ᓲᓗᒨᓂᐅᑉ ᐅᖃᓪᓚᖕᓂᖏᑦ 22
22
1ᐃᓕᑕᕆᔭᐅᓂᖃᑦᓯᐊᕐᓂᖅ ᓂᕈᐊᕆᔭᒃᓴᐅᓂᕐᓴᐅᕗᖅ ᐊᒃᓱᐃᑦᑐᐊᓘᓂᕐᒥᑦ,
ᖁᕕᐊᒋᔭᐅᓂᖅ ᐱᐅᓂᕐᓴᐅᕗᖅ ᓯᐅᓪᕕᕆᒥᑦ ᒎᓗᒥᓪᓗ.
2ᐊᒃᓗᐃᑦᑐᖅ ᐊᒃᓗᔪᕐᓗ ᐊᑕᐅᓯᕐᒥᒃ ᐊᑦᔨᒌᒍᑎᖃᕐᐴᒃ,
ᐊᑕᓂᐅᑉ ᐱᓐᖑᕐᑎᓯᒪᔧᓐᓇᕆᖕᒪᒋᒃ.
3ᐅᑦᔨᕐᓱᑦᓯᐊᕐᑐᖅ ᖃᐅᔨᒪᔭᕇᓲᖑᕗᖅ ᐱᐅᖏᑦᑐᖅ ᑎᑭᓚᐅᕐᑎᓐᓇᒍ
ᓴᐳᑎᓯᒪᓇᓱᐊᕈᑎᒃᓴᒥᓂᒃ ᐱᓇᓱᐊᕐᓯᒪᔪᓐᓇᕐᐳᖅ,
ᐅᑦᔨᕐᓱᑦᓯᐊᖏᑦᑐᕐᓕ ᖃᐅᔨᓚᐅᕋᓂ ᐱᐅᖏᑦᑐᒧᑦ ᑎᑭᐅᑎᑐᐃᓐᓇᓲᖑᕗᖅ.
4ᒥᑭᒡᓕᑎᕐᓯᒪᓂᖅ ᐊᑕᓂᕐᒥᒡᓗ ᓯᕘᕋᒋᔭᖃᕐᓂᖅ ᐊᑭᓕᕐᑕᐅᕘᒃ
ᐊᒃᓱᐃᓐᓂᕐᒥᒃ ᐅᐱᒋᔭᐅᓂᕐᒥᒃ ᐃᓅᓯᕐᒥᒡᓗ.
5ᐅᕐᐲᑦ ᑲᑭᓐᓇᕐᑐᓖᑦ ᓂᒊᓪᓗ ᐱᑦᓯᐊᕈᓐᓇᖏᑦᑐᑦ ᐊᖅᑯᑎᖓᓃᑉᐳᑦ,
ᐃᒻᒥᓂᒃ ᓴᐳᑎᓯᒪᔫᑉ ᑕᒪᒃᑯᐊ ᐅᖓᓯᒋᓂᐊᕐᐰᑦ.
6ᓄᑕᖅᑲᑦ ᐱᒋᐅᕐᓴᕐᑕᐅᑦᓯᐊᕆᐊᖃᕐᐳᑦ ᐊᑐᕐᓂᐊᕐᑕᖏᓐᓂᒃ ᓈᒻᒪᒃᑐᒃᑯᑦ,
ᐃᓐᓇᐅᓕᕈᓂᓗ ᐳᐃᒍᕐᓂᐊᓐᖏᓛ.
7ᐊᒃᓱᐃᑦᑐᑦ ᐊᐅᓚᑦᓯᕗᑦ ᐊᒃᓱᔪᓂᒃ,
ᐊᑦᑕᑐᕐᑎᓗ ᑭᒡᒐᕆᔭᐅᕗᖅ ᐊᑦᑕᑐᕐᑎᑦᓯᔨᒧᑦ.
8ᐊᑦᔨᒌᒃᑎᑦᓯᖏᓐᓂᕐᒥᒃ ᑲᓐᖓᕐᓱᐃᔪᖅ ᕿᒃᓵᖕᓇᕐᑐᒥᒃ ᑲᑎᕐᓱᐃᓂᐊᕐᐳᖅ,
ᓂᓐᖓᐅᒪᓂᖓᑕᓗ ᑲᑉᐱᐊᓇᕐᓂᖓ ᓵᓚᖃᕐᓂᐊᓐᖏᓚᖅ.
9ᐃᖅᑲᓱᒃᐸᒃᑐᖅ ᐊᓯᒥᓂᒃ ᓮᒻᒪᕐᑎᑕᐅᓂᐊᕐᐳᖅ,
ᐊᒃᓱᔪᓄᑦ ᑐᓂᓯᖃᑦᑕᕋᒥ ᓂᕿᖁᑎᒥᓂᒃ.
10ᒥᑕᐅᑎᒃᓴᕐᑐᖅ ᐊᓂᑎᑕᐅᒃᐸᑦ ᐊᒃᓱᕈᕐᑎᑕᐅᓂᖅ ᐊᓂᓂᐊᕆᕗᖅ,
ᐂᕙᓂᖅ ᓵᓚᓯᐊᖃᕐᓂᕐᓗ ᓄᖅᑲᕐᓂᐊᕆᕗᑦ.
11ᐆᒻᒪᑎᒃᑯᑦ ᐱᐅᖏᓐᓂᕐᑕᖃᖏᑦᑐᒥᒃ ᐱᔪᒪᓂᕐᐹᖃᕐᑐᖅ
ᐅᖃᐅᓯᕐᒥᒍᓪᓗ ᓇᒡᓕᖕᓂᖃᑦᓯᐊᕐᑐᖅ ᐃᓚᓐᓈᖃᓕᕐᓂᐊᕐᐳᖅ ᐊᖓᔪᖅᑳᕐᔪᐊᕐᒥᒃ.
12ᐊᑕᓂᐅᑉ ᐃᔨᖏᒃ ᑕᑯᓐᓈᕐᐳᒃ ᖃᐅᔨᑎᑕᐅᔪᒥᒃ,
ᐅᒃᐱᕐᓂᖃᖏᑦᑐᓪᓕ ᐅᖃᐅᓯᖏᑦ ᐊᑐᕐᑎᓐᖏᓔᑦ.
13ᓱᓇᓕᕆᔪᒪᖏᑦᑐᖅ ᐅᖃᕐᐳᖅ, “ᓯᓚᒥ ᓛᔭᑕᓕᐊᓘᖕᒪᑦ
ᐊᓂᒐᓗᐊᕈᒪ ᐅᒋᐊᕐᑕᐅᑐᐃᓐᓇᕐᓂᐊᕐᐳᖓ!”
14ᐊᕐᓇᐅᑉ ᐊᖑᓐᓂᐊᕐᑎᐅᑉ ᖃᓂᖓ ᐃᑎᕐᓴᕐᔪᐊᑎᑐᑦ ᑍᒤᑉᐳᖅ,
ᐊᑕᓂᐅᑉ ᓈᒻᒪᒋᓐᖏᑕᖓ ᑕᕝᕗᖓ ᐃᔪᒃᑲᕐᓂᐊᕐᐳᖅ.
15ᓯᓔᓐᓂᖅ ᓄᑕᖅᑲᑦ ᐆᒻᒪᑎᖏᓐᓃᑉᐳᖅ,
ᐊᓇᐅᑕᐅᓪᓕ ᐋᖅᑭᒋᐊᕐᓯᓂᐅᑉ ᓯᓔᓐᓂᖅ ᐊᓂᑎᓐᓂᐊᕐᐹ ᑖᑦᓱᒪᓐᖓᑦ.
16ᐊᒃᓱᔪᓂᒃ ᐅᖁᒤᑦᑐᒦᑎᑦᓯᔪᖅ ᐊᒃᓱᐃᓕᕈᒪᓗᓂ,
ᐊᒃᓱᐃᑦᑐᓄᓪᓗ ᑐᓂᓯᖃᑦᑕᕐᑐᖅ, ᐊᔪᕐᓴᕐᓇᕐᑐᒧᑦ ᑎᑭᓐᓂᐊᕐᐴᒃ.
ᓯᓚᑐᔪᑦ ᐅᖃᐅᓰᑦ ᐅᖃᕐᓯᒪᔭᖏᑦ 30ᐅᔪᑦ
17ᓯᐅᑏᒃᑭᒃ ᓈᓚᒃᓕᒃ, ᑐᓵᒋᑦ ᓯᓚᑐᔫᑉ ᐅᖃᐅᓯᖏᓐᓂᒃ,
ᐃᓱᒤᑦ ᐊᑐᓕᕈᒃ ᖃᐅᔨᒪᓂᓐᓄᑦ;
18ᖁᕕᐊᓇᕐᓂᐊᕐᒪᑦ ᐃᓗᖕᓂ ᐱᓯᒪᒍᕕᒋᑦ,
ᖃᐅᔨᒪᓂᒃᑲ ᐅᖃᐅᓯᕆᖃᑦᑕᕐᓗᒋᑦ.
19ᐊᑕᓂᕐᒥᒃ ᑕᑎᖃᓕᖁᓪᓗᑎᑦ,
ᐅᓪᓗᒥ ᐃᓕᖕᓄᑦ ᖃᐅᔨᔭᐅᑎᑉᐸᒃᑲ, ᐃᓛᒃ ᐃᓕᖕᓄᑦ.
20ᑎᑎᕋᕐᕕᒋᓚᐅᓐᖏᓚᒌᑦ ᐅᖃᐅᓯᕐᓂᒃ 30ᓂᒃ
ᐃᑲᔪᕐᓯᒋᐊᕐᓂᕐᒥᒃ ᖃᐅᔨᑎᑕᐅᓂᕐᒥᒡᓗ?
21ᖃᐅᔨᓕᖁᓪᓗᑎᑦ ᓱᓕᔪᓂᒃ ᓈᒻᒪᒃᑐᓂᒃᓗ ᐅᖃᐅᓯᕐᓂᒃ,
ᑭᐅᑦᔪᑎᒃᓴᖃᖁᓪᓗᑎᓪᓗ ᐅᖃᐅᓯᕐᓂᒃ ᓱᓕᔪᓂᒃ ᐃᓕᖕᓂᒃ ᑎᓕᓯᔪᓄᑦ.
-1-
22ᐊᒃᓱᔪᑦ ᑎᒡᓕᒐᕐᕕᒋᑦᑍᓕᒃᑭᑦ ᐊᒃᓱᓂᖓ ᐱᑦᔪᑎᒋᓗᒍ,
ᐅᖁᒤᒃᓴᕐᑐᓂᒡᓗ ᐊᒃᓱᕈᕐᓇᕐᑐᒦᑎᑦᓯᖃᑦᑕᖏᓪᓗᑎᑦ;
23ᐊᑕᓂᐅᑉ ᓯᕐᓈᓕᑐᐃᓐᓇᕆᐊᖃᕐᒪᒋᑦ ᑍᒤᑦᑑᓂᖏᑦ ᐱᓪᓗᒋᑦ,
ᑎᒡᓕᒐᕐᕕᒋᑐᐃᓐᓇᕆᐊᖃᕐᒪᒋᑦ ᐃᓅᓯᖏᓐᓂᒃ ᑖᒃᑯᓂᖓ ᑎᒡᓕᒐᕐᕕᖃᕐᑐᑦ.
-2-
24ᐃᓚᓐᓈᕐᑖᕋᓱᐊᕐᑍᓕᒋᑦ ᓂᓐᖓᒃᓴᕅᑦᑐᒥᒃ,
ᓂᓐᖓᒃᑳᓗᖕᒥᒡᓗ ᐃᓅᖃᑎᑖᕋᓱᐊᕐᓂᐊᕐᓇᒃ.
25ᐃᓕᖅᑯᓯᕆᔭᖏᓐᓂᒃ ᐃᓕᖅᑯᓯᕐᑖᕈᓐᓇᕋᕕᑦ,
ᓂᒐᕐᑎᑕᐅᔪᑎᑐᑦ ᐊᔪᓕᕐᑎᑕᐅᔪᓐᓇᕋᕕᑦ.
-3-
26ᐃᓚᒋᔭᐅᑦᑍᓕᒋᑦ ᑍᒃᑯᓄᖓ ᑎᒎᑎᓂᒃᑯᑦ ᐊᖏᖃᑎᒌᒍᑎᓕᐅᓲᓄᑦ,
ᐊᑭᓖᑦᔪᑦᔨᔭᕆᐊᖃᓕᕐᓗᑎᑦ ᐊᓯᕕᑦ ᐊᑭᓕᒃᓴᖏᓐᓂᒃ.
27ᐊᑭᓕᐅᑎᒃᓴᖃᕈᓐᓃᕈᕕᑦ ᐊᑭᓕᕈᓐᓇᕐᓂᐊᕐᓯᒪᔭᕐᓂᒃ,
ᐃᒡᓕᕐᓂᒃ ᓯᓂᒡᕕᒋᕙᒃᑕᕐᓂᒃ ᐊᕐᓵᕐᑕᐅᖁᓇᒃ.
-4-
28ᓄᓇᐅᑉ ᐊᕕᒃᑐᕐᓯᒪᓂᖓᓄᑦ ᓇᓗᓁᒃᑯᑕᕐᓂᒃ ᐃᓕᓯᒪᔪᑐᖃᕐᓂᒃ ᐲᔧᑦᑍᓕᒋᑦ,
ᓯᕗᓕᕕᓂᕐᐱᑦ ᐋᖅᑭᒃᓱᓚᐅᕐᑕᕕᓂᖏᓐᓂᒃ.
-5-
29ᐱᓇᓱᐊᕐᓯᑎᐊᓗᖕᒥᒃ ᖃᐅᔨᒪᕖᑦ?
ᑖᓐᓇ ᓇᖏᕈᒫᕐᐳᖅ ᐊᖓᔪᖅᑳᕐᔪᐊᑉ ᓵᖓᓂ;
ᐃᓄᑐᐃᓐᓁᑦ ᓵᖓᓐᓂ ᓇᖏᕈᒫᓐᖏᓚᖅ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 22: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
