ᓲᓗᒨᓂᐅᑉ ᐅᖃᓪᓚᖕᓂᖏᑦ 16
16
1ᐃᓱᒪᒃᑯᑦ ᐃᓱᒪᒃᓴᕐᓯᐅᕐᓂᖅ ᐃᓅᑉ ᐱᒋᕚ,
ᐅᖃᐅᓪᓕ ᑭᐅᔭᐅᑦᔪᑎᒃᓴᖓ ᐊᑕᓂᕐᒥᑦ ᐱᕗᖅ.
2ᐃᓅᑉ ᐊᖅᑯᑎᒋᔭᖏᑦ ᐃᔨᖏᒃᑕ ᓵᖓᓂ ᐱᐅᖏᑦᑐᕐᑕᖃᓐᖏᓚᑦ,
ᐊᑕᓂᐅᓪᓕ ᐊᓂᕐᓃᑦ ᖃᐅᔨᓴᕐᐰᑦ.
3ᐱᓂᐊᕐᓂᑎᑦ ᐊᑕᓂᕐᒧᑦ ᑐᓂᒃᑭᑦ,
ᑕᕝᕙ ᐃᓱᒪᕕᑦ ᐱᓇᓱᐊᕈᒪᔭᖏᑦ ᓈᒻᒪᒃᓯᑎᓐᓂᐊᕐᐰᑦ.
4ᐊᑕᓂᐅᑉ ᓱᓇᑐᐃᓐᓁᑦ ᐱᓐᖑᕐᑎᓚᐅᕐᐰᑦ ᐊᑑᑎᒃᓴᖏᓐᓄᑦ,
ᐱᐅᖏᑦᑐᑦ ᐊᒡᓛᑦ ᐊᓯᕈᕐᑕᐅᕕᒃᓴᖏᑦ ᓇᓪᓕᐅᑎᑎᑦᓱᒫᕐᐰᑦ.
5ᐱᐅᔪᕆᔪᓕᒫᑦ ᐊᑕᓂᕐᒧᑦ ᓇᕐᕈᓇᕐᐳᑦ,
ᖃᐅᔨᒪᓕᕆᑦ ᐊᑕᓂᐅᑉ ᓱᒋᐊᓐᖏᓮᓐᓇᕐᓂᐊᓐᖏᓔᑦ.
6ᑲᒪᑦᓯᐊᕐᓂᕐᒧᑦ ᓱᖁᓯᔪᐃᑦᑑᓂᕐᒧᓪᓗ ᐊᔪᕐᑐᓕᓃᑦ ᐃᓱᒪᒋᔪᓐᓁᕐᑕᐅᑦᔪᑎᒃᓴᖃᕐᐳᑦ,
ᐊᑕᓂᕐᒥᒃ ᓯᕘᕋᓂᒃᑯᑦ ᐃᓄᒃ ᐱᐅᖏᑦᑐᓂᒃ ᓂᒍᐃᔪᓐᓇᕐᐳᖅ.
7ᐃᓅᑉ ᐃᓕᖅᑯᓯᕐᒥᒍᑦ ᐊᑕᓂᖅ ᖁᕕᐊᓱᒃᑎᑉᐸᒍ,
ᐊᑭᕋᖏᓐᓄᑦ ᐊᒡᓛᑦ ᐊᑕᓂᐅᑉ ᐱᑦᓯᐊᕐᑕᐅᑎᑦᓱᓐᓇᕐᐹ.
8ᐱᐅᓂᕐᓴᐅᕗᖅ ᐱᖃᑦᓯᐊᖏᒃᑲᓗᐊᕐᓗᓂ ᐃᓱᐊᕐᑐᒥᒃ ᐃᓅᓯᖃᕐᑐᖃᕈᓂ,
ᑮᓇᐅᔭᓕᐅᕐᑐᕐᔪᐊᖑᓂᕐᒥᒃ ᓈᒻᒪᖏᑦᑐᒃᑯᑦ ᐱᔭᐅᔪᓂᒃ.
9ᐃᓅᑉ ᐃᓱᒪᖓᑕ ᐊᑐᕐᓂᐊᕐᑕᖏᓐᓂᒃ ᐋᖅᑭᒃᓲᑎᕚ,
ᐊᑕᓂᐅᓪᓕ ᑕᓯᐅᕐᐹ ᐱᓱᖕᓂᖏᑦ.
10ᐊᖓᔪᖅᑳᕐᔪᐊᖅ ᖃᐅᔨᑎᑕᐅᓂᕐᒥᒍᑦ ᐅᖃᕐᐸᒃᐳᖅ,
ᐃᖅᑲᕐᑐᐃᓕᕈᓂ ᐅᖃᐅᓯᕐᒥᒍᑦ ᐊᔪᕐᑐᓕᓐᖏᓚᖅ.
11ᐅᖁᒤᓐᓂᕐᓯᐅᑏᑦ ᐆᒃᑐᕋᐅᑎᓪᓗ ᐊᑦᔨᒌᒃᑎᑦᓯᔪᑦ ᐊᑕᓂᕐᒥᑦ ᐱᕗᑦ;
ᐴᕐᒧᑦ ᐴᕐᓯᒪᔪᑦ ᐅᖁᒤᓐᓂᖏᑦ ᑖᑦᓱᒪ ᐱᓂᐊᕐᓂᖓᓄᑦ ᐃᓕᖓᕗᑦ.
12ᓇᕐᕈᓇᕐᑐᕐᔪᐊᖑᕗᖅ ᐊᖓᔪᖅᑳᕐᔪᐊᖅ ᐱᐅᖏᑦᑐᓕᒃᐸᑦ,
ᐃᒃᓯᕙᐅᑕᕐᔪᐊᖓ ᐋᖅᑭᒃᑕᐅᓯᒪᖕᒪᑦ ᐃᓱᐊᕐᑐᓕᓂᕐᒧᑦ.
13ᐃᓱᐊᕐᑐᓂᒃ ᐅᖃᐅᓯᓖᑦ ᐊᖓᔪᖅᑳᕐᔪᐊᑉ ᖁᕕᐊᒋᕔᑦ,
ᖁᕕᐊᒋᔭᖃᕐᐳᖅ ᓈᒻᒪᒃᑐᓂᒃ ᐅᖃᐅᓯᖃᕐᑐᓂᒃ.
14ᐊᖓᔪᖅᑳᕐᔪᐊᑉ ᓂᓐᖓᖕᓂᖓ ᑐᖁᒥᒃ ᑐᓴᕐᑎᑦᓯᑦᔪᑎᐅᕗᖅ,
ᓯᓚᑐᔪᕐᓕ ᓮᒻᒪᕈᑎᒃᓴᖓᓂᒃ ᐱᓇᓱᐊᕐᐳᖅ.
15ᐊᖓᔪᖅᑳᕐᔪᐊᑉ ᑮᓇᖓ ᖁᕕᐊᓱᑐᐊᕐᐸᑦ ᐃᓅᓯᕐᑕᖃᕐᐳᖅ,
ᓈᒻᒪᒃᓴᕐᓂᖓᓗ ᓄᕗᔭᑎᑐᑦ ᑍᒤᑉᐳᖅ ᐅᐱᕐᖔᒥ ᓯᓚᓗᓕᕐᑐᑎᑐᑦ.
16ᓯᓚᑐᓂᕐᑖᕐᓂᑦ ᐱᐅᓂᕐᓴᐅᕗᖅ ᒎᓗᒥᒃ ᐱᑖᕐᓂᕐᒥᑦ,
ᑐᑭᓯᔪᓐᓇᕐᓯᓂᖅ ᓂᕈᐊᕆᔭᒃᓴᐅᓂᕐᓴᐅᕗᖅ ᓯᐅᓪᕕᕆᒥᑦ.
17ᐃᓱᐊᕐᑐᑦ ᐊᖅᑯᑎᕐᔪᐊᖓᑦ ᐱᐅᖏᑦᑐᒥᒃ ᓴᓂᖅᑯᑦᓯᓂᐅᕗᖅ;
ᐊᖅᑯᑎᒋᔭᒥ ᐊᓯᐊᓄᑦ ᓅᑦᑍᓕᔪᖅ ᐃᓅᓯᕐᒥᓂᒃ ᓴᐳᑦᔨᕗᖅ.
18ᐱᐅᔪᕆᓂᖅ ᓯᕗᓪᓕᐅᕗᖅ ᐊᓯᕈᕐᑕᐅᓂᕐᒥᑦ,
ᐊᔪᖏᓐᓇᓱᒋᓂᕐᓗ ᓯᕗᓪᓕᐅᕗᖅ ᑲᑕᖕᓂᕐᒥᑦ.
19ᐱᐅᓂᕐᓴᐅᕗᖅ ᒥᑭᒡᓕᑎᕐᓯᒪᓗᓂ ᐊᔪᕐᓴᕐᑐᓂ,
ᐅᓇᑕᕐᓂᒃᑯᑦ ᓵᓚᖃᐅᑎᕕᓂᕐᓂᒃ ᑐᓂᐅᖅᑲᕐᑕᐅᓂᕐᒥᑦ ᐱᐅᔪᕆᔪᓄᑦ.
20ᐅᖃᐅᓯᕐᒥᒃ ᓈᓚᒃᑐᖅ ᐱᐅᔪᒥᒃ ᐊᔪᕈᓐᓃᕐᓂᐊᕐᐳᖅ,
ᖁᕕᐊᓇᕐᑐᒦᑉᐳᖅ ᓇᓪᓕᐊᑦ ᐊᑕᓂᕐᒥᒃ ᑕᑎᖃᕐᑐᖅ.
21ᐆᒻᒪᑎᖃᕐᑐᖅ ᓯᓚᑐᔪᒥᒃ ᐅᑦᔨᕐᓱᑦᓯᐊᕐᑐᒥᒃ ᑍᔭᐅᓂᐊᕐᐳᖅ,
ᐅᖃᓪᓚᑦᓯᐊᕐᐸᒃᑐᕐᓗ ᒪᓕᒃᓴᕐᑎᑦᓯᑦᓯᐊᕈᓐᓇᕐᐳᖅ.
22ᓯᓚᑐᔪᒧᑦ ᓯᓚᑐᓂᖅ ᐃᓅᓯᕐᑕᖃᕐᐳᖅ ᓄᓇᐅᑉ ᐃᓗᐊᓂᑦ ᑰᒃᑐᑎᑐᑦ,
ᓯᓔᑦᑐᓪᓕ ᓯᓔᕐᕈᕐᑐᕐᓂᖅ ᓱᒋᐊᕐᑕᐅᑦᔪᑎᒋᕚᑦ.
23ᓯᓚᑐᔫᑉ ᐃᓱᒪᖓᑕ ᐅᖃᐅᓯᖃᕐᑎᑉᐹ ᓯᓚᑐᔪᓂᒃ,
ᖃᓂᓂᓗ ᑲᔪᖏᕐᓮᓂᕐᒥᒃ ᐃᓚᖃᕐᑎᑉᐹ.
24ᐅᖃᐅᓰᑦ ᑐᓐᖓᓇᕐᑐᑦ ᐃᒍᑦᓴᐅᑉ ᓰᕐᓇᐅᑎᖓᑐᑦ ᑍᒤᑉᐳᑦ,
ᑕᕐᓂᐅᑉ ᒪᒪᕆᕔᑦ ᑎᒥᖓᑕᓗ ᐋᖅᑭᒃᑕᐅᑦᔪᑎᒋᕔᑦ.
25 #
ᓲᓗᒨᓂ 14:12. ᐊᖅᑯᑎᑕᖃᕐᐳᖅ ᐃᓄᖕᒧᑦ ᓈᒻᒪᑦᓯᐊᕐᑑᔮᕐᑐᒥᒃ,
ᑭᓯᐊᓂᓕ ᐃᓱᖃᕐᐳᖅ ᑐᖁᒥᒃ.
26ᐱᓇᓱᐊᕐᑎ ᓂᕆᔭᕆᐊᖃᕋᒥ ᐊᒃᓱᕈᕐᓗᓂ ᐱᓇᓱᐊᕐᐳᖅ,
ᓂᕆᔪᒪᓂᖓᑕ ᐱᓇᓱᐊᖁᕚ.
27ᐱᕋᔭᒃ ᐱᐅᖏᑦᑐᓂᒃ ᐃᓱᒪᒃᓴᕐᓯᐅᕈᑎᖃᕐᐳᖅ,
ᓂᓪᓕᐊᓂᖓᓗ ᐃᑯᐊᓚᔪᑎᑐᑦ ᑍᒤᑉᐳᖅ.
28ᐃᓄᒃ ᐱᐅᖏᑦᑐᓕᔨ ᐊᑭᕋᕐᑐᕐᑎᑦᓯᓂᕐᒥᒃ ᓯᐊᒻᒪᒃᑎᑦᓯᕗᖅ,
ᐃᓯᑦᔫᑎᓂᕐᓗ ᐃᓚᓐᓇᕇᓂᒃ ᐊᕕᑎᑦᓯᑦᔪᑎᐅᕙᒃᐳᖅ.
29ᑲᑉᐱᐊᓵᕆᔩᑦ ᐃᓚᓐᓇᕆᔭᒥᖕᓂᒃ ᑕᐱᒃᓴᕐᑖᕋᓱᐊᕐᐸᒃᐳᑦ ᓯᓔᕐᕆᒃᓯᓂᒃᑯᑦ,
ᑕᓯᐅᕐᓗᒋᓪᓗ ᐊᖅᑯᒻᒧᑦ ᐱᐅᖏᑦᑐᒧᑦ.
30ᐃᔨᒥ ᐃᒡᓗᐃᓐᓇᖓᓄᑦ ᓯᑯᓐᖏᕐᑕᕐᕕᖃᕐᐳᖅ ᐱᑦᓯᐊᕐᓂᐅᖏᑦᑐᒧᑦ ᑕᓯᐅᕐᓯᔪᒪᓕᕋᒥ,
ᖃᓂᓂᓗ ᑮᒻᒥᕚ ᐱᐅᖏᑦᑐᒥᒃ ᐱᓂᐊᓂᖃᕈᒪᓕᕋᒥ.
31ᓂᐊᖁᖅ ᖀᖑᓕᕋᒥ ᓂᕐᑐᕐᓇᕐᑐᒥᒃ ᓂᐊᖂᑎᐅᕗᖅ,
ᑍᒤᓕᕙᒃᐳᑦ ᐃᓱᐊᕐᑐᒥᒃ ᐃᓅᓯᖃᕋᒥᒃ.
32ᓂᓐᖓᒃᓴᕅᖏᑦᑐᖅ ᐊᔪᖏᑦᑐᕐᔪᐊᒥᑦ ᐱᐅᓂᕐᓴᐅᕗᖅ,
ᐊᓂᕐᓂᕐᒥᓂᒡᓗ ᐊᐅᓚᑦᓯᔪᓐᓇᕐᑐᖅ ᐱᐅᓂᕐᓴᐅᒋᕗᖅ ᐃᒡᓗᒐᓴᒡᔪᐊᓂᒃ ᓵᓚᖃᕐᑐᒥᑦ.
33ᓄᓇᖁᑎᑖᕋᓱᐊᕐᑐᖅ ᖃᐅᔨᓇᓱᐊᕐᐳᖅ ᓇᓚᐅᑦᑖᕈᑎᒃᑯᑦ ᓵᒥᒍᑦ,
ᐃᓱᒪᑖᕈᑕᐅᔪᓪᓕ ᐊᑕᓂᕐᒧᑦ ᓇᓗᓇᕈᓐᓃᕐᑎᑕᐅᓂᐊᕐᐳᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 16: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
