳᖓ ᐃᓅᓯᕋ ᓈᓗᒍ;
ᐃᓐᖏᕐᓗᖓ ᒎᑎᒐ ᓂᕐᑐᖃᑦᑕᕐᓂᐊᕐᐸᕋ ᐃᓅᓂᓕᒫᓐᓂ.
34ᑖᑦᓱᒪ ᐃᓱᒪᒃᓴᕐᓯᐅᕈᑎᒋᔭᒃᑲ ᖁᕕᐊᒋᓕᒋᑦ,
ᐊᑕᓂᕐᒥ ᖁᕕᐊᓲᑎᖃᖁᓪᓗᖓ.
35ᐊᔪᕐᑐᓕᔪᑦ ᓄᖑᑕᐅᓕᕐᓕᑦ ᓄᓇᕐᔪᐊᕐᒥ,
ᐱᐅᖏᑦᑐᓪᓗ ᐱᑕᖃᕈᓐᓃᕐᓗᑎᒃ.
ᑕᕐᓃᒃ ᐊᑕᓂᖅ ᓂᕐᑐᕈᒃ!
ᐊᑕᓂᖅ ᓂᕐᑐᕐᑕᐅᓕ!
Currently Selected:
ᐃᓐᖏᕈᑎᑦ 104: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
