ᓲᓗᒨᓂᐅᑉ ᐅᖃᓪᓚᖕᓂᖏᑦ 21
21
1ᐊᖓᔪᖅᑳᕐᔪᐊᑉ ᐆᒻᒪᑎᖓᑕ ᐃᒥᕐᒥᒃ ᑰᖕᓂᖓ ᐊᑕᓂᐅᑉ ᐊᒡᒐᖏᓐᓃᑉᐳᖅ,
ᑰᖕᓂᖓ ᓇᒧᑐᐃᓐᓇᖅ ᓵᑎᖃᑦᑕᕈᓐᓇᕐᐹ ᐃᓱᒪᒥᓂᒃ.
2ᐃᓅᑉ ᐊᑐᕐᑕᓕᒫᓂ ᓈᒻᒪᒐᓱᒋᕔᑦ ᑕᐅᑐᒃᑕᒥᒍᑦ,
ᐊᑕᓂᐅᓪᓕ ᐆᒻᒪᑎᖏᑎᒍᑦ ᖃᐅᔨᓴᕐᐰᑦ.
3ᐃᓱᐊᕐᑐᓂᒃ ᓈᒻᒪᑦᓯᐊᕐᑐᓂᒡᓗ ᐱᓇᓱᐊᕐᓂᖅ ᓈᒻᒪᒋᔭᐅᓂᕐᓴᐅᕗᖅ ᐊᑕᓂᕐᒧᑦ,
ᑐᓂᕐᕈᑎᓂᑦ ᐆᑕᒃᓴᓂᑦ ᑐᓂᓯᓂᕐᒥᑦ.
4ᐱᔪᓐᓇᕋᓱᒋᓂᖅ ᐆᒻᒪᑎᒃᑯᓪᓗ ᐱᐅᔪᕆᓂᖅ,
ᐱᐅᖏᑦᑐᓕᔪᑦ ᐱᓇᓱᐊᒐᒃᓴᓕᐊᖏᑦ, ᐊᔪᕐᑐᓕᓂᐅᕗᑦ.
5ᑲᔪᖏᕐᓂᖃᑦᓯᐊᕐᓗᑎᒃ ᐱᓂᐊᕈᒪᔭᒥᓂᒃ ᐋᖅᑭᒃᓱᐃᕙᒃᑐᑦ ᐊᔪᕐᓴᕐᓂᐊᓐᖏᓚᑦ,
ᑐᐊᕕᕐᓗᑎᒃ ᐱᓂᐊᕈᒪᔭᒥᓂᒃ ᐋᖅᑭᒃᓱᐃᔪᑦ ᐊᔪᕐᓴᓕᕐᓂᐊᕐᐳᑦ.
6ᓴᓗᕿᑦᓯᓂᒃᑯᑦ ᐱᐅᔪᓂᒃ ᐱᑖᕐᑐᕐᓂᖅ
ᐊᔪᕐᓴᓕᑦᓴᐅᑎᒋᑦᔪᑎᒃᓴᐅᕗᖅ ᑐᖁᒦᑦᔪᑎᒃᓴᐅᓪᓗᓂᓗ.
7ᑲᑉᐱᐊᓱᒃᑎᑦᓯᓂᕐᒥᒃ ᐱᐅᖏᑦᑐᓕᔪᑦ ᓴᓂᕐᑎᑐᑦ ᐊᒡᕖᕐᑎᓐᓂᐊᕐᐰᑦ,
ᐱᐅᔪᒥᒃ ᓈᒻᒪᒃᑐᒥᒃ ᐱᓇᓱᐊᕈᒪᖏᒻᒪᑕ.
8ᐸᓯᔭᒃᓴᐅᓂᕐᒥᒃ ᐃᓕᖅᑯᓯᓖᑦ ᐊᖅᑯᑎᖏᑦ ᑐᑭᓕᐊᓐᖏᓚᑦ,
ᐸᓯᔭᒃᓴᐅᓂᖃᖏᑦᑐᓪᓕ ᐱᓂᐊᕐᓂᖏᑦ ᐃᓱᐊᕐᑑᕗᑦ.
9ᐱᐅᓂᕐᓴᐅᕗᖅ ᐃᒡᓘᑉ ᖁᓛᖓᑕ ᑎᕆᖅᑯᐊᓂ ᐃᓂᖃᕐᓗᓂ,
ᐂᕙᑐᔪᒥᒃ ᓄᓕᐊᖃᕐᓂᕐᒥᑦ.
10ᐱᐅᖏᑦᑑᑉ ᑕᕐᓂᖓ ᐱᐅᖏᑦᑐᓕᐅᕈᒪᔪᒥᒃ ᐃᓱᒪᖃᕐᐳᖅ,
ᐃᓅᖃᑎᒥᓄᑦ ᓇᒡᓕᒋᔭᐅᓕᕈᓐᓇᓐᖏᓚᖅ.
11ᒥᑕᐅᑎᒃᓴᕐᑐᖅ ᓱᒋᐊᕐᑕᐅᔭᕌᖓᑦ, ᓯᓔᑦᑐᖅ ᓯᓚᑦᑐᕐᐹᓪᓕᓲᖑᕗᖅ;
ᓯᓚᑐᔪᕐᓕ ᐅᖃᐅᑦᔪᕐᑕᐅᒍᓂ ᖃᐅᔨᑎᑕᐅᓂᕐᒥᒃ ᐱᑖᕈᓐᓇᕐᐳᖅ.
12ᒎᑎ ᐃᓱᐊᕐᑑᒐᒥ ᓯᓚᑐᓂᕐᒥᓄᑦ ᐱᐅᖏᑦᑑᑉ ᓇᔪᕐᑕᖓ ᖃᐅᔨᓴᕐᐹ,
ᐱᐅᖏᑦᑑᓪᓗ ᐱᓂᐊᕐᓂᖏᑦ ᐊᓯᕈᕐᑕᐅᑎᑉᐰᑦ.
13ᐊᔪᕐᓴᕐᑐᑦ ᕿᓄᓂᖏᓐᓂᒃ ᑐᓴᕐᑍᓕᒪᔪᖅ,
ᕿᓄᓇᓱᐊᓕᕋᓗᐊᕐᐸᑦ ᑐᓴᕐᑕᐅᓂᐊᓐᖏᓚᖅ.
14ᓂᓐᖓᐅᒪᔪᖅ ᑐᓂᔭᐅᒍᓂ ᖃᐅᔨᑎᑕᐅᖏᓪᓗᓂ ᓮᒻᒪᕈᑎᒋᔪᓐᓇᕐᐹ,
ᐃᓚᓐᓂᕐᓴᐅᑎᒥᒃ ᑐᓂᓯᓂᖅ ᓮᒻᒪᕐᑎᑦᓯᔪᓐᓇᕆᕗᖅ ᓂᓐᖓᕐᔪᐊᕐᓯᒪᔪᒥᒃ.
15ᐃᓱᐊᕐᑐᓄᑦ ᖁᕕᐊᓇᕐᐳᖅ ᓈᒻᒪᑦᓯᐊᕐᑐᒥᒃ ᐱᓇᓱᐊᕐᓂᖃᕆᐊᒥᒃ,
ᐱᐅᖏᑦᑐᒥᒡᓕ ᐱᓇᓱᐊᕐᑐᑦ ᖁᕕᐊᓇᕐᑐᒧᑦ ᑎᑭᑕᐅᔪᓐᓇᓐᖏᓚᖅ.
16ᐃᓄᒃ ᑐᑭᓯᓂᖃᕐᑎᑕᐅᓂᕐᒥᒃ ᕿᒪᕉᑎᔪᖅ,
ᐃᓂᒃᓴᖃᕐᓂᐊᕐᐳᖅ ᑐᖁᖓᔪᑦ ᐃᓂᖓᓂ.
17ᖁᕕᐊᒋᔭᑐᐃᓐᓇᕐᒥᓂᒃ ᐊᑐᕈᒪᔪᖅ ᐊᔪᕐᓴᓕᕐᓂᐊᕐᐳᖅ,
ᕔᓂᒥᒃ ᐅᕐᓱᒥᒡᓗ ᐱᐅᒋᔭᑐᐊᖃᕐᑐᖅ ᐊᒃᓱᐃᓕᓂᐊᓐᖏᓚᖅ.
18ᐱᐅᖏᑦᑐᑦ ᐊᑭᓕᕐᑕᐅᓂᐊᕐᐳᑦ ᐃᓱᐊᕐᑑᑉ ᐃᓅᑦᔪᑎᒃᓴᖓᓄᑦ,
ᐅᒃᐱᕈᒪᖏᑦᑐᓪᓗ ᐊᑭᓕᐅᑕᐅᓗᑎᒃ ᓈᒻᒪᑦᓯᐊᕐᑐᓄᑦ.
19ᓱᓇᖃᔪᐃᑦᑐᒥ ᐊᖏᕐᕋᖃᕐᓗᓂ ᐱᐅᓂᕐᓴᐅᕗᖅ,
ᓄᓕᐊᖃᕐᓂᕐᒥᑦ ᓂᓐᖓᒃᓴᕅᑦᑐᒥᒃ ᐂᕙᓇᓱᐊᖏᓐᓇᕐᑐᒥᒡᓗ.
20ᓯᓚᑐᔪᑦ ᐃᒡᓗᖓᓂ ᖃᓄᐃᑦᑐᑐᐃᓐᓇᕐᓂᒃ
ᐱᒃᑯᒥᓇᕐᑐᓂᒃ ᐅᕐᓱᒃᓴᓂᒡᓗ ᐱᑕᖃᕐᐳᖅ,
ᓯᓔᑦᑐᓪᓕ ᑕᒤᓐᓂᒃ ᓄᖑᕈᑎᑲᐅᑎᒋᕚᒃᐳᑦ.
21ᐃᓱᐊᕐᓂᕐᒥᒃ ᐱᑦᓯᐊᕐᓂᕐᒥᒡᓗ ᕿᓂᕐᑐᖅ
ᐃᓅᓯᕐᒥᒃ ᓇᓂᓯᕗᖅ ᐅᐱᒋᔭᐅᓂᕐᒥᒡᓗ.
22ᓯᓚᑐᔪᖅ ᐱᔪᓐᓇᕐᑐᕐᔪᐊᑉ ᐃᒡᓗᒐᓴᖏᓐᓂᒃ ᒪᔪᕋᕐᓗᒍ ᐃᑖᕈᓐᓇᕐᐹ,
ᐊᕙᓗᕐᔪᐊᖏᓪᓗ ᐱᔭᐅᑦᔧᕐᓯᒪᑦᔪᑎᒋᓇᓱᒋᔭᖏᑦ ᓯᖁᑦᑎᕐᓂᐊᕐᐰᑦ.
23ᐅᖃᐅᓯᕐᒥᓂᒃ ᐅᖃᕐᒥᒡᓗ ᐃᒃᐱᒍᓱᑦᓯᐊᕐᑐᖅ,
ᑕᕐᓂᕐᒥᓂᒃ ᓴᐳᑦᔨᓯᒪᕗᖅ ᖃᓄᐃᑕᐅᓐᓇᕐᑐᓂᑦ.
24ᐱᐅᔪᕆᔪᖅ ᐱᔪᓐᓇᕋᓱᒋᓗᐊᕐᑐᕐᓗ ᑍᔭᐅᕗᖅ, “ᒥᑕᐅᑎᒃᓴᕐᑎᒥᒃ”
ᐱᓂᐊᕐᓂᖃᕐᒪᑦ ᐊᔪᖏᓐᓇᓱᒋᓂᕐᒥᒃ ᐱᐅᔪᕆᓂᕐᒥᒃ.
25ᐃᕿᐊᑦᑕᐅᑉ ᐃᓱᒪᒥᒍᑦ ᐱᔪᒪᓂᖓᑕ ᑐᖁᑎᑉᐹ,
ᐊᒡᒐᖕᒥᓄᑦ ᐱᓇᓱᐊᕈᒪᓂᖃᖏᓐᓇᒥ.
26ᐅᓪᓗᓕᒫᖅ ᑐᓱᒋᔭᒥᓂᒃ ᐱᑦᓴᓚᐅᕈᓂ ᐃᓱᒪᕗᖅ,
ᐃᓱᐊᕐᑐᓪᓕ ᑐᓂᓯᕗᑦ ᐊᓐᓂᕈᓱᒐᑎᒃ.
27ᐱᐅᖏᑦᑐᑦ ᑐᓂᕐᕈᑎᖏᑦ ᓇᕐᕈᓇᕐᐳᑦ,
ᐱᐅᓐᖏᓗᐊᕆᕗᑦ ᐱᐅᖏᑦᑐᒥᒃ ᐱᓂᐊᕈᑎᒋᔪᒪᓗᓂᒋᑦ ᑐᓂᕐᕈᑎᒋᒃᐸᒋᑦ.
28ᖃᐅᔨᓯᒪᓂᕋᕐᑐᖅ ᓱᓕᓇᓂ ᐊᓯᕈᕐᓇᕐᑐᒧᑦ ᑎᑭᐅᑎᓂᐊᕐᐳᖅ,
ᓈᓚᑦᓯᐊᕈᓐᓇᕐᑐᕐᓕ ᐅᖃᐅᓯᒃᓴᖃᑦᓯᐊᕐᓂᐊᕐᐳᖅ.
29ᐱᐅᖏᑦᑐᖅ ᑮᓇᖃᕐᐳᖅ ᐃᓕᕋᓇᕈᓇᕐᑐᒥᒃ,
ᐃᓱᐊᕐᑑᓪᓕ ᐃᓕᖅᑯᓯᕆᔭᓂ ᐃᒃᐱᒋᑦᓯᐊᕐᓗᒍ ᐊᑐᕐᐹ.
30ᓯᓚᑐᓂᖅ, ᐃᓕᓯᒪᓂᕐᓗ, ᐃᓱᒪᒃᓴᕐᓯᐅᕈᓐᓇᕐᓂᕐᓘᓐᓃᑦ,
ᓵᓚᖃᓕᕈᓐᓇᓐᖏᓚᑦ ᐊᑕᓂᕐᒥᒃ.
31ᕿᒻᒥᕐᔪᐊᖅ ᐅᓇᑕᕆᐊᕐᓂᐊᕐᑐᓄᑦ ᐊᑐᕐᑕᐅᓂᐊᕐᑐᖅ ᐊᑐᐃᓐᓇᕈᕐᑕᐅᔪᓐᓇᕋᓗᐊᕐᐳᖅ,
ᐅᓇᑕᕐᓂᕐᒥᒡᓕ ᓵᓚᖃᕐᓂᖅ ᐊᑕᓂᕐᒥᑦ ᐱᕗᖅ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 21: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
