ᓲᓗᒨᓂᐅᑉ ᐅᖃᓪᓚᖕᓂᖏᑦ 15
15
1ᓂᑲᒍᓱᒡᓗᓂ ᐅᖃᐅᑦᔨᔪᖅ ᓂᓐᖓᐅᒪᓂᕐᒥᒃ ᓮᒻᒪᕐᑎᑦᓯᕗᖅ,
ᐊᑦᑕᕈᓱᒐᓂᓕ ᐅᖃᐅᑦᔨᔪᖅ ᓂᓐᖓᖕᓂᕐᒥᒃ ᓄᐃᑎᑦᓯᕗᖅ.
2ᓯᓚᑐᔫᑉ ᐅᖃᐅᓯᖏᑦ ᖃᐅᔨᒪᓂᕐᒥᒃ ᓴᖅᑭᑎᑦᓯᕗᑦ,
ᓯᓔᑦᑑᓪᓕ ᐅᖃᐅᓯᖏᑦ ᓯᓔᓐᓂᕐᒥᒃ ᑯᕕᕗᑦ.
3ᐊᑕᓂᖅ ᑕᐅᑐᒃᐳᖅ ᓇᓃᑦᑐᓕᒫᓂᒃ,
ᑕᒪᕐᒥᒃ ᑕᐅᑐᖕᒪᒋᑦ ᐱᐅᖏᑦᑐᑦ ᐱᐅᔪᓪᓗ.
4ᓇᒡᓕᒍᓱᒡᓗᓂ ᐅᖃᐅᑦᔨᔫᑉ ᐅᖃᐅᓯᖏᑦ ᓇᐹᕐᑑᕗᖅ ᐃᓅᓯᖃᕐᓇᕐᑐᖅ,
ᐅᖃᐅᓯᕐᓗᖕᓂᕐᓕ ᐃᓅᑉ ᐊᓂᕐᓂᖓᓂᒃ ᓯᖁᒥᑦᓯᕗᖅ.
5ᓯᓔᑦᑑᑉ ᐊᑖᑕᒥ ᐅᖃᐅᑦᔪᐃᓂᖏᑦ ᓇᕐᕈᒋᕔᑦ;
ᐅᖃᐅᑦᔫᓯᐊᒥᓂᒡᓕ ᓈᓚᒃᑐᖅ ᓯᓚᑐᔫᕗᖅ.
6ᐃᓱᐊᕐᑐᒥᒃ ᐃᓅᓯᖃᕐᑑᑉ ᐃᒡᓗᖓ ᐅᓄᕐᑐᓂᒃ ᐱᒃᑯᒥᓇᕐᑐᓂᒃ ᐱᑕᖃᕐᐳᑦ,
ᐱᐅᖏᑦᑐᓪᓕ ᑮᓇᐅᔭᕐᑖᕆᕙᒃᑕᖏᑦ ᐃᓱᐊᖏᑦᑐᕐᑕᖃᕐᐳᑦ.
7ᓯᓚᑐᔫᑉ ᐅᖃᐅᓯᖏᑦ ᓯᐊᒻᒪᕐᑎᑦᓯᕗᑦ ᖃᐅᔨᒪᓂᕐᒥᒃ,
ᓯᓔᑦᑐᓪᓕ ᐃᓱᒪᒥᐅᑕᖏᑦ ᑍᒤᑦᑐᓐᓇᓐᖏᓚᑦ.
8ᐱᐅᖏᑦᑐᑦ ᑐᓂᕐᕈᑎᖏᑦ ᐊᑕᓂᐅᑉ ᓇᕐᕈᒋᕔᑦ,
ᐃᓱᐊᕐᑑᓪᓕ ᑐᒃᓯᐊᕐᓂᖏᑦ ᐊᑕᓂᐅᑉ ᖁᕕᐊᒋᕔᑦ.
9ᐱᐅᖏᑦᑐᑦ ᐊᖅᑯᑎᖏᑦ ᐊᑕᓂᐅᑉ ᓇᕐᕈᒋᕔᑦ,
ᐊᑕᓂᐅᓪᓕ ᓇᒡᓕᒋᕚ ᐃᓱᐊᕐᓯᑎᑕᐅᓂᕐᒥᒃ ᕿᓂᕐᑐᖅ.
10ᐊᑦᑕᕆᔭᐅᓇᓂ ᓱᒋᐊᕐᑕᐅᓂᖅ ᐊᑐᕐᑕᐅᕗᖅ ᐊᖅᑯᒻᒥᒃ ᕿᒤᔪᓄᑦ,
ᐋᖅᑭᒋᐊᕐᑕᐅᓂᕐᒥᒃ ᐱᐅᒃᓴᖏᑦᑐᖅ ᑐᖁᔪᒫᕐᐳᖅ.
11ᑲᑉᐱᐊᓇᕐᑐᕕᒃ ᐊᓯᕈᕐᑕᐅᓇᕐᑐᕐᓗ ᐊᑕᓂᐅᑉ ᓵᖓᓂᑉᐳᑦ,
ᐊᖏᓂᕐᓴᒥᒡᓕ ᐃᓄᐃᑦ ᐆᒻᒪᒻᒥᐅᑕᖏᑦ ᐃᔨᕐᓯᒪᔪᓐᓇᓐᖏᓚᑦ ᐊᑕᓂᐅᑉ ᓵᖓᓂ.
12ᒥᑕᐅᑎᒃᓴᕋᔪᒃᑐᑦ ᐃᓂᕐᑎᕐᑕᐅᔪᒪᕙᓐᖏᓚᑦ;
ᓯᓚᑐᔪᒧᓪᓗ ᐂᔪᒪᓇᑎᒃ.
13ᐆᒻᒪᑎᖃᕐᑐᖅ ᖁᕕᐊᓱᒃᑐᒥᒃ ᖁᕕᐊᓱᖕᓂᖓ ᑕᑯᒃᓴᐅᕗᖅ ᑮᓇᕐᒥᒍᑦ,
ᕿᒃᓵᒃᑐᕐᓕ ᐆᒻᒪᑎᒥᒍᑦ, ᐊᓂᕐᓂᖓ ᓯᖁᒥᓯᒪᕗᖅ.
14ᑐᑭᓯᐅᒪᔪᒥᒃ ᐃᓱᒪᖃᕐᑐᖅ ᕿᓂᕐᐳᖅ ᖃᐅᔨᑎᑕᐅᓂᕐᒥᒃ,
ᓯᓔᑦᑑᓪᓕ ᖃᓂᖓ ᓂᕆᕗᖅ ᓯᓔᑦᑑᓇᕐᑐᓂᒃ.
15ᐊᒃᓱᕈᕐᓇᕐᑐᓄᑦ ᐅᖁᒤᒃᓴᕐᓇᕐᑐᒦᑦᑐᑦ ᐅᓪᓗᖏᑦ ᐱᐅᖏᑦᑐᐃᓐᓇᐅᔮᕐᐳᑦ,
ᖁᕕᐊᓱᒃᑐᒥᒡᓕ ᐆᒻᒪᑎᓕᐅᑉ ᐅᓪᓗᖏᑦ ᓂᕆᕕᒃᔪᐊᕐᓃᓐᓇᐅᔮᕐᐳᑦ.
16ᐱᖃᑦᓯᐊᖏᓐᓂᖅ ᐱᐅᓂᕐᓴᐅᕗᖅ ᐊᑕᓂᕐᒥᒃ ᓯᕘᕋᒋᔭᖃᕐᑐᒧᑦ,
ᐱᓕᐊᓘᒐᓗᐊᕐᓗᓂ ᖃᓄᐃᓐᓇᕐᑐᒦᓐᓂᕐᒥᑦ.
17ᓇᒡᓕᒃᑎᒌᖕᓂᖃᕐᓗᓂ ᐱᕈᕐᑐᕕᓂᕐᓂᒃ ᐅᓐᓄᒍᒻᒥᑖᖃᕐᓂᖅ ᐱᐅᓂᕐᓴᐅᕗᖅ,
ᖁᐃᓂᔪᒥᒃ ᐆᒪᔪᕕᓂᕐᒥᒃ ᓂᕆᔭᒃᓴᖃᕐᓂᕐᒥᑦ ᐆᒥᓲᑎᓂᕐᑕᓕᖕᒥ.
18ᓂᓐᖓᒃᓴᕅᑦᑐᖅ ᐊᑭᕋᕐᑑᑎᑦᔪᑎᒃᓴᓂᒃ ᓴᖅᑭᑎᕆᕗᖅ,
ᓂᓐᖓᒃᓴᕅᖏᑦᑐᕐᓕ ᐂᕙᑦᔪᑕᐅᒐᔭᕐᑐᓂᒃ ᓂᐸᖏᕐᑎᑦᓯᕗᖅ.
19ᐃᕿᐊᑦᑕᐅᑉ#15:19 ᐃᕿᐊᑦᑕᐅᑉ ᐅᕝᕙᓗ ᓯᓇᐅᖓᔫᑉ ᐊᑐᕐᑕᖓ ᐱᕈᕐᕕᐅᕗᖅ ᐅᕐᐱᖕᓂᑦ ᑲᑭᓪᓚᐅᑎᓕᖕᓂᒃ
ᐃᓱᐊᕐᑑᓪᓕ ᐊᑐᕐᑕᖓ ᐊᖅᑯᑎᕐᔪᐊᕐᑎᑐᑦ ᒪᓂᕋᑦᑐᑎᑐᑦ ᑍᒤᑉᐳᖅ.
20ᐃᕐᓂᐅᑉ ᓯᓚᑐᔫᑉ ᐊᑖᑕᓂ ᖁᕕᐊᓱᒃᑎᑉᐹ,
ᓯᓔᑦᑐᕐᓕ ᐊᓈᓇᒥᓂᒃ ᓇᕐᕈᕗᖅ.
21ᓯᓔᕐᕈᕐᑐᕐᓃᑦ ᖁᕕᐊᒋᔭᐅᕗᑦ ᓯᓔᑦᑐᓄᑦ,
ᓯᓚᑐᔪᕐᓕ ᑐᑭᓕᐊᕐᑐᒥᒃ ᐃᓅᓯᖃᕐᐳᖅ.
22ᐅᖃᖃᑎᒃᓴᖃᖏᑦᑐᒥ ᐊᑐᒐᒃᓴᓕᐊᖑᔪᑦ ᑕᒻᒪᕈᓐᓇᕐᐳᑦ,
ᐅᓄᕐᑐᓪᓕ ᐃᑲᔪᖃᑎᒌᓕᕌᖓᑕ ᐊᑐᒐᒃᓴᓕᐊᖑᔪᑦ ᑲᔪᓯᕙᒃᐳᑦ.
23ᐊᖑᑦ ᖁᕕᐊᓱᒃᑎᑕᐅᕗᖅ ᑭᐅᑦᔪᑎᒃᓴᖃᑦᓯᐊᕌᖓᒥ,
ᐅᖃᐅᓯᖅ ᓈᒻᒪᓈᕐᑎᓪᓗᒍ, ᐱᐅᔪᐊᓘᕗᖅ!
24ᓯᓚᑐᔫᑉ ᐊᖅᑯᑎᖓ ᖁᒻᒧᑦ ᐃᖏᕐᕋᕗᖅ ᐃᓅᓯᕐᒧᑦ,
ᓂᒍᖁᓪᓗᒍ ᑲᑉᐱᐊᓇᕐᑐᕕᖕᒥᒃ ᑕᐅᓇᓃᑦᑐᒥᒃ.
25ᐊᑕᓂᐅᑉ ᐱᐅᔪᕆᔪᑦ ᐊᖏᕐᕋᖏᑦ ᐊᓯᕈᕐᓂᐊᕐᐰᑦ,
ᐅᐃᒡᒐᕐᓂᐅᓪᓗ ᓄᓇᖁᑎᖓᑕ ᑭᒡᓕᖓ ᑍᒤᓕᖓᑎᓐᓂᐊᕐᐹ.
26ᐱᐅᖏᑦᑑᑉ ᐃᓱᒪᒋᔭᖏᑦ ᐊᑕᓂᐅᑉ ᓇᕐᕈᒋᕔᑦ,
ᐱᐅᖏᓐᓂᖃᕐᖏᑦᑐᓪᓕ ᐅᖃᐅᓯᖏᑦ ᑐᓐᖓᒋᕔᑦ.
27ᓂᐊᖂᔭᒃᓴᓂᒃ ᒥᖕᓂᑐᔫᑉ ᐱᕋᔭᖕᓂᒃᑯᑦ ᑮᓇᐅᔭᕐᑖᕈᒪᓂᕐᒧᑦ ᐃᒡᓗᒥᐅᖃᑎᓂ ᐃᓱᐊᖏᑦᑐᒦᑎᑉᐰᑦ,
ᐅᐃᕕᕆᒃᓯᓂᕐᒥᒃᓕ ᐱᐅᒋᔭᖃᕐᖏᑦᑐᖅ ᐃᓅᓂᐊᕐᐳᖅ.
28ᐃᓱᐊᕐᑐᑦ ᐃᓱᒪᒃᓴᕐᓯᐅᖅᑳᕐᐳᖅ ᑭᐅᑦᔪᑎᒋᓂᐊᕐᑕᒥᓂᒃ,
ᐱᐅᖏᑦᑐᓪᓕ ᖃᓂᖏᑦ ᐊᓂᑎᑦᓯᕗᑦ ᐱᐅᖏᑦᑐᓂᒃ.
29ᐊᑕᓂᖅ ᐅᖓᓯᒃᐳᖅ ᐱᐅᖏᑦᑐᓄᑦ,
ᐃᓱᐊᕐᑐᓪᓕ ᑐᒃᓯᐊᕐᓂᖏᑦ ᑐᓴᕐᐰᑦ.
30ᐃᔨᐅᑉ ᖃᐅᒪᔪᒦᓐᓂᖓ ᐆᒻᒪᑎᐅᑉ ᖁᕕᐊᓱᖕᓂᕆᕚ,
ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᓂᒃᑳᕐᑐᑦ ᑎᒥᒥᒃ ᐃᓱᐊᕐᓯᑎᑦᓯᕗᑦ.
31ᓯᐅᑏᒃ ᐃᓅᓯᕐᒨᖓᔪᓂᒃ ᓱᐊᒃᑕᐅᓂᕐᒥᒃ ᑐᓴᖃᑦᑕᕐᑑᒃ,
ᓯᓚᑐᔪᓂ ᐃᓅᖃᑕᐅᓕᕐᓂᐊᕐᐴᒃ.
32ᐃᓂᕐᑎᕐᑕᐅᑦᔪᑎᒥᓂᒃ ᑲᒪᔪᒪᖏᑦᑐᖅ ᑕᕐᓂᕐᒥᓂᒃ ᓇᕐᕈᕗᖅ
ᐃᓂᕐᑎᕐᑕᐅᑦᔪᑎᒥᓂᒡᓕ ᓈᓚᒃᐸᒃᑐᖅ ᑐᑭᓯᐅᒪᓂᕐᑖᕐᓂᐊᕐᐳᖅ.
33ᐊᑕᓂᕐᒥᒃ ᓯᕘᕋᓂᖅ ᐊᔪᕆᕐᑐᐃᓂᐅᕗᖅ ᓯᓚᑐᓂᕐᒥᒃ
ᒥᑭᒡᓕᑎᕐᓯᒪᓂᖅ ᓯᕗᓪᓕᐅᕗᖅ ᐅᐱᒋᔭᐅᓂᕐᒥᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 15: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
