ᓲᓗᒨᓂᐅᑉ ᐅᖃᓪᓚᖕᓂᖏᑦ 25
25
ᓱᓕ ᓲᓗᒨᓂᐅᑉ ᐅᖃᓪᓚᖕᓂᖏᑦ
1ᐅᑯᐊᑦᑕᐅᖅ ᑕᕝᕙ ᓲᓗᒨᓂᐅᑉ ᐅᖃᐅᓯᕆᓚᐅᕐᑕᖏᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᕼᐃᓯᑬᐊᐅᑉ ᐱᔨᖏᓐᓂᑦ ᐊᑦᔨᓕᐅᕐᑕᐅᓚᐅᕐᑐᑦ:
2ᒎᑎᐅᑉ ᐱᓐᓇᕐᓇᕐᓂᕐᔪᐊᕆᕚ ᓱᓇᑐᐃᓐᓇᖅ ᐃᔨᕐᓯᒪᓗᒍ,
ᐊᖓᔪᖅᑳᕐᔪᐊᓪᓕ ᐱᓐᓇᕐᓇᕐᓂᕆᕚ ᓱᓇᑐᐃᓐᓇᖅ ᕿᓂᕐᓗᒍ ᓇᓂᓗᒍᓗ.
3ᕿᓚᒃ ᐳᕐᑐᓂᕆᓗᒍ ᓄᓇᓗ ᐃᑎᓂᕆᓗᒍ,
ᑍᒫᒃ ᐊᖓᔪᖅᑳᕐᔪᐊᑉ ᐃᓱᒪᖓ ᓇᓂᔭᒃᓴᐅᓐᖏᓚᖅ,
4ᓯᐅᓪᕕᕆᐅᑉ ᐊᑐᕐᑐᒃᓴᐅᖏᓐᓂᖓ ᐲᕐᓗᒍ,
ᑕᕝᕙ ᓯᐅᓪᕕᕆᓕᕆᔨᐅᑉ ᐱᐅᓴᐅᑎᓕᐊᕆᓗᒍ ᓴᓇᓂᐊᓕᕐᐹ.
5ᐱᐅᖏᑦᑐᓕᔪᑦ ᐲᕐᓗᒋᑦ ᐊᖓᔪᖅᑳᕐᔪᐊᑉ ᓇᔪᒐᖓᓂᑦ,
ᐃᒃᓯᕙᐅᑕᕐᔪᐊᖓ ᑕᕝᕙ ᐃᓂᖃᕐᓂᐊᕐᐳᖅ ᐃᓱᐊᕐᑐᓕᓂᕐᒥᒃ.
6 #
ᓘᑲᓯ 14:8-10. ᐃᓕᖕᓂᒃ ᐊᖏᔪᕈᕐᑎᓐᓂᐊᕐᓇᒃ ᐊᖓᔪᖅᑳᕐᔪᐊᑉ ᓇᔪᒐᖓᓂ,
ᐅᐱᒋᔭᐅᔪᑦ ᐃᓂᖏᓐᓂ ᓇᖏᕐᓂᐊᕐᓇᒃ;
7ᐱᐅᓂᕐᓴᐅᖕᒪᑦ ᐃᓕᖕᓄᑦ ᐅᖃᕐᐸᑦ, “ᒪᐅᖓ ᕾᓚᐅᕆᑦ,”
ᐊᒃᐸᓯᖕᓂᕐᓴᒨᖁᔭᐅᒐᔭᕐᓂᕐᓂᑦ ᐊᖓᔪᖅᑳᕐᔪᐊᑉ ᑐᖏᓕᖏᑕ ᓇᔪᕐᓂᖓᓂᑦ,
ᐃᔨᖕᓄᑦ ᑕᒪᓐᓇ ᑕᑯᓚᐅᕐᑍᑦ.
8ᐃᖅᑲᕐᑐᐃᕕᖕᒧᑦ ᑐᐊᕕᕐᓂᐊᕐᓇᒃ;
ᐱᔭᕇᕐᐸᑦ ᖃᓄᐃᓕᐅᕐᓂᐊᕋᕕᑦ, ᐃᓅᖃᑎᕕᑦ ᑲᓐᖑᓇᕐᑐᒦᑎᑉᐸᑎᑦ?
9ᐸᓯᒃᓕᕈᑎᒋᔧᑦ ᐃᓅᖃᑎᖕᓄᑦ ᐂᕙᑦᔪᑎᒋᒍᕕᐅᒃ,
ᓴᖅᑭᑎᑦᓯᓂᐊᕐᓇᒃ ᐊᓯᕕᑦ ᐃᔨᕐᓯᒪᔭᖓᓂᒃ,
10ᐃᓕᖕᓂᒃ ᑐᓵᔪᒥᑦ ᑲᓐᖑᓱᒃᑎᑕᐅᖁᓇᒃ,
ᐅᖃᐅᓯᐅᓃᓪᓗ ᐱᐅᖏᑦᑐᒥᒃ ᐃᓱᓕᓐᓂᐊᓐᖏᓚᖅ.
11ᐅᖃᐅᓯᖅ ᓇᓛᒎᕐᑐᒥᒃ ᐅᖃᐅᓯᐅᔪᖅ
ᐊᑦᔨᖃᕐᐳᖅ ᐋᐳᓂᒃ ᒎᓗᓂᒃ ᓯᐅᓪᕕᕆᒥᒃ ᐊᓪᓕᕋᖃᕐᑐᓂᒃ.
12ᓲᕐᓗ ᓯᐅᑎᒥᐅᑕᖅ ᒎᓗ ᐅᕝᕙᓗ ᐱᐅᓴᐅᑎ ᒎᓗᑦᓯᐊᖅ,
ᓯᓚᑐᔫᑉ ᐃᓂᕐᑎᕆᓂᖓ ᓯᐅᑎᒧᑦ ᓈᓚᑦᓯᐊᕐᑐᒧᑦ.
13ᓲᕐᓗ ᐊᐳᑎᐅᑉ ᓂᒡᓕᓇᕐᓂᖓ ᐱᕈᕐᑐᓂᒃ ᑲᑎᕐᓱᐃᕕᖕᒥ,
ᑎᓕᔭᐅᔫᑉ ᑲᔪᓯᑦᓯᐊᕐᓂᖓ ᑎᓕᔨᒥᓄᑦ,
ᐊᖓᔪᖅᑳᒥ ᑕᕐᓂᖓ ᓲᖑᓯᑎᑉᐹ.
14ᓄᕗᔭᒥᒃ ᐊᓄᕆᒥᒡᓗ ᓯᓚᓗᒃᑎᑦᓯᖏᑦᑐᒥᒃ ᐊᑦᔨᖃᕐᐳᖅ
ᓇᓪᓕᐊᑦ ᐱᐅᔪᕆᔪᖅ ᑐᓂᓯᓂᕋᕐᑐᖅ ᑐᓂᓯᓇᓂᓗ.
15ᕿᓄᐃᓵᕐᓂᒃᑯᑦ ᐊᖓᔪᖅᑳᕐᔪᐊᖅ ᐃᓱᒪᓕᐅᕐᑕᐅᔪᓐᓇᕐᒪᑦ,
ᐅᖃᕐᒧᓪᓗ ᓂᑲᒍᓱᒃᑐᒧᑦ ᓴᐅᓂᖅ ᓇᑲᑕᐅᔪᓐᓇᕐᐳᖅ.
16ᕼᐊᓂᒥᒃ ᓇᓂᓯᒍᕕᑦ, ᐃᓕᖕᓄᑦ ᓈᒻᒪᒃᑐᒥᒃ ᑭᓯᐊᓂ ᓂᕆᒋᑦ,
ᐊᖏᓗᐊᕐᑐᒥᒃ ᓂᕆᒍᕕᑦ ᒥᕆᐊᑐᐃᓐᓇᕆᐊᖃᕋᕕᑦ.
17ᐊᑯᓔᓗᐊᕐᑐᒥᒃ ᐃᓅᖃᑎᕕᑦ ᐃᒡᓗᖓᓄᑦ ᐃᑎᖃᑦᑕᕐᓇᒃ,
ᐃᕿᐊᓐᖑᕈᓂᑎᑦ ᐆᒥᒋᔪᓐᓇᕐᒪᑎᑦ.
18ᐊᖑᑦ ᓴᒡᓗᑎᖃᕐᑐᖅ ᐃᓅᖃᑎᒥᓂᖅ,
ᐊᑦᔨᖃᕐᐳᖅ ᐊᓇᐅᑕᕐᒥᒃ, ᓴᕕᒡᔪᐊᒥᒡᓘᓐᓃᑦ, ᖃᕐᔪᒥᒡᓘᓐᓃᑦ ᐃᐱᒃᑐᒥᒃ.
19ᓱᓕᔪᕐᓴᕐᑐᖅ ᐊᖑᒻᒥᒃ ᑲᔪᓯᔪᓐᓇᖏᑦᑐᒥᒃ ᐃᓱᐊᖏᑦᑐᖃᕐᑎᓪᓗᒍ,
ᐊᑦᔨᖃᕐᐳᖅ ᑭᒍᓯᕆᓂᕐᒥᒃ, ᐃᑎᒐᖕᓂᒡᓗ ᐱᒡᓗᐃᓯᒪᔪᓂᒃ.
20ᐃᓐᖏᕐᕕᖃᕐᑐᖅ ᐆᒻᒪᑎᒥᒍᑦ ᐅᖁᒤᒃᓴᕐᑐᒧᑦ
ᐊᑦᔨᖃᕐᐳᖅ ᐊᓐᓄᕌᒥᓂᒃ ᐲᕐᓯᔪᒥᒃ ᓯᓚ ᓂᒡᓚᓱᒃᑎᓪᓗᒍ,
ᐊᒻᒪᓗ ᕕᓂᒐᒥᒃ ᐃᑭᒧᑦ ᑯᕕᔭᐅᔪᒥᒃ.
21 #
ᕉᒪᒥᐅᓄᑦ 12:20. ᐊᑭᕋᕐᑐᕐᑏᑦ ᑳᒃᐸᑦ ᓂᐊᖂᔭᒥᒃ ᓂᕆᑎᒍᒃ;
ᐃᒥᕈᒃᐸᓪᓗ ᐃᒪᕐᒥᒃ ᐃᒥᕐᑎᒍᒃ;
22ᑍᒤᓕᐅᕈᕕᑦ ᐊᐅᒪᓂᒃ ᐃᑯᒪᓕᖕᓂᑦ ᓂᐊᖁᖓᓄᑦ ᐃᓕᐅᖅᑬᓂᐊᕐᐳᑎᑦ,
ᐊᑕᓂᐅᓪᓗ ᐊᑭᓕᕈᒫᕐᐹᑎᑦ.
23ᐊᓄᕆ ᐅᓐᓄᐊᓪᓗᐊᒥᑦ ᐱᔪᖅ ᓯᓚᓗᖕᒥᒃ ᓇᒃᓴᕐᒪᑦ,
ᐅᖃᕐᓗ ᐊᑭᓂᐊᕐᑐᖅ, ᓂᓐᖓᐅᒪᓂᕐᒥ ᑕᑯᒃᓴᐅᑎᑦᓯᕗᖅ.
24ᐱᐅᓂᕐᓴᐅᕗᖅ ᐃᓂᖃᕐᓗᓂ ᐃᒡᓘᑉ ᖁᓚᑕ ᑎᕆᖅᑯᐊᓂ,
ᐃᒡᓗᒥᐅᖃᑎᖃᕆᐊᒥᑦ ᐊᕐᓇᒥᒃ ᐂᕙᔪᒪᔪᒥᒃ.
25ᐃᒥᖅ ᓂᒡᓕᓇᕐᑐᖅ ᑕᕐᓂᕐᒧᑦ ᐃᒥᕈᒃᑐᒧᑦ ᐊᑦᔨᖃᕐᐳᖅ,
ᑐᓴᕈᒥᓇᕐᑐᒥᒃ ᑐᓴᕐᑎᑕᐅᓂᖅ ᓄᓇᒥᑦ ᐅᖓᓯᒃᑐᒥᑦ.
26ᐊᖑᑦ ᐃᓱᐊᕐᑐᖅ ᐃᓱᒪᓕᐅᕐᑕᐅᒃᐸᑦ ᐱᐅᖏᑦᑐᓕᔪᒧᑦ
ᐊᑦᔨᖃᕐᐳᖅ ᐳᐊᓚᕕᖕᒥᒃ ᒪᕐᕋᕐᒥᒃ ᐃᒥᕐᑕᕐᕕᖕᒥᒡᓗ ᓱᕈᕐᓯᒪᔪᒥᒃ.
27ᐱᐅᓐᖏᓚᖅ ᐊᖏᓗᐊᕐᑐᒥᒃ ᕼᐊᓂᒥᒃ ᓂᕆᒋᐊᖅ,
ᑍᒤᒃᑭᕗᖅ ᓇᖕᒥᓂᖅ ᓂᕐᑐᕐᑕᐅᒍᑎᒃᓴᒥᒃ ᕿᓂᕆᐊᖅ ᓂᕐᑐᕐᑕᐅᓂᒻᒪᕆᐅᓐᖏᓚᖅ.
28ᓇᓪᓕᐊᑦ ᓇᖕᒥᓂᕐᒥᓂᒃ ᐊᐅᓚᑦᓯᔪᓐᓇᖏᑦᑐᖅ
ᐊᑦᔨᖃᕐᐳᖅ ᐃᒡᓗᒐᓴᒡᔪᐊᓂᒃ ᓯᖁᒥᓯᒪᔪᓂᒃ, ᐊᕙᓗᕐᔪᐊᖃᖏᑦᑐᓂᒃ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 25: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
