ᓲᓗᒨᓂᐅᑉ ᐅᖃᓪᓚᖕᓂᖏᑦ 20
20
1ᕔᓂᑐᕐᓂᖅ ᒥᑕᐅᑎᖃᕐᑎᑦᓯᕗᖅ, ᓴᓐᖏᔪᒥᒡᓗ ᐃᒥᐊᓗᖕᓂᖅ ᐱᑦᓯᐊᕈᓐᓃᕐᑎᑦᓯᕗᖅ;
ᑕᒪᑐᒧᖓᓗ ᑕᒻᒪᕐᑎᑕᐅᔪᖅ ᓯᓚᑐᔫᓐᖏᓚᖅ.
2ᐊᖓᔪᖅᑳᕐᔪᐊᑉ ᓂᓐᖓᐅᒪᓂᖓ ᑲᑉᐱᐊᓇᕐᑐᖅ, ᓛᔭᐅᑉ ᓂᓪᓕᐊᓂᖓᑐᑦ ᑍᒤᑉᐳᖅ;
ᐊᖓᔪᖅᑳᕐᔪᐊᕐᒥᒃ ᓂᓐᖓᒃᑎᑦᓯᔪᖅ ᐃᓅᓯᕐᒥᓂᒃ ᓴᒃᑯᐃᔭᕆᐊᖃᕐᐳᖅ.
3ᐅᐱᓐᓇᕐᐳᖅ ᐂᕙᓂᕐᒥᒃ ᐃᓚᐅᑦᑍᓕᔪᖅ,
ᓯᓔᑦᑐᖅ ᖃᖓᑐᐃᓐᓇᖅ ᐂᕙᑎᑦᓯᖕᒪᑦ.
4ᐃᕿᐊᑦᑕᐅᒍᓂ ᐃᓄᒃ ᐅᑭᐊᒃᑯᑦ ᓄᓇᒥᒃ ᐱᕈᕐᓰᕕᖕᒥᒃ ᒪᒃᐱᕐᑎᕆᔪᒪᓐᖏᓚᖅ;
ᑲᑎᕐᓱᐃᕕᒃ ᓇᓪᓕᐅᑎᒃᐸᑦ ᐱᕈᕐᑐᕐᓯᐅᕈᒫᕐᐳᖅ ᓇᒡᕚᕋᓂᓗ.
5ᐃᓅᑉ ᐃᓱᒪᖓᑕ ᐊᑐᕈᒪᔭᖏᑦ ᐃᒪᕐᑎᑐᑦ ᐃᑎᔫᕗᑦ,
ᑐᑭᓯᓂᖃᕐᑑᓪᓕ ᖃᓗᓂᐊᕐᐹ.
6ᐃᓄᐃᑦ ᐅᓄᕐᑐᑦ ᑕᑎᒋᔭᐅᔪᓐᓇᕐᓂᕋᕐᓗᑎᒃ ᐅᖃᕈᓐᓇᕐᐳᑦ,
ᑭᓇᓕ ᑕᑎᒋᔭᒃᓴᓪᓚᕆᖕᒥᒃ ᓇᓂᓯᔪᓐᓇᕐᐸ?
7ᐃᓱᐊᕐᑐᖅ ᐸᓯᔭᒃᓴᐅᓇᓂ ᐃᓅᕗᖅ,
ᕿᑐᕐᖓᖏᑦ ᓮᒻᒪᕐᑎᑕᐅᓯᒪᓗᑎᒃ ᑭᖑᓂᖓᓂ ᐃᓅᓂᐊᕐᐳᑦ!
8ᐊᖓᔪᖅᑳᕐᔪᐊᖅ ᐃᒃᓯᕙᐅᑕᕐᔪᐊᒥᓂ ᐃᖅᑲᕐᑐᐃᓕᕈᓂ,
ᐱᐅᖏᑦᑐᓕᓃᑦ ᓴᓃᔭᕐᐰᑦ ᑕᑯᓐᓇᕐᑕᒥᒍᑦ.
9ᑭᓇ ᐅᖃᕈᓐᓇᕐᐸ, “ᐆᒻᒪᑎᒐ ᓴᓗᒻᒪᕐᐸᕋ;
ᐊᔪᕐᓂᒃᑲ ᐲᔭᕐᑕᐅᓯᒪᖕᒪᑕ ᓴᓗᒤᓐᓂᖃᕈᓐᓃᕐᐳᖓ”?
10ᐅᖁᒤᓐᓂᕐᓯᐅᑏᑦ ᐆᒃᑐᕋᐅᑏᓪᓗ ᓇᓛᒍᑦ ᐊᑐᕐᑕᐅᖏᑦᑐᑦ,
ᐊᑕᓂᐅᑉ ᑕᒪᕐᒥᒃ ᓇᕐᕈᒋᕔᑦ.
11ᓄᑕᕋᐅᒐᓗᐊᑦ ᐃᒻᒥᖕᓂᒃ ᖃᐅᔨᒪᔭᐅᑎᑉᐳᑦ ᐱᓂᐊᕐᓂᕐᒥᒃᑎᒍᑦ,
ᐱᐅᓯᕆᔭᖏᑦ ᐃᓱᐊᕐᑑᖕᒪᖔᑕ ᐸᓯᔭᒃᓴᐅᓂᖃᖏᑦᓯᐊᕐᒪᖔᑕᓗ.
12ᓯᐅᑎ ᑐᓵᔪᖅ ᐃᔨᓗ ᑕᐅᑐᒃᑐᖅ,
ᐊᑕᓂᐅᑉ ᑕᒪᕐᒥᒃ ᓴᓇᓯᒪᕚᒃ.
13ᓯᓂᑐᐃᓐᓇᕈᒪᓇᒃ ᐊᔪᕐᓴᓕᑦᓴᕈᐊᕋᕕᑦ;
ᐃᖅᑯᒪᓕᕆᑦ, ᑕᕝᕙ ᓂᕿᒃᓴᓂᒃ ᐊᒥᒐᕐᓯᓂᐊᓐᖏᓚᑎᑦ.
14ᓂᐅᕕᕐᑐᖅ ᐅᖃᕐᐳᖅ, “ᐱᐅᖏᑦᑐᖅ ᐅᓇ, ᐱᐅᖏᑦᑐᖅ ᐅᓇ,”
ᐅᓇᖕᒥᓁᔭᓕᕐᓂᐊᕆᓪᓗᓂ ᐱᐅᔪᐊᓗᖕᒥᒃ ᐱᑖᕐᓂᕋᕐᓗᓂ.
15ᒎᓗᑕᖃᕐᐳᖅ ᐅᔭᕋᑦᓯᐊᕙᖕᓂᒡᓗ ᐊᑭᑐᔪᓂᒃ ᐊᒥᒐᖏᑦᑐᕐᑕᖃᕐᓱᓂ;
ᖃᐅᔨᒪᓂᖃᕐᑑᑉ ᐅᖃᐅᓯᖏᑦ ᐱᐅᓴᐅᑎᑎᑐᑦ ᐊᑭᑐᔪᑎᑐᑦ ᑍᒤᑉᐳᑦ.
16ᐊᓐᓄᕌᖅ ᑎᒍᔭᐅᓕ ᑐᓂᔭᐅᓯᒪᔪᖅ ᓱᓕᑦᔪᑕᐅᓇᓱᒃᓱᓂ ᐃᓅᖃᑎᑐᖃᐅᖏᑦᑐᖅ ᐱᓪᓗᒍ,
ᑎᒍᔭᐅᓕ ᐊᖏᕈᑎ ᑐᓂᔭᐅᔪᖅ ᓄᓇᖃᑎᒃᓴᔭᐅᖏᑦᑐᖅ ᐱᓪᓗᒍ.
17ᓂᐊᖂᔭᕐᓯᔪᖅ ᐅᐃᕖᕐᕆᒃᓯᓂᒃᑯᑦ ᓰᕐᓇᕋᓗᐊᕐᐳᖅ ᖃᓂᕐᒥ,
ᑭᖑᓂᖓᒍᓪᓕ ᖃᓂᖓᓂ ᑐᐊᐸᒃᑎᑐᑦ ᑍᒤᓕᕐᓂᐊᕐᐳᖅ.
18ᐊᑐᕐᑕᐅᔪᒪᔪᑦ ᑐᑭᑖᕐᑕᐅᔪᓐᓇᕐᐳᑦ ᐅᖃᖃᑎᒌᖕᓂᒃᑯᑦ;
ᐅᓇᑕᕐᓂᖅ ᑕᓯᐅᕐᑕᐅᔭᕆᐊᖃᕐᐳᖅ ᓯᓚᑐᔪᒧᑦ.
19ᑎᕝᕕᐊᕐᑍᓂᕐᓂᒃ ᐅᖃᐅᓯᖃᕐᐸᒃᑐᑦ ᖃᐅᔨᔭᐅᔭᕆᐊᖃᖏᑦᑐᓂᒃ ᓴᖅᑭᑎᕆᕗᖅ;
ᑍᒤᒻᒪᑦ ᓯᓔᑦᑐᓂᒃ ᐅᖃᐅᑎᒃᓴᕋᔪᒃᑐᑦ ᐃᓚᒋᑦᑍᓕᒃᑭᑦ.
20ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᐱᐅᖏᑦᑐᐊᓘᑎᑦᓯᔪᖅ,
ᓇᓂᕈᐊᖓ ᖃᒥᑕᐅᓂᐊᕐᐳᖅ ᑖᕐᑐᕐᔪᐊᕐᒥ.
21ᑭᖑᕐᖑᑎᔭᒃᓴᒥᓂᒃ ᐱᔪᖅ ᑐᐊᕕᓗᐊᕐᓗᓂ,
ᑭᖑᓂᖓᒍᑦ ᓮᒻᒪᕐᑎᑕᐅᓯᒪᓂᐊᓐᖏᓚᖅ.
22ᐅᖃᕐᓂᐊᕐᓇᒃ, “ᐱᐅᖏᑦᑐᖅ ᐊᑭᓂᐊᕐᐸᕋ”;
ᐊᑕᓂᕐᒥᒡᓕ ᐅᑕᖅᑭᓕᕆᑦ, ᑕᕝᕙ ᐃᑲᔪᕐᓂᐊᕐᐹᑎᑦ.
23ᐅᖁᒤᓐᓂᕐᓯᐅᑏᑦ ᐅᐃᕕᕆᒃᓯᕈᑕᐅᓯᒪᔪᑦ ᐊᑕᓂᐅᑉ ᓇᕐᕈᒋᕔᑦ,
ᐆᒃᑐᕋᐅᑎᓪᓗ ᓱᓕᔪᒥᒃ ᐊᑐᕐᑕᐅᖏᑦᑐᑦ ᐊᑕᓂᐅᑉ ᐱᐅᒋᓐᖏᓔᑦ.
24ᐃᓅᑉ ᐊᑐᕐᓂᐊᕐᑕᖓ ᐊᑕᓂᐅᑉ ᐋᖅᑭᒃᓱᕐᓯᒪᕚ,
ᖃᓄᕐᓕ ᐃᓄᒃ ᐊᑐᕐᓂᐊᕐᑕᒥᓂᒃ ᑐᑭᓯᐅᒪᔪᓐᓇᕐᐸ?
25ᐃᓄᒃ ᐃᒻᒥᓂᒃ ᐊᔪᓕᕐᑎᑦᓱᓐᓇᕐᐳᖅ ᑐᐊᕕᓗᐊᕐᓗᓂ ᐅᖃᕐᐸᑦ, “ᐅᓇ ᐃᑦᔪᕐᓁᑦᑐᖅ,”
ᑭᖑᓂᖓᒍᑦ ᐊᖏᕈᑎᒋᓚᐅᕐᑕᓂ ᐃᓱᒪᒋᑦᓯᐊᓕᑍᓐᓇᕐᓗᒍ.
26ᐊᖓᔪᖅᑳᕐᔪᐊᑉ ᓯᓚᑐᔫᑉ ᐱᐅᖏᑦᑐᑦ ᓴᓂᕈᓐᓇᕐᐰᑦ,
ᓯᖃᓪᓕᓯᑦᔪᑎᒧᑦ ᖃᓪᓕᕌᕐᑕᐅᑎᓪᓗᒋᑦ.
27ᐃᓅᑉ ᐊᓂᕐᓂᖓ ᐊᑕᓂᐅᑉ ᖃᐅᒻᒪᖅᑯᑎᒋᕚ,
ᕿᓂᕈᑎᒋᓪᓗᓂᐅᒡᓗ ᐃᓗᖓᓂ ᐃᔨᕐᓯᒪᔪᓂᒃ.
28ᑲᒪᑦᓯᐊᕐᓂᖅ ᓱᖁᓯᔪᐃᓐᓂᕐᓗ ᐊᖓᔪᖅᑳᕐᔪᐊᑉ ᐱᓯᒪᔭᐅᑦᔪᑎᒋᕔᑦ,
ᐃᒃᓯᕙᐅᑕᕐᔪᐊᖓᓗ ᒪᑭᑕᑎᑕᐅᕗᖅ ᐃᓱᐊᕐᑐᓕᓂᕐᒧᑦ.
29ᐃᓅᓱᒃᑐᑦ ᓂᕐᑐᕐᓇᕐᓂᖃᕐᑎᑕᐅᕗᑦ ᓴᓐᖏᔫᓂᕐᒥᖕᓄᑦ,
ᐃᓄᑐᕾᓪᓕ ᑕᑯᒥᓇᕈᑎᖃᕐᐳᑦ ᓂᐊᖁᖏᑕ ᑮᖑᓕᕐᓂᖏᓐᓂᒃ.
30ᐊᓇᐅᔭᐅᓂᐅᑉ ᐋᓐᓂᕐᓇᕐᓂᖓ ᐱᐅᖏᑦᑐᓕᓂᕐᓂᒃ ᓴᓗᒻᒪᕐᓮᕗᖅ,
ᑏᒐᕐᑐᕐᑕᐅᓃᓪᓗ ᓴᓗᒻᒪᕐᓮᒋᕗᑦ ᐃᓗᒥᐅᑕᕐᓂᒃ ᑕᑯᒃᓴᐅᖏᑦᑐᓂᒃ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 20: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
