ᒨᓯᓯ ᓯᑕᒪᖏᑦ 17
17
ᐂᕉᓂᐅᑉ ᐊᔭᐅᑉᐱᐊᖓ
1ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐅᖃᕐᓗᓂ: 2“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐊᔭᐅᑉᐱᐊᒥᒃ ᓯᕗᓕᖏᑕ ᐊᔭᐅᑉᐱᐊᖓᓂᒃ ᐊᑕᐅᓯᕐᒥᒃ ᐊᑐᓂᑦ ᐱᖁᓪᓗᒋᑦ, ᓯᕗᓕᕐᑏᑦ ᑭᖑᕚᖑᖃᑎᒌᓂᑦ ᐊᑐᓂᑦ 12ᓂᒃ. ᐊᖑᑎᐅᑉ ᐊᑎᖓ ᐊᔭᐅᑉᐱᐊᕐᒥ ᑎᑎᕋᕐᓯᒪᓗᓂ. 3ᐂᕉᓂᐅᑉ ᐊᑎᖓ ᑎᑎᕋᕐᓗᒍ ᓕᕔᑉ ᐊᔭᐅᑉᐱᐊᖓᓂ. ᑭᖑᕚᖑᖃᑎᒌᑦ ᐊᑐᓂᑦ ᐊᑕᐅᓯᕐᒥᒃ ᐱᓂᐊᕐᒪᑕ. 4ᐃᓕᓂᐊᕐᐸᓯᓗ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐃᒃᓯᕐᕕᐅᑉ ᐊᖏᕈᑎᑕᓕᐅᑉ ᓵᖓᓂ, ᑕᕝᕙᓂ ᑲᑎᓂᐊᕋᑦᓯ. 5ᐃᒤᓐᓂᐊᕐᐳᖅ ᐊᖑᑎᐅᑉ ᓂᕈᐊᕐᑕᒪ ᐊᔭᐅᑉᐱᐊᖓ ᐱᕈᕐᕕᐅᓂᐊᕐᐳᖅ; ᑍᒫᒃ ᐃᓴᕆᐊᓕᒥᐅᑦ ᐅᕙᓐᓂᒃ ᓈᒻᒪᒃᓴᖏᓪᓗᑎᒃ ᓂᓪᓕᐊᓂᖏᑦ ᓄᖅᑲᕐᑎᓐᓂᐊᕐᐸᒃᑲ, ᐃᓕᖕᓂᒃ ᐊᑭᕋᕐᑐᕐᑐᑦ.”
6ᑍᒫᒃ ᒨᓯᓯᐅᑉ ᐃᓴᕆᐊᓕᒥᐅᑦ ᐅᖃᕐᕕᒋᓚᐅᕐᐰᑦ, ᓯᕗᓕᕐᑎᖏᑕ ᐊᑐᓂᑦ ᐊᔭᐅᑉᐱᐊᕐᒥᒃ ᑐᓂᓯᕕᒋᕚᑦ, ᓯᕗᓕᕐᑏᑦ ᐊᑐᓂᑦ ᓯᕗᓕᕕᓂᕐᑎᒃ ᒪᓕᒡᓗᒋᑦ, 12ᓂᒃ ᐊᔭᐅᑉᐱᐊᓂᒃ; ᐂᕉᓂᐅᑉ ᐊᔭᐅᑉᐱᐊᖓ ᐃᓚᒋᔭᐅᓚᐅᕐᐳᖅ. 7ᒨᓯᓯᐅᑉ ᐊᔭᐅᑉᐱᐊᑦ ᐃᓕᕔᑦ ᐊᑕᓂᐅᑉ ᓵᖓᓂ ᑐᐱᕐᔪᐊᒥ ᓇᓗᓁᕐᓯᕕᖕᒥ.
8 #
ᐄᑉᕈᐃᓄᑦ 9:4. ᑕᕝᕙ ᐱᔪᖃᓚᐅᕐᐳᖅ ᖃᐅᑎᓪᓗᒍ, ᒨᓯᓯ ᑐᐱᕐᔪᐊᒧᑦ ᐂᒐᒥ ᓇᓗᓁᕐᓯᕕᖕᒧᑦ, ᑕᑯᕗᕐᓗ, ᐂᕉᓂᐅᑉ ᓕᕔᒃᑯᑦ ᑭᖑᕚᖓᑕ ᐊᔭᐅᑉᐱᐊᖓ ᐱᕈᕐᕕᐅᓕᕐᑐᖅ ᖃᖅᑯᐊᒐᓂᒡᓗ ᐋᓪᒪᓐᓂᒃ ᐊᑎᖃᕐᑐᓂᒃ ᓄᑖᓂᒃ ᐱᕈᕐᕕᐅᔪᖅ. 9ᑕᕝᕙ ᒨᓯᓯᐅᑉ ᐊᔭᐅᑉᐱᐊᓕᒫᑦ ᐊᓐᓂᓯᕔᑦ ᐊᑕᓂᐅᑉ ᓵᖓᓂᑦ ᐃᓴᕆᐊᓕᒥᐅᓕᒫᓄᑦ; ᕿᒥᕐᕈᐊᓕᕐᓗᑎᒡᓗ ᐊᖑᑎᑦ ᐊᑐᓂᑦ ᐊᔭᐅᑉᐱᐊᑎᒃ ᑎᒍᕔᑦ. 10ᐊᑕᓂᐅᓪᓗ ᒨᓯᓯ ᐅᖃᐅᑎᕚ, “ᐂᕉᓂᐅᑉ ᐊᔭᐅᑉᐱᐊᖓ ᐃᒃᓯᕐᕕᐅᑉ ᐊᖏᕈᑎᑕᓕᐅᑉ ᓵᖓᓄᑦ ᐅᑎᕐᑎᒍᒃ, ᑕᕝᕙᓂ ᐃᓂᖃᓕᖁᓪᓗᒍ ᐊᑭᕋᕐᑐᓚᐅᕐᑐᓄᑦ ᓇᓗᓁᒃᑯᑕᐅᖁᓪᓗᒍ, ᐅᕙᓐᓂᒃ ᐊᑭᕋᕐᑐᕐᓂᖏᑦ ᐃᓱᓕᑎᑕᐅᖁᓪᓗᒋᑦ, ᑐᖁᖁᓇᒋᑦ.” 11ᒨᓯᓯ ᑍᒤᓕᐅᓚᐅᕐᐳᖅ; ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ.
12ᑕᕝᕙ ᐃᓴᕆᐊᓕᒥᐅᑦ ᒨᓯᓯᒧᑦ ᐅᖃᓕᕐᐳᑦ, ᐅᖃᕐᓗᑎᒃ, “ᓱᓕᔪᒥᒃ ᑐᖁᓂᐊᓕᕐᐳᒍᑦ, ᐊᓯᐅᓂᐊᓕᕐᐳᒍᑦ, ᑕᒪᑦᑕ ᐊᓯᐅᓂᐊᓕᕐᐳᒍᑦ! 13ᓇᓪᓕᐊᓪᓘᓐᓃᑦ ᐊᑕᓂᐅᑉ ᑐᐱᕐᔪᐊᖓᓄᑦ ᖃᒡᓕᔪᖅ ᑐᖁᔪᒃᓴᐅᖕᒪᑦ. ᑕᕝᕙᓖ ᑐᖁᔪᐃᓐᓇᐅᓂᐊᓕᕐᐱᑕ?”
Currently Selected:
ᒨᓯᓯ ᓯᑕᒪᖏᑦ 17: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
