ᓲᓗᒨᓂᐅᑉ ᐅᖃᓪᓚᖕᓂᖏᑦ 27
27
1 #
ᔧᒥᓯ 4:13-16. ᖃᐅᒃᐸᐅᓂᐊᕐᑐᕐᒧᑦ ᐱᔪᕆᑦᑍᓕᒋᑦ,
ᖃᐅᔨᒪᖏᓐᓇᕕᑦ ᓱᓇᒥᒃ ᐅᓪᓗᖅ ᐱᑎᑦᓯᓂᐊᕐᒪᖔᑦ.
2ᐊᓯᖕᓄᑦ ᓂᕐᑐᕐᑕᐅᓕᕆᑦ, ᓇᖕᒥᓂᖅ ᖃᓂᕐᓂᐅᖏᑦᑐᖅ;
ᐃᓅᖃᑎᒋᓐᖏᑕᕐᓄᑦ, ᓇᖕᒥᓂᖅ ᖃᓂᕐᓅᖏᑦᑐᖅ.
3ᐅᔭᕋᒃ ᐅᖁᒤᑉᐳᖅ ᓯᐅᕋᕐᓗ ᐅᖁᒤᒃᑭᕗᖅ,
ᓯᓔᑦᑑᓪᓕ ᓂᓐᖓᖕᓂᖓ ᐅᖁᒤᓐᓂᕐᓴᐅᕗᖅ ᑕᒪᖏᖕᓂᑦ.
4ᓂᓐᖓᐅᒪᓂᖅ ᐱᐅᓐᖏᓚᖅ, ᓂᓐᖓᖕᓂᒡᓗ ᓵᓚᖃᕈᓐᓇᕐᐳᖅ;
ᑭᓇᓕ ᓯᖕᓇᓂᐅᑉ ᓵᖓᓂ ᓇᖏᕈᓐᓇᕐᐹ?
5ᐃᓂᕐᑎᕆᓂᖅ ᐱᐅᓂᕐᓴᐅᕗᖅ ᓇᒡᓕᖕᓂᕐᒥᑦ ᐃᔨᕐᓯᒪᔪᒥᑦ.
6ᐋᖅᑭᒃᓱᐃᓂᐅᕗᖅ ᐃᓚᓐᓈᑉ ᐃᑭᓕᕐᓯᓂᖓ;
ᐊᑭᕋᐅᓪᓕ ᑯᓂᒃᓯᓂᖓ ᓯᓔᕐᕆᒃᓯᓂᐅᕗᖅ.
7ᑕᕐᓂᐅᑉ ᐊᕿᐊᑦᑐᓱᖕᓂᖓ ᐱᐅᒃᓴᖏᓐᓂᐅᕗᖅ ᕼᐊᓂᒥᒃ,
ᑕᕐᓂᐅᓪᓕ ᑳᒃᑑᑉ ᖃᒃᑭᓐᓇᕐᑐᑦ ᓰᕐᓇᕐᓯᑎᑉᐰᑦ.
8ᓲᕐᓗ ᑎᖕᒥᐊᖅ ᐃᕙᕕᖕᒥᓂᑦ ᕿᒤᒃᐸᑦ
ᑍᒫᒃᑕᐅᖅ ᐃᓄᒃ ᕿᒤᒋᕗᖅ ᐃᓂᒋᔭᒥᓂᒃ.
9ᐅᕐᓱᕐᑎᕈᑏᑦ ᑎᐱᑦᓯᐊᕆᒃᓴᐅᑏᓪᓗ ᐆᒻᒪᑎᐅᑉ ᖁᕕᐊᒋᕔᑦ,
ᑍᒫᒃᑕᐅᖅ ᐊᖑᑎᐅᑉ ᐃᓚᓐᓈᖓᑕ ᐅᖃᐅᑦᔪᐃᓂᖏᑦ ᓰᕐᓇᕐᑑᒋᕗᑦ.
10ᕿᒤᓐᓇᕐᑍᓕᒍᒃ ᓇᖕᒥᓂᖅ ᐃᓚᓐᓈᑦ ᐊᑖᑕᕕᓪᓘᓐᓃᑦ ᐃᓚᓐᓈᖓ;
ᖃᑕᓐᖑᑎᕕᓪᓘᓐᓃᑦ ᐃᒡᓗᖓᓄᐊᕐᑍᓕᒋᑦ ᐅᓪᓗᒥ ᖁᕕᐊᓇᖏᑦᑐᒦᓐᓂᕐᓂ;
ᐱᐅᓂᕐᓴᐅᕗᖅ ᓯᓚᖅᑲᑏᑦ ᖃᓂᑦᑐᒦᑦᑐᖅ ᖃᑕᓐᖑᑎᖕᓂᑦ ᐅᖓᓯᒃᑐᒦᑦᑐᒥᑦ.
11ᐃᕐᓃᒃ, ᓯᓚᑐᓕᕆᑦ, ᐆᒻᒪᑎᒐᓗ ᖁᕕᐊᓱᒃᑎᒍᒃ,
ᑭᐅᔪᓐᓇᖁᓪᓗᖓ ᐅᕙᓐᓂᒃ ᓈᒻᒪᒃᓴᖏᓐᓇᓱᒃᑐᒥᒃ.
12ᐅᑦᔨᑦᑎᐊᕐᑐᖅ ᐱᐅᖏᑦᑐᒥᒃ ᐊᒡᒋᕐᑐᒥᒃ ᑕᑯᕙᒃᐳᖅ ᐃᔨᕐᐸᒡᓗᓂᓗ;
ᓯᓔᑦᑐᕐᓕ ᑲᔪᓯᕗᑦ ᓱᒋᐊᕐᑕᐅᓪᓗᓂᓗ.
13ᐃᓕᑕᕆᓐᖏᑕᒥᓄᑦ ᐱᖁᑎᒥᓂᒃ ᑐᓂᓯᔫᑉ ᐊᓐᓄᕌᖓ ᐱᒍᒃ,
ᐊᑭᓕᐅᑎᓐᖑᕐᓕ ᐊᕐᓇᒧᑦ ᐊᓯᓐᓂᐊᕐᑎᒧᑦ.
14ᐃᓚᓐᓈᒥᓂᒃ ᓮᒻᒪᕐᑎᑦᓯᔪᖅ ᓂᐱᖅᑯᕐᑐᓗᓂ,
ᐅᓪᓛᒻᒪᕆᒃᑯᑦ ᒪᑭᓪᓗᓂ,
ᑖᓐᓇ ᐃᓱᒪᓂᕐᓗᒡᕕᐅᔪᑐᑦ ᐃᓕᖓᕗᖅ.
15ᐅᓪᓗᕐᒥ ᓯᓚᓗᒃᑎᓪᓗᒍ ᑯᑐᐃᓐᓇᕐᑐᖅ
ᐊᑦᔨᖃᕐᐳᖅ ᐊᕐᓇᑐᑦ ᐂᕔᓐᓇᕐᑐᑐᑦ.
16ᓇᓪᓕᐊᑦ ᐊᕐᓇᒥᒃ ᑖᑦᓱᒥᖓ ᓄᖅᑲᕐᑎᑦᓯᔪᖅ ᐊᓄᕆᒥᒃ ᓄᖅᑲᕐᑎᑦᓯᒋᕗᖅ,
ᑎᒍᓯᕗᕐᓗ ᐅᕐᓱᒥᒃ ᐊᒡᒐᒥᓄᑦ ᑕᓕᕐᐱᖕᒥᓄᑦ.
17ᓲᕐᓗ ᓴᕕᕋᔭᒃ ᐃᐱᒃᓮᖕᒪᑦ ᓴᕕᕋᔭᖕᒥᒃ,
ᑍᒫᒃᑕᐅᖅ ᐊᖑᑦ ᐃᓚᓐᓇᕆᔭᒥᓂᒃ ᐃᐱᒃᓮᒋᕗᖅ ᑕᐅᑦᑐᐊᓂᒃ.
18ᓇᓪᓕᐊᑦ ᓇᐹᕐᑐᒥᒃ ᐸᐅᕐᖓᓕᖕᒥᒃ ᑲᒪᑦᓯᐊᕐᑐᖅ ᓂᕆᕕᒋᔪᒫᕐᐹ ᐸᐅᕐᖓᖏᓐᓂᒃ;
ᑍᒫᒃᑕᐅᖅ ᐊᖓᔪᖅᑳᒥᓂᒃ ᑲᒪᑦᓯᐊᕐᑐᖅ ᐅᐱᒋᔭᐅᔪᒫᕐᐳᖅ.
19ᓲᕐᓗ ᐃᒪᖅ ᑕᕐᕋᒃᑯᑦ ᓴᖅᑭᑎᑦᓯᖕᒪᑦ ᑮᓇᕐᒥᒃ,
ᑍᒫᒃᑕᐅᖅ ᐊᖑᑎᐅᑉ ᐃᓱᒪᖓ ᓴᖅᑭᑎᑦᓯᕗᖅ ᐃᓅᓯᖓᓂᒃ.
20ᑐᖁᖓᔪᑦ ᐃᓂᖓᑦ ᐊᓯᕈᕐᑕᐅᓂᕐᓗ ᑕᑕᑦᓱᓐᓇᓐᖏᓛᒃ;
ᐊᖑᑎᐅᓪᓗ ᐃᔨᖏᒃ ᓈᒻᒪᒃᓯᓚᐅᕐᓯᒪᓐᖏᓛᒃ.
21ᐅᒃᑯᓯᒃ ᐊᐅᒃᑎᕆᕕᐅᕗᖅ ᓯᐅᓪᕕᕆᒧᑦ ᐃᑯᒪᓗ ᒎᓗᒧᑦ,
ᐊᖑᓪᓗ ᐱᐅᓯᑎᑕᐅᕗᖅ ᐊᓯᖏᑕ ᐅᖃᐅᓯᖏᓐᓄᑦ.
22ᓯᓔᑦᑐᖅ ᓯᖃᓪᓕᒐᓗᐊᕈᕕᐅᒃ ᓂᐊᖂᔭᒃᓴᑐᑦ ᓯᖃᓪᓕᔭᐅᕙᒃᑐᑐᑦ,
ᓯᓔᓐᓂᖓᑕ ᕿᒪᖕᓂᐊᓐᖏᓛ.
23ᓰᐱᖁᑎᑎᑦ ᐊᔪᐃᓐᓇᕐᓗᒋᑦ ᑲᒪᒋᑦᓯᐊᒃᑭᑦ,
ᐆᒪᔪᖁᑎᑎᓪᓗ ᖃᐅᔨᓴᑦᓯᐊᕐᓗᒋᑦ;
24ᐊᒃᓱᐃᓐᓃᑦ ᐃᓱᖃᖏᑦᑑᓐᖏᓚᑦ;
ᐊᖓᔪᖅᑳᕐᔪᐊᑉ ᓂᐊᖂᑎᖓ ᑭᖑᕚᕇᓄᑦ ᑲᔪᓯᓂᐊᓐᖏᓚᖅ?
25ᐃᕕᒃᓱᒊᑦ ᓄᖑᑉᐸᑕ, ᑕᕝᕙ ᐃᕕᒃᓱᒐᕐᓂᒃ ᐱᕈᓕᕐᑐᓂᒃ ᓴᖅᑭᑦᑐᖃᕐᐳᖅ,
ᖃᖅᑲᐅᓪᓗ ᐱᕈᕐᑐᖏᑦ ᐃᓚᐅᕈᑎᒃᓮᑦ ᑲᑎᕐᓱᕐᑕᐅᒋᕗᑦ.
26ᓄᕐᕅᑦ ᐃᓕᖕᓂᒃ ᐊᓐᓄᕌᒃᓴᕐᑖᕐᑎᑦᓯᔪᒫᕐᐳᑦ,
ᒎᑦᓰᓪᓗ ᐊᑭᖏᓐᓄᑦ ᐱᕈᕐᓰᕕᒃᑖᕈᒫᕐᐳᑎᑦ.
27ᒎᑦᓰᓪᓗ ᐃᒻᒧᖏᓐᓂᒃ ᐊᒥᒐᖏᑦᑐᒥᒃ ᓂᕿᖃᕈᒫᕐᐳᑎᑦ,
ᐃᒡᓗᒥᐅᖃᑎᕕᑦ ᓂᕿᒃᓴᖏᓐᓂᒃ, ᐱᔨᕕᓪᓗ ᐊᕐᓁᑦ ᓂᕿᒋᔪᒫᕐᐰᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 27: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
