ᓂᕼᐃᒤᐊᐅᑉ ᐊᒡᓚᖏᑦ 4
4
ᓂᕼᐃᒤᐊᐅᑉ ᐊᑭᕋᕐᑐᕐᑎᒥᓂᒃ ᓵᓚᖃᕐᓂᖓ ᓴᓇᑎᓪᓗᒍ
1ᓴᓐᐸᓛᑎᓕ ᑐᓴᕋᒥ ᔫᑎᐅᔪᒍᑦ ᓴᓇᓕᕐᓂᑦᑎᓐᓂᒃ ᐊᕙᓗᕐᔪᐊᒥᒃ, ᓂᓐᖓᐅᒪᓕᓚᐅᕐᐳᖅ ᐱᐅᒃᓴᕈᓐᓁᕐᓗᓂᓗ ᐅᕙᑦᑎᓐᓂᒃ. 2ᐱᖃᑎᒋᔭᓂ ᓴᒥᐊᕆᐊᒥᐅᓪᓗ ᐅᓇᑕᕐᑐᒃᓴᖁᑎᖏᑕ ᓵᖓᓂ ᐅᖃᓚᐅᕐᐳᖅ, “ᖃᓄᕐᖏᒃᑯᐊ ᔫᑎᕐᓗᐊᓗᐃᑦ ᐱᓇᓱᓕᕐᑐᑦ? ᐃᒃᑯᐊ ᓴᓇᒋᐊᓪᓚᒐᓱᒃᑐᑦ ᐃᒡᓗᒐᓴᖕᓃᒃ? ᐃᒃᑯᐊ ᑐᓂᕐᕈᓯᖃᑦᑕᕐᓂᕐᒥᒍᑦ ᐱᔭᕇᕐᓂᐊᕋᓱᒋᔫᑦ ᓴᓇᔭᒥᖕᓂᒃ ᐅᓪᓗᒥᒃ ᐊᑕᐅᓯᕐᒥᒃ? ᐅᔭᕋᖕᓂᒃ ᓴᓇᔪᓐᓇᕐᐹᑦ ᓱᕋᒃᑎᕐᓯᒪᔪᓂᒃ ᐃᑯᐊᓪᓚᒃᓯᒪᔪᓂᒡᓗ ᖃᓕᕇᕌᓗᖕᓂᒃ?”
3ᑐᐱᐊᓕ ᐊᒧᓁᑎᒥᐅᖅ ᓇᖏᕐᐳᖅ ᑖᑦᓱᒪ ᓴᓂᐊᓂ, ᐅᖃᕐᓗᓂᓗ, “ᖃᓄᐃᑦᑐᒥᒃ ᐊᑭᓐᓇᓕᐅᕈᓐᓇᕐᐹᑦ? ᓴᓇᔭᖏᑦ ᑎᕆᒐᓂᐊᒧᓪᓘᓐᓃᑦ ᒪᔪᕐᕕᐅᒍᑎᒃ ᐅᕐᕈᑎᑕᐅᔪᓐᓇᕐᑐᑦ!”
4ᑐᒃᓯᐊᓚᐅᕐᐳᖓ, “ᑐᓵᓚᐅᕆᑦ ᐅᕙᑦᑎᓐᓂᒃ ᒥᑕᐅᑎᖃᕐᑎᓪᓗᒋᑦ, ᒎᑏᒃ! ᐱᑦᓯᐊᖏᓐᓂᖏᑦ ᐃᒻᒥᖕᓄᑦ ᑲᑕᓚᐅᕐᓕ ᓂᐊᖁᖏᓐᓄᑦ, ᑎᒡᓕᒡᕕᐅᓚᐅᕐᓕᓪᓗ ᐱᖁᑎᖏᓐᓂᒃ ᐃᓘᓐᓇᖏᓐᓂᒃ, ᑎᒍᔭᐅᒪᔪᑎᑐᓪᓗ ᑎᒍᔭᐅᓚᐅᕐᓕ ᓄᓇᒋᓐᖏᑕᒥᖕᓄᑦ. 5ᐃᓱᒪᒋᔪᓐᓁᕐᕕᒋᑦᑍᓕᒃᑭᑦ ᐳᐃᒍᕐᑍᓕᒃᑭᓪᓗ ᐊᔪᕐᑐᓕᓂᖏᓐᓂᒃ, ᑍᒃᑯᐊ ᐅᕙᑦᑎᓐᓂᒃ ᓇᕐᕈᓇᕐᓯᑎᑦᓯᖕᒪᑕ ᓴᓇᓂᑦᑎᓐᓂᒃ ᐃᓕᖕᓂᒡᓗ ᓂᓐᖓᒃᓮᓪᓗᑎᒃ.”
6ᑲᔪᓯᓚᐅᕐᐳᒍᓪᓕ ᓴᓇᔭᑦᑎᓐᓂᒃ ᐊᕙᓗᕐᔪᐊᕐᒥᒃ, ᐊᑯᓂᐅᓗᐊᖏᑦᑐᕐᓗ ᐊᕝᕙᕈᓚᐅᕐᐹᑦ ᐳᕐᑐᓂᖓ, ᐃᓄᐃᑦ ᑲᑦᓱᖎᒻᒪᕆᓚᐅᕐᒪᑕ ᓴᓇᔭᒥᖕᓂᒃ.
7ᓴᓐᐸᓛᑎᓕ, ᑐᐱᐊᓗ ᐃᓄᐃᓪᓗ ᐋᕋᑉᒥᐅᑦ, ᐊᒧᓁᑎᒥᐅᑦ ᐋᔅᑖᑦᒥᐅᓪᓗ ᑐᓴᕋᒥᒃ ᐱᕙᓪᓕᐊᓂᑦᑎᓐᓂᒃ ᐊᕙᓗᕐᔪᐊᓪᓗ ᐱᔭᕇᕐᐸᓪᓕᐊᓂᖓᓂᒃ ᔨᕉᓴᓕᐅᑉ ᐊᕙᓗᕐᔪᐊᖓᑕ, ᓯᖁᒥᓯᒪᓂᖏᓪᓗ ᐊᕙᓗᕐᔪᐊᒦᑦᑐᑦ ᒪᑐᔭᐅᕙᓪᓕᐊᓂᖏᓐᓂᒃ, ᑖᒃᑯᐊ ᓂᓐᖓᐅᒪᒻᒪᕆᓕᓚᐅᕐᐳᑦ. 8ᐊᓱᐃᓛᒃ ᐃᓱᒪᖃᑎᒌᓚᐅᕐᐳᑦ ᑲᑎᓪᓗᑎᒡᓗ ᔨᕉᓴᓕᒥᒃ ᐅᓇᑕᕆᐊᕈᒪᓪᓗᑎᒃ ᓇᓗᓕᕐᑎᑦᓯᔪᒪᓪᓗᑎᒡᓗ, 9ᑐᒃᓯᐊᓚᐅᕐᐳᒍᓪᓕ ᒎᑎᒧᑦ ᓇᐅᑦᓯᕐᑐᕐᑎᕾᓐᓇᓕᕐᓗᑕᓗ ᐅᓪᓗᒃᑯᑦ ᐅᓐᓄᒃᑯᓪᓗ.
10ᔫᑕᐅᑉ ᐃᓄᖏᑦ ᐃᓐᖏᐅᑎᖃᓚᐅᕐᐳᑦ ᐃᓐᖏᕐᐸᒃᑕᒥᖕᓂᒃ:
“ᓴᓐᖐᓕᕗᒍᑦ ᐅᖁᒤᒃᓴᕐᓂᕐᒧᑦ;
ᐅᔭᕅᑦ ᖃᓕᕇᒃᑐᑦ ᐅᓄᓗᐊᓕᕐᒪᑕ,
ᖃᓄᕐᓕ ᐊᕙᓗᕐᔪᐊᓕᐅᕐᓂᐊᕐᐱᑖ ᐅᓪᓗᒥ?”
11ᐊᑭᕋᕗᑦ ᐃᓱᒪᓚᐅᕐᒪᑕ ᑕᑯᓂᐊᕐᑐᒋᒃᓯᓇᑎᒃ ᖃᐅᔨᒪᓇᓱᒋᒃᓯᒐᑎᒡᓗ, ᕾᒐᒥᒃ ᑭᓯᐊᓂ ᖃᐅᔨᓚᐅᕐᐳᑦ, ᑐᖁᑦᓯᒋᐊᕐᑐᓕᕋᒥᒃ ᐱᓇᓱᐊᕐᑕᑦᑎᓐᓂᒡᓗ ᓄᖅᑲᕐᑎᑦᓯᒋᐊᕐᑐᓕᕋᒥᒃ. 12ᑭᓯᐊᓂᓕ ᑍᒪᓐᖓᑦ ᔫᑎᓂᑦ ᖃᓂᒋᔮᓂ ᓄᓇᖃᖃᑕᐅᔪᓂᑦ ᐊᑭᕋᑦᑎᓐᓄᑦ ᐅᖃᐅᑦᔭᐅᒋᐊᕐᑐᖃᑦᑕᓚᐅᕐᐳᒍᑦ, ᐊᑭᕋᑦᑕᓗ ᐅᕙᑦᑎᓐᓄᑦ ᐱᓇᓱᐊᓕᕐᑕᖏᓐᓂᒃ. 13ᑍᒤᒻᒪᑦ ᐃᓄᐃᑦ ᓴᕕᒃᔪᐊᕐᑖᕐᑎᓚᐅᕐᐸᒃᑲ, ᖃᓗᒋᐊᓂᒡᓗ, ᐱᓯᒃᓯᓂᒡᓗ, ᖃᐅᔨᓴᕐᐸᒃᓗᑎᒡᓗ, ᐊᕙᓗᕐᔪᐊᒥ ᐊᒃᐸᓯᖕᓂᕐᓴᒥ ᐊᕙᓗᕐᔪᐊᖃᖏᓐᓂᖓᓂᓗ, ᐃᓚᒌᑦ ᒪᓕᒡᓗᒋᑦ ᐊᕙᓗᕐᔪᐊᑉ ᓴᓂᐊᓂ ᐱᔭᕇᕐᓯᒪᖏᑦᑐᓂ.
14ᑕᑯᓚᐅᕐᐳᖓᓕ ᐃᓄᖕᓂᒃ ᐃᓱᒪᔮᕐᑐᓂᒃ, ᑍᒤᒻᒪᑦ ᓯᕗᓕᕐᑎᖏᑦ ᐅᖃᐅᑎᓚᐅᕐᐸᒃᑲ, ᐊᖓᔪᖅᑳᖏᓪᓗ, “ᑲᑉᐱᐊᓱᒃᑍᓕᒋᑦᓯ ᐊᑭᕋᑦᑎᓐᓂᒃ, ᐃᖅᑲᐅᒪᒋᑦᓯ ᖃᓄᖅ ᐊᑕᓂᖅ ᐊᔪᖏᑦᑐᕐᔪᐊᖑᓂᖓᓂᒃ ᐊᖏᔪᕐᔪᐊᖑᓂᖓᓂᒡᓗ, ᓴᐳᓐᓂᐊᕐᓂᐊᕐᐳᕐᓗ, ᐃᓚᑦᓯᓐᓂᒃ, ᓄᓇᖅᑲᑎᑦᓯᓐᓂᒃ, ᕿᑐᕐᖓᑦᓯᓐᓂᒃ, ᓄᓕᐊᑦᓯᓐᓂᒃ, ᐊᖏᕐᕋᓯᓗ ᐱᓪᓗᒋᑦ.” 15ᐊᑭᕋᕗᓪᓕ ᑐᓴᕋᒥᒃ ᖃᐅᔨᒪᓕᕐᓂᑦᑎᓐᓂᒃ ᐊᑭᕋᕐᑐᕋᓱᖕᓂᖏᓐᓂᒃ, ᖃᐅᔨᓪᓗᑎᒡᓗ ᐋᖅᑭᒃᓱᕐᓯᒪᓇᓱᒃᑕᖏᑦ ᒎᑎᐅᑉ ᓵᓚᒋᖕᒪᒋᑦ, ᐃᓘᓐᓇᑕᓗ ᓴᓇᔭᑦᑎᓐᓄᑦ ᐅᑎᕐᓂᑦᑎᓐᓂᒃ ᓴᓇᒋᐊᓪᓚᓕᕐᓂᑦᑎᓐᓂᒡᓗ ᐊᕙᓗᕐᔪᐊᕐᒥᒃ.
16ᑍᒃᑲᓐᖓᓂᑦ ᐱᒋᐊᕐᓗᒍ ᐃᓄᐃᑦ ᐊᕝᕙᖏᑦ ᓴᓇᖃᑦᑕᓕᓚᐅᕐᐳᑦ, ᐊᕝᕙᖏᓪᓗ ᖃᐅᔨᓴᕐᑎᐅᓪᓗᑎᒃ, ᐅᓕᒡᔪᐊᖃᓚᐅᕐᐳᑦ ᓴᐴᓗᑕᖃᕐᓗᑎᒡᓗ ᐅᓇᑕᐅᑎᖃᕐᓗᑎᒡᓗ ᖃᓗᒋᐊᓂᒃ, ᓴᐴᓗᑕᕐᓂᒃ, ᐱᓯᒃᓯᓂᒡᓗ. ᓯᕗᓕᕐᑎᕗᓪᓗ ᐃᑲᔪᕐᑐᑦᓯᐊᓚᐅᕐᐳᑦ ᐃᓄᖕᓂᒃ. 17ᐊᕙᓗᕐᔪᐊᒥᒃ ᓴᓇᔪᓂᒃ, ᑍᒃᑯᐊᑦᑕᐅᖅ ᐃᓚᒃᓴᓂᒃ ᐊᒡᔭᕐᑐᕐᑏᑦ ᐱᓇᓱᐊᓚᐅᕐᐳᑦ ᐊᒡᒐᖕᒥ ᐃᒡᓗᐊᓄᑦ, ᐃᒡᓗᐊᓄᓪᓗ ᓱᒋᐅᓯᔭᕐᓗᑎᒃ. 18ᓴᓇᔪᓕᒫᑦ ᕿᑎᕐᒥᐅᑕᖃᓚᐅᕐᐳᑦ ᓴᕕᒡᔪᐊᒥᒃ. ᐊᖑᓪᓗ ᑎᑦᑐᓚᐅᑎᒥᒃ ᓂᓪᓕᕐᑎᑦᓯᒍᒫᕐᓂᐊᕐᑐᖅ ᐅᕙᓐᓃᖏᓐᓇᓚᐅᕐᐳᖅ. 19ᑕᕝᕙ ᐃᓄᐃᑦ ᐊᖓᔪᖅᑳᖏᑦ, ᓯᕗᓕᕐᑎᖏᓪᓗ ᐅᖃᐅᑎᓚᐅᕐᐸᒃᑲ, “ᐱᓇᓱᐊᕐᑐᑦ ᓯᐊᒻᒪᕐᓯᒪᓗᐊᕐᒪᑕ ᐅᖓᓯᒌᓗᐊᕐᓗᑎᒡᓗ ᐊᕙᓗᕐᔪᐊᓕᐅᕐᑕᒥᖕᓂ. 20ᖃᖓᑐᐃᓐᓇᑦᓯᐊᖅ ᑎᑦᑐᓚᐅᒻᒥᒃ ᑐᓴᑐᐊᕈᑦᓯ ᕾᓛᕐᐳᓯ, ᒎᑎᕗᑦ ᐅᓇᑕᕐᓂᐊᕐᒪᑦ ᐅᕙᒍᑦ ᐱᓪᓗᑕ.” 21ᑍᒤᒻᒪᑦ ᖃᐅᑕᒫᑦ, ᐅᓪᓛᒻᒪᕆᖕᒥᑦ ᐱᒋᐊᕐᓗᑕ ᐅᓐᓄᒧᑦ ᐅᓪᓗᕆᐊᑦ ᓄᐃᖕᒪᑕ ᑭᓯᐊᓂ ᓄᖅᑲᕐᐸᒃᓗᑕ ᐱᓇᓱᐊᖃᑦᑕᓚᐅᕐᐳᒍᑦ, ᐊᕝᕙᖏᑦ ᐱᓇᓱᐊᕐᐳᑦ ᐊᕙᓗᕐᔪᐊᓕᕆᓪᓗᑎᒃ, ᐊᕝᕙᖏᑕ ᐂᑉᐸᖏᑦ ᖃᐅᔨᓴᕐᑎᐅᑎᓪᓗᒋᑦ ᖃᓗᒋᐊᖃᕐᓗᑎᒃ.
22ᑍᑦᓱᒪᓂᐅᑎᓪᓗᒍ ᐊᖑᑎᑦ ᑲᒪᔨᐅᔪᑦ ᐃᑲᔪᕐᑎᓕᒫᖏᓪᓗ ᔨᕉᓴᓕᒦᖏᓐᓇᖁᓪᓗᒋᑦ ᐅᓐᓄᒃᑯᑦ ᐅᖃᐅᑎᓚᐅᕆᕙᒃᑲ, ᐃᒡᓗᒐᓮᓪᓗ ᖃᐅᔨᓴᕐᑎᕾᓐᓇᑯᓪᓗᒋᑦ ᐅᓐᓄᒃᑯᑦ ᐅᓪᓗᒃᑯᓪᓗ ᐱᓇᓱᐊᕈᓐᓇᖁᓪᓗᒋᑦ ᑍᒤᓚᐅᕐᐳᒍᑦ. 23ᐊᓐᓄᕌᒃᑲᓘᓐᓃᑦ ᐅᓐᓄᒃᑯᑦ ᐲᖃᑦᑕᕈᓐᓁᓚᐅᕐᐸᒃᑲ, ᐃᓚᒋᔭᒃᑲᓗ, ᐱᔨᒋᔭᒃᑲᓘᓐᓃᑦ ᖃᐅᔨᓴᕐᑎᖁᑎᒃᑲᓘᓐᓃᑦ ᐅᕙᓐᓂᒃ ᒪᓕᑐᐃᓐᓇᓚᐅᕐᐳᑦ, ᑭᓯᐊᓂ ᐅᐊᓴᕆᐊᖃᓕᕌᖓᑕ ᐲᖃᑦᑕᕋᓗᐊᕐᓗᑎᒍ, ᐅᓇᑕᐅᑎᓂᒃ ᓇᔪᕐᑎᕾᓐᓇᓕᓚᐅᕋᑦᑕ.
Currently Selected:
ᓂᕼᐃᒤᐊᐅᑉ ᐊᒡᓚᖏᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
