ᓲᓗᒨᓂᐅᑉ ᐅᖃᓪᓚᖕᓂᖏᑦ 23
23
-6-
1ᐊᖓᔪᖅᑳᒥᒃ ᐃᒃᓯᕙᖃᑎᖃᕈᕕᑦ ᓂᕆᖃᑎᒋᓂᐊᕐᓗᒍ,
ᐅᑦᔨᕐᓱᑦᓯᐊᕆᑦ ᖃᐅᔨᒪᑦᓯᐊᕋᓱᐊᕐᓗᑎᑦ ᓱᓇᒥᒃ ᐱᑎᑕᐅᖕᒪᖔᕐᐱᑦ;
2ᓂᕆᓗᐊᕈᒪᓂᐊᓗᐃᑦ ᓄᖅᑲᕐᑎᑦᔪᒃ
ᐊᖏᓗᐊᕐᑐᒥᒃ ᓂᕆᓂᐅᓴᓗᐊᕈᕕᑦ.
3ᒪᒪᕆᔭᖏᓐᓂᒃ ᐱᔪᒪᓂᐊᕐᓇᒃ, ᑍᒤᑦᑐᑦ ᐅᐃᕕᕆᒃᓯᕐᒪᑕ.
-7-
4ᐱᓇᓱᐊᕐᓂᕐᒧᑦ ᑕᖃᑐᐃᓐᓇᕐᓂᐊᕐᓇᒃ ᐊᒃᓱᐃᓕᔪᒪᓂᕐᒧᑦ;
ᓯᓚᑐᓂᖃᕆᓪᓕ, ᓄᖅᑲᖓᔪᓐᓇᕐᓗᑎᑦ.
5ᐊᒃᓱᐃᓕᕐᓂᖅ ᐃᔨᖕᓄᑦ ᑕᑯᒐᕕᐅᒃ, ᑕᕝᕔᓐᓇᖅ ᐊᓯᐅᕗᖅ;
ᐊᒃᓱᐃᓐᓂᖅ ᐃᓴᕈᖃᕐᑐᑎᑐᑦ ᑎᖏᔪᑐᑦ ᑍᒤᒻᒪᑦ;
ᓇᒃᑐᕋᓕᒃᑐᑦ ᕿᓚᖕᒧᑦ ᑎᖏᔪᑐᑦ.
-8-
6ᒥᖕᓂᑐᔫᑉ ᓂᐊᖂᔭᖓᓂᒃ ᓂᕆᓂᐊᕐᓇᒃ,
ᒪᒪᕆᔭᖏᓐᓂᒡᓘᓐᓃᑦ ᐱᔪᒪᓂᐊᕐᓇᒃ;
7ᐆᒻᒪᑎᒥᒍᑦ ᐃᓱᒪᒋᔭᓂ, ᐃᓕᖅᑯᓯᕆᖕᒪᒋᑦ,
“ᓂᕆᒋᑦ ᐃᒥᕐᓗᑎᓪᓗ” ᐃᓕᖕᓄᑦ ᐅᖃᕐᐳᖅ;
ᐆᒻᒪᑎᖓᑕᓕ ᐃᓚᒋᓐᖏᓛᑎᑦ.
8ᓂᕿ ᑕᒧᐊᔧᑦ, ᒥᕆᐊᕆᓂᐊᕐᐸᑦ,
ᐅᖃᐅᓯᕐᑎᓪᓗ ᐱᐅᔪᑦ ᑕᒪᐅᖓᑐᐃᓐᓈᕐᓂᐊᕐᐳᑦ.
-9-
9ᐅᖃᕐᓂᐊᕐᓇᒃ ᓯᓔᑦᑐᖅ ᑐᓵᑎᓪᓗᒍ,
ᐅᖃᐅᓯᕐᑎᑦ ᓯᓚᑐᔪᑦ ᓇᕐᕈᒋᓂᐊᕐᒪᒋᑦ.
-10-
10ᓄᓇᒥ ᓇᓗᓁᒃᑯᑕᑐᖃᕐᒥᒃ ᐲᕐᓯᓂᐊᕐᓇᒃ,
ᐊᑖᑕᖃᖏᑦᑐᓪᓗ ᓄᓇᖁᑎᖓᓂ ᐃᓂᖃᕐᓂᐊᕐᓇᒃ;
11ᑍᒤᑦᑐᑦ ᓴᐳᑦᔨᔨᖓᑦ ᐊᔪᒐᖃᖏᑦᑑᖕᒪᑦ;
ᐃᖅᑲᕐᑐᕐᑕᐅᑦᔪᑎᒃᓴᕐᓂᒃ ᐱᓇᓱᐊᕈᓐᓇᕐᒪᑦ.
-11-
12ᐃᓱᒤᑦ ᐊᑐᕈᒃ ᐃᓕᓐᓂᐊᕐᑎᑕᐅᔪᒪᓂᕐᒧᑦ,
ᓯᐅᑏᒃᑭᒡᓗ ᐅᖃᐅᓯᕐᓄᑦ ᖃᐅᔨᑎᑦᓯᔪᓄᑦ.
-12-
13ᓄᑕᕋᐅᑉ ᐋᖅᑭᒋᐊᕆᐊᖃᕐᓂᖓ ᖄᖏᕐᑎᓐᓂᐊᕐᓇᒍ,
ᐊᓇᐅᑕᕐᒧᑦ ᐊᓇᐅᒐᓗᐊᕈᕕᐅᑉ ᑐᖁᓂᐊᖏᒻᒪᑦ.
14ᐊᓇᐅᑕᕐᒧᑦ ᐊᓇᐅᓕᕈᕕᐅᒃ, ᑕᕐᓂᖓ ᓴᐳᑎᓂᐊᕐᐸᑦ ᑐᖁᒥᑦ.
-13-
15ᐃᕐᓃᒃ, ᐆᒻᒪᑏᑦ ᓯᓚᑐᒃᐸᑦ,
ᐆᒻᒪᑎᒐᑦᑕᐅᖅ ᖁᕕᐊᓱᖃᑕᐅᓂᐊᕐᐳᖅ;
16ᑕᕐᓂᕋ ᐊᓕᐊᓁᒍᓱᖕᓂᐊᕐᐳᖅ
ᖃᓃᑦ ᓇᓛᒎᕐᑐᓂᒃ ᐅᖃᓕᕐᐸᑦ.
-14-
17ᐆᒻᒪᑏᑦ ᑐᓱᓂᐊᕋᓂ ᐊᔪᕐᑐᓕᔪᓂᒃ,
ᐊᔪᐃᓐᓇᓕᕆᑦ ᐊᑕᓂᕐᒥᒃ ᓯᕘᕋᓂᕐᒥᒃ ᐅᓪᓗᖅ ᓈᓗᒍ.
18ᓇᓗᓇᖏᑦᑐᒥᒃ, ᓯᕗᓂᒃᓴᕐᑕᖃᕐᒪᑦ, ᓂᕆᐅᒋᔧᑦ ᑭᐱᔭᐅᓂᐊᓐᖏᓚᖅ.
-15-
19ᐃᕐᓃᒃ, ᑐᓵᒋᑦ, ᓯᓚᑐᓕᕐᓗᑎᓪᓗ,
ᐃᓱᒤᑦ ᑕᓯᐅᕈᒃ ᐊᖅᑯᑎᒃᑯᑦ,
20ᕔᓂᒧᑦ ᐋᖓᔮᕐᑎᑦ ᐃᓚᒋᓂᐊᕐᓇᒋᑦ, ᓂᕿᒥᒡᓗ ᓂᕆᓗᐊᕐᐸᒃᑐᑦ;
21ᐋᖓᔮᕐᑏᑦ ᓂᕆᓗᐊᕐᐸᒃᑐᓪᓗ ᐊᔪᕐᓴᓕᕈᒫᕐᒪᑕ,
ᑐᑭᖃᖏᑦᑐᒥᒃ ᐃᓅᓯᖃᕐᓂᕐᒧᑦ ᐊᓐᓄᕌᕐᓗᓕᕐᓂᐊᕐᐳᑎᑦ.
-16-
22ᐊᑖᑍᑦ ᓈᓚᒍᒃ ᐃᓕᖕᓂᒃ ᕿᑐᕐᖓᕐᑖᓚᐅᕐᑐᖅ,
ᐊᓈᓁᓪᓗ ᓇᕐᕈᒋᓂᐊᕐᓇᒍ ᐃᓄᑐᖃᐅᓕᕐᐸᑦ.
23ᓱᓕᔪᖅ ᓂᐅᕕᐊᕆᒍᒃ, ᓂᐅᕐᕈᑎᒋᓂᐊᕐᓇᒍᓗ;
ᓯᓚᑐᓂᕐᓗ ᓂᐅᕕᐊᕆᒍᒃ, ᐃᓕᓐᓂᐊᕐᑎᑕᐅᓂᕐᓗ, ᑐᑭᓯᑦᓯᐊᕐᓂᕐᓗ.
24ᐃᓱᐊᕐᑑᑉ ᐊᑖᑕᖓ ᐊᖏᔪᒥᒃ ᖁᕕᐊᓱᖕᓂᐊᕐᐳᖅ;
ᓯᓚᑐᔪᒥᒡᓗ ᕿᑐᕐᖓᕐᑖᕐᑑᑉ ᕿᑐᕐᖓᓂ ᖁᕕᐊᓲᑎᒋᓂᐊᕐᐹ.
25ᐊᑖᑍᑦ ᐊᓈᓁᓪᓗ ᖁᕕᐊᓱᒃᑎᒃᑭᒃ,
ᐃᓕᖕᓂᒃ ᐃᕐᓂᐊᖃᓚᐅᕐᑑᑉ ᖁᕕᐊᓲᑎᒋᓛᑎᑦ.
-17-
26ᐃᕐᓃᒃ, ᐆᒻᒪᑏᑦ ᐅᕙᓐᓄᑦ ᑐᓂᒍᒃ,
ᐃᔨᖕᓄᓪᓗ ᐱᓂᐊᕐᓂᒃᑲ ᐅᑦᔨᕆᓗᒋᑦ.
27ᐊᕐᓇᖅ ᑮᓇᐅᔭᒧᑦ ᓄᓕᐊᒐᖅ ᐃᑎᔪᑐᑦ ᐃᑎᕐᓵᓗᒃᑐ ᑍᒤᒻᒪᑦ,
ᐊᖑᓐᓂᐊᕐᑎᓗ ᐃᒥᕐᑕᕐᕕᒃᑐᑦ ᓂᕈᑭᑦᑐᑐᑦ ᑍᒤᑉᐳᖅ.
28ᐱᕋᔭᒃᑎᑐᑦ ᓇᓚᕗᖅ ᐅᑕᖅᑭᓪᓗᓂ ᓵᓚᒋᓂᐊᕐᑕᒥᓂᒃ,
ᐅᒃᐱᕆᔭᒃᓴᐅᔪᓐᓃᕐᑎᑦᓯᓪᓗᓂ ᐊᖑᑎᓂᒃ.
-18-
29ᑭᓇ ᑲᑉᐱᓇᕐᑐᒦᑉᐸ? ᑭᓇ ᕿᒃᓵᖕᓇᕐᑐᒦᑉᐸ?
ᑭᓇ ᐂᕙᓂᕐᒦᑉᐸ? ᑭᓇ ᐃᓱᐊᕆᓐᖏᑕᒥᓂᒃ ᐅᖃᐅᓯᖃᕐᐹ?
ᑭᓇ ᐃᑭᓕᕐᑕᐅᓯᒪᕙ ᐱᑦᔪᑎᖃᖏᑦᑐᒧᑦ? ᑭᓇᐅᑉ ᐃᔨᖏᒃ ᐊᐅᐸᕐᓯᓯᒪᕚᒃ?
30ᑖᒃᑯᐊᖑᕗᑦ ᐊᑯᓂ ᕔᓂᒥᒃ ᐃᒥᕐᑐᑦ,
ᑖᒃᑯᐊᖑᕗᑦ ᕿᓂᕐᑐᑦ ᕔᓂᒥᒃ ᐃᓚᓯᒪᔪᒥᒃ.
31ᕔᓂᒥᒃ ᑕᑯᓐᓇᕐᓂᐊᕐᓇᒃ ᐊᐅᐸᕐᑑᑎᓪᓗᒍ,
ᑕᑯᒥᓇᕐᑑᓗᓂ ᐃᒥᐅᑎᒥ, ᐄᓗᒍ ᐃᓱᐊᕐᑑᑎᓪᓗᒍ;
32ᑭᖑᓂᖓᒍᑦ ᑮᓯᓂᐊᕐᐳᖅ ᖁᒡᓗᒋᐊᑎᑐᑦ,
ᖃᓯᓕᓇᕐᓗᓂᓗ ᖁᒡᓗᒋᐊᑐᑦ ᑐᖁᓐᓇᕐᑐᑐᑦ.
33ᐃᔩᒃᑭᒃ ᑕᑯᓐᓇᓕᕐᓂᐊᕐᐴᒃ ᑕᑯᓕᒪᓇᖏᑦᑐᓂᒃ,
ᐃᓱᒤᓪᓗ ᓂᓪᓕᐊᓕᕐᓗᓂ ᐱᐅᖏᑦᑐᐊᓗᖕᓂᒃ.
34ᐃᓛᒃ, ᐊᑦᔨᖃᓕᕐᓂᐊᕐᐳᑎᑦ ᐃᒪᕐᕕᐅᑉ ᕿᑎᖓᓂ ᓇᓚᔪᒥᒃ,
ᐅᕝᕙᓘᓐᓃᑦ ᓇᐸᕈᑕᐅᑉ ᓄᕗᐊᓂ ᓇᓚᔪᒥᒃ, ᐅᖃᕐᓗᓂ:
35“ᑎᒡᓗᒃᑕᐅᒐᓗᐊᕋᒪ, ᐋᓐᓂᓚᐅᓐᖏᓚᖓ;
ᐊᓇᐅᓕᕋᓗᐊᕐᒪᖓ ᐃᒃᐱᖕᓂᓚᐅᓐᖏᓚᖓ.
ᖃᖓᓕ ᑐᐸᖕᓂᐊᕐᐳᖓ?
ᐃᒥᕐᓂᐊᕐᑕᓐᓂᒃ ᕿᓂᒃᑲᓐᓂᕐᓂᐊᕋᒪ.”
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 23: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
