ᓂᕼᐃᒤᐊᐅᑉ ᐊᒡᓚᖏᑦ 5
5
ᐊᔪᕐᓴᕐᑐᑦ ᐅᖁᒤᒃᓴᕐᓂᖏᑦ
1ᑕᒪᑐᒪ ᑭᖑᓂᐊᒍᑦ ᐃᓄᐃᑦ ᐅᓄᕐᑐᑦ, ᐊᖑᑎᓪᓗ ᐊᕐᓁᓪᓗ ᓈᒻᒪᒃᓴᓐᖏᕙᓪᓛᓕᓚᐅᕐᐳᑦ ᔫᑎᐅᖃᑎᒥᖕᓄᑦ. 2ᐃᓚᖏᑦ ᐅᖃᓚᐅᕐᒪᑕ, “ᐃᓚᒌᑎᒍᑦ ᐃᓄᒋᐊᒻᒪᕆᐊᓘᒐᑦᑕ, ᓂᐊᖂᔭᒃᓴᖃᕆᐊᖃᕐᐳᒍᑦ ᓂᕆᖃᑦᑕᕐᓗᑕ ᑭᓯᐊᓂ ᐃᓅᔪᓐᓇᕋᑦᑕ.”
3ᐊᓯᖏᑦᑕᐅᖅ ᐅᖃᕐᐳᑦ, “ᐊᑐᕐᑐᐊᕐᑎᑦᓯᔭᕆᐊᖃᓕᕐᐳᒍᑦ ᐱᕈᕐᓰᕕᑦᑎᓐᓂᒃ ᕔᓂᓕᐅᕐᕕᑦᑎᓐᓂᒡᓗ, ᐃᒡᓗᑦᑎᓐᓂᒡᓗ ᓂᐊᖂᔭᒃᓴᕐᑖᕈᓐᓇᖁᓪᓗᑕ ᐱᕐᓕᖁᓇᑕᓗ.”
4ᐊᓯᖏᑦᑕᐅᖅ ᐅᖃᕆᕗᑦ, “ᐊᑐᕐᑐᐊᕆᐊᖃᓚᐅᕐᐳᒍᑦ ᑮᓇᐅᔭᓂᒃ ᐊᑭᓖᖁᓪᓗᑕ ᐊᖓᔪᖅᑳᕐᔪᐊᕐᒧᑦ ᐊᑭᓕᕆᐊᖃᕐᑕᑦᑎᓐᓂᒃ ᑖᒃᓯᓂᒃ ᐱᕈᕐᓰᕕᖁᑎᑦᑎᓐᓄᑦ ᕔᓂᓕᐊᑦᑎᓐᓄᓪᓗ. 5ᐃᓅᖃᑎᒌᒃᑲᓗᐊᕐᑐᒍᑦ ᔫᑎᐅᖃᑎᒋᒐᑦᑎᒍ, ᕿᑐᕐᖓᕗᑦ ᑍᒃᑯᑎᑐᓇᖅ ᕿᑐᕐᖓᖏᑎᑐᑦ ᐱᐅᔫᑎᒋᓐᖏᓛᑦ? ᐸᓂᑦᑕ ᐃᓚᖏᑦ ᐊᒡᓛᑦ ᓂᐅᕐᕈᑎᐅᓯᒪᕗᑦ ᐱᔨᑲᑖᖑᓂᐊᓕᕐᓗᑎᒃ. ᐊᔪᓕᕐᐳᒍᑦ ᐱᕈᕐᓰᕕᖁᑎᕗᑦ ᕔᓂᓕᐅᕐᕕᒃᐳᓪᓗ ᑎᒍᔭᐅᓯᒪᓕᕐᒪᑕ.”
6ᐊᒃᓱᐊᓗᒃ ᓂᓐᖓᓚᐅᕐᐳᖓ, ᓈᒻᒪᒃᓴᖏᓐᓂᖏᑦ ᐅᖃᐅᓯᕆᔭᖏᓪᓗ ᑐᓴᕋᒃᑭᑦ. 7#ᒨᓯᓯ ᐂᑉᐸᖏᑦ 22:25; ᒨᓯᓯ ᐱᖓᔪᖏᑦ 25:35-37; ᒨᓯᓯ ᑕᓪᓕᒪᖏᑦ 23:19,20.ᐃᓱᒪᒃᓴᕐᓯᐅᕈᑎᒋᒻᒪᕆᓚᐅᕐᓗᒍ ᑕᒪᓐᓇ, ᓯᕗᓕᕐᑏᑦ ᐊᖓᔪᖅᑳᓪᓗ ᐃᓄᖕᓄᑦ ᓱᐊᓚᐅᕐᐸᒃᑲ ᐃᓄᐃᑦ ᓯᕗᕌᓂ ᐅᖃᐅᑎᓪᓗᒋᓪᓗ, “ᖃᑕᓐᖑᑎᓯ ᐅᖁᒤᒃᓴᕐᑎᓕᕋᑦᓯᐅᒃ!”
ᐃᓄᓕᒫᓂᒃ ᑲᑎᒪᑎᑦᓯᓕᓚᐅᕐᐳᖓ ᑕᒪᓐᓇ ᐃᓱᐃᓪᓕᐅᕈᑎᐅᔪᖅ ᐱᓪᓗᒍ. 8ᐅᖃᐅᑎᓕᓚᐅᕐᐸᒃᑲᓗ, “ᐱᔪᓐᓇᕐᓂᓕᒫᑦᑎᓐᓄᑦ, ᔫᑎᐅᖃᑎᕗᑦ ᐅᑎᕐᑎᓐᓇᓱᓚᐅᕐᐸᕗᑦ ᓂᐅᕕᐊᕆᓪᓗᒋᑦ ᐃᓅᖃᑎᒌᒡᔪᐊᓂᑦ, ᐃᒻᒥᖕᓂᒃ ᓂᐅᕐᕈᑎᒋᕙᓕᕐᓂᕐᒪᑕ ᔫᑎᐅᖏᑦᑐᓄᑦ, ᒫᓐᓇᓗ ᖃᑕᓐᖑᑎᓯ ᓇᖕᒥᓂᖅ ᓂᐅᕐᕈᑎᒋᓕᕆᕗᑦ ᐃᓕᑦᓯᓐᓄᑦ, ᔫᑎᐅᖃᑎᓯ!” ᓯᕗᓕᕐᑏᑦ ᓂᓪᓕᕐᑐᖃᓚᐅᓐᖏᓚᑦ ᐅᖃᐅᓯᒃᓴᖃᕋᑎᒡᓗ.
9ᑕᕝᕙ ᐅᖃᒃᑲᓐᓂᓕᕐᐳᖓ, “ᐱᓂᐊᕐᓂᕆᔭᑦᓯ ᐱᐅᓐᖏᓚᖅ! ᒎᑎᒥᒃ ᐃᒃᐱᒍᓱᑦᓯᐊᕆᐊᖃᕐᐳᓯ ᐱᐅᔪᒥᒡᓗ ᐱᓇᓱᐊᕐᓗᓯ, ᐊᑭᕋᕐᑐᕐᑎᕗᓪᓗ ᔫᑎᐅᖏᑦᑐᑦ ᐃᓅᖃᑎᒌᒡᔪᐊᑦ ᐱᑦᔪᑎᒃᓴᕐᑖᕐᑎᑕᒃᓴᕆᓐᖏᓚᕗᑦ ᐊᑭᕋᕐᑐᕈᑎᒃᓴᒥᒃ. 10ᐃᓄᐃᑦ ᑮᓇᐅᔭᓂᒃ ᐊᑐᕐᑐᐊᕐᑎᓚᐅᕐᐸᒃᑲ ᓂᐊᖂᔭᒃᓴᓂᒡᓗ, ᐱᖃᑎᒋᔭᒃᑲᓗ ᐱᓇᓱᐊᖃᑎᒋᔭᒃᑲᓗ ᑍᒫᑦᓮᓐᓇᖅ ᐱᓇᓱᐊᕆᕗᑦ, ᒫᓐᓇᓕ ᐊᑭᓕᒃᓴᖃᕐᕕᐅᓂᕗᑦ ᐊᑭᓖᒋᐊᓖᓪᓗ ᓄᖅᑲᕐᑎᓕᕐᓚᕗᑦ. 11ᐅᓪᓗᒥ ᒫᓐᓇ ᐊᑭᓕᒃᓴᖏᑦ ᓄᖑᑎᓕᕐᓚᕗᑦ, ᑮᓇᐅᔭᐅᒃᐸᑕ, ᓂᐊᖂᔭᒃᓴᐅᒃᐸᑕ, ᕔᓂᐅᒃᐸᑕ, ᐸᐅᕐᖓᐅᓪᓘᓐᓃᑦ ᐅᕐᓱᖏᑦ, ᐱᕈᕐᓰᕕᖁᑎᖏᓪᓗ, ᕔᓂᓕᐅᕐᕕᖏᓪᓗ, ᐅᕐᓱᒃᓴᓕᖁᑎᖏᓪᓗ ᐃᒡᓗᖏᓪᓗ ᒫᓐᓇ ᐅᑎᕐᑎᑕᐅᓕᕐᓕᑦ!”
12ᑕᕝᕙ ᓯᕗᓕᕐᑏᑦ ᑭᐅᕗᑦ, “ᐱᓇᓱᐊᕐᓂᐊᕐᐳᒍᑦ ᐅᖃᐅᓯᕆᔭᓕᒫᑎᑦ ᐊᑐᕐᓗᒋᑦ, ᐱᖁᑎᖏᓐᓂᒃ ᐅᑎᕐᑎᑦᓯᕕᒋᓂᐊᕐᐸᕗᑦ, ᐊᑭᓕᒃᓴᖏᓐᓂᒡᓗ ᐊᑭᓖᑎᑦᓯᓇᓱᐊᕐᓂᐊᓐᖏᓚᒍᑦ.”
ᑕᕝᕙ ᑐᓂᕐᕈᓯᕐᑎᑦᓯᔩᑦ ᕾᖁᓚᐅᕐᐸᒃᑲ, ᓯᕗᓕᕐᑏᓪᓗ ᐊᖏᒻᒪᕆᒍᑎᖃᕐᑎᓚᐅᕐᐸᒃᑲ ᑖᒃᑯᐊ ᓵᖏᓐᓂ, ᐊᖏᕈᑎᒋᔭᒥᖕᓂᒃ ᑲᔪᓯᑦᓯᐊᖁᓪᓗᒋᑦ. 13ᐅᓕᒡᔪᐊᒪᓗ ᕿᑎᕈᑎᖓ ᐊᑐᕐᑕᕋ ᐃᑦᓱᒃᑐᕐᓗᒍ, ᐅᖃᕐᐳᖓ, “ᑍᒫᑦᓮᓐᓇᖅ ᒎᑎᐅᑉ ᐃᑦᓱᒃᑐᕐᓂᐊᕐᐹᓯ; ᐃᒡᓗᑦᓯᓐᓂᓗ ᓱᓇᑐᐃᓐᓇᑦᓯᓐᓂᒃ ᓇᖕᒥᓂᑦᓯᓐᓂᒃ ᐊᕐᓵᕐᓂᐊᕐᐹᓯ, ᓱᓇᒥᒡᓘᓐᓃᑦ ᕿᒤᕕᒋᓂᐊᓐᖏᓛᓯ ᐊᖏᕈᑎᒋᔭᑦᓯᓐᓂᒃ ᑲᔪᓯᓐᖏᑐᐊᕈᑦᓯ!”
ᐃᓘᓐᓇᑎᒃ ᑲᑎᒪᔪᑦ ᐅᖃᕐᐳᑦ, “ᐋᒦᓐ!” ᐊᑕᓂᖅ ᓂᕐᑐᕐᑕᐅᓕ, ᓯᕗᓕᕐᑏᑦ ᑲᔪᓯᓚᐅᕐᒪᑕ ᐊᖏᕈᑎᒋᓚᐅᕐᑕᒥᖕᓂᒃ.
ᓂᕼᐃᒤᐊᐅᑉ ᓇᖕᒥᓂᕐᓱᑐᐃᓐᓇᖏᓐᓂᖓ
14ᐊᕐᕌᒍᓂᒃ 12ᓂᒃ ᐊᐅᓚᑦᓯᔨᐅᑎᑕᐅᑎᓪᓗᖓ ᔫᑕᐅᑉ ᓄᓇᖓᓂ, ᐋᕐᑕᔮᒃᓯᐅᑉ ᐊᖓᔪᖅᑳᕐᔪᐊᖑᓂᖓᓂ ᐊᕐᕌᒍᒥ 20ᒥᑦ ᐱᒋᐊᕐᓗᓂ 32ᒧᑦ ᑎᑭᓪᓗᒍ, ᐅᕙᖓᓘᓐᓃᑦ ᐃᓚᒃᑲᓘᓐᓃᑦ ᓂᕆᓚᐅᓐᖏᓚᒍᑦ ᓂᕿᒋᔭᕆᐊᖃᕐᑕᑦᑎᓐᓂᒃ ᐊᐅᓚᑦᓯᔨᐅᓂᓐᓄᑦ ᑐᕌᖓᔪᓂᒃ. 15ᐊᐅᓚᑦᓯᔨᐅᓚᐅᕐᑐᑦ ᐃᓘᓐᓇᑎᒃ ᓯᕗᓂᓐᓂ ᐃᓄᖕᓄᑦ ᐅᖁᒤᓐᓇᕐᑑᓚᐅᕐᒪᑕ ᐊᑭᓖᖁᔨᕙᓚᐅᕐᒪᑕᓗ 40ᓂᒃ ᓯᐅᓪᕕᕆᓂᒃ, ᓂᕿᓂᒡᓗ, ᕔᓂᓂᒡᓗ, ᐱᔨᒋᔭᖏᓪᓘᓐᓃᑦ ᐅᖁᒤᒃᓴᕐᑎᑦᓯᓚᐅᕆᕗᑦ ᐃᓄᖕᓂᒃ, ᑍᒤᓕᐅᓚᐅᓐᖏᓚᖓᓕ ᒎᑎᒥᒃ ᐃᓕᕋᓱᓚᐅᕋᒪ. 16ᐱᔪᓐᓇᕐᓂᓕᒫᓐᓄᑦ ᐱᓇᓱᐊᓚᐅᕐᐳᖓ ᐋᖅᑮᕙᓪᓕᐊᓪᓗᑕ ᐊᕙᓗᕐᔪᐊᒥᒃ, ᓄᓇᒥᒡᓗ ᓇᖕᒥᓂᕐᑖᓚᐅᓐᖏᓚᒍᑦ, ᐃᓘᓐᓇᑎᒡᓗ ᐅᕙᓐᓄᑦ ᐱᓇᓱᒃᑐᑦ ᓴᓇᖃᑕᐅᓚᐅᕐᐳᑦ ᐊᕙᓗᕐᔪᐊᒥᒃ. 17ᖃᐅᑕᒫᑦ ᓂᕆᑎᑦᓯᖃᑦᑕᓚᐅᕐᐳᖓ ᐊᖏᕐᕋᓐᓂ ᔫᑎᓂᒃ 150ᓂᒃ ᐊᐅᓚᑦᓯᔨᐅᔪᓂᒡᓗ, ᐊᓯᖏᓐᓂᒡᓗ ᐃᓄᖕᓂᒃ ᐅᕙᓐᓄᑦ ᕾᓯᒪᔪᓂᒃ ᓄᓇᓂᑦ ᐃᓅᖃᑎᒌᒡᔪᐊᓂᒃ ᓇᑭᑐᐃᓐᓈᕐᓯᒪᔪᓂᒃ. 18ᖃᐅᑕᒫᑦ ᓂᕆᑎᑦᓯᖃᑦᑕᓚᐅᕐᐳᖓ ᐃᒻᒧᒃᓯᐅᒐᕐᒥᒃ ᐊᑕᐅᓯᕐᒥᒃ, ᐱᖓᓲᔪᕐᑐᓂᒃ ᓰᐱᓂᒃ ᐱᐅᓂᕐᐹᓂᒃ, ᐅᓄᕐᑐᓂᒡᓗ ᐊᑭᒡᒋᐅᔭᓂᒃ, ᐅᓪᓗᐃᓪᓗ ᖁᓕᑦ ᓈᑐᐊᕐᒪᑕ ᐊᑐᐃᓐᓇᐅᑎᑦᓯᕙᓚᐅᕐᐳᖓ ᕔᓂᒥᒃ ᓄᑖᒥᒃ, ᖃᐅᔨᒪᒐᒪ ᐃᓄᐃᑦ ᐅᖁᒤᒃᓴᕐᓂᖏᓐᓂᒃ, ᐱᔭᕆᐊᓕᒐᓗᐊᒃᑲ ᐊᐅᓚᑦᓯᔨᐅᓂᓐᓄᑦ ᐱᖃᑦᑕᓚᐅᓐᖏᓚᒃᑲ.
19ᒎᑏᒃ, ᐃᖅᑲᐅᒪᓂᐊᕐᐸᕐᒪ ᐱᑦᓯᐊᕐᓯᒪᓂᓐᓂᒃ, ᐱᓂᐊᕐᓂᕆᓯᒪᔭᓕᒫᓐᓂᒡᓗ ᐅᑯᓄᖓ ᐃᓄᖕᓄᑦ.
Currently Selected:
ᓂᕼᐃᒤᐊᐅᑉ ᐊᒡᓚᖏᑦ 5: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
