ᐃᓐᖏᕈᑎᑦ 103
103
ᒎᑎᐅᑉ ᓇᒡᓕᖕᓂᖓ
ᑍᕕᑎᐅᑉ ᐃᓐᖏᕈᑖ
1ᑕᕐᓃᖅ, ᐊᑕᓂᖅ ᓂᕐᑐᕈᒃ;
ᐃᓗᓐᓃᑦᑐᓕᒫᓪᓗ, ᐊᑎᖓ ᐃᑦᔪᕐᓁᑦᑐᖅ ᓂᕐᑐᕐᓕᐅᒃ!
2ᑕᕐᓃᖅ, ᐊᑕᓂᖅ ᓂᕐᑐᕈᒃ,
ᐳᐃᒍᕐᓂᐊᕐᓇᒡᓗ ᑖᑦᓱᒧᖓ ᐱᑦᓯᐊᕐᕕᐅᓯᒪᓂᕐᓂᒃ:
3ᑖᑦᓱᒪ ᐊᔪᕐᑐᓕᓂᓕᒫᑎᑦ ᐃᓱᒪᒋᔪᓐᓁᓚᐅᕐᐰᑦ,
ᐋᓐᓂᐊᓂᓕᒫᑎᓪᓗ ᐋᖅᑭᓚᐅᕐᐰᑦ,
4ᐃᓅᓰᓪᓗ ᓴᐳᑎᓚᐅᕐᐹ ᐊᓯᕈᕐᑕᐅᕕᖕᒥᑦ,
ᓂᐊᖂᓯᕐᐹᑎᓪᓗ ᓇᒡᓕᖕᓂᕐᒥᓂᒃ ᐃᓱᖃᖏᑦᑐᒥᒃ ᓂᑲᒍᓱᖕᓂᕐᒥᓂᒡᓗ,
5ᑖᑦᓱᒪ ᓂᕆᔭᒃᓴᕐᓂᒃ ᐱᐅᔪᓂᒃ ᓈᒻᒪᒃᓯᑎᑉᐹᑎᑦ,
ᑕᕝᕙ ᐃᓅᓱᒃᑑᓃᑦ ᓄᑖᓐᖑᕐᑎᑕᐅᕗᖅ ᓇᒃᑐᕋᓕᒃᑎᑐᑦ.
6ᐊᑕᓂᐅᑉ ᐃᑲᔪᕐᑎᒃᓴᖃᖏᑦᑐᓕᒫᑦ
ᐱᓇᓱᐊᕐᕕᒋᕔᑦ ᐃᓱᐊᕐᓂᕐᒥᒃ ᓈᒻᒪᓈᑦᓯᐊᕐᓂᕐᒥᒡᓗ.
7ᑖᑦᓱᒪ ᐱᓇᓱᐊᕈᒪᔭᒥᓂᒃ ᒨᓯᓯ ᖃᐅᔨᑎᓚᐅᕐᐹ,
ᐱᓂᐊᕐᓂᕐᒥᓂᒡᓗ ᐃᓴᕆᐊᓕᒥᐅᑦ ᖃᐅᔨᑎᓚᐅᕐᐰᑦ.
8 #
ᔧᒥᓯ 5:11. ᐊᑕᓂᖅ ᓂᑲᒍᓱᒃᐳᖅ ᐱᑦᓯᐊᕐᓗᓂᓗ,
ᓂᓐᖓᒃᓴᕅᓐᖏᓚᖅ ᓇᒡᓕᒍᓱᑦᓮᓐᓇᕐᓗᓂᓗ.
9ᓱᐊᖏᓐᓇᕐᓂᐊᓐᖏᓚᖅ ᐅᕙᑦᑎᓐᓂᒃ, ᓂᓐᖓᐅᒪᓂᐊᕋᓂᓗ ᐃᓱᖃᖏᑦᑐᒧᑦ.
10ᐱᓇᓱᐊᕐᕕᒋᓐᖏᓛᑎᒍᑦ ᐊᔪᕐᓂᕗᑦ ᐱᑦᔪᑎᒋᓗᒋᑦ,
ᐊᑭᓖᕕᒋᓯᒪᓐᖏᓛᑎᒍᓪᓗ ᐊᔪᕐᑐᓕᓂᕆᓚᐅᕐᑕᕗᑦ ᒪᓕᒡᓗᒋᑦ.
11ᓲᕐᓗ ᕿᓚᒃ ᖁᑦᓯᒃᑑᖕᒪᑦ ᓄᓇᒥᑦ,
ᑍᒫᒃᑕᐅᖅ ᑖᑦᓱᒪ ᓇᒡᓕᖕᓂᖓ ᓱᖁᓯᔪᐃᑦᑑᒋᕗᖅ
ᓯᕘᕋᒋᔭᖃᕐᑐᓄᑦ ᑖᑦᓱᒥᖓ;
12ᓯᕿᓂᐅᑉ ᓄᐃᕕᐊᓂᑦ ᓯᕿᓂᐅᑉ ᓂᐱᕕᐊ ᐅᖓᓯᒃᑑᖕᒪᑦ,
ᑍᒫᒃᑕᐅᖅ ᐊᔪᕐᓂᕗᑦ ᐲᕐᓗᒋᑦ ᐅᖓᓯᒃᓯᑎᑉᐰᑦ ᐅᕙᑦᑎᓐᓂᑦ.
13ᓲᕐᓗ ᐊᑖᑕᐅᑉ ᕿᑐᕐᖓᓂ ᓂᑲᒋᕙᖕᒪᒋᑦ,
ᑍᒫᒃᑕᐅᖅ ᐊᑕᓂᐅᑉ ᓯᕘᕋᒋᔨᓂ ᓂᑲᒋᒋᕔᑦ.
14ᖃᓄᐃᑦᑑᖕᒪᖔᑦᑕ ᖃᐅᔨᒪᖕᒪᑎᒍᑦ;
ᐃᖅᑲᐅᒪᓪᓗᓂᓗ ᓄᓇᑐᐃᓐᓇᐅᒐᑦᑕ.
15ᐃᓅᑉ ᐅᓪᓗᖏᑦ ᐃᕕᒃᓱᒃᑲᑎᑐᑦ ᑍᒤᑉᐳᑦ;
ᑕᑯᒥᓇᕐᑐᓂᒃ ᐱᕈᕐᕕᐅᓯᒪᔪᑎᑐᑦ ᐱᕈᕐᓰᕕᖕᒥ;
16ᐊᓄᕆᒧᑦ ᑎᑭᑕᐅᒐᒥ, ᑕᕝᕙ ᑕᕝᕙᓃᑦᓱᓐᓃᕐᐳᖅ,
ᐃᓂᒋᓚᐅᕐᑕᖓᓗ ᖃᐅᔨᒪᔭᐅᔪᓐᓃᕐᓗᓂ.
17ᐊᑕᓂᐅᓪᓕ ᓇᒡᓕᖕᓂᖓ ᓄᖑᓐᓂᐊᖏᑦᑐᖅ
ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ ᑐᕌᕐᐳᖅ ᓯᕘᕋᒋᔭᖃᕐᑐᓄᑦ ᑖᑦᓱᒥᖓ,
ᐃᓱᐊᕐᑐᓕᓂᖓᓗ ᕿᑐᕐᖓᖏᑕ ᕿᑐᕐᖓᖏᓐᓄᑦ.
18ᑖᒃᑯᓄᖓ ᐊᖏᖃᑎᒌᒍᑎᖃᕐᓯᒪᓂᖓᓂᒃ ᓈᓚᒃᑐᓄᑦ,
ᐱᖁᔭᖏᓐᓂᒡᓗ ᐱᓇᓱᐊᕐᓂᕐᒥᒃ ᐃᖅᑲᐅᒪᔪᓄᑦ.
19ᐊᑕᓂᐅᑉ ᐊᖓᔪᖅᑳᕐᔪᐊᖑᓂᕐᒥᓄᑦ
ᐃᒃᓯᕙᐅᑕᕐᔪᐊᓂ ᐋᖅᑭᒃᓯᒪᕚ ᕿᓚᖕᒥ,
ᐊᑕᓂᐅᕕᖓᓗ ᐊᐅᓚᑦᓯᕗᖅ ᓱᓇᓕᒫᓂᒃ.
20ᐊᑕᓂᖅ ᓂᕐᑐᕐᓯᐅᒃ, ᐃᓕᑦᓯ ᐂᖏᓕᖁᑕᐅᔪᓯ ᑖᑦᓱᒧᖓ,
ᐃᓕᑦᓯ ᐊᔪᖏᑦᑐᕐᔪᐊᖑᔪᓯ ᐅᖃᐅᓯᖓᓂᒃ ᓈᓚᒃᑐᓯ,
ᒪᓕᑦᓯᐊᕐᑐᓯ ᐅᖃᐅᓯᖓᑕ ᓂᐱᖓᓂᒃ!
21ᐊᑕᓂᖅ ᓂᕐᑐᕐᓯᐅᒃ, ᕿᓚᖕᒥᐅᑕᔪᓯ ᑕᒪᑦᓯ,
ᑖᑦᓱᒧᖓ ᐱᓇᓱᐊᕐᑎᐅᔪᓯ ᐱᔪᒪᔭᖓᓂᒃ ᐱᓕᕆᓪᓗᓯ!
22ᐊᑕᓂᖅ ᓂᕐᑐᕐᓯᐅᒃ, ᐱᓇᓱᐊᕐᓂᓕᒫᖏᑦ ᐱᓪᓗᒋᑦ,
ᑕᒪᑦᓯ ᑖᑦᓱᒪ ᐊᑕᓂᐅᕕᖓᓃᑦᑐᓯ.
ᑕᕐᓃᒃ, ᐊᑕᓂᖅ ᓂᕐᑐᕈᒃ!
Currently Selected:
ᐃᓐᖏᕈᑎᑦ 103: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
