ᒨᓯᓯ ᓯᑕᒪᖏᑦ 16
16
ᐊᑭᕋᕐᑐᕐᓂᖅ ᒨᓯᓯᒥᒃ ᐂᕉᓂᒥᒃᓗ
1 #
ᔫᑎᐅᑉ 1:11. ᒫᓐᓇᓕ ᑰᕋ ᐃᔾᕼᐊᕆᐅᑉ ᐃᕐᓂᖓ, ᑯᕼᐋᑎᐅᓪᓗ ᐃᕐᖑᑕᖓ, ᓕᕔᑉ ᑭᖑᕚᖓ, ᐃᓚᖃᕐᓗᓂ ᑖᑕᓐᒥᒃ ᐊᐱᕋᒥᒡᓗ ᐃᓔᐊᑉ ᐃᕐᓂᖏᓐᓂᒃ, ᐆᓂ ᐱᓕᑎᐅᑉ ᐃᕐᓂᖓ, ᕉᐱᓂᐅᑉ ᑭᖑᕚᖏᑦ, ᐊᖑᑎᓂᒃ ᐃᓚᑖᕐᐳᑦ; 2ᐊᑭᕋᕐᑐᕆᐊᕐᑐᕐᐳᑦ ᒨᓯᓯᒥᒃ, ᐃᓴᕆᐊᓕᒥᐅᑦ ᐃᓚᖏᑦ ᐃᓚᒋᓪᓗᒋᑦ, 250ᓂᒃ ᓯᕗᓕᕐᑎᐅᔪᓂᒃ ᐃᓄᒋᐊᒃᑐᕐᔪᐊᓂᑦ, ᐃᓄᒋᐊᒃᑐᕐᔪᐊᑦ ᐱᑦᔪᑎᓪᓗᒋᑦ, ᐊᖑᑎᑦ ᐅᐱᒋᔭᐅᑦᓯᐊᕐᑐᑦ. 3ᑲᑎᓪᓗᑎᒃ ᐊᑭᕋᕐᑐᓕᕐᐳᑦ ᒨᓯᓯᒥᒃ ᐂᕉᓂᒥᒡᓗ, ᑖᒃᑯᖕᓄᖓ ᐅᖃᕐᓗᑎᒃ, “ᐃᓕᑦᓯᓐᓂᒃ ᐊᖓᔪᖅᑳᖑᑎᓗᐊᕋᑦᓯᒃ, ᐃᓅᖃᑎᒌᒡᔪᐊᑦ ᐃᑦᔪᕐᓁᑦᑑᖕᒪᑕ, ᑕᒪᕐᒥᑦᓯᐊᖅ, ᐊᑕᓂᐅᓪᓗ ᐃᓚᒋᖕᒪᒋᑦ. ᓱᖕᒪᑦ ᐃᓕᑦᓯᓐᓂᒃ ᐊᖏᔫᑎᓗᐊᕐᐱᓯᒃ ᐊᑕᓂᐅᑉ ᑲᑎᒪᔪᕐᔪᐊᖁᑎᖏᓐᓄᑦ?”
4ᒨᓯᓯᓗ ᑐᓴᕋᒥ, ᓄᓇᒧᑦ ᐳᓪᓗᓂ ᐹᒻᒪᒃᐳᖅ; 5ᐅᖃᕐᓗᓂᓗ ᑰᕋᒧᑦ ᐃᓚᒋᔭᖏᓐᓄᓪᓗ, “ᖃᐅᒃᐸᑦ ᐅᓪᓛᒃᑯᑦ ᐊᑕᓂᖅ ᖃᐅᔨᑎᑦᓯᓂᐊᕐᐳᖅ ᑭᓇᒥᒃ ᐱᖃᕐᒪᖔᕐᒥ, ᑭᓇᓗ ᐃᑦᔪᕐᓁᒻᒪᖔᑦ, ᖃᓂᒋᔭᒥᓅᕐᑎᑦᓯᓂᐊᕐᐳᕐᓗ; ᑖᑦᓱᒥᖓ ᓂᕈᐊᕐᑕᒥᓂᒃ. 6ᐃᒫᒃ ᐱᓂᐊᕐᐳᓯ: ᐃᓯᕐᓗᐊᕐᓂᑎᑦᓯᑦᔪᑎᓂᒃ ᐱᓯᒪᓂᐊᕐᐳᓯ, ᐃᕝᕕᑦ ᑰᕋ ᐃᓚᒋᔭᓕᒫᑎᓪᓗ; 7ᐃᑯᒪᑎᓪᓗᒋᑦ ᑎᐱᑦᓯᐊᕆᒃᑐᒥᒡᓗ ᐃᓗᓕᖃᕐᓗᑎᒃ ᐊᑕᓂᐅᑉ ᓵᖓᓂ ᖃᐅᒃᐸᑦ, ᓇᓗᓁᕐᓂᐊᕐᐳᖅ ᑭᓇ ᐊᑕᓂᐅᑉ ᓂᕈᐊᕐᑕᖓ ᐃᑦᔪᕐᓁᑦᑑᓂᐊᕐᒪᖔᑦ. ᐃᓕᑦᓯ ᓕᕔᑎᐅᔪᓯ ᐃᓕᑦᓯᓐᓂᒃ ᐱᔭᒃᓴᖃᕐᑎᓗᐊᕋᑦᓯ!”
8ᒨᓯᓯᓗ ᑰᕋᒧᑦ ᐅᖃᕐᐳᖅ, “ᓈᓚᓚᐅᕆᑦᓯ ᓕᕔᑉ ᑭᖑᕚᖏᑦ: 9ᒥᑭᓗᐊᕐᐹ ᐃᓕᑦᓯᓐᓄᑦ ᐃᓴᕆᐊᓕᒥᐅᑦ ᒎᑎᖓᑦᑕ ᓴᓂᕐᕙᒃᑎᓯᒪᖕᒪᓯ ᐃᓴᕆᐊᓕᒥᐅᑦ ᑲᑎᒪᔪᕐᔪᐊᖏᓐᓂᑦ, ᐃᒻᒥᓄᑦ ᖃᓂᑦᑑᑎᒻᒪᓯ, ᐊᑕᓂᐅᑉ ᑐᐱᕐᔪᐊᖓᓂᒃ ᑲᒪᔨᐅᑎᒻᒪᓯ, ᐃᓄᒋᐊᒃᑐᕐᔪᐊᖁᑎᖏᓐᓂᒡᓗ ᐱᔨᑦᓯᕐᑎᐅᑎᒻᒪᓯ; 10ᖃᓂᒋᔭᒥᓂᓗ ᐃᓂᖃᕐᑎᒻᒪᓯ, ᐃᓕᑦᓯ ᖃᑕᓐᖑᑎᓯᓗ, ᓕᕔᑉ ᑭᖑᕚᖏᓐᓂᒃ ᐃᓚᖃᕐᑎᒻᒪᓯ? ᑐᓂᕐᕈᓯᕐᑎᑦᓯᔨᐅᔪᒪᓕᕆᕕᓰ? 11ᑍᒤᒻᒪᑦ ᐃᓕᑦᓯ ᐃᓚᒋᔭᓯᓗ ᑲᑎᒪᕗᓯ ᐊᑕᓂᕐᒥᒃ ᐊᑭᕋᕐᑐᕈᒪᓪᓗᓯ. ᖃᓄᐃᒻᒪᑦ ᐂᕉᓂ ᓈᒻᒪᒋᓇᒍ ᓂᓪᓕᐊᑦᔪᑎᒋᕕᓯᐅᒃ?”
12ᒨᓯᓯᐅᑉ ᑖᑕᓐ ᐊᐱᕋᒥᓗ ᐃᓔᐊᐱᐅᑉ ᐃᕐᓂᖏᒃ ᕾᖁᔭᐅᖁᕚᒃ, ᑍᒃᑯᐊᒡᓕ ᐅᖃᕐᐳᒃ, “ᕾᓂᐊᖏᑦᑐᒍᒃ! 13ᐃᓕᖕᓄᑦ ᒥᑭᓗᐊᕐᐹ ᓄᓇᒥᑦ ᐱᕈᕐᑐᖃᑦᓯᐊᕐᑐᒥᑦ ᐊᔪᕐᓴᕐᓇᖏᑦᑐᒥᓪᓗ ᐊᐅᓪᓚᕐᑎᓚᐅᕋᑦᑎᒍᑦ, ᐃᓄᖃᖏᑦᑐᒥ ᑐᖁᖁᓪᓗᑖ, ᐊᖓᔪᖅᑳᕐᔪᐊᓪᓗ ᐃᕐᓂᖓᑐᑦ ᑍᒤᑦᓱᒪᓪᓗᑎᑦ ᐅᕙᑦᑎᓐᓄᑦ? 14ᓱᓕᓗ ᑎᑭᑎᓚᐅᖏᓐᓇᑦᑎᒍᑦ ᓄᓇᒧᑦ ᐱᕈᕐᑐᖃᑦᓯᐊᕐᑐᒧᑦ ᐊᔪᕐᓴᕐᓇᖏᑦᑐᒧᓪᓗ, ᓄᓇᖁᑎᑖᕐᑎᓚᐅᕋᑕᓘᓐᓃᑦ ᐱᕈᕐᓰᕕᖕᓂᒃ ᕔᓂᓕᐅᕐᕕᒃᓴᓂᒡᓗ. ᐅᑯᐊ ᐃᔨᖏᑦ ᑕᐅᑐᒍᓐᓃᕐᑎᑦᓱᒪᔭᑏᑦ? ᕾᓂᐊᖏᑦᑐᒍᑦ!”
15ᑕᕝᕙ ᒨᓯᓯ ᐊᒃᓱᐊᓗᒃ ᓂᓐᖓᓚᐅᕐᐳᖅ, ᐊᑕᓂᕐᒧᓪᓗ ᐅᖃᕐᓗᓂ, “ᑐᓂᕐᕈᑎᖏᑦ ᑲᒪᒋᑦᑍᓕᒃᑭᑦ. ᓯᐅᑎᖅᑯᕐᑐᔪᒥᒡᓘᓐᓃᑦ ᐊᑕᐅᓯᕐᒥᒃ ᑖᒃᑯᓇᓐᖓᑦ ᐱᑎᑕᐅᓚᐅᓐᖏᓚᖓ, ᐋᓐᓂᕐᓯᓚᐅᕐᓇᖓᓘᓐᓃᑦ ᓇᓪᓕᐊᓐᓂᒃ.”
16ᒨᓯᓯ ᑰᕋᒧᑦ ᐅᖃᕐᐳᖅ, “ᖃᐅᒃᐸᑦ, ᐃᓚᒋᔭᑎᓪᓗ ᑖᒃᑯᐊ ᐃᓚᒋᓗᒋᑦ ᐊᑕᓂᐅᑉ ᓵᖓᓅᓚᕐᐳᓯ ᐃᕝᕕᓪᓗ ᐅᑯᐊᓗ, ᐂᕉᓂ ᐃᓚᐅᓛᕆᕗᖅ. 17ᐃᓯᕐᓗᐊᕐᓂᑎᑦᓯᑦᔪᑎᓯ ᐊᑐᓂᑦ ᑎᐱᑦᓯᐊᕆᒃᑐᓂᒃ ᐃᓗᓕᖃᕐᓗᑎᒃ ᓇᒃᓴᕐᓗᒋᑦ, ᐃᓯᕐᓗᐊᕐᓂᑎᑦᓯᑦᔪᑎᖃᕐᓗᓯ ᐊᑕᓂᐅᑉ ᓵᖓᓂ, 250ᓂᒃ ᐃᓯᕐᓗᐊᕐᓂᑎᑦᓯᑦᔪᑎᓂᒃ; ᐃᓕᑦᓯ ᑕᒪᑦᓯ ᐂᕉᓂᓗ, ᓇᖕᒥᓂᖅ ᐊᑐᓂᑦ ᐃᓯᕐᓗᐊᕐᓂᑎᑦᓯᑦᔪᑎᖃᕐᓗᓯ.” 18ᑍᒤᒻᒪᑦ ᐊᖑᑎᑦ ᐊᑐᓂᑦ ᐃᓯᕐᓗᐊᕐᓂᑎᑦᓯᑦᔪᑎᓕᔭᓚᐅᕐᐳᑦ, ᐃᑯᒪᔪᓂᒃ ᑎᐱᑦᓯᐊᕆᒃᑐᒥᒃ ᐃᓗᓕᖃᕐᓗᑎᒃ, ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ ᓇᖏᓚᐅᕐᐳᑦ ᒨᓯᓯ ᐂᕉᓂᓗ ᑲᑎᒪᖃᑎᒋᓪᓗᒋᒃ. 19ᑰᕋᐅᑉ ᐃᓄᒋᐊᒃᑐᕐᔪᐊᑦ ᑲᑎᑎᓚᐅᕐᐰᑦ ᑖᒃᑯᓂᖓ ᐊᑭᕋᕐᑐᕆᐊᕐᑐᕐᓗᑎᒃ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ. ᑕᕝᕙ ᐊᑕᓂᐅᑉ ᐱᓐᓇᕐᓇᕐᓂᕐᔪᐊᖓ ᓴᖅᑭᑉᐳᖅ ᐃᓄᒋᐊᒃᑐᕐᔪᐊᓄᑦ. 20ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ ᐃᒫᒃ, 21“ᐊᕝᕗᑎᓕᕆᑦᓯᒃ ᐃᓄᒋᐊᒃᑐᕐᔪᐊᓂᑦ ᐅᑯᓇᓐᖓᑦ, ᐅᑯᐊ ᒫᓐᓈᐱᒃ ᓄᖑᓐᓂᐊᕋᒃᑭᑦ.”
22ᑖᒃᑯᐊᒃ ᐹᒻᒪᒃᓗᑎᒃ ᓄᓇᒧᑦ ᑐᓪᓗᑎᒃ ᐅᖃᕐᐳᑦ, “ᒎᑎ, ᒎᑎᐅᔪᑎᑦ ᑎᒥᖃᕐᑐᑦ ᐊᓂᕐᓂᖏᓐᓄᑦ, ᐃᓄᒃ ᐊᑕᐅᓯᖅ ᐱᐅᖏᑦᑐᓕᒃᐸᑦ, ᐃᓄᒋᐊᒃᑐᕐᔪᐊᓕᒫᑦ ᓂᓐᖓᐅᑎᔭᕆᐊᖃᕐᐱᒌᑦ?”
23ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᓕᕐᐳᖅ, ᐃᒫᒃ, 24“ᐃᓄᒋᐊᒃᑐᕐᔪᐊᑦ ᐅᖃᐅᑎᒃᑭᑦ, ᑰᕋᐅᑉ ᑖᑕᓂᐅᓪᓗ, ᐊᐱᕋᒥᐅᓪᓗ ᑐᐱᖏᑦ ᕿᒪᒃᓯᐅᒃ.”
25ᑕᕝᕙ ᒨᓯᓯ ᒪᑭᓐᓇᒥ ᐅᐸᒍᑎᕗᖅ ᑖᑕᓂᒧᑦ ᐊᐱᕋᒥᒧᓪᓗ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑕ ᒪᓕᒃᐹᑦ. 26ᐃᓄᒋᐊᒃᑐᕐᔪᐊᑦ ᐅᖃᕐᕕᒋᕔᑦ ᐅᖃᕐᓗᓂ, “ᐅᑯᐊ ᐃᓄᐃᑦ ᐱᐅᖏᑦᑐᓕᔪᑦ ᑐᐱᖏᑦ ᕿᒪᒃᓯᐅᒃ! ᐱᒋᔭᖏᓐᓂᒡᓘᓐᓃᑦ ᐊᒃᑐᕐᓯᓂᐊᕋᓯ, ᓄᖑᑕᐅᖁᓇᓯ ᐊᔪᕐᑐᓕᓂᖏᓐᓄᑦ.” 27ᑕᕝᕙ ᐃᓄᐃᑦ ᑰᕋᐅᑉ, ᑖᑕᓂᐅᓪᓗ, ᐊᐱᕋᒥᐅᓪᓗ ᑐᐱᖏᓐᓂᑦ ᐊᓂᒐᒥᒃ ᐹᖓᓂ ᓇᖏᕐᐳᑦ, ᓄᓕᐊᑎᒃ ᐃᕐᓂᑎᒃ ᕿᑐᕐᖓᑎᒡᓗ ᒥᑭᔫᑎᑦ ᐃᓚᒋᓪᓗᒋᑦ. 28ᒨᓯᓯᓗ ᐅᖃᕐᐳᖅ, “ᒫᓐᓇ ᖃᐅᔨᑦᔪᑎᒋᓂᐊᕋᑦᓯᐅᒃ ᐊᑕᓂᐅᑉ ᑎᓕᓚᐅᕐᒪᖓ ᑕᒪᒃᑯᓂᖓ ᐱᓇᓱᐊᖁᓪᓗᖓ, ᓇᖕᒥᓂᖅ ᐃᓱᒪᒋᔭᓐᓂᒃ ᑍᒤᓕᐅᓚᐅᖏᓐᓇᒪ. 29ᐅᑯᐊ ᐊᖑᑎᑦ ᐃᓄᓕᒫᑦ ᐱᐅᓯᖏᑎᑐᑦ ᑐᖁᑐᐃᓐᓇᕐᐸᑕ, ᑎᑭᑕᐅᒃᐸᑕᓘᓐᓃᑦ ᓱᓇᑐᐃᓐᓇᕐᓄᑦ ᐃᓄᓕᒫᓄᑦ ᑐᖁᑦᔪᑕᐅᕙᒃᑐᓄᑦ, ᑕᕝᕙ ᐊᑕᓂᐅᑉ ᑎᓕᓯᒪᓐᖏᓛᖓ. 30ᐊᑕᓂᕐᓕ ᓄᑖᒥᒃ ᐱᓚᐅᕐᓯᒪᖏᑦᑐᒥᒃ ᓴᖅᑭᑎᑦᓯᒃᐸᑦ, ᓄᓇᐅᑉ ᖃᓂᓂ ᐂᑦᑕᕐᐸᒍ ᑖᒃᑯᐊᓗ ᐄᓗᒋᑦ ᐱᒋᔭᓕᒫᖏᓪᓗ ᐃᑎᕐᓴᒧᑦ ᐆᒪᓗᑎᒃ ᑲᑕᒃᐸᑕ, ᑐᑭᓯᓂᐊᕐᐳᓯ ᑕᕝᕙ ᑖᒃᑯᐊ ᐊᑕᓂᕐᒥᒃ ᐊᑭᕋᕐᑐᓚᐅᕐᒪᑕ.”
31ᑍᒫᒡᓗ ᑕᒪᒃᑯᓂᖓ ᐅᖃᕇᕐᑎᓪᓗᒍ, ᓄᓇ ᐊᑎᖏᓐᓂᑦ ᐊᕕᒃᐳᖅ, 32ᓄᓇᐅᑉ ᖃᓂᓂ ᐂᑦᑕᕐᐹ ᐄᓪᓗᒋᓪᓗ, ᐃᒡᓗᒥᐅᖃᑎᓕᒫᖏᓪᓗ, ᑰᕋᐅᓪᓗ ᐊᖑᑕᐅᖃᑎᖏᑦ, ᐱᒋᔭᓕᒫᖏᓪᓗ. 33ᑖᒃᑯᐊ ᐆᒪᓪᓗᑎᒃ ᑲᑕᒃᐳᑦ ᐃᑎᕐᓴᒧᑦ ᐱᒋᔭᓕᒫᖏᓪᓗ; ᓄᓇᐅᓪᓗ ᒪᑐᑦᔪᑎᒋᕔᑦ, ᐊᓯᐅᓚᐅᕐᐳᑦ ᐃᓅᖃᑎᒌᒡᔪᐊᓂᑦ ᐃᓚᒋᔭᐅᔪᓐᓁᕐᓗᑎᒃ. 34ᐃᓴᕆᐊᓕᐅᓪᓕ ᖃᓂᒋᔭᖓᓃᑦᑐᓕᒫᑦ ᕿᒫᕗᑦ ᓂᓪᓕᐊᓂᖏᓐᓂᒃ ᑐᓵᓕᕋᒥᒃ, ᐅᖃᕐᓗᑎᒡᓗ, “ᐅᕙᒍᑦᑕᐅᖅ ᓄᓇᒧᑦ ᐄᔭᐅᑦᑍᓕᑕ!” 35ᐃᑯᒪᓗ ᐊᖅᑲᕐᐳᖅ ᐊᑕᓂᕐᒥᑦ ᓄᖑᓪᓗᒋᓪᓗ 250 ᐊᖑᑎᑦ ᐃᓯᕐᓗᐊᕐᓂᑎᑦᓯᓪᓗᑎᒃ ᑐᓂᕐᕈᓯᕐᑐᑦ.
ᐃᓯᕐᓗᐊᕐᓂᑎᑦᓯᑦᔪᑎᑦ
36ᐊᑕᓂᕐᓗ ᒨᓯᓯᒧᑦ ᐅᖃᓕᕐᐳᖅ, ᐅᖃᕐᓗᓂ: 37ᐃᓕᓯᕆ ᐅᖃᐅᑎᒍᒃ, ᑐᓂᕐᕈᓯᕐᑎᑦᓯᔨᐅᑉ ᐂᕉᓂᐅᑉ ᐃᕐᓂᖓ, ᐃᓯᕐᓗᐊᕐᓂᑎᑦᓯᑦᔪᑎᓂᒃ ᓄᐊᑦᓯᖁᓪᓗᒍ ᐃᑯᐊᓚᔪᒥᑦ, ᑕᒪᒃᑯᐊ ᐃᑦᔪᕐᓁᒻᒪᑕ, ᐃᑯᒪ ᐃᑯᒪᔪᓪᓗ ᐅᖓᓯᒋᔭᖓᓄᐊᕐᓗᒋᑦ. 38ᐃᓯᕐᓗᐊᕐᓂᑎᑦᓯᑦᔪᑎᑦ ᓇᖕᒥᓂᖅ ᑕᕐᓂᑎᒃ ᐱᓪᓗᒋᑦ ᐊᔪᕐᑐᓕᓚᐅᕐᑐᑦ ᐱᖏᑦ, ᑲᑦᔪᒡᓗᒋᑦ ᓯᖓᕐᑎᓪᓗᒋᑦ ᑐᓂᕐᕈᓯᕐᕕᐅᑉ ᖄᖓᑕ ᐅᓕᒃᑖᕆᓂᐊᕐᒪᒋᑦ. ᐊᑕᓂᐅᑉ ᓵᖓᓂ ᑐᓂᕐᕈᑕᐅᓚᐅᕐᒪᑕ, ᑍᒤᒻᒪᑦ ᐃᑦᔪᕐᓁᑦᑑᕗᑦ; ᓇᓗᓁᒃᑯᑕᐅᓂᐊᕐᒪᑕ ᐃᓴᕆᐊᓕᒥᐅᓄᑦ. 39ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᐃᓯᕐᓗᐊᕐᓂᑎᑦᓯᑦᔪᑎᑦ ᑲᓐᓄᔧᑦ ᓄᐊᑉᐰᑦ, ᐃᑯᐊᓚᓚᐅᕐᑐᑦ ᑐᓂᕐᕈᑎᒋᓚᐅᕐᑕᖏᑦ, ᑲᑦᔪᒃᑕᐅᓪᓗᑎᒃ ᑐᓂᕐᕈᓯᕐᕕᖕᒧᑦ ᐅᓕᓕᐊᖑᕗᑦ. 40ᐃᖅᑲᐅᒪᑦᔪᑕᐅᖁᓪᓗᒍ ᐃᓴᕆᐊᓕᒥᐅᓄᑦ ᒫᓐᖓᑐᐃᓐᓇᖅ ᐱᔪᑦ, ᐂᕉᓂᐅᑉ ᑭᖑᕚᖏᓐᓂᑦ ᐱᖏᑦᑐᑦ, ᐊᑕᓂᐅᑉ ᓵᖓᓂ ᐃᓯᕐᓗᐊᕐᓂᑎᑦᓯᓗᓂ ᑐᓂᕐᕈᓯᖁᓇᒍ ᐊᑕᓂᕐᒧᑦ, ᑰᕋᑐᑦ ᐃᓚᒋᓚᐅᕐᑕᖏᑎᑐᓪᓗ ᐱᔭᐅᖁᓇᒍ, ᐊᑕᓂᖅ ᑍᒫᒃ ᐅᖃᓚᐅᕐᒪᑦ ᒨᓯᓯᑯᑦ.
ᐂᕉᓂᐅᑉ ᓴᐳᑦᔨᓂᖓ ᐃᓄᖕᓂᒃ
41ᖃᐅᑎᓪᓗᒍ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᓕᒫᑦ ᓈᒻᒪᒃᓴᕋᑎᒃ ᓂᓪᓕᐊᓚᐅᕐᐳᑦ ᒨᓯᓯᒧᑦ ᐂᕉᓂᒧᓪᓗ, ᐅᖃᕐᓗᑎᒃ, “ᑐᖁᑦᓯᔪᓯᒃ ᐊᑕᓂᐅᑉ ᐃᓄᖁᑎᖏᓐᓂᒃ.” 42ᐱᔪᖃᓚᐅᕐᐳᖅ, ᐃᓅᖃᑎᒌᒡᔪᐊᑦ ᐊᑭᕋᕐᑐᕈᒪᓪᓗᑎᒃ ᒨᓯᓯᒥᒃ ᐂᕉᓂᒥᒡᓗ ᑲᑎᖕᒪᑕ, ᑐᐱᕐᔪᐊᑉ ᑲᑎᒪᕕᐅᑉ ᓇᓛᓄᑦ ᓵᒻᒪᑕ; ᑕᕝᕔᓐᓇᖅ ᓄᕗᔭᐅᑉ ᐅᓕᒃᐹ, ᐊᑕᓂᐅᓪᓗ ᐱᓐᓇᕐᓇᕐᓂᖓ ᓴᖅᑭᑉᐳᖅ. 43ᒨᓯᓯᓗ ᐂᕉᓂᓗ ᐅᐸᒍᑎᓕᕐᐴᒃ ᑐᐱᕐᔪᐊᕐᒧᑦ ᑲᑎᒪᕕᖕᒧᑦ. 44ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ, ᐅᖃᕐᓗᓂ, 45“ᐅᑯᐊ ᐃᓄᒋᐊᒃᑐᕐᔪᐊᑦ ᕿᒪᓕᒃᑭᑦ, ᑕᕝᕔᓐᓇᖅ ᓄᖑᓐᓂᐊᕋᒃᑭᑦ.” ᑖᒃᑯᐊᒡᓗ ᓄᓇᒧᑦ ᐹᒻᒪᒃᐴᒃ ᒪᓂᖅᑲᒧᑦ ᑮᓇᑎᒃ ᐳᓪᓗᒋᑦ.
46ᒨᓯᓯᓗ ᐂᕉᓂᒧᑦ ᐅᖃᕐᐳᖅ, “ᐃᓯᕐᓗᐊᕐᓂᑎᑦᓯᑦᔪᑎᒥᒃ ᑎᒍᓯᒋᑦ, ᐃᑯᒪᔪᒥᒡᓗ ᑐᓂᕐᕈᓯᕐᕕᖕᒥᑦ ᐃᓕᓯᕕᒋᓗᒍ, ᑎᐱᑦᓯᐊᕆᒃᑐᒥᒃ ᐃᓗᓪᓕᕐᓗᒍ, ᑐᐊᕕᕐᓗᑎᑦ ᐃᓄᒋᐊᒃᑐᕐᔪᐊᓄᑦ ᐂᑦᔪᑎᒍᒃ ᐃᓱᒪᒋᔪᓐᓁᕐᕕᐅᖁᓪᓗᒋᑦ; ᐊᑕᓂᐅᑉ ᓂᓐᖓᐅᓯᖓ ᐃᖏᕐᕋᓕᕐᒪᑦ ᑖᑦᓱᒪᓐᖓᑦ. ᑐᖁᑦᓯᔪᖅ ᐋᓐᓂᐊᓇᕐᑐᖅ ᐱᒋᐊᕐᒪᑦ.” 47ᐂᕉᓂ ᐂᒃᓯᕐᐳᖅ ᒨᓯᓯᐅᑉ ᐱᖁᔨᓂᖓ ᒪᓕᒡᓗᒍ, ᐃᓄᒋᐊᒃᑐᕐᔪᐊᑦ ᐊᑯᓐᓂᖓᓄᑦ ᐅᓪᓚᒃᓗᓂ; ᐋᓐᓂᐊᓇᕐᑐᖅ ᑐᖁᑦᓯᔪᖅ ᐱᒋᐊᕐᓯᒪᓕᕇᓚᐅᕐᐳᖅ ᐃᓄᖕᓂ. ᑎᐱᑦᓯᐊᕆᒃᑐᒥᒃ ᐃᓗᐊᓄᑦ ᐃᓕᓯᕗᖅ ᐃᓄᐃᓪᓗ ᐃᓱᒪᒋᔪᓐᓁᕐᕕᐅᑎᑉᐰᑦ. 48ᑐᖁᔪᑦ ᐆᒪᔪᓪᓗ ᐊᑯᓐᓂᖓᓂ ᓇᖏᕐᑎᓪᓗᒍ; ᐋᓐᓂᐊᓇᕐᑐᖅ ᑐᖁᑦᓯᔪᖅ ᓄᖅᑲᕐᐳᖅ. 49ᑐᖁᔪᓪᓕ ᐋᓐᓂᐊᓇᕐᑐᒧᑦ ᐅᓄᕐᓂᖃᓚᐅᕐᐳᑦ 14,700ᓂᒃ, ᑍᒃᑯᐊ ᑰᕋᒃᑯᑦ ᑐᖁᓚᐅᕐᑐᑦ ᐊᓯᖏᑦ. 50ᐂᕉᓂ ᐅᑎᕆᕗᖅ ᒨᓯᓯᒧᑦ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓃᑦᑐᒧᑦ, ᑐᖁᓐᓇᕐᑐᖅ ᐋᓐᓂᐊ ᓄᖅᑲᓚᐅᕐᒪᑦ.
Currently Selected:
ᒨᓯᓯ ᓯᑕᒪᖏᑦ 16: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
