ᓲᓗᒨᓂᐅᑉ ᐅᖃᓪᓚᖕᓂᖏᑦ 26
26
1ᐊᐅᔭᒃᑯᑦ ᖃᓐᓂᕐᑐᑐᑦ ᓯᓚᓗᒃᑐᑐᓪᓗ ᐱᕈᕐᑐᓂᒃ ᑲᑎᕐᓱᐃᕕᖕᒥ,
ᑍᒫᒃ ᓈᒻᒪᖏᓐᓂᕗᖅ ᓯᓔᑦᑑᑉ ᐅᐱᒋᔭᐅᓂᖓ.
2ᓲᕐᓗ ᖁᐸᓄᐊᑉ ᓴᐹᕉᑉ ᓱᒃᑲᓕᓪᓗᓂ ᑎᖏᓯᒪᓂᖓᑐᑦ,
ᖁᐸᓄᐊᓪᓗ ᓱᐊᓘᑉ ᐸᐱᑯᑖᓕᐅᑉ ᖃᖓᑕᓂᖓᑐᑦ,
ᐃᓱᒪᓂᕐᓗᒡᕕᐅᓂᒃᑯᑦ ᐃᓅᓯᕐᑖᕐᑎᑕᐅᓂᖅ ᐲᕈᓐᓇᖏᓐᓂᕗᖅ.
3ᕿᒧᒃᓯᐅᑎᒧᑦ ᑏᒐᕈᑎ, ᓯᐅᑎᖅᑯᕐᑐᔪᒧᓪᓗ ᑕᓯᒍᐊᕈᑎ,
ᐊᓇᐅᑕᕐᓗ ᓯᓔᑦᑐᑉ ᖁᓖᖓᓄᑦ.
4ᓯᓔᑦᑐᖅ ᑭᐅᓂᐊᕐᓇᒍ ᓯᓔᑦᑐᒥᒃ ᐅᖃᐅᓯᖃᕐᓂᖓ ᒪᓕᒡᓗᒍ,
ᐊᑦᔨᒋᓕᑐᐃᓐᓇᕆᐊᖃᕋᕕᐅᒃ.
5ᓯᓔᑦᑑᑉ ᓯᓔᓐᓂᖓ ᒪᓕᒡᓗᒍ ᑭᐅᒍᒃ,
ᐃᒻᒥᓂᒃ ᓯᓚᑐᓇᓱᒋᓕᖁᓇᒍ.
6ᓯᓔᑦᑐᒥᒃ ᑎᓕᓯᔪᖅ ᑐᓴᒐᒃᓴᖁᑎᒥᓂᒃ ᐋᑦᓯᖁᓪᓗᒍ,
ᓲᕐᓗ ᓇᖕᒥᓂᖅ ᐃᑎᒐᒥᓂᒃ ᓇᑲᑦᓯᔪᑐᑦ
ᐅᕝᕙᓘᓐᓃᑦ ᑲᑉᐱᐊᓱᒃᑎᑕᐅᓂᕐᒥᒃ ᐋᖓᔮᕐᑐᒧᑦ ᑍᒤᑉᐳᖅ.
7ᐱᓱᒍᓐᓇᖏᑦᑑᑉ ᓂᐅᖏᒃᑎᑐᑦ ᓂᕕᖓᑐᐃᓐᓇᕐᑐᑎᑐᑦ ᑍᒤᑉᐳᖅ,
ᐅᖃᐅᓯᖅ ᓯᓚᑐᔪᖅ ᓯᓔᑦᑐᒥᑦ ᐅᖃᐅᓯᐅᑎᓪᓗᒍ.
8ᐅᔭᕋᒃ ᐃᓪᓘᖕᓄᑦ ᕿᓚᒃᓯᒪᔪᑐᑦ ᑍᒤᑉᐳᖅ,
ᓯᓔᑦᑐᖅ ᐅᐱᒋᔭᐅᑎᓪᓗᒍ.
9ᐅᕐᐱᒊᑦ ᑲᑭᓪᓚᕐᓇᕐᑐᑦ ᐋᖓᔮᕐᑎᐅᑉ ᐊᒡᒐᖏᓐᓄᑦ ᑲᑉᐳᑎᔪᑐᑦ ᑍᒤᑉᐳᖅ,
ᐅᖃᐅᓯᖅ ᓯᓚᑐᔪᖅ ᐅᖃᐅᓯᐅᑎᓪᓗᒍ ᓯᓔᑦᑐᒧᑦ.
10ᐱᓯᒃᑖᕐᑐᑐᑦ ᑭᓇᒃᑯᑐᐃᓐᓇᕐᓂᒃ ᐃᑭᓕᕐᑐᐃᔪᑐᑦ ᑍᒤᑉᐳᖅ,
ᓯᓔᑦᑐᒥᒃ ᐃᖅᑲᓁᔭᕐᑎᓯᔪᑐᑦ ᐱᐅᖏᑦᑐᓕᔪᒥᒃᓗ ᐊᑭᓕᕐᑐᐃᔪᑐᑦ.
11 #
2 ᐲᑦᑐᕉᓯ 2:22. ᕿᒻᒥᕐᑕᐅᖅ ᓇᖕᒥᓂᖅ ᒥᕆᐊᒥᓄᑦ ᐅᑎᕐᒪᑦ,
ᑍᒤᓐᓂᕗᖅ ᓯᓔᑦᑐᖅ ᓯᓔᓐᓂᕐᒥᓄᑦ ᐅᑎᕐᑕᕆᕗᖅ.
12ᖃᐅᔨᒪᕖᑦ ᐊᖑᒻᒥᒃ ᐃᒻᒥᓂᒃ ᓯᓚᑐᓇᓱᒋᔪᒥᒃ?
ᓯᓔᑦᑐᖅ ᐃᓱᒪᓇᕐᓂᕐᓴᐅᕗᖅ ᑖᑦᓱᒪᓐᖓᑦ.
13ᐊᖑᑦ ᐃᕿᐊᓱᒃᑐᖅ ᐅᖃᕐᒪᑦ, “ᐊᖅᑯᑎᕐᒥ ᓛᔭᑕᖃᕐᑐᖅ!
ᓛᔭ ᐃᕐᓯᓇᕐᑐᖅ ᐊᖅᑯᑎᑦᑎᓐᓃᒻᒪᑦ!”
14ᐅᒃᑯᐊᖅ ᕿᕕᕐᑕᐅᑎᒥᒍᑦ ᐊᐅᓚᖕᒪᑦ,
ᐊᖑᑦᑕᐅᖅ ᐃᕿᐊᓱᒃᑐᖅ ᓯᓂᒡᕕᖕᒥᓂ ᐃᒡᓗᐊᓄᑦ ᓵᖃᑦᑕᑐᐃᓐᓇᕆᕗᖅ.
15ᐃᕿᐊᓱᒃᑑᑉ ᐊᒡᒐᓂ ᐃᓕᕔᑦ ᐴᒍᑕᐅᑉ ᐃᓗᐊᓄᑦ;
ᐃᕿᐊᒋᕔᓪᓗ ᖃᓂᕐᒥᓄᑦ ᐅᑎᕐᑎᒋᐊᖏᓐᓂᒃ.
16ᐃᕿᐊᑦᑕᖅ ᓯᓚᑐᓂᕐᓴᐅᓇᓱᒋᕗᖅ ᓇᖕᒥᓂᖅ ᖃᐅᔨᒪᔭᒥᒍᑦ,
ᐊᖑᑎᓂᑦ 7ᓂᑦ ᑐᑭᖃᕐᑐᒥᒃ ᑭᐅᔪᓐᓇᕐᑐᓂᑦ.
17ᓇᓪᓕᐊᑦ ᐊᖅᑯᓵᕐᑐᖅ ᐂᕙᓕᕐᓗᓂ ᓇᖕᒥᓂᖅ ᐱᒋᐊᕐᑎᓐᖏᑕᒥᓂᒃ,
ᐊᑦᔨᖃᕐᐳᖅ ᑎᒍᓯᔪᒥᒃ ᕿᒻᒥᒥᒃ ᓴᓂᖅᑯᑦᑐᒥᒃ ᓯᐅᑎᖏᒃᑎᒍᑦ.
18ᐊᖑᑎᑐᑦ ᑐᑮᕈᑎᓯᒪᔪᑐᑦ ᐃᒋᐅᖅᑬᔪᑐᑦ ᕿᔪᖕᓂᒃ ᐃᑯᒪᔪᓂᒃ,
ᖃᕐᔪᓂᒡᓗ, ᑐᖁᒥᒡᓗ,
19ᑍᒤᑉᐳᖅ ᐊᖑᑦ ᐃᓅᖃᑎᒥᓂᒃ ᐅᐃᕕᕆᒃᓯᔪᖅ,
ᐅᖃᕐᓗᓂᓗ, “ᖁᖓᓐᓈᕿᓇᓱᑐᐃᓐᓇᕐᑐᖓ!”
20ᕿᔪᖃᖏᓐᓂᕐᒧᑦ, ᐃᑯᒪ ᖃᒥᑉᐳᖅ;
ᐃᓅᖃᑎᒥᓂᒃ ᐅᖃᐅᓯᒃᓴᕐᓂᖅ ᐱᑕᖃᕐᑎᓐᓇᒍ, ᐂᕙᓂᖅ ᓄᖅᑲᕐᐳᖅ.
21ᕿᔪᒃᓴᖅ ᐊᑐᕐᒪᑦ ᐊᐅᒪᒧᑦ ᐃᑯᒪᔪᒧᑦ, ᕿᔪᒡᓗ ᐃᑯᒪᒧᑦ,
ᐊᖑᑦᑕᐅᖅ ᐂᕙᔪᒪᔪᖅ ᐃᑯᐊᓪᓚᒃᑎᑦᓯᕗᖅ ᐊᑭᕋᕐᑐᕐᓂᕐᒥᒃ.
22ᐃᓅᖃᑎᒥᓂᒃ ᐅᖃᐅᓯᖃᕐᑑᑉ ᐅᖃᐅᓯᖓ ᐊᑦᔨᖃᕐᐳᖅ ᑕᒧᐊᒃᓴᒥᒃ ᒪᒪᕐᑐᒥᒃ,
ᑕᒪᕐᒥᒃ ᐃᓅᑉ ᑎᒥᖓᑕ ᐃᓗᐊᓄᑦ ᐃᑎᕐᐳᑦ.
23ᖃᓂᖅ ᐅᖃᕐᓴᕅᑦᑐᖅ ᐱᐅᖏᑦᑐᒥᒃ ᐆᒻᒪᑎᓕᖕᒥᑦ,
ᐊᑦᔨᖃᕐᐳᖅ ᒪᕋᖅ ᐃᓗᓕᖁᑎ ᓯᐅᓪᕕᕆᒥᒃ ᐊᒥᐊᕐᓯᒪᔪᑐᑦ ᑍᒤᑉᐳᖅ.
24ᓇᓪᓕᐊᑦ ᐆᒥᓱᒃᑐᖅ, ᐃᔨᕐᓯᒪᑎᑉᐹ ᖃᓂᕐᒥᓄᑦ,
ᐅᐃᕕᕆᒃᓯᓂᕐᓗ ᐃᓗᒥᓃᑎᓪᓗᒍ.
25ᐱᑦᓯᐊᕐᓗᓂ ᐅᖃᕐᐸᑦ, ᐅᒃᐱᕆᓂᐊᕐᓇᒍ,
ᐆᒻᒪᑎᒥᒍᑦ ᐃᔨᕐᓯᓯᒪᖕᒪᑦ 7ᓂᒃ ᐊᑭᕋᕐᑐᕐᓂᕐᔪᐊᓂᒃ.
26ᐆᒥᓱᖕᓂᓂ ᐃᔨᕐᓯᒪᔭᕋᓗᐊᖓ ᐅᐃᕕᕆᒃᓯᓂᕐᒥᒃ,
ᐱᐅᖏᑦᑐᐊᓘᓂᓂ ᓴᖅᑭᑎᓐᓂᐊᕐᐹ ᐃᓄᒋᐊᒃᑐᑦ ᓵᖓᓂ.
27ᓇᓪᓕᐊᑦ ᐃᑎᕐᓴᓕᐅᕐᑐᖅ ᑕᕝᕗᖓ ᑲᑕᖕᓂᐊᕐᐳᖅ,
ᐅᔭᕋᒡᔪᐊᒥᒡᓗ ᐊᒃᓴᑳᑎᑦᓯᔪᖅ ᐊᒃᓴᑲᕐᕕᐅᓂᐊᕆᓪᓗᓂ.
28ᐅᖃᖅ ᓴᒡᓗᔪᖅ ᓵᓚᐅᓂᕐᒥᒃ ᐆᒥᓱᒃᐳᖅ,
ᖃᓂᕐᓗ ᓄᖅᑲᔪᐃᑦᑐᖅ ᓯᖁᒥᒍᑎᒃᓴᒥᓂᒃ ᓴᓇᕗᖅ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 26: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
