ᓂᕼᐃᒤᐊᐅᑉ ᐊᒡᓚᖏᑦ 6
6
ᓂᕼᐃᒤᐊᐅᑉ ᐊᑭᕋᕐᑐᕐᑕᐅᓂᖓ
1ᓴᓐᐸᓛᑎ, ᑐᐱᐊ, ᒋᓯᒥᓗ ᐋᕋᑉᒥᐅᑦ ᐊᑭᕋᕐᑐᕐᑎᓕᒫᕗᑦ ᑐᓴᕋᒥᒃ ᐱᔭᕇᕐᓂᑦᑎᓐᓂᒃ ᐊᕙᓗᕐᔪᐊᕐᒥᒃ, ᐊᕙᓗᖃᖏᑦᑐᖃᕈᓐᓁᕐᓂᖓᓗ (ᐃᓛᒃ ᑍᑦᓱᒪᓂᐅᑎᓪᓗᒍ ᓱᓕ ᐱᔭᕇᓚᐅᓐᖏᒃᑲᓗᐊᕐᑐᒍᑦ ᐃᑎᕐᑕᕐᕕᐅᑉ ᐅᒃᑯᐊᕐᔪᐊᖏᓐᓂᒃ), 2ᑍᒤᒻᒪᑦ ᓴᓐᐸᓛᑎᓗ ᒋᓯᒥᓗ ᐅᖃᕆᐊᕐᑐᕐᑎᑦᓯᓚᐅᕐᐴᒃ, ᐅᕙᓐᓂᒃ ᑲᑎᓯᑬᓐᓇᕈᒪᓪᓗᑎᒃ ᓄᓇᓖᑦ ᐃᓚᖓᓐᓂ ᐆᓅᒥ. ᑭᓯᐊᓂ ᓯᓔᕐᕆᒃᓯᓇᓱᐊᓚᐅᕐᐳᑦ ᐅᕙᓐᓂᒃ ᐋᓐᓂᕐᓯᔪᒪᓪᓗᑎᒃ. 3ᑎᓕᓯᓚᐅᕐᐳᖓᓕ ᐅᖃᕆᐊᕐᑐᖁᔨᓪᓗᖓ ᑖᒃᑯᓄᖓ, ᐅᖃᖁᓪᓗᒋᑦ, “ᐱᓇᓱᐊᕐᑕᕋ ᐱᒻᒪᕆᐅᖕᒪᑦ ᕾᔪᓐᓇᓐᖏᓚᖓ, ᓱᖕᒪᑦ ᐱᓇᓱᐊᕐᑕᕋ ᓄᖅᑲᐅᑎᔭᒃᓴᕆᕙᕌ ᐃᓕᖕᓂᒃ ᑕᑯᔭᕐᑐᑐᐃᓐᓇᕐᓗᖓ?”
4ᑖᒃᑯᐊᓕ ᐅᖃᕆᐊᕐᑐᕐᑎᑦᓯᖃᑦᑕᓚᐅᕐᐳᑦ ᑍᒫᑦᓮᓐᓇᖅ ᓯᑕᒪᕕᒃᓱᑎᒃ, ᑍᒪᓐᖓᓪᓗ ᑍᒫᑦᓮᓐᓇᖅ ᑭᐅᖃᑦᑕᓚᐅᕐᐸᒃᑲ.
5ᑕᕝᕙ ᑭᖑᓂᖓᒍᑦ ᓴᓐᐸᓛᑦ ᐱᔨᒥᓂᒃ ᑎᓕᓯᓚᐅᕐᐳᖅ ᑕᓪᓕᒪᒋᓕᕐᑕᖓᓂᒃ, ᑖᓐᓇᓗ ᑎᒍᒥᐊᓚᐅᕐᐳᖅ ᑎᑎᕋᕐᓯᒪᔪᓂᒃ ᓇᕿᑕᐅᓯᒪᖏᑦᑐᓂᒃ. 6ᐃᒤᓕᐅᕐᑐᓂᒃ:
“ᒋᓯᒥᐅᑉ ᐅᖃᐅᑎᓚᐅᕐᒪᖓ ᑐᓴᐅᒪᔭᐅᓕᕋᑦᓯᒎᖅ ᐃᓅᖃᑎᒌᒡᔪᐊᓄᑦ ᖃᓂᑦᑐᓃᑦᑐᓂᑦ, ᐃᓕᑦᓯ ᔫᑎᐅᔪᓯ ᒐᕙᒪᑦᓯᓐᓂᒃ ᐊᑭᕋᕐᑐᕐᓂᐅᓴᒐᑦᓯ, ᑍᒤᓐᓂᑯᖓᓄᑦ ᐊᕙᓗᕐᔪᐊᒥᒃ ᓴᓇᕗᓯ, ᐅᖃᒃᑲᓐᓂᓚᐅᕐᒪᓪᓗ ᐃᓕᖕᓂᒃ ᓇᖕᒥᓂᖅ ᐊᖓᔪᖅᑳᕐᔪᐊᓐᖑᕐᑎᓐᓂᐊᓕᕐᑐᑎᒡᒎᖅ 7ᐊᒻᒪᓗ ᐋᖅᑮᔭᕇᕐᓯᒪᔪᑎᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᒃ ᔨᕉᓴᓕᒥ ᓇᓗᓁᕐᓯᓛᖁᓪᓗᒋᑦ ᐊᖓᔪᖅᑳᕐᔪᐊᓐᖑᕐᓂᕐᓂᒃ ᔫᑕᒧᑦ. ᐊᖓᔪᖅᑳᕐᔪᐊᕗᑦ ᑕᒪᑐᒥᖓ ᑐᓴᕐᓂᐊᕐᐳᖅ. ᑍᒤᒻᒪᑦ ᑲᑎᓗᓄᒃ ᑕᒪᓐᓇ ᐅᖃᖃᑎᒌᒍᑎᒋᓚᐅᕐᓚᕗᒃ.”
8ᐊᐅᓪᓚᕐᑎᑦᓯᓚᐅᕐᐳᖓ ᑭᒡᒍᓯᓐᓂᒃ ᑖᑦᓱᒧᖓ, ᐅᖃᕐᓯᒪᔪᓂᒃ, “ᐅᖃᐅᓯᑎᑦ ᓇᓪᓕᐊᓪᓘᓐᓃᑦ ᓱᓕᔪᖃᓐᖏᓚᑦ, ᐃᕝᕕᓪᓕ ᓇᖕᒥᓂᖅ ᐃᓱᒪᖕᓂᒃ ᐋᖅᑭᒃᓯᒪᑐᐃᓐᓇᕐᐸᑦ.”
9ᑍᒃᑯᐊ ᑲᑉᐱᐊᓱᒃᑎᑦᓯᓇᓱᐊᓚᐅᕐᒪᑕ ᐅᕙᑦᑎᓐᓂᒃ ᐱᓇᓱᐊᕐᑕᑦᑎᓐᓂᒃ ᓄᖅᑲᕐᑎᑦᓯᓇᓱᐊᕐᓗᑎᒃ, ᑍᒤᒻᒪᑦ ᑐᒃᓯᐊᓕᓚᐅᕐᐳᖓ, “ᒫᓐᓇ ᒎᑏᒃ, ᓲᖑᓂᖃᕐᑎᓚᐅᓐᖓ!”
10ᑕᒪᑐᒪ ᑭᖑᓂᖓᒍᑦ ᐳᓛᕆᐊᓚᐅᕐᐳᖓ ᓯᒤᐊᒧᑦ ᑎᓔᐊᐅᑉ ᐃᕐᓂᖓᓄᑦ, ᒥᕼᐃᑕᐱᐅᓕᐅᑉ ᐃᕐᖑᑕᖓᓄᑦ, ᑖᓐᓇ ᐃᒡᓗᒥᓂᒃ ᕿᒤᔪᓐᓇᓚᐅᖏᒻᒪᑦ ᑐᓴᕐᑎᑦᓯᔨᒋᕙᒃᓗᒍᓗ; ᑖᑦᓱᒪ ᐅᖃᐅᑎᕙᖓ, “ᑲᑎᔭᕐᑐᓚᐅᕐᓗᒃ ᐊᑕᐅᑦᓯᒃᑯᑦ ᒎᑎᐅᑉ ᐃᒡᓗᖓᓂ, ᑕᕝᕙᓂᓗ ᑐᒃᓯᐊᕐᕕᒡᔪᐊᑉ ᐅᒃᑯᐊᖏᑦ ᐊᑦᓱᖏᕐᓗᒋᑦ, ᐃᓕᖕᓂᒃ ᑐᖁᑦᓯᔭᕐᑐᕈᒪᓪᓗᑎᒃ ᕾᓂᐊᕐᐳᑦ; ᐃᓛᒃ, ᐅᓐᓄᐊᖅ ᕾᓂᐊᕐᐳᑦ ᑐᖁᑦᓯᔭᕐᑐᕐᓗᑎᒃ ᐃᓕᖕᓂᒃ.”
11ᑭᐅᓚᐅᕐᐳᖓ, “ᐱᐅᓯᖃᓐᖏᓚᖓ ᕿᒫᔨᐅᓂᕐᒥᒃ ᐃᔨᕐᑎᑐᐃᓐᓇᐅᓂᕐᒥᒡᓗ, ᐃᓱᒪᕖᑦ ᓇᖕᒥᓂᖅ ᐃᓅᓯᓐᓂᒃ ᐱᐅᓕᓯᓇᓱᐊᕐᓂᐊᕐᑐᕆᓪᓗᖓ ᐃᔨᕆᐊᕐᑐᕐᓂᓐᓄᑦ ᑐᒃᓯᐊᕐᕕᒃᔪᐊᕐᒨᑦ? ᑍᒤᓐᓂᐊᓐᖏᓚᖓ.”
12ᐃᓱᒪᒋᑦᓯᐊᓕᕋᒃᑯᓕ, ᖃᐅᔨᓚᐅᕐᐳᖓ ᓯᒤᐊ ᒎᑎᐅᑉ ᐅᖃᕐᕕᒋᓚᖏᒻᒪᒍ, ᑐᐱᐊᓪᓗ ᓴᓐᐸᓛᑎᐅᓪᓗ ᑮᓇᐅᔧᕐᕕᒋᓐᓂᕐᒪᒍ ᑍᒫᒃ ᐅᖃᓪᓚᖁᓪᓗᒍ ᐅᕙᓐᓄᑦ. 13ᐊᑭᓕᓚᐅᕐᐹ ᑲᑉᐱᐊᓱᖕᓂᕐᒧᑦ ᑍᒤᓕᐅᖁᓪᓗᖓ ᐊᔪᕐᑐᓕᖁᓪᓗᖓᓗ, ᑐᓴᐅᒪᔭᐅᓂᓐᓂᒃ ᓱᒃᑯᐃᔪᒪᓪᓗᑎᒃ, ᐅᕙᓐᓄᓪᓗ ᐊᑭᕋᕐᑐᕈᑎᒃᓴᖃᕈᒪᓪᓗᑎᒃ.
14ᑐᒃᓯᐊᓚᐅᕐᐳᖓ, “ᒎᑏᒃ, ᐃᖅᑲᐅᒪᒋᑦ ᑐᐱᐊᑉ ᓴᓐᐸᓛᑎᐅᓪᓗ ᐱᓂᐊᕐᓂᕆᔭᖏᖕᓂᒃ ᓱᒋᐊᕐᓗᒋᒡᓗ, ᐃᖅᑲᐅᒪᒍᒃᑕᐅᖅ ᑍᓐᓇ ᐊᕐᓇᖅ ᓄᐊᑎᐊ ᐊᓯᖏᓪᓗ ᐱᔪᒫᕐᑐᓂᒃ ᐅᖃᕐᑎᐅᔪᑦ ᐅᕙᓐᓂᒃ ᑲᑉᐱᐊᓱᒃᑎᑦᓯᓇᓱᐊᓚᐅᕐᑐᑦ.”
ᐱᓇᓱᐊᕐᑕᐅᔪᑦ ᐱᔭᕇᕐᑕᐅᓂᖓ
15ᐅᓪᓗᓂᒃ 52ᓂᒃ ᐱᓇᓱᐊᕐᑕᐅᔪᑦ ᐊᕙᓗᕐᔪᐊᖅ ᐱᔭᕇᕐᑕᐅᓚᐅᕐᐳᖅ ᐃᓘᓐᓇᓕᒫᖓ, ᐱᔭᕇᓚᐅᕐᐳᖅ ᐅᓪᓘᑉ 25ᖓᓐᓂ ᐃᓘᑉ ᑕᖅᑭᖓᓂ. 16ᐊᑭᕋᕐᑐᕐᑎᕗᑦ ᖃᓂᒋᔭᑦᑎᓐᓃᑦᑐᑦ ᑐᓴᕋᒥᒃ ᑕᒪᑐᒥᖓ, ᐃᓅᖃᑎᒌᒡᔪᐊᓕᒫᓪᓗ ᖃᓂᒋᔮᓃᑦᑐᑦ ᑲᑉᐱᐊᓱᓕᓚᐅᕐᐳᑦ ᐃᒻᒥᖕᓂᒡᓗ ᐃᒃᐱᒋᐅᒻᒥᓕᕐᓗᑎᒃ, ᐃᓘᓐᓇᑎᒃ ᖃᐅᔨᓚᐅᕐᒪᑕ ᐱᓇᓱᐊᕐᑕᑦᑎᓐᓂᒃ ᐱᔭᕇᓚᐅᕋᑦᑕ ᒎᑎᐅᑉ ᐃᑲᔪᕐᓂᖓᒍᑦ.
17ᑍᑦᓱᒪᓂᓕᒫᖅ ᔫᑎᑦ ᓯᕗᓕᕐᑎᖏᑦ ᐅᓄᕐᑐᐃᓱᕐᓗᑎᒃ ᑎᑎᕋᖃᑦᑕᓚᐅᕐᐳᑦ ᑐᐱᐊᒧᑦ, ᑖᑦᓱᒧᖓᓗ ᑎᑎᕋᕐᕕᐅᕙᒃᓗᑎᒃ. 18ᐃᓄᐃᑦ ᐅᓄᕐᑐᑦ ᔫᑕᒥᐅᑦ ᐃᑲᔪᕐᑐᓚᐅᕐᐳᑦ ᑖᑦᓱᒥᖓ ᔫᑎᒥᒃ ᓴᑭᖃᕐᓂᖓ ᐱᑦᔪᑎᒋᓪᓗᒍ, ᓯᑲᓁᐊ ᐊᕋᐅᑉ ᐃᕐᓂᖓᓂᒃ, ᑖᑦᓱᒪᓗ ᐃᕐᓂᖓ ᔨᕼᐅᕼᐊᓇᓐ ᓄᓕᐊᓂᓚᐅᕐᒪᑦ ᒥᓱᓚᒻᒥᒃ, ᐱᕆᑬᐊᐅᑉ ᐃᕐᓂᖓᑕ ᐸᓂᖓᓂᒃ. 19ᐃᓄᐃᓪᓗ ᐅᕙᓐᓄᑦ ᐅᖃᖃᑦᑕᓚᐅᕐᐳᑦ ᑐᐱᐊᑉ ᐱᑦᓯᐊᕐᓂᖓᓂᒃ, ᐅᖃᐅᑦᔭᐅᕙᒃᓗᓂᓗ ᐅᖃᐅᓯᕆᔭᕕᓂᓐᓂᒃ. ᑎᑎᕋᕐᕕᒋᖃᑦᑍᓐᓇᓚᐅᕐᐹᖓᓗ ᑲᑉᐱᐊᓱᒃᑎᑦᓱᒪᓪᓗᖓ.
Currently Selected:
ᓂᕼᐃᒤᐊᐅᑉ ᐊᒡᓚᖏᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
