ᓲᓗᒨᓂᐅᑉ ᐅᖃᓪᓚᖕᓂᖏᑦ 17
17
1ᐱᐅᓂᕐᓴᐅᕗᖅ ᓂᐰᑦᑐᒥ ᐸᓂᕐᓂᑯᒥᒃ ᓂᐊᖂᔭᕕᓂᕐᑐᕐᓂᖅ,
ᓂᕆᕕᒡᔪᐊᖃᑕᐅᓂᕐᒥᑦ ᐃᒡᓗᒥ ᐃᓄᒋᐊᒃᑐᓂ ᐂᕙᔪᓂ.
2ᐱᔨ ᐱᓇᓱᐊᕐᐸᑦ ᓯᓚᑐᓂᒃᑯᑦ ᐊᐅᓚᑦᓯᓕᕈᓐᓇᕐᐳᖅ ᐃᕐᓂᕐᒥᒃ ᑲᓐᖑᓇᕐᑐᓕᕆᔨᒥᒃ,
ᕿᑐᕐᖓᕆᔭᐅᔪᑐᓪᓗ ᑭᖑᕐᖑᑦᔨᖃᑕᐅᓕᕐᓗᓂ.
3ᐊᐅᒃᑎᑦᓯᕕᒃ ᐊᑐᕐᐳᖅ ᓯᐅᓪᕕᕆᒧᑦ,
ᐃᑯᐊᓚᑦᓯᕕᒡᓗ ᒎᓗᒧᑦ ᐊᐅᒃᑎᑦᓯᕕᐅᓪᓗᓂ,
ᐊᑕᓂᕐᓕ ᐆᒃᑐᕋᕐᑎᐅᕗᖅ ᐆᒻᒪᑎᓂᒃ.
4ᐱᐅᖏᑦᑐᓕᔨ ᐅᖃᐅᓯᕐᓂᒃ ᓱᓕᖏᑦᑐᓂᒃ ᓈᓚᑦᓯᐊᓲᖑᕗᖅ;
ᓴᒡᓗᑐᔪᕐᓗ ᐅᖃᐅᓯᕐᓘᑎᓂᒃ ᑐᓴᕈᒻᒪᐅᕗᖅ.
5ᐊᒃᓗᔪᓂᒃ ᒥᑕᐅᑎᖃᕐᑐᖅ ᐱᓐᖑᕐᑎᑦᓯᔨᒥᓂᒃ ᓇᕐᕈᓇᕐᑎᑦᓯᕗᖅ,
ᐱᓂᕐᓗᖕᓂᐅᔪᓂᒃ ᖁᕕᐊᓲᑎᖃᕐᑐᖅ ᓱᒋᐊᕐᑕᐅᖏᑦᑑᓂᐊᓐᖏᓚᖅ.
6ᐃᕐᖑᑕᕆᔭᐅᔪᑦ ᓂᐊᖂᑕᐅᕗᑦ ᐃᑦᑑᓕᕐᑐᓄᑦ,
ᕿᑐᕐᖓᐅᔪᓪᓗ ᓂᕐᑐᐊᖑᓂᖓ ᐊᑖᑕᖓᓂᑦ ᐱᕗᖅ.
7ᐅᖃᐅᓯᑦᓯᐊᕔᑦ ᓯᓔᑦᑐᒧᑦ ᑐᓱᒋᔭᐅᓐᖏᓚᑦ,
ᑍᒫᒃᑕᐅᖅ ᓱᓕᖏᑦᑐᓂᒃ ᐅᖃᐅᓯᖃᖃᑦᑕᕐᓂᖅ ᐊᖓᔪᖅᑳᕐᔪᐊᕐᒧᑦ ᐊᑐᕐᑕᐅᔪᒥᓇᖏᓐᓂᕗᖅ.
8ᐅᐃᕕᕆᒃᓯᓂᖅ ᐱᐅᔪᕐᔪᐊᒥᒃ ᐅᔭᕋᖁᑎᑖᕐᑎᑦᓯᔪᑎᑐᑦ ᑍᒤᑉᐳᖅ ᐂᑦᑐᐃᔪᒧᑦ;
ᓇᒧᑐᐃᓐᓇᖅ ᐱᓇᓱᐊᕈᓂ ᐱᕙᓪᓕᐊᓂᖃᑦᓯᐊᕐᐳᖅ.
9ᐱᖁᔭᐅᖏᑦᑐᓂᒃ ᐱᓂᐊᖃᑦᑕᕐᑐᖅ ᓈᒻᒪᒋᔭᐅᔪᒪᓂᕐᒥᒃ ᕿᓂᕐᐳᖅ,
ᐱᔮᕆᓪᓗᓂ ᐱᔭᕆᐊᖃᓐᖏᑕᒥᓄᑦ ᑍᒤᓕᐅᖃᑦᑕᕐᑐᖅ ᐃᓚᓐᓇᕇᖕᓂᕐᒥᒃ ᐊᕕᑎᑦᓯᕗᖅ.
10ᓱᐊᒃᑕᐅᓂᖅ ᐊᑑᑎᖃᑦᓯᐊᕐᐳᖅ ᓯᕗᓂᒃᓴᒥᒃ ᐃᓱᒪᖃᕐᑐᒧᑦ,
ᓯᓔᑦᑑᑉ ᓱᐊᖓᔭᐅᕙᒃᑲᓗᐊᕐᓗᓂ ᓱᕐᕋᒍᓐᓇᖏᓐᓂᖓᓂᑦ.
11ᐱᐅᖏᑦᑐᖅ ᐊᑭᕋᕐᑐᕐᓃᓐᓇᕐᒥᒃ ᕿᓂᕐᒪᑦ,
ᓇᒡᓕᖕᓂᖃᖏᑦᑐᒥᒃ ᐅᖃᕆᐊᕐᑐᕐᑐᒥᒃ ᑎᓕᓯᕕᐅᔪᒫᕐᐳᖅ.
12ᐊᖑᑦ ᓇᓄᕐᒥᒃ ᐊᒃᓴᒥᒃ ᓂᕕᐅᕐᑐᒥᒃ ᑲᑎᓯᓗᓂ ᐱᐅᓂᕐᓴᐅᕗᖅ,
ᑲᑎᓯᒐᔭᕐᓂᖓᓂᑦ ᓯᓔᑦᑐᒥᒃ ᓯᓔᓐᓂᕐᒧᑦ ᐃᓕᖅᑯᓯᓕᖕᒥᒃ.
13ᐃᓄᒃ ᐱᐅᔪᒥᒃ ᐱᐅᖏᑦᑐᓐᖑᕐᑎᑦᓯᓇᓱᐊᕐᑑᑉ,
ᐃᒡᓗᖓ ᐱᐅᖏᑦᑐᒧᑦ ᕿᒪᒃᑕᐅᓂᐊᓐᖏᓚᖅ.
14ᐊᑭᕋᕐᑑᑎᓂᐅᑉ ᐱᒋᐊᕈᑖ ᐃᒪᕐᒥᒃ ᑯᕕᑎᑦᓯᔫᑉ ᐊᑦᔨᒋᕚ;
ᑍᒤᒻᒪᑦ ᐂᕙᓂᖅ ᐱᒋᐊᓚᐅᕐᑎᓐᓇᒍ ᓄᖅᑲᕆᑦ.
15ᐱᐅᖏᑦᑐᒥᒃ ᓈᒻᒪᖕᓂᕅᓂᖅ ᓇᓛᒎᕐᑐᓂᒡᓗ ᐱᐅᖏᓐᓂᕅᓂᖅ
ᑖᒃᑯᐊᒃ ᑕᒪᖏᒃ ᐊᑕᓂᕐᒧᑦ ᓇᕐᕈᓇᕐᐴᒃ.
16ᓱᖕᒪᑦ ᓯᓔᑦᑐᖅ ᓂᐅᕕᕆᐊᖃᐊᕐᐸ ᓯᓚᑐᓂᕐᒥᒃ?
ᐃᓱᒪᒥᒍᑦ ᑕᒪᑐᒥᖓ ᐃᓕᑦᓯᔪᒪᑎᓐᓇᒍ.
17ᐃᓚᓐᓇᕆᔭᖅ ᓇᒡᓕᒍᓱᐃᓐᓇᕈᓐᓇᕐᐳᖅ ᖃᓄᐃᑦᑐᖃᕋᓗᐊᕐᐸᑦ,
ᖃᑕᓐᖑᓪᓗ ᐃᓅᓕᕐᓯᒪᕗᖅ ᐅᖁᒤᑦᑐᖃᓕᕐᐸᑦ ᐃᑲᔪᕐᑎᐅᖁᓪᓗᒍ.
18ᐃᓄᒃ ᓯᓔᑦᑐᖅ ᑎᒎᑎᓂᒃᑯᑦ ᐊᖏᖃᑎᒌᒍᑎᓕᐅᓲᖑᕗᖅ,
ᐃᓚᓐᓇᕆᔭᒥᓄᑦ ᓱᓕᔪᕐᓇᐅᑎᒋᔪᒪᓪᓗᓂᐅᒃ.
19ᐱᐅᖏᑦᑐᒥᒃ ᖁᕕᐊᒋᔭᖃᕐᑐᖅ ᐊᑭᕋᕐᑑᑎᓂᕐᒥᒃ ᖁᕕᐊᒋᔭᖃᕐᐳᖅ;
ᐅᒃᑯᐊᑉ ᐊᑖᓂᒃ ᐳᕐᑐᔪᓕᐅᕐᑐᖅ ᓴᐅᓂᕐᒥᒃ ᓇᕕᒍᑎᒃᓴᓕᐅᕐᐳᖅ.
20ᐊᖑᑦ ᑐᑭᒧᐊᖏᑦᑐᒥᒃ ᐃᓱᒪᓕᒃ ᐊᔪᕈᓐᓃᕈᓐᓇᓐᖏᓚᖅ,
ᐅᖃᐅᓯᕐᓗᒃᐸᒃᑐᕐᓗ ᑲᑉᐱᐊᓇᕐᑐᒧᑦ ᑎᑭᐅᑎᔪᒫᕐᐳᖅ.
21ᐊᑖᑕ ᒥᑕᐅᑎᒃᓴᕐᑎᒥᒃ ᕿᑐᕐᖓᓕᒃ ᕿᒃᓵᒍᑎᒃᓴᖃᕐᐳᖅ,
ᐊᑖᑕᓗ ᓯᓔᑦᑐᒥᒃ ᐃᕐᓂᖃᕐᑐᖅ ᖁᕕᐊᓱᖕᓂᖃᓐᖏᓚᖅ.
22ᖁᕕᐊᓱᖕᓂᖅ ᐆᒻᒪᑎᒃᑯᑦ ᐃᓅᓕᓴᐅᑎᑦᓯᐊᖑᕗᖅ,
ᐊᓂᕐᓂᒥᒍᓪᓕ ᕿᒃᓵᒃᑐᖅ ᓴᐅᓂᖏᑦ ᓴᓗᐊᕐᑎᑕᐅᕗᑦ.
23ᐱᐅᖏᑦᑐᒥᒃ ᐃᓱᒪᓕᒃ ᐃᔨᕋᕐᑐᕐᓗᓂ ᐃᓚᓐᓂᕐᓴᐅᒻᒥᒃ ᐊᖏᕐᐳᖅ,
ᑭᖑᓂᖓᒍᓪᓗ ᓈᒻᒪᑦᓯᐊᕐᑐᖅ ᐊᑐᕐᑕᐅᓕᕐᓂᐊᓐᖏᓚᖅ.
24ᓯᕗᓂᒃᓴᕐᓯᐅᕐᑐᖅ ᓵᓐᖓᕗᖅ ᓯᓚᑐᓂᕐᒧᑦ,
ᓯᓔᑦᑐᕐᓕ ᕿᓂᕐᐳᖅ ᓯᓚᕐᔪᐊᑉ ᑭᒡᓕᖓᓄᑦ.
25ᐃᕐᓂᖅ ᓯᓔᑦᑐᖅ ᐊᑖᑕᒥᓄᑦ ᕿᒃᓵᒍᑕᐅᕗᖅ,
ᐊᓈᓇᒥᓂᒡᓗ ᖁᕕᐊᓇᖏᑦᑐᒦᑎᑦᓯᕗᖅ ᐃᓄᒍᐃᔨᒋᓚᐅᕐᑕᒥᓂᒃ.
26ᐃᓱᐊᕐᑐᒥᒃ ᐃᓕᖅᑯᓯᖃᕐᑐᖅ ᐊᑭᓕᒐᒃᓴᓕᐅᕐᓗᒍ ᐱᐅᓐᖏᓚᖅ,
ᑍᒫᒃᑕᐅᖅ ᐊᖓᔪᖅᑳᕐᔪᐊᑉ ᐃᕐᓂᖓ ᐃᓱᐊᕐᑑᓂᖓ ᐱᓪᓗᒍ ᑏᒐᕐᑐᕐᑕᐅᑎᓪᓗᒍ ᐱᐅᖏᓐᓂᕗᖅ.
27ᓂᓪᓕᖏᑦᑐᖅ ᖃᐅᔨᒪᓂᖃᕐᐳᖅ,
ᑐᑭᓯᓂᖃᕐᑎᑕᐅᔪᕐᓗ ᐅᐃᒪᔮᖏᑦᑐᒥᒃ ᐊᓂᕐᓂᖃᕐᐳᖅ.
28ᓯᓔᑦᑑᒐᓗᐊᖅ ᓯᓚᑐᓇᓱᒋᔭᐅᔪᓐᓇᕐᐳᖅ ᑭᐅᑲᐅᕐᑐᖏᑉᐸᑦ,
ᓂᓪᓕᖏᑉᐸᓪᓗ ᑐᑭᓯᓂᖃᑦᓯᐊᕋᓱᒋᔭᐅᓕᕐᐳᖅ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 17: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
