ᒨᓯᓯ ᓯᑕᒪᖏᑦ 15
15
ᐱᖁᔧᑦ ᑐᓂᕐᕈᓯᕐᓂᖅ ᐱᓪᓗᒍ
1ᐊᑕᓂᖅ ᐅᖃᕐᐳᖅ ᒨᓯᓯᒧᑦ, ᐅᖃᕐᓗᓂ, 2“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ ᐃᒫᒃ ᐅᖃᕐᕕᒋᓗᒋᑦ: ᓄᓇᒧᑦ ᑎᑭᒃᑯᑦᓯ ᓄᓇᒋᓂᐊᕐᑕᑦᓯᓐᓄᑦ, ᐃᓕᑦᓯᓐᓄᑦ ᑐᓂᓂᐊᕐᑕᓐᓄᑦ, 3ᐃᑯᐊᓚᑎᑦᓯᓂᒃᑯᑦ ᑐᓂᕐᕈᓯᓕᕈᑦᓯ ᐊᑕᓂᕐᒧᑦ, ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕈᑦᓯ, ᐅᕝᕙᓘᓐᓃᑦ ᐆᒫᔪᕕᓂᕐᒥᒃ ᑐᓂᕐᕈᓯᕈᑦᓯ, ᐊᖏᕈᑎᓯ ᐃᓗᐃᑦᑑᓕᖁᓪᓗᒍ, ᐅᕝᕙᓘᓐᓃᑦ ᑐᓂᕐᕈᓯᕈᒪᓂᑐᐃᓐᓇᕐᒧᑦ, ᓇᓪᓕᐅᓐᓂᕐᓯᐅᕐᕕᑦᓯᓐᓂᓘᓐᓃᑦ, ᑎᐱᑦᓯᐊᕆᒃᑐᒥᒃ ᐊᑕᓂᕐᒧᑦ ᑐᓂᓯᔪᒪᒍᑦᓯ, ᐃᒻᒧᒃᓯᐅᒐᖁᑎᑦᓯᓐᓂᒡᓘᓐᓃᑦ ᓰᐱᖁᑎᑦᓯᓐᓂᒡᓘᓐᓃᑦ. 4ᓇᓪᓕᐊᑦ ᑐᓂᕐᕈᓯᕐᑐᖅ ᐊᑕᓂᕐᒧᑦ ᐱᖃᓯᐅᑦᔨᔭᕆᐊᖃᕐᐳᖅ ᑐᓂᕐᕈᑎᒃᓴᒥᒃ ᓂᐊᖂᔭᒃᓴᒥᒃ ᐆᒃᑑᑦ ᐄᕙ 1/10ᒥᒃ ᓂᐊᖂᔭᒃᓴᖅ ᓯᖃᓕᓯᒪᑦᓯᐊᕐᓗᒍ ᐊᑯᓯᒪᓗᒍ ᐅᕐᓱᒥᒃ ᐆᒃᑑᑦ 1/4ᕼᐃᓐᒥᒃ; 5ᐊᒻᒪᓗ ᕔᓂᒥᒃ ᐆᒃᑑᑦ 1/4ᕼᐃᓐᒥᒃ ᐃᒥᒐᒃᓴᒥᒃ ᑐᓂᕐᕈᑎᒃᓴᒥᒃ ᐃᓚᓕᐅᑎᓗᒋᑦ ᑐᓂᕐᕈᑎᒃᓴᒧᑦ ᐆᑕᒃᓴᒧᑦ, ᐆᒪᔪᕕᓂᕐᓄᓪᓘᓐᓃᑦ ᓰᐱᐅᑉ ᓄᕐᕋᖏᓐᓄᑦ ᐊᑐᓂᑦ. 6ᓰᐱᐅᓪᓕ ᐊᖑᓴᓪᓗᖓᓂᒃ ᑐᓂᕐᕈᓯᕐᓂᐊᕈᑦᓯ, ᓂᐊᖂᔭᒃᓴᒥᒃ ᐆᒃᑑᑦ 2/10ᐄᕙᒥᒃ, ᐃᓚᓗᒍ ᐅᕐᓱᒥᒃ ᐆᒃᑑᑦ 1/3ᕼᐃᓐᒥᒃ; 7ᐃᒥᒐᒃᓴᒥᒡᓕ ᐃᓚᓗᒍ ᕔᓂᒥᒃ ᐆᒃᑑᑦ 1/3ᕼᐃᓐᒥᒃ ᑎᐱᑦᓯᐊᕆᒃᑑᓗᓂ ᐊᑕᓂᕐᒧᒃ ᑐᓂᕐᕈᑕᐅᖁᓪᓗᒍ. 8ᑐᓂᕐᕈᓯᕐᓂᐊᕈᑦᓯᓕ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐃᓐᓇᐅᖏᑦᑐᒥᒃ ᐆᑕᒃᓴᒥᒃ, ᐃᓚᔭᕆᐊᖃᕐᐳᖅ, ᐊᖏᕈᑎᒧᓪᓘᓐᓃᑦ ᑐᓂᕐᕈᑎᒋᓂᐊᕐᓗᒍ, ᓮᒻᒪᕐᑎᑕᐅᓂᕐᒧᓪᓗᓐᓃᑦ ᑐᓂᕐᕈᑎᒋᓗᒍ ᐊᑕᓂᕐᒧᑦ, 9ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᑐᓂᕐᕈᑕᐅᔭᕆᐊᖃᕐᐳᖅ ᐃᓚᖃᕐᓗᓂ ᓂᐊᖂᔭᒃᓴᒥᒃ ᐆᒃᑑᑦ 3/10ᐄᕙᒥᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᐃᓚᖃᕐᓗᒍ ᐅᕐᓱᒥᒃ ᐆᒃᑑᑦ 1/2ᕼᐃᓐᒥᒃ: 10ᐃᒥᒐᒃᓴᒥᒃ ᐃᓚᖃᕆᐊᖃᕐᐳᖅ ᕔᓂᒥᒃ ᐆᒃᑑᑦ 1/2ᕼᐃᓐᒥᒃ, ᐃᑯᐊᓚᑎᓪᓗᒍ ᑐᓂᕐᕈᑎᒃᓴᐅᖁᓪᓗᒍ, ᑎᐱᑦᓯᐊᕆᒃᑑᓗᓂ ᐊᑕᓂᕐᒧᑦ.
11“ᑍᒫᒃ ᐱᔭᕆᐊᖃᕐᐳᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖏᓐᓄᑦ, ᓰᐱᐅᓪᓗ ᐊᖑᓴᓪᓗᖏᓐᓄᑦ, ᓰᐱᐅᓪᓗ ᓄᕐᕋᖏᓐᓄᑦ, ᒎᑦᓯᓪᓗ ᓄᕐᕋᖏᓐᓄᑦ. 12ᑐᓂᕐᕈᑎᒃᓮᑦ ᐊᑐᐃᓐᓇᕈᕐᑕᓯ ᐅᓄᕐᓂᖏᑦ ᒪᓕᒡᓗᒋᑦ, ᑍᒫᒃ ᐱᖃᑦᑕᕐᓂᐊᕐᐳᓯ ᑐᓂᕐᕈᓯᕐᓂᐊᕐᑐᓕᒫᓄᑦ ᐅᓄᕐᓂᖏᑦ ᒪᓕᒡᓗᒋᑦ. 13ᑖᕙᓂ ᐃᓅᔪᑦ ᑕᒪᒃᑯᓂᖓ ᑍᒫᒃ ᐱᔭᕆᐊᖃᕐᐳᑦ, ᑐᓂᕐᕈᓯᕐᓂᐊᕈᑎᒃ ᐃᑯᐊᓚᑎᑕᒃᓴᒥᒃ, ᐊᑕᓂᕐᒧᑦ ᑎᐱᑦᓯᐊᕆᒃᑐᒥᒃ. 14ᓄᓇᐅᑉ ᐊᓯᐊᓂᑦ ᐱᓯᒪᔪᒥᒃ ᐃᓕᑦᓯᓐᓃᑦᑐᖃᕐᐸᑦ, ᐃᓕᑦᓯᓐᓃᑐᖃᕐᐸᓪᓘᓐᓃᑦ ᐃᓅᖃᑎᒋᔭᑦᓯᓐᓂᒃ, ᑐᓂᕐᕈᓯᕈᒪᒃᐸᑦ ᐃᑯᐊᓚᑎᑕᒃᓴᒥᒃ, ᐊᑕᓂᕐᒧᑦ ᑎᐱᑦᓯᐊᕆᒃᑐᒥᒃ, ᐃᓕᑦᓯᑎᑐᑦ, ᑍᒫᒃ ᐱᔭᕆᐊᖃᕐᐳᖅ. 15ᒪᓕᒐᖃᕐᓂᐊᕐᐳᓯ ᐃᓕᑦᓯᓐᓄᑦ ᑲᑎᒪᔪᕐᔪᐊᓄᑦ ᓄᓇᐅᓪᓗ ᐊᓯᐊᓂᑦ ᐱᓯᒪᔪᓄᑦ, ᑍᒪᓐᖓᓕᒫᖅ ᒪᓕᒐᕆᓂᐊᕐᑕᓯ ᑭᖑᕚᕇᓂᑦ ᑭᖑᕚᕇᓄᑦ; ᐃᓕᑦᓯ ᑍᒤᑦᓴᕆᐊᖃᕐᓂᐊᕋᑦᓯ, ᑍᒫᒃᑕᐅᖅ ᓄᓇᐅᑉ ᐊᓯᐊᓂᑦ ᐱᓯᒪᔪ ᐱᔭᕆᐊᖃᕆᕗᑦ ᐊᑕᓂᐅᑉ ᓵᖓᓂ. 16#ᒨᓯᓯ ᐱᖓᔪᖏᑦ 24:22.ᐱᖁᔭᖅ ᐊᑕᐅᓯᖅ ᐱᐅᓯᕐᓗ ᐊᑕᐅᓯᖅ ᐃᓕᑦᓯ ᒪᓕᒋᐊᖃᕐᐸᓯ ᓄᓇᖃᑎᒋᓐᖏᑕᓯᓗ ᐃᓕᑦᓯᓐᓃᑦᑐᑦ ᑍᒫᑦᓮᓐᓇᖅ.”
17ᐊᒻᒪ ᐊᑕᓂᖅ ᐅᖃᕆᕗᖅ ᒨᓯᓯᒧᑦ, ᐅᖃᕐᓗᓂ, 18“ᐃᓴᕆᐊᓕᒥᐅᑦ ᐅᖃᕐᕕᒋᒃᑭᑦ, ᐃᒤᓕᓗᒋᑦ: ᓄᓇᒧᑦ ᑎᑭᒃᑯᑦᓯ ᐃᓕᑦᓯᓐᓄᑦ ᑐᓂᓂᐊᕐᑕᓐᓄᑦ, 19ᓄᓇᒥᑦ ᐱᔪᒥᒃ ᓂᐊᖂᔭᒥᒃ ᓂᕆᔭᕌᖓᑦᓯ, ᐃᓵᒃᑕᕈᑎᒋᓗᒍ ᑐᓂᕐᕈᑎᒋᔭᒃᓴᕆᕙᓯ ᐊᑕᓂᕐᒧᑦ. 20ᓂᐊᖂᔭᒥᒃ ᐆᓯᒪᔪᒥᒃ ᓯᖃᓪᓕᔭᕕᑦ ᓯᕗᓪᓕᕐᐹᖓᓂᒃ ᑐᓂᕐᕈᓯᕆᐊᖃᕐᐳᓯ ᐃᓵᒃᑕᕈᑎᒋᓗᒍ; ᓂᐊᖂᔭᒃᓴᓂᒃ ᐃᕖᔧᕕᖕᒥᑦ ᐱᔪᒥᒃ ᐃᓵᒃᑕᕈᑎᒋᓗᒍ, ᑍᒫᒃ ᖁᒻᒧᑦ ᑐᓂᕐᕈᑎᒋᔭᕆᐊᖃᕐᐸᑦ. 21ᓯᕗᓪᓕᕐᐹᖅ ᓂᐊᖂᔭᒃᓴᖅ ᓯᖃᓪᓕᔧᑦ ᐊᑕᓂᕐᒧᑦ ᑐᓂᕐᕈᑎᒋᔭᕆᐊᖃᕐᐸᑦ ᐃᓵᒃᑕᕈᑎᒋᓗᒍ ᑭᖑᕚᑦᓯᓐᓄᑦ ᑍᒤᓕᐅᕐᓗᓯ.”
ᐱᖁᔧᑦ ᐱᔮᕆᓇᓂ ᐱᐅᖏᑦᑐᓕᓂᖅ ᐱᓪᓗᒍ
22“ᐱᔮᕆᖏᓪᓗᓯ ᐱᐅᖏᑦᑐᓕᒍᑦᓯ, ᐱᖁᔧᓪᓗ ᒪᓕᖏᓪᓗᒋᑦ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᑦ ᒨᓯᓯᒧᑦ, 23ᐊᑕᓂᐅᑉ ᐱᖁᓚᐅᕐᑕᓕᒫᖏᑦ ᒨᓯᓯᑯᑦ, ᑍᒪᓐᖓᑦ ᐅᓪᓗᒥᑦ ᐱᖁᔭᓕᐅᕐᕕᒋᓚᐅᕐᑕᖓᓂᑦ ᑭᖑᓕᕇᑦ ᑭᖑᕚᕇᑦ ᑎᑭᓪᓗᒋᑦ, 24ᑕᕝᕙ ᐃᒤᒃᑲᔭᕐᐳᖅ, ᒪᓕᒃᑕᐅᖏᑉᐸᑕ ᐱᔮᕆᖏᑦᑐᒧᑦ, ᐃᓅᖃᑎᒌᒡᔪᐊᑦ ᖃᐅᔨᑎᓐᓇᒋᑦ, ᐃᓅᖃᑎᒌᒡᔪᐊᑦ ᑐᓂᕐᕈᓯᕋᔭᕐᐳᑦ ᐃᒻᒧᒃᓯᐅᒐᕐᒥᒃ ᐊᖑᓴᓪᓗᕐᒥᒃ ᐃᑯᐊᓚᑎᑕᒃᓴᒥᒃ, ᐊᑕᓂᕐᒧᑦ ᑎᐱᑦᓯᐊᕆᒃᑐᒥᒃ, ᓂᐊᖂᔭᒃᓴᒥᒃ ᐃᓚᖃᕐᓗᒍ, ᐃᒥᒃᓴᒥᒡᓗ ᑐᓂᕐᕈᑎᒃᓴᒥᒃ, ᑐᓂᕐᕈᑎᒃᓴᐅᑉ ᒪᓕᒐᖓ ᒪᓕᒡᓗᒍ, ᒎᑦᓯᐅᓪᓗ ᓄᕐᕋᖓᓂᒃ ᐊᑕᐅᓯᕐᒥᒃ. 25ᑍᒫᒃ ᑐᓂᕐᕈᓯᕐᑎᑦᓯᔨ ᐃᓅᖃᑎᒌᒡᔪᐊᓂᒃ ᐃᓴᕆᐊᓕᒥᐅᓂᒃ ᐃᓱᒪᒋᔪᓐᓁᕐᕕᐅᑎᑦᓯᒐᔭᕐᐳᖅ, ᑖᒃᑯᐊ ᐃᓱᒪᒋᔪᓐᓁᕐᕕᐅᒐᔭᕐᐳᑦ ᐲᔮᕆᓂᐅᖏᒻᒪᑦ; ᑐᓂᕐᕈᑎᒃᓴᒥᒃ ᓇᒃᓴᕐᓗᑎᒃ, ᑐᓂᕐᕈᑎᒃᓴᒥᒃ ᐃᑯᐊᓚᑎᑕᒃᓴᒥᒃ ᐊᑕᓂᕐᒧᑦ, ᐊᔪᕐᑐᓕᓂᖅ ᐱᑦᔪᑎᒋᓗᒍ ᐊᑕᓂᐅᑉ ᓵᖓᓂ, ᐱᔮᕆᓇᑎᒃ ᐊᔪᕐᑐᓕᓂᖏᓐᓄᑦ. 26ᐃᓴᕆᐊᓕᒥᐅᑦ ᐃᓅᖃᑎᒌᒡᔪᐊᓕᒫᑦ ᐃᓱᒪᒋᔪᓐᓁᕐᕕᐅᒐᔭᕐᐳᑦ ᐃᓄᐃᓪᓗ ᐊᓯᐊᓂᑦ ᐱᓯᒪᔪᑦ ᓄᓇᖃᑎᒋᔭᖏᑦ, ᐃᓄᐃᑦ ᐱᔮᕆᓇᑎᒃ ᐊᔪᕐᑐᓕᓚᐅᕐᓂᖏᓐᓄᑦ. 27#ᒨᓯᓯ ᐱᖓᔪᖏᑦ 4:27-31.ᐃᓄᒡᓕ ᐊᑕᐅᓯᖅ ᐱᔮᕆᓇᓂ ᐱᐅᖏᑦᑐᓕᒃᐸᑦ, ᒎᑦᓯᒥᒃ ᐊᕐᓇᓪᓗᖕᒥᒃ ᐊᕐᕌᒍᖃᕐᑐᒥᒃ ᐊᑕᐅᓯᕐᒥᒃ ᐊᔪᕐᓂᖅ ᐱᑦᔪᑎᒋᓗᒍ ᑐᓂᕐᕈᓯᕐᑐᒃᓴᐅᕗᖅ. 28ᑐᓂᕐᕈᓯᕐᑎᑦᓯᔨᐅᑉ ᐃᓱᒪᒋᔪᓐᓁᕐᕕᐅᑎᒃᒐᔭᕐᐹ ᐃᓄᒃ ᐱᔮᕆᓇᓂ ᐊᔪᕐᑐᓕᓚᐅᕐᑐᖅ, ᐱᔮᕆᓇᓂ ᐊᔪᕐᑐᓕᓚᐅᕐᐸᑦ ᐊᑕᓂᐅᑉ ᓵᖓᓂ, ᐃᓱᒪᒋᔪᓐᓁᕐᕕᐅᖁᓪᓗᒍ; ᑕᕝᕙ ᐃᓱᒪᒋᔪᓐᓁᕐᕕᐅᓂᐊᕐᐳᖅ. 29ᐊᑕᐅᓯᕐᒥᒃ ᐱᖁᔭᖃᕐᓂᐊᕐᐳᓯ ᐱᔮᕆᓇᓂ ᐊᔪᕐᑐᓕᔪᒧᑦ, ᐃᓴᕆᐊᓕᒥᐅᓂ ᓄᓇᖃᖃᑕᐅᓗᓂ ᐃᓅᓚᐅᕐᑐᒧᑦ ᐊᓯᓂᓪᓗ ᓄᓇᒥᑦ ᐱᓯᒪᓗᓂ ᑖᒃᑯᓇᓂ ᓄᓇᖃᖃᑕᐅᔪᓄᑦ.”
ᐱᔮᕆᓗᓂ ᐊᔪᕐᑐᓕᓂᖅ ᐱᓪᓗᒍ ᐱᖁᔭᖅ
30“ᐱᔮᕆᓗᓂᓕ ᐊᔪᕐᑐᓕᔪᖅ, ᐃᓴᕆᐊᓕᒥᐅᓂ ᐃᓅᓯᒪᒐᓗᐊᕈᓂ, ᓄᓇᐅᓪᓗ ᐊᓯᐊᓂᑦ ᐱᓯᒪᒐᓗᐊᕈᓂ, ᐊᑕᓂᕐᒥᒃ ᓇᕐᕈᓇᕐᑎᑦᓯᕗᖅ, ᑖᓐᓇ ᐃᓅᖃᑎᒥᓂᑦ ᐊᕕᑕᐅᔭᕆᐊᖃᕐᐳᖅ. 31ᐊᑕᓂᐅᑉ ᐅᖃᐅᓯᖓᓂᒃ ᓇᕐᕈᖕᒪᑦ, ᐱᖁᔭᖓᓂᒡᓗ ᓯᖁᒥᑦᓯᓪᓗᓂ, ᑖᓐᓇ ᐊᕕᑕᐅᒻᒪᕆᒋᐊᖃᕐᐳᖅ; ᐸᓯᔭᒃᓴᐅᓐᓚᕆᖕᒪᑦ.”
ᓴᐸᑎᒥᒃ ᓯᖁᒥᑦᓯᔫᑉ ᓱᒋᐊᕐᑕᐅᑦᔪᑎᒃᓴᖏᑦ
32ᐃᓴᕆᐊᓕᒥᐅᑦ ᐃᓄᖃᖏᑦᑐᒦᑎᓪᓗᒋᑦ, ᑕᑯᓚᐅᕐᐳᑦ ᐊᖑᒻᒥᒃ ᕿᔪᖕᓂᒃ ᓄᐊᑦᓯᔪᒥᒃ ᐅᓪᓗᖅ ᓴᐸᑎᐅᑎᓪᓗᒍ. 33ᑖᒃᑯᐊᓗ ᑕᑯᔪᑦ ᕿᔪᖕᓂᒃ ᓄᐊᑦᓯᔪᒥᒃ, ᒨᓯᓯᒧᐊᕈᑎᕚᑦ ᐂᕉᓂᒧᓪᓗ, ᑲᑎᒪᔪᕐᔪᐊᓄᓪᓗ ᐃᓴᕆᐊᓕᒥᐅᓄᑦ. 34ᖃᐅᔨᓴᕐᑕᐅᕕᖕᒨᕈᑎᕚᑦ, ᖃᓄᐃᓕᐅᕐᑕᐅᔭᕆᐊᖃᕐᒪᖔᑦ ᐅᖃᐅᓯᐅᓯᒪᖏᓐᓂᖓ ᐱᓪᓗᒍ. 35ᐊᑕᓂᐅᓪᓕ ᒨᓯᓯ ᐅᖃᐅᑎᕚ, “ᐊᖑᑦ ᑖᓐᓇ ᑐᖁᑕᐅᔭᕆᐊᖃᓪᓚᕆᒃᐳᖅ; ᐃᓅᖃᑎᒌᒡᔪᐊᑦ ᑕᖕᒫᕐᓯᒪᕕᐅᑉ ᓯᓚᑖᓂ ᐅᔭᕋᖕᓄᑦ ᒥᓪᓗᕐᑕᒃᓴᕆᕚᑦ.” 36ᑍᒫᒃ ᐊᑕᓂᐅᑉ ᒨᓯᓯ ᐱᖁᖕᒪᒍ, ᐃᓅᖃᑎᒌᒡᔪᐊᑦ ᑕᖕᒫᕐᓯᒪᔪᑦ ᓯᓚᑖᓅᕐᑎᑉᐹᑦ ᐅᔭᖅᑲᓄᓪᓗ ᒥᓪᓗᕐᓗᒍ, ᑐᖁᑉᐹᑦ.
ᒪᓕᒊᑦ ᓂᒃᔧᑦ (ᖀᕆᓕᑍᑦ) ᐱᓪᓗᒋᑦ
37ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ, 38#ᒨᓯᓯ ᑕᓪᓕᒪᖏᑦ 22:12.“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ: ᓂᒡᔭᓕᐅᖁᓗᒋᑦ#15:38 ᓂᒡᔧᑦ ᑐᑭᓕᒃ ᖀᕆᓕᑍᑦ ᐊᓐᓄᕌᖏᑕ ᑎᕆᖅᑯᐊᒍᑦ ᑭᖑᕚᕇᓄᑦ ᑍᒪᓐᖓᓕᒫᖅ ᒪᓕᒃᑕᐅᓂᐊᕐᑐᒥᒃ, ᐃᕙᓗᒥᒃ ᑐᖑᔪᕐᑐᒥᒃ ᓂᒡᔭᖃᖁᓪᓗᒋᑦ ᑎᕆᖅᑯᖏᑎᒍᑦ. 39ᓂᒡᔭᖃᕐᓂᐊᕐᐳᓯᓗ, ᑕᑯᔭᕌᖓᑦᓯᐅᒃ ᐃᖅᑲᐅᒪᑦᔪᑎᒋᓂᐊᕋᑦᓯᐅᒃ ᐊᑕᓂᐅᑉ ᐱᖁᔭᖏᓐᓂᒃ ᒪᓕᒡᓗᒋᓪᓗ, ᐆᒻᒪᑎᑦᓯ ᐃᔨᓯᓗ ᐃᒃᓕᒎᕐᓂᖏᓐᓄᑦ ᐊᓯᓐᓂᐊᕈᒪᓂᕐᒧᓪᓗ ᐊᐅᓚᑕᐅᖁᓇᒋᑦ. 40ᐃᖅᑲᐅᒪᖁᓪᓗᓯ ᐱᖁᔭᓕᒫᓐᓂᒡᓗ ᒪᓕᖁᓪᓗᓯ, ᐃᑦᔪᕐᓁᑦᑑᖁᓪᓗᓯᓗ ᒎᑎᓯ ᐱᓪᓗᒍ. 41ᐅᕙᖓ ᐊᑕᓂᐅᒐᒪ ᒎᑎᓯ, ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᐸᑦᓯ, ᐃᓕᑦᓯᓐᓄᑦ ᒎᑎᒋᔭᐅᔪᒪᓪᓗᖓ: ᐅᕙᖓ ᐊᑕᓂᐅᒐᒪ ᒎᑎᓯ.”
Currently Selected:
ᒨᓯᓯ ᓯᑕᒪᖏᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
