ᑍᑑᓯᒧᑦ 3
3
᙭ᔅᑑᓯᒥᐅᑦ ᐱᐅᓯᕆᔭᒃᓴᖏᑦ
1ᐃᖅᑬᑎᒃᑭᑦ ᐊᐅᓚᑦᓯᔨᓂᒃ ᐊᖓᔪᖅᑳᓂᒡᓗ ᓈᓚᑦᓯᐊᖁᓗᒋᑦ, ᐃᒻᒥᖕᓂᒃ ᑐᓂᓯᒪᑦᓯᐊᕐᓗᑎᒃ ᑖᒃᑯᓄᖓ, ᐱᓇᓱᐊᑦᓯᐊᕈᒪᓂᕐᒥᒡᓗ ᖃᖓᓕᒫᒃᑯᑦ ᐊᑐᐃᓐᓇᐅᑦᓯᐊᖁᓪᓗᒋᑦ. 2ᐃᓅᖃᑎᒥᖕᓂᒃ ᐱᐅᖏᑦᑐᒥᒃ ᐅᖃᐅᓯᖃᖁᓇᒋᑦ, ᐂᕙᑦᑍᓕᓗᑎᒃ, ᐃᓅᖃᓐᓂᑦᓯᐊᕐᓗᑎᒃ, ᑐᓐᖓᓇᕐᓗᑎᒡᓗ ᐃᓄᓕᒫᓄᑦ. 3ᓇᖕᒥᓂᕐᑕᐅᖅ ᐅᕙᒍᑦ ᓯᓔᑦᑑᕙᓚᐅᕐᒥᒐᑦᑕ ᓈᓚᐃᓐᓇᕐᐸᒐᑕᓗ, ᑕᒻᒪᕐᓯᒪᓪᓗᑕᓗ, ᐃᒃᖠᒎᕐᓂᕐᓄᑦ ᖃᓄᑐᐃᓐᓇᕐᓄᑦ ᐊᐅᓚᑕᐅᓪᓗᑕ ᓱᓇᑐᐃᓐᓇᕐᓂᒡᓗ ᖁᕕᐊᓲᑎᖃᕐᓗᑕ, ᐃᓅᓯᕗᓪᓗ ᐊᑐᓚᐅᕐᐸᕗᑦ ᐅᒋᐊᓐᖑᓂᕐᒧᑦ ᐊᓐᓂᕈᑦᔨᓂᕐᒧᓪᓗ, ᐊᓯᑦᑎᓐᓂᒃ ᐆᒥᓱᒃᐸᒃᓗᑕ ᐆᒥᒋᔭᐅᕙᒃᓗᑕᓗ ᐊᓯᑦᑎᓐᓄᑦ; 4ᒎᑎᐅᓪᓕ ᐱᐅᓕᔨᑦᑕ ᐱᑦᓯᐊᕐᓂᖓ ᓇᒡᓕᒍᓱᖕᓂᖓᓗ ᓴᖅᑭᒻᒪᑦ, 5ᑖᑦᓱᒪ ᓴᐳᑎᓚᐅᕐᐹᑎᒍᑦ, ᐱᓇᓱᐊᑦᓯᐊᕐᓂᕆᓚᐅᕐᑕᕗᑦ ᐱᑦᔪᑎᒋᓇᒋᑦ, ᓇᖕᒥᓂᕐᓕ ᓂᑲᒍᓱᖕᓂᕐᒥᓄᑦ ᐱᐅᓕᓚᐅᕐᐹᑎᒍᑦ, ᐅᐊᓴᕐᓗᑕ ᓄᑖᒥᒃ ᐃᓅᓯᕐᑖᕐᑎᓚᐅᕐᐹᑎᒍᑦ ᐊᓂᕐᓂᒃᑯᓪᓗ ᐃᑦᔪᕐᓁᑦᑐᒃᑯᑦ ᓄᑖᓐᖑᑎᓪᓗᑕ. 6ᒎᑎᐅᑉ ᑯᕝᕕᕆᓚᐅᕐᐹᑎᒍᑦ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐊᒥᒐᖏᑦᑐᒥᒃ ᔩᓱᓯ ᙭ᔅᑑᓯᒃᑯᑦ ᐱᐅᓕᔨᑦᑎᒍᑦ, 7ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᓈᒻᒪᒋᔭᐅᓕᖁᓪᓗᑕ ᒎᑎᒧᑦ ᑭᖑᕐᖑᑦᔨᔪᓐᓇᖁᓪᓗᑕᓗ ᐱᐅᓕᔭᐅᓂᕐᒥᒃ ᓂᕆᐅᖕᓂᕐᑖᕆᓯᒪᔭᑦᑎᒃᓂᒃ. 8ᑕᒪᑦᔭ ᐅᖃᐅᓯᖅ ᓱᓕᔪᖅ.
ᑕᒪᒃᑯᓂᖓ ᐃᒃᐱᒍᓱᑦᓯᐊᕐᓗᑎᑦ ᐊᔪᕆᕐᑐᐃᖁᕙᒋᑦ, ᒎᑎᒧᑦ ᐅᒃᐱᕐᑐᑦ ᐱᓇᓱᐊᑦᓯᐊᕈᒪᓂᕐᒥᒃ ᑲᔪᖏᓕᖁᓪᓗᒋᑦ ᐱᕕᖃᕐᓂᓕᒫᒥᒍᑦ; ᑍᒤᓕᐅᕐᓃᑦ ᑕᒪᒃᑯᐊ ᐱᐅᖕᒪᑕ ᐊᑐᕐᓇᕐᑑᓪᓗᑎᒡᓗ ᐃᓄᓕᒫᓄᑦ. 9ᓱᓕᓂᕐᓴᐅᖃᑦᑕᐅᑎᓇᓱᖕᓃᓪᓕ ᓈᒻᒪᖏᑦᑐᑦ ᐊᑐᕐᓂᐊᕐᓇᒋᑦ, ᓯᕗᓕᕕᓂᑦᑕ ᑭᖑᕚᕆᒃᐸᓪᓕᐊᓂᖏᓐᓂᒃ ᖃᐅᔨᓇᓱᐊᕐᓂᑦ, ᐂᕙᓃᑦ, ᐊᑭᕋᕐᑑᑎᓃᓪᓗ ᐱᖁᔧᑦ ᐱᓪᓗᒋᑦ, ᑕᒪᒃᑯᐊ ᐊᑑᑎᖃᖏᒻᒪᑕ ᐱᕙᓪᓕᕐᓇᕐᑐᖃᕋᑎᒡᓗ. 10ᐃᓄᒃ ᐃᓅᖃᑎᒥᓂᒃ ᐊᕕᑎᑦᓯᔪᖅ ᐊᑕᐅᓯᐊᕐᓗᒍ ᒪᕐᕈᐃᕐᑐᕐᓗᒍᓘᓐᓃᑦ ᐃᓂᕐᑎᓚᐅᖅᑳᕐᓗᒍ, ᑭᖑᓂᖓᒍᑦ ᑲᒪᒋᓇᓱᐊᒃᑲᓐᓂᕈᓐᓃᕈᒃ. 11ᖃᐅᔨᒪᒐᕕᑦ ᐃᓄᒃ ᑍᒤᑦᑐᖅ ᓇᒻᒪᒃᓯᓐᖏᒻᒪᑦ ᐱᓂᐊᕐᓂᕐᒥᒍᑦ ᐊᔪᕐᑐᓕᓯᒪᓂᖓᑕ ᓇᓗᓇᕈᒃᓃᕐᑎᒻᒪᒍ ᑕᒻᒪᕐᓯᒪᓂᖓᓂᒃ.
ᓄᖅᑲᐅᓯᕈᑏᑦ ᐅᖃᐅᑦᔨᓃᓪᓗ
12 #
ᐋᐴᓯᑕᓖᑦ 20:4; ᐃᐱᓯ 6:21,22; ᑯᓘᓯ 4:7,8; 2 ᑎᒧᑎ 4:12. ᐋᕐᑎᒪᓯ ᐃᓕᖕᓄᑦ ᑎᓕᒍᒃᑯ ᐅᕝᕙᓗ ᑍᑭᑰᓯ, ᐱᕕᖃᕐᓂᓕᒫᒃᑯᑦ ᐅᕙᓐᓄᑦ ᑎᑭᓐᓇᓱᐊᖁᒐᓗᐊᕐᐸᒋᑦ ᑕᕝᕗᖓ ᓂᑯᐴᓕᓯᒧᑦ, ᑕᕝᕙᓂ ᐅᑮᔪᒪᓪᓗᖓ ᐃᓱᒪᑖᕐᓯᒪᓕᕋᒪ. 13#ᐋᐴᓯᑕᓖᑦ 18:24; 1 ᑯᕆᓐᑎ 16:12.ᓯᓇᓯ ᐃᑲᔪᑦᓯᐊᕋᓱᖕᓂᐊᕐᐸᑦ ᐱᖁᔭᓕᕆᔨ, ᐊᐴᓗᓯᓗ ᐊᐅᓪᓚᕈᓐᓇᕐᓯᖁᓪᓗᒋᒃ; ᐊᑐᕆᐊᖃᕐᑕᖏᓐᓂᒡᓗ ᑕᒤᓐᓂᒃ ᓈᒻᒪᑦᓯᐊᕐᑎᒋᐊᕈᒫᕐᐹᒃᑭᒃ. 14ᐃᓅᖃᑎᕗᑦ ᐱᓂᐊᑦᓯᐊᕈᓐᓇᕐᓂᕐᒥᒃ ᐃᓕᓐᓂᐊᕈᓐᓇᖁᓪᓗᒋᑦ, ᐃᑲᔪᕐᑕᐅᔭᕆᐊᖃᓪᓚᕆᒃᑐᓂᒃ ᐃᑲᔪᕈᓐᓇᕐᓯᖁᓪᓗᒋᑦ, ᐊᑑᑎᖃᖏᑦᑐᒥᒡᓗ ᐃᓅᓯᖃᖁᓇᒋᑦ.
15ᐅᕙᑦᑎᓐᓃᑦᑐᓕᒫᓂᑦ ᑕᕝᕙᐅᕗᑏᕐᑕᐅᕗᑎᑦ. ᐅᒃᐱᕐᓂᒃᑯᓪᓗ ᐃᓚᓐᓇᕆᔭᕗᑦ ᑕᕝᕙᐅᕗᑏᕐᐸᕗᑦ.
ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᐃᓚᒋᔭᐅᑦᓮᓐᓇᕆᑦᓯ ᑕᒪᑦᓯ.
Currently Selected:
ᑍᑑᓯᒧᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
