ᓲᓗᒨᓂᐅᑉ ᐅᖃᓪᓚᖕᓂᖏᑦ 14
14
1ᐊᕐᓇᖅ ᓯᓚᑐᔪᖅ ᐃᒡᓗᓕᐅᕐᐳᖅ,
ᓯᓔᑦᑑᓪᓕ ᐃᒡᓗᓕᐊᓂ ᐊᒡᒐᖕᒥᓄᑦ ᓯᖁᑦᑎᕐᐹ.
2ᐃᓱᐊᕐᑐᒥᒃ ᐃᓅᔪᖅ ᐊᑕᓂᕐᒥᒃ ᓯᕘᕋᒋᔭᖃᕐᓗᓂ ᐃᓅᕗᖅ,
ᐃᓱᐃᑦᑐᒥᒡᓕ ᐃᓅᔪᖅ ᐊᑕᓂᕐᒥᒃ ᓇᕐᕈᕗᖅ.
3ᓯᓔᑦᑐᖅ ᐱᐅᔪᕆᓂᕐᒥᓄᑦ ᐅᖃᐅᓯᖃᕐᐳᖅ ᐊᓇᐅᓕᕐᑕᐅᑦᔪᑎᒃᓴᒥᓂᒃ,
ᓯᓚᑐᔪᓪᓕ ᐅᖃᐅᓯᓂ ᓴᐳᑎᔭᐅᑦᔪᑎᒋᕔᑦ.
4ᐆᒪᔪᓂᒃ ᐅᓂᐊᕐᑎᒃᓴᖃᕐᑎᓐᓇᒋᑦ, ᐱᕈᕐᓰᕕᒃ ᐱᕈᕐᕕᐅᔪᓐᓇᓐᖏᓚᖅ;
ᓄᓇᓕᕆᐅᑎᓂᒃ ᐅᓂᐊᕐᑎᐅᑉ ᐱᓇᓱᐊᕐᔪᐊᕈᓐᓇᕐᓂᖓᓄᑦ
ᑲᑎᕐᓱᒐᒃᓴᖃᑦᓯᐊᕐᐳᖅ ᐱᕈᕐᑐᕕᓂᕐᓂᒃ.
5ᓱᓕᔪᒥᒃ ᖃᐅᔨᓯᒪᔪᖅ ᓴᒡᓗᓗᓂ ᐅᖃᕐᓂᐊᓐᖏᓚᖅ,
ᖃᐅᔨᒪᔫᓐᖑᐊᕐᑐᕐᓕ ᓱᓕᓗᓂ ᐅᖃᓪᓚᒍᓐᓇᓐᖏᓚᖅ.
6ᒥᑕᐅᑎᖃᕋᔪᒃᑐᖅ ᓯᓚᑐᓂᖃᕐᑎᑕᐅᓂᕐᒥᒃ ᐱᔪᒪᒐᓗᐊᕐᐳᖅ ᓇᓂᓯᓇᓂᓗ,
ᖃᐅᔨᒪᓂᖅ ᐊᔪᕐᓇᓐᖏᓚᖅ ᐃᓄᖕᒧᑦ ᑐᑭᓯᐅᒪᔪᒧᑦ.
7ᕿᒪᒍᒃ ᓯᓔᑦᑑᑉ ᓇᔪᒐᖓ,
ᑕᕝᕙᓂ ᐅᖃᐅᓯᕐᓂᒃ ᖃᐅᔨᒪᓂᕐᓂᒃ ᖃᐅᔨᓂᐊᓐᖏᓚᑎᑦ.
8ᓯᓚᑐᓂᕐᒥᓄᑦ ᓯᕗᓂᒃᓴᕐᓯᐅᑦᓯᐊᕐᑑᑉ ᐊᖅᑯᑎᒋᔭᓂ ᐅᑦᔨᕐᑐᑦᓯᐊᕐᓗᒍ ᐃᓅᕗᖅ,
ᓯᓔᑦᑐᓪᓕ ᐱᓂᐊᕐᓂᖃᕐᐳᑦ ᑕᒻᒪᕐᑎᑦᓯᓪᓗᑎᒃ.
9ᓯᓔᑦᑐᑦ ᒥᑕᐅᑎᖃᕐᐳᑦ ᐊᔪᕐᑐᓕᓂᕐᒧᑦ ᑐᓂᕐᕈᑎᓂᒃ,
ᐃᓱᐊᕐᑐᒥᒡᓕ ᐃᓅᔪᑦ ᒎᑎᒧᑦ ᐅᐱᒋᔭᐅᓂᕐᒥᒃ ᖁᕕᐊᓱᒃᐳᑦ.
10ᐆᒻᒪᑎᐅᑉ ᖃᐅᔨᒪᕚ ᓇᖕᒥᓂᖅ ᐅᖁᒤᒃᓴᕐᓂᓂ,
ᐃᓅᖃᑎᒋᓐᖏᑕᖓᓗ ᖁᕕᐊᓱᖕᓂᖓᓂᒃ ᐃᓚᐅᓐᖏᓚᖅ.
11ᐱᐅᖏᑦᑑᑉ ᐃᒡᓗᖓ ᐊᓯᕈᕐᑕᐅᔪᒫᕐᐳᖅ,
ᐃᓱᐊᕐᑐᓪᓕ ᑐᐱᖓ ᐱᕈᕐᑐᑎᑐᑦ ᐱᕈᕐᐸᓪᓕᐊᔪᑎᑑᕐᓂᐊᕐᐳᖅ.
12 #
ᓲᓗᒨᓂ 16:25. ᐊᖅᑯᑎᑕᖃᕐᐳᖅ ᐃᓄᖕᒧᑦ ᓈᒻᒪᑦᓯᐊᕐᑑᔮᕐᑐᒥᒃ,
ᐃᓱᐊᓕ ᑐᖁᒧᑦ ᐊᖅᑯᑕᐅᕗᖅ.
13ᐃᔪᕿᑕᒃᑲᓗᐊᕐᓗᓂ#14:13 ᐃᔪᕿᑕᖕᓂᖅ ᐅᕝᕙᓗ ᐃᒡᓚᑲᑕᖕᓂᖅ ᐆᒻᒪᑎ ᖁᕕᐊᓱᖏᑦᑐᓐᓇᕐᐳᖅ,
ᖁᕕᐊᓱᖕᓂᖅ ᐃᓱᓕᑉᐸᑦ ᕿᒃᓵᖕᓂᖅ ᐱᒋᐊᕐᐳᖅ.
14ᐱᐅᖏᑦᑐᒥᒃ ᐃᓱᒪᓕᒃ ᐱᐅᓯᕆᔭᒥᓄᑦ ᐊᐅᓚᑕᐅᓕᕐᓂᐊᕐᐳᖅ,
ᐃᓱᐊᕐᑐᕐᓕ ᓈᒻᒪᒃᓯᑎᑕᐅᓂᐊᕐᐳᖅ ᐱᐅᓯᕆᔭᒥᓄᑦ.
15ᓯᓔᑦᑐᖅ ᐅᖃᐅᓯᐅᔪᓕᒫᓂᒃ ᐅᒃᐱᕈᓱᒃᐳᖅ,
ᓯᕗᓂᒃᓴᕐᓯᐅᕐᑑᓪᓕ ᐊᖅᑯᑎᒋᔭᓂ ᐅᑦᔨᕐᑐᕐᐰᑦ.
16ᓯᓚᑐᔪᖅ ᓯᕘᕋᒐᒥ ᐱᐅᖏᑦᑐᒥᒃ ᐊᑐᕐᑍᓕᕗᖅ,
ᓯᓔᑦᑐᕐᓕ ᐃᓱᒤᓐᓇᕐᕆᓪᓗᓂ ᐊᑐᕆᐊᖃᓐᖏᑕᓂ ᑲᒪᒋᑦᓯᐊᓐᖏᓛ.
17ᓂᓐᖓᒃᓴᕅᑦᑐᖅ ᓯᓔᕐᕈᕐᑐᕐᓗᓂ ᐱᓇᓱᐊᕐᓴᕅᑉᐳᖅ,
ᓯᓚᑐᔪᕐᓕ ᐅᐃᒪᔮᕋᓂ ᕿᓄᐃᓵᕐᐳᖅ.
18ᓯᓔᑦᑐᖅ ᐱᐅᓯᖃᕐᐳᖅ ᓯᓔᓐᓂᕐᒥᒃ,
ᓯᕗᓂᒃᓴᑦᓯᐅᑦᓯᐊᕐᑐᓪᓕ ᓂᐊᖂᑎᖃᕐᐳᑦ ᖃᐅᔨᒪᓂᕐᒥᒃ.
19ᐱᐅᖏᑦᑐᒥ ᐃᓅᔪᑦ ᐅᑯᕗᑦ ᐱᐅᔪᑦ ᓵᖏᓐᓂ,
ᐱᐅᖏᑦᑐᓪᓗ ᐃᓱᐊᕐᑐᓕᔪᑦ ᐃᑎᕐᑕᕐᕕᖏᓐᓂ.
20ᐊᒃᓗᔪᑦ ᐱᐅᒋᔭᐅᕙᓐᖏᓚᑦ ᓯᓚᖅᑲᑎᒥᖕᓄᑦ,
ᐊᒃᓗᐃᑦᑐᕐᓕ ᐅᓄᕐᑐᓂᒃ ᐃᓚᓐᓈᖃᕐᐳᖅ.
21ᓯᓚᖅᑲᑎᒥᓂᒃ ᓇᕐᕈᔪᖅ ᐊᔪᕐᑐᓕᕗᖅ,
ᐊᒃᓗᔪᓂᒡᓕ ᓂᑲᒍᓱᒃᑐᖅ ᑖᓐᓇ ᖁᕕᐊᓱᒃᐳᖅ.
22ᐱᐅᖏᑦᑐᓂᒃ ᐱᓂᐊᕈᒪᔪᑦ ᐊᔪᕐᑐᓕᓐᖏᓛᑦ?
ᐱᐅᔪᓂᒃ ᐱᓂᐊᕈᒪᔪᑦ ᐃᑲᔪᕐᑎᒃᓴᕐᓯᕗᑦ ᑕᕝᕙᓃᖏᓐᓇᕐᓂᐊᕐᑐᓂᒃ.
23ᐊᒃᓱᕈᕐᓗᑎᒃ ᐱᓇᓱᐊᕐᓂᐅᔪᓕᒫᑦ ᐱᕙᓪᓕᕐᓇᕐᑐᕐᑕᖃᕐᐳᑦ,
ᐅᖃᑐᐃᓐᓇᕐᓂᖅ ᐊᔪᕐᓴᕐᓂᕐᒥᒃ ᐱᑎᑦᓯᕗᖅ.
24ᓯᓚᑐᔪᑦ ᓂᐊᖂᑎᖃᕐᐳᑦ ᓯᓚᑐᓂᕐᒥᖕᓂᒃ,
ᓯᓔᑦᑑᓪᓕ ᓯᓔᑦᑑᓂᖅ ᓂᐊᖂᑎᒋᕚᑦ.
25ᓱᓕᔪᒥᒃ ᖃᐅᔨᓯᒪᔪᖅ ᑕᕐᓂᕐᓂᒃ ᐱᐅᓕᒃᓯᕗᖅ,
ᓱᓕᖏᑦᑐᓂᒡᓕ ᐅᖃᐅᓯᒃᓴᖃᕐᑐᖅ ᐊᓯᒥᓂᒃ ᐱᔭᐅᑎᑦᓯᕗᖅ.
26ᐊᑕᓂᕐᒥᒃ ᓯᕘᕋᔪᑦ ᓴᐱᖏᓐᓂᕐᒥᒃ ᑎᒍᒥᐊᕐᐳᑦ,
ᕿᑐᕐᖓᖏᓪᓗ ᕿᒫᕕᒃᓴᖃᕐᓂᐊᕐᐳᑦ.
27ᐊᑕᓂᕐᒥᒃ ᓯᕘᕋᓂᖅ ᑯᕕᕗᖅ ᐃᓅᓯᖃᕐᓇᕐᑐᒥᒃ,
ᑐᖂᓪᓗ ᓂᒐᖓᓂᒃ ᓂᒍᕈᓐᓇᕐᓗᓂ.
28ᓄᓇᓖᑦ ᐃᓄᒋᐊᒃᐸᑕ ᐊᖓᔪᖅᑳᕐᔪᐊᑉ ᓂᕐᑐᕐᓇᐅᑎᒋᕚ,
ᐊᖓᔪᖅᑳᕐᔪᐊᕐᓕ ᐃᓄᖁᑎᖃᖏᒃᑯᓂ ᐊᖓᔪᖅᑲᐅᓂᖓ ᐊᑑᑎᖃᓐᖏᓚᖅ.
29ᓂᓐᖓᒃᓴᕅᖏᑦᑐᖅ ᐊᖏᔪᒥᒃ ᑐᑭᓯᐅᒪᓂᕐᒥᒃ ᐱᓯᒪᕗᖅ,
ᓂᓐᖓᒃᓴᕅᑦᑐᕐᓕ ᓯᓔᓐᓂᕐᒥᒃ ᐊᖏᒡᓕᑎᕆᕗᖅ.
30ᐆᒻᒪᑎᖃᕐᑐᖅ ᓮᓕᓂᕐᒥᒃ ᑎᒥᒥᓂᒃ ᐃᓅᓯᖃᕐᑎᑦᓯᕗᖅ,
ᑐᓱᓂᖃᓗᐊᕐᑐᕐᓕ ᓴᐅᓂᕐᓂᒃ ᐊᐅᓂᕈᕐᑎᑦᓯᕗᖅ.
31ᐊᒃᓗᔪᓂᒃ ᐅᖁᒤᒃᓴᕐᑎᑦᓯᔪᖅ ᐱᓐᖑᕐᑎᑎᔨᒥᓂᒃ ᐱᐅᒃᓴᓐᖏᓚᖅ,
ᐊᒃᓗᔪᓂᒡᓕ ᐱᑦᓯᐊᕐᑐᖅ ᒎᑎᒥᒃ ᐅᐱᒍᓱᖕᓂᖃᕐᐳᖅ.
32ᐱᐅᖏᑦᑐᑦ ᐱᐅᖏᑦᑐᓕᓂᕐᒥᖕᓄᑦ ᐃᒻᒥᓂᒃ ᓵᓚᐅᑎᑉᐳᑦ,
ᐃᓱᐊᕐᑐᓪᓕ ᓴᐳᑦᔭᐅᕕᒃᓴᖃᕐᐳᑦ ᐅᐱᒋᔭᐅᓂᕐᒥᓄᑦ.
33ᓯᓚᑐᓂᖅ ᐃᓂᖃᕐᐳᖅ ᐃᓄᖕᒥ ᑐᑭᓯᐅᒪᔪᒥ,
ᓯᓔᑦᑑᓪᓕ ᐆᒻᒪᑎᒥᓂ ᑕᒪᑐᒥᖓ ᖃᐅᔨᒪᓐᖏᓚ.
34ᓇᓛᒎᕐᓂᖅ ᐊᖏᓕᑎᕆᕗᖅ ᐃᓅᖃᑎᒌᒡᔪᐊᓂᒃ,
ᐊᔪᕐᓂᕐᓕ ᓈᒻᒪᒋᔭᐅᔪᓐᓃᕐᑎᑦᓯᕗᖅ ᑭᓇᒃᑯᑐᐃᓐᓇᑦᓯᐊᓂᒃ.
35ᐱᔨ ᓯᓚᑐᔪᒥᒃ ᐱᓇᓱᐊᕐᑐᖅ ᐊᖓᔪᖅᑳᕐᔪᐊᒥᓄᑦ ᖁᕕᐊᒋᔭᐅᕗᖅ,
ᓂᓐᖓᐅᒪᓂᖓᓕ ᑎᑭᐅᑎᕗᖅ ᑲᓐᖑᓇᕐᑐᓕᓂᕐᒥᒃ ᐱᓇᓱᐊᕐᑐᒧᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 14: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
