ᐰᓕᒨᓂᒧᑦ 1
1
ᓇᓗᓁᕐᓯᑦᔪᑏᑦ
1ᐸᐅᓗᓯᒥᑦ, ᑎᒍᔭᐅᓯᒪᔪᒥᑦ ᔩᓱᓯ ᙭ᔅᑑᓯ ᐱᑦᔪᑎᒋᓪᓗᒍ, ᑎᑎᕋᕐᐳᒍᒃ ᐅᒃᐱᕐᑑᖃᑎᕗᓪᓗ ᑎᒧᑎ,
ᐃᓚᓐᓇᕆᔭᑦᑎᓐᓄᑦ ᐱᓇᓱᐊᖃᑎᑦᑎᓐᓄᓪᓗ ᐰᓕᒨᓂᒧᑦ, 2#ᑯᓘᓯ 4:17.ᐃᓚᒌᒃᑐᓄᓪᓗ ᐃᒡᓗᑦᓯᓐᓂ ᑲᑎᒪᖃᑦᑕᕐᑐᓄᑦ, ᓇᔭᑦᑎᓐᓄᓪᓗ ᐊᐱᐊᒧᑦ, ᐅᓇᑕᕐᑎᐅᖃᑎᑦᑎᓐᓄᓪᓗ ᐋᑭᐸᓯᒧᑦ.
3ᒎᑎᐅᑉ ᐊᑖᑕᑦᑕ ᐊᑕᓂᐅᓪᓗ ᔩᓱᓯ ᙭ᔅᑑᓯᐅᑉ ᑐᓂᓯᕕᒋᓕᓯ ᐱᔪᓐᓇᕐᑎᑦᓯᓂᕐᒥᓂᒃ ᓮᒻᒪᕐᑎᑦᓯᓂᕐᒥᓂᒡᓗ.
ᐰᓕᒨᓂᐅᑉ ᓇᒡᓕᖕᓂᖓ ᐅᒃᐱᕐᓂᖓᓗ
4ᑍᒪᓐᖓᑦ ᑐᒃᓯᐊᓕᕌᖓᒪ ᐃᖅᑲᐅᒪᖃᑦᑕᕐᐸᒋᑦ ᒎᑎᒧᓪᓗ ᖁᔭᓕᑦᔪᑎᒋᖃᑦᑕᕐᐸᒋᑦ. 5ᑐᓴᕐᑎᑕᐅᓯᒪᒐᒪ ᐃᑦᔪᕐᓁᑎᑕᐅᓯᒪᔪᓕᒫᓄᑦ ᓇᒡᓕᒍᓱᖕᓂᕐᓂᒃ ᐅᒃᐱᕐᓂᓂᒃᓗ ᐊᑕᓂᕐᒧᑦ ᔩᓱᓯᒧᑦ. 6ᑐᒃᓯᐊᕐᐳᖓᓗ ᐅᒃᐱᕐᓂᕐᓂᒃ ᐅᖃᐅᓯᖃᖃᑦᑕᖁᓪᓗᑎᑦ ᐃᓅᖃᑎᖕᓄᑦ ᖃᐅᔨᑦᔪᑕᐅᖁᓪᓗᒍ ᓮᒻᒪᕐᑎᑕᐅᓂᕆᔭᑦᑎᓐᓂᒃ ᙭ᔅᑑᓯᒥ. 7ᐅᒃᐱᕐᑑᖃᑎᒐ ᓇᒡᓕᖕᓇᕐᑐᑎᑦ, ᓇᒡᓕᖕᓂᕐᓄᑦ ᐊᖏᔪᐊᓗᖕᒥᒃ ᖁᕕᐊᓱᒃᑎᑕᐅᕗᖓ ᐱᕙᓪᓕᕐᑎᑕᐅᓪᓗᖓᓗ, ᐃᑦᔪᕐᓁᑎᑕᐅᓯᒪᔪᓕᒫᑦ ᐆᒻᒪᑎᒥᒍᑦ ᖁᕕᐊᓱᒃᑎᑕᐅᓯᒪᖕᒪᑕ ᐱᑦᔪᑎᒋᓪᓗᑎᑦ.
ᐅᓂᓯᒪᓯᐅᑉ ᐃᓚᓕᐅᕐᑕᐅᖁᔭᐅᓂᖓ
8ᑍᒤᒻᒪᑦ ᓯᕘᕋᖏᓪᓗᖓ ᙭ᔅᑑᓯᒥ ᐅᖃᕐᕕᒋᔪᓐᓇᕋᓗᐊᕐᐸᒋᑦ ᐱᔭᕆᐊᖃᓪᓚᕆᒃᑐᒥᒃ ᐱᖁᓪᓗᑎᑦ, 9ᓇᒡᓕᒋᒐᒃᑭᓪᓕ ᕿᓄᕕᒋᑐᐃᓐᓇᓕᕐᐸᒋᑦ, ᐅᕙᖓ ᐸᐅᓗᓯ, ᒫᓐᓇ ᑎᒍᔭᐅᓯᒪᕕᖕᒦᑦᑐᖓ ᔩᓱᓯ ᙭ᔅᑑᓯ ᐱᑦᔪᑎᒋᓪᓗᒍ. 10#ᑯᓘᓯ 4:9.ᕿᓄᕕᒋᕙᒋᑦ ᐅᓂᓯᒪᓯ ᐱᑦᔪᑎᒋᓪᓗᒍ, ᑖᓐᓇ ᐃᕐᓂᕐᑖᕆᓚᐅᕋᒃᑯ ᙭ᔅᑑᓯᒥ; ᑎᒍᔭᐅᓯᒪᕕᖕᒦᑎᓪᓗᖓ ᐊᓂᕐᓂᒃᑯᑦ ᐊᑖᑕᑖᕆᓚᐅᕐᒪᖓ. 11ᑍᑦᓱᒪᓂ ᐊᑑᑎᒃᓴᖃᓚᐅᓐᖏᓚᖅ ᐃᓕᖕᓄᑦ, ᒫᓐᓇᓕ ᐊᑑᑎᒃᓴᖃᒻᒪᕆᓕᕐᐳᖅ ᐃᓕᖕᓄᑦ ᐅᕙᓐᓄᓪᓗ.
12ᒫᓐᓇ ᐃᓕᖕᓄᑦ ᐅᑎᕐᑎᓕᕐᐸᕋ, ᐅᕙᖓᐅᔮᕐᑎᓪᓗᒍ ᐃᓚᓕᐅᓚᐅᕈᒃ. 13ᐱᓯᒤᓐᓇᕈᒪᔭᕋᓗᐊᕋ, ᑎᒍᔭᐅᓯᒪᓂᓐᓂ ᐅᖃᐅᓰᑦ ᑐᓴᕈᒥᓇᕐᑐᑦ ᐱᑦᔪᑎᒋᓪᓗᒋᑦ, ᐅᕙᓐᓂᒃ ᐃᑲᔪᕈᓐᓇᖁᓪᓗᒍ ᐃᓇᖏᕐᓗᑎᑦ. 14ᖃᐅᔨᓐᖏᑎᓪᓗᒋᓪᓕ ᐋᖅᑭᒃᓯᔪᒪᓐᖏᓇᒪ ᐱᓇᓱᐊᕈᒪᔭᓐᓂᒃ ᐱᔪᒪᔧᓪᓕ ᐊᑐᑦᓯᐊᕐᓗᒍ ᐱᖁᕙᒋᑦ ᐱᓇᓱᐊᕈᒪᓪᓗᖓ ᐊᖏᖃᑎᒋᓯᒪᑦᓯᐊᕐᓗᑎᑦ.
15ᐃᒻᒪᖄ ᑖᓐᓇ ᐃᓕᖕᓂᑦ ᑭᒤᓚᐅᕐᓂᕐᐳᖅ ᑕᒪᓐᓇ ᐱᑦᔪᑎᒋᓪᓗᒍ, ᐱᓯᒤᓐᓇᕈᓐᓇᓛᕋᕕᐅᒃ ᑍᒪᓐᖓᓕᒫᖅ, 16ᒫᓐᓇ ᐱᔨᑐᑦ ᑍᒤᑦᓱᓐᓁᕐᐳᖅ ᐱᔨᒥᓪᓕ ᐱᓪᓚᕆᐅᓂᕐᓴᐅᓕᕐᐳᖅ, ᓇᒡᓕᖕᓇᕐᑑᓪᓗᓂᓕ ᐅᒃᐱᕐᑑᖃᑎᐅᓕᕐᐳᖅ, ᐅᕝᕙᓐᓄᑦ ᐃᓕᖕᓄᓪᓕ ᐊᑐᕐᓇᕐᓂᕐᓴᐅᓕᕐᐳᖅ, ᑎᒥᒃᑯᑦ ᐊᑕᓂᕐᒥᓗ.
17ᐱᓇᓱᐊᖃᑎᓪᓚᕆᒃᑐᑦ ᐃᓱᒪᒋᒍᕕᖓ, ᑐᓐᖓᓱᒃᑎᓐᓂᐊᕐᐸᑦ ᐅᕙᖓᐅᔮᕐᑎᓪᓗᒍ. 18ᐃᓕᖕᓄᑦ ᓈᒻᒪᖏᑐᓕᓚᐅᕐᐸᑦ, ᐅᕝᕙᓗ ᐊᑭᓕᒃᓴᖃᓚᐅᕐᓂᕐᐸᑦ ᓱᓇᑐᐃᓐᓇᕐᒥᒃ, ᐅᕙᓐᓄᑦ ᐊᑭᓕᒐᒃᓴᐅᑎᓐᓂᐊᕐᐸᑎᑦ. 19ᑖᒃᑯᐊ ᒫᓐᓇ ᑎᑎᕋᕐᑕᒃᑲ ᓇᖕᒥᓂᖅ ᐅᕙᖓ ᐸᐅᓗᓯ ᐊᒡᒐᓐᓄᑦ ᑎᑎᕋᕐᐸᒃᑲ, ᐅᕙᖓ ᐊᑭᓕᕈᒫᕐᐸᒋᑦ; ᐅᕙᓐᓄᑦ ᐊᑭᓕᒃᓴᖃᕐᓂᕋᕐᓗᑎᑦ ᐅᖃᖏᒃᑲᓗᐊᕐᐳᖓ ᐃᓕᖕᓂᒃ ᓇᖕᒥᓂᖅ ᐊᑭᓕᒃᓴᕆᒐᕕᑦ ᐅᕙᓐᓄᑦ. 20ᐃᓛᒃ ᐅᒃᐱᕐᑑᖃᑎᒐ, ᖁᕕᐊᒋᔭᓐᓂᒃ ᐱᓇᓱᐊᖁᕙᒋᑦ ᐊᑕᓂᕐᒥ. ᐆᒻᒪᑎᒃᑯᑦ ᖁᕕᐊᓱᒃᑎᓚᐅᓐᖓ.
21ᖁᓚᓐᖏᓚᖓ ᐱᓇᓱᐊᕐᑕᐅᖁᔭᓐᓂᒃ ᓈᓚᖕᓂᐊᕋᕕᑦ, ᑖᒃᑯᓂᖓ ᑎᑎᕋᐅᑎᒋᔭᓐᓂᒃ, ᖃᐅᔨᒪᓪᓗᖓ ᐅᖃᐅᓯᕆᔭᒪ ᐊᒡᓛᑦ ᐅᖓᑖᓄᑦ ᐱᓇᓱᐊᑦᓯᐊᕐᓂᐊᕋᕕᑦ. 22ᑍᒫᒃᑕᐅᖅ, ᓯᓂᒃᑕᕐᕕᒃᓴᓐᓂᒃ ᐋᖅᑭᓯᓯᒪᖁᕙᒋᑦ, ᓂᕆᐅᒃᑲᒪ ᑐᒃᓯᐊᕐᓂᓯ ᑭᐅᔭᐅᓂᐊᕐᒪᑕ ᐃᓕᖕᓄᑦ ᐅᑎᕈᓐᓇᖁᓪᓗᖓ.
ᐸᐅᓗᓯᐅᑉ ᑕᕝᕙᐅᕗᑏᕐᓂᖓ
23 #
ᑯᓘᓯ 1:7; 4:12. ᐃᐸᐳᕌᓯᐅᑉ, ᑎᒍᔭᐅᓯᒪᖃᑎᒪ ᔩᓱᓯ ᙭ᔅᑑᓯ ᐱᑦᔪᑎᒋᓪᓗᒍ ᑖᑦᓱᒪ ᑕᕝᕙᐅᕗᑏᕐᐹᑎᑦ, 24#ᐋᐴᓯᑕᓖᑦ 12:12,25; 13:13; 15:37-39; ᑯᓘᓯ 4:10; ᐋᐴᓯᑕᓖᑦ 19:29; 27:2; ᑯᓘᓯ 4:10; ᑯᓘᓯ 4:14; 2 ᑎᒧᑎ 4:10; ᑯᓘᓯ 4:14; 2 ᑎᒧᑎ 4:11.ᐅᑯᓇᓐᖓᓪᓗ ᐱᓇᓱᐊᖃᑎᓐᓂᑦ ᑕᕝᕙᐅᕗᑏᕐᑕᐅᒋᕗᑎᑦ ᒫᑯᓯᒧᑦ, ᐊᕆᔅᑕᑰᓯᒧᑦ, ᑏᒪᓯᒧᑦ, ᓘᑲᓯᒧᓪᓗ.
25ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐊᓂᕐᓂᓯ ᐃᓚᒋᓕᒋᑦ.
Currently Selected:
ᐰᓕᒨᓂᒧᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
