ᓲᓗᒨᓂᐅᑉ ᐅᖃᓪᓚᖕᓂᖏᑦ 19
19
1ᐊᒃᓱᔫᓗᓂ ᐱᑦᓯᐊᕐᑐᒥᒃ ᐃᓅᓯᖃᕐᓗᓂ ᐱᐅᓂᕐᓴᐅᕗᖅ,
ᓯᓔᑦᑑᓗᓂ ᓱᓕᖏᑦᑐᓂᒃ ᐅᖃᐅᓯᖃᕐᑎᐅᓂᕐᒥᑦ.
2ᐱᐅᓐᖏᓚᖅ ᐃᓄᒃ ᖃᐅᔨᑎᑕᐅᓂᕐᒥᒃ ᐱᖃᖏᑦᑐᖅ,
ᐅᐃᒪᓗᐊᒧᓪᓗ ᐊᖅᑯᑎᒥᒃ ᐊᓯᐅᔨᔪᖅ.
3ᓯᓔᑦᑑᓂᕐᒧᑦ ᐃᓄᒃ ᐃᓅᓯᕐᒥᓂᒃ ᓱᒃᑯᐃᔪᓐᓇᕐᐳᖅ,
ᐸᓯᒃᓯᕈᑎᒋᓕᕐᓗᓂᐅᒡᓗ ᐊᑕᓂᕐᒥᒃ.
4ᐊᒃᓱᐃᓐᓂᖅ ᐃᓚᓐᓈᖃᕐᑎᑦᓯᕗᖅ ᐅᓄᕐᑐᓂᒃ,
ᐊᒃᓱᔪᕐᓕ ᐃᓚᓐᓈᕋᓗᐊᒥᓂᑦ ᕿᒪᒃᑕᐅᕗᖅ.
5ᐃᖅᑲᕐᑐᐃᕕᖕᒥ ᓱᓕᖏᑦᑐᓂᒃ ᐅᖃᐅᓯᖃᕈᕕᑦ ᓱᒋᐊᕐᑕᐅᖏᑦᑑᓂᐊᓐᖏᓚᑎᑦ,
ᓴᒡᓗᔪᕐᓗ ᕿᒫᕕᒃᓴᖃᕐᓂᐊᓐᖏᓚᖅ.
6ᐅᓄᕐᑐᑦ ᑐᓂᐅᖅᑬᓲᒧᑦ ᐱᐅᒋᔭᐅᔪᒪᓲᖑᕗᑦ,
ᐃᓘᓐᓇᑎᒃᓗ ᐃᓚᓐᓈᖃᕐᐳᑦ ᑐᓂᔭᒃᓴᖃᕐᑐᒥᒃ.
7ᐊᒃᓱᔪᖅ ᐆᒥᒋᔭᐅᒃᐸᑦ ᓇᖕᒥᓂᖅ ᐃᓚᒥᓄᑦ;
ᐃᓚᓐᓇᕆᔭᖏᓐᓄᓪᓗ ᐊᒡᓛᑦ ᖃᓂᒋᔭᐅᔪᒪᓲᖑᓐᖏᓚᖅ!
ᓂᓪᓕᐊᓗᓂ ᐃᓇᒃᑲᓗᐊᕐᐸᒋᑦ ᑲᒪᒋᓂᐊᓐᖏᓛᑦ.
8ᓯᓚᑐᓂᖃᕐᑐᖅ ᐃᒻᒥᓂᒃ ᓇᒡᓕᒋᕗᖅ,
ᑐᑭᓯᐅᒪᓂᕐᒥᒡᓗ ᐱᖃᕐᑑᑉ ᐱᐅᔪᒥᒃ ᓇᒡᕚᕈᑎᒋᕚ.
9ᐃᖅᑲᕐᑐᐃᕕᖕᒥ ᓱᓕᖏᑦᑐᓂᒃ ᐅᖃᐅᓯᖃᕐᑐᖅ ᓱᒋᐊᕐᑕᐅᖏᑦᑑᓂᐊᓐᖏᓚᖅ,
ᓴᒡᓗᔪᕐᓗ ᐊᓯᕈᕐᑕᐅᓂᐊᕐᐳᖅ.
10ᓈᒻᒪᓐᖏᓚᖅ ᓯᓔᑦᑐᖅ ᐊᒃᓱᐃᑦᑐᕐᓯᐅᑎᒥᒃ ᐃᒡᓗᖃᕆᐊᒃᓴᖅ,
ᐱᐅᖏᓐᓂᕐᓴᐅᕗᖅ ᓯᐊᓛᖅ ᐊᐅᓚᑦᓯᒃᐸᑦ ᐊᖓᔪᖅᑳᒥᓂᒃ.
11ᐃᓱᒪᖃᑦᓯᐊᕐᑐᖅ ᓂᓐᖓᒃᓴᕅᓐᖏᓚᖅ,
ᓂᕐᑐᕐᓇᐅᑎᒋᕚᓗ ᑕᒻᒪᕐᓃᑦ ᐃᓱᒪᒋᑐᐃᓐᓇᕐᐸᖏᒻᒪᒋᑦ.
12ᐊᖓᔪᖅᑳᕐᔪᐊᑉ ᓂᓐᖓᐅᒪᓂᖓ ᓛᔭᑎᑐᑦ ᓂᓪᓕᐊᔪᑎᑐᑦ ᐃᕐᓯᓇᕐᑎᒋᕗᖅ,
ᓮᒪᕕᖃᕐᓂᖓᓕ ᐅᓪᓛᒃᑯᑦ ᐃᕕᒃᓱᒊᑦ ᖃᐅᓯᕐᓂᖓᑕ ᐊᑦᔨᒋᕚ.
13ᐃᕐᓂᖅ ᓯᓔᑦᑐᖅ ᐊᑖᑕᖓᑕ ᓱᒃᑯᒍᑎᒋᕚ,
ᓄᓕᐊᖅ ᐂᕙᒐᔪᒃᑐᖅ ᐊᑦᔨᖃᕐᐳᖅ ᓯᓚᓗᖕᒥᒃ ᑯᑐᒃᑐᒥᒃ.
14ᐃᒡᓗᖃᕐᓂᖅ ᐊᒃᓱᐃᓐᓂᕐᓗ ᑭᖑᕐᖑᑦᔨᓂᐅᕗᑦ ᐊᖓᔪᖅᑳᖏᓐᓂᑦ ᐱᔪᓂᒃ,
ᓄᓕᐊᕐᓕ ᓯᕗᓂᒃᓴᑦᓯᐊᒥᒃ ᕿᓂᕐᑐᖅ ᐊᑕᓂᕐᒥᑦ ᐱᕗᖅ.
15ᐃᕿᐊᑦᑕᐅᓂᖅ ᓯᓂᓪᓚᕆᒃᑎᑦᓯᕗᖅ,
ᓱᓕᕆᔪᒪᖏᑦᑐᕐᓗ ᑳᓕᕈᒫᕐᐳᖅ.
16ᐱᖁᔭᓂᒃ ᒪᓕᒃᑐᖅ ᐃᓅᓯᕐᒥᓂᒃ ᐱᓯᒪᑦᓯᐊᕐᐳᖅ;
ᐅᖃᐅᓯᕐᒥᒃᓕ ᑲᒪᓇᓱᐊᑦᓯᐊᖏᑦᑐᖅ ᑐᖁᓂᐊᕐᐳᖅ.
17ᐊᒃᓗᔪᓂᒃ ᐱᑦᓯᐊᕐᕕᖃᕐᑐᖅ ᐊᑕᓂᕐᒥᒃ ᐊᑐᕐᑎᑦᓯᔪᑎᑐᑦ ᑍᒤᑉᐳᖅ,
ᐱᓂᐊᕐᓂᖏᓪᓗ ᐱᓪᓗᒋᑦ ᐅᑎᕐᑎᑦᓯᕕᐅᓂᐊᕆᕗᖅ.
18ᐃᕐᓃᑦ ᐋᖅᑭᒋᐊᕈᒃ ᐱᕕᖃᕐᓂᖓᓂ,
ᐃᓅᓯᕐᓗᓕᕐᓇᕐᑐᒧᑦ ᑎᑭᐅᑎᑎᑦᓱᒫᕋᕕᐅᒃ ᐃᓱᒪᒋᕙᖕᓂᖏᒃᑯᕕᐅᒃ.
19ᓂᓐᖓᕕᒃᔪᐊᖃᑦᑕᕐᑐᖅ ᐊᒃᓱᕈᕐᓇᕐᑐᒧᑦ ᓱᒋᐊᕐᑕᐅᑦᔪᑎᖃᕐᓂᐊᕐᐳᖅ,
ᑕᒪᑐᒪᓐᖓᑦ ᓴᐳᑎᔪᓐᓇᕋᕕᐅᒃ, ᓱᓕ ᓴᐳᑎᓕᖅᑭᖃᑦᑕᕆᐊᖃᕐᓂᐊᕐᐸᑦ.
20ᒪᓕᒐᒃᓴᓕᐅᕐᑕᐅᒍᕕᑦ ᓈᓚᑦᓯᐊᕆᑦ ᐃᓕᓴᕐᑕᐅᓃᑦ ᓈᒻᒪᒋᒍᒃ,
ᓯᕗᓂᕐᒥ ᓯᓚᑐᓂᕐᑖᕈᑎᒋᓛᕋᕕᒋᑦ.
21ᐃᓄᒃ ᐅᓄᕐᑐᓂᒃ ᐃᓱᒪᒥᒍᑦ ᐱᓇᓱᐊᕈᒪᔭᖃᕐᐳᖅ,
ᑭᓯᐊᓂᓕ ᐊᑕᓂᐅᑉ ᐱᓇᓱᐊᖁᔭᖓ ᑲᔪᓯᔪᑑᓂᐊᕐᐳᖅ.
22ᐱᔪᒪᔭᐅᓂᕐᐸᐅᕗᖅ ᓱᓕᔪᒥᒃ ᑲᔪᓯᑦᓯᐊᕐᓂᖅ,
ᐊᒃᓱᓂᖅ ᐱᐅᓂᕐᓴᐅᕗᖅ ᓴᒡᓗᑐᔪᒥᑦ.
23ᐊᑕᓂᕐᒥᒃ ᓯᕘᕋᒋᔭᖃᕐᓂᖅ ᐃᓅᓯᖃᕐᓇᕐᑐᒧᑦ ᐱᑎᑦᓯᕗᖅ;
ᑕᒪᑐᒥᖓᓗ ᐱᖃᕐᑐᖅ ᓈᒻᒪᑦᓯᐊᕐᑐᒦᓐᓂᐊᕐᐳᖅ; ᑲᑉᐱᐊᓇᕐᑐᒧᓪᓗ ᑎᑭᑕᐅᓂᐊᓐᖏᓚᖅ.
24ᐃᕿᐊᑦᑕᐅᑉ ᐊᒡᒐᓂ ᐴᕐᐰᑦ ᐴᒍᑕᕐᒧᑦ,
ᖃᓂᕐᒥᓄᓪᓗ ᐊᒡᒐᓂ ᐅᑎᕐᑎᓐᓂᐊᓐᖏᓔᑦ.
25ᒥᑕᐅᑎᒃᓴᕐᑎ ᐊᓇᐅᔭᐅᒃᐸᑦ, ᓯᓔᓗᐊᕐᑐᖅ ᑕᕝᕙ ᑐᑭᓯᕚᓪᓕᕐᓂᐊᕐᐳᖅ,
ᑐᑭᓯᐊᔪᖅ ᓱᐊᒃᑕᐅᒍᓂ, ᐃᓕᓯᒪᓂᕐᑖᒃᑲᓐᓂᕐᓂᐊᕐᐳᖅ.
26ᐊᑖᑕᒥᓂᒃ ᑲᑉᐱᐊᓱᒃᑎᑦᓯᔪᖅ ᐊᓈᓇᒥᓂᒡᓗ ᕿᒫᑎᑦᓯᔪᖅ,
ᐃᕐᓂᐅᕗᖅ ᑲᓐᖑᓱᒃᑎᑦᓯᔪᖅ ᐃᓕᕋᒃᑯᓐᓇᕐᓱᓂᓗ.
27ᐃᕐᓃᒃ, ᓄᖅᑲᕆᑦ, ᐊᔪᕆᕐᑐᕐᑕᐅᑦᔪᑎᒋᔭᕐᓂᒃ ᓈᓚᒃᓗᑎᑦ
ᖃᐅᔨᑎᑕᐅᓂᕐᒥᒃ ᐊᓐᓁᖁᓇᑎᑦ.
28ᓱᓕᓇᓂ ᖃᐅᔨᒪᓂᕋᕐᑐᖅ ᒥᑕᐅᑎᖃᕐᐳᖅ ᐃᖅᑲᕐᑐᐃᕕᖕᒥᒃ,
ᐱᐅᖏᑦᑐᓕᔪᑦ ᖃᓂᖏᑦ ᓂᕆᕗᑦ ᐊᔪᕐᑐᓕᓂᕐᒥᒃ.
29ᓱᒋᐊᕐᑕᐅᓃᑦ ᒥᑕᐅᑎᖃᕐᐸᒃᑐᑦ ᐱᓪᓗᒋᑦ ᐊᑐᐃᓐᓇᐅᕗᑦ,
ᐊᓇᐅᓕᕐᑕᐅᓃᓪᓗ ᓯᓔᑦᑐᑦ ᐱᓪᓗᒋᑦ ᐊᑐᐃᓐᓇᐅᒋᕗᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 19: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
