ᒫᑯᓯᐅᑉ ᐊᒡᓚᖏᑦ 8
8
ᔩᓱᓯᐅᑉ ᓂᕆᑎᑦᓯᓂᖓ ᐃᓄᖕᓂᒃ 4,000ᓂᒃ
ᒫᑎᐅᓯ 15:32-39
1ᐅᓪᓗᓂ ᑍᒃᑯᓇᓂ, ᐃᓄᒐᓴᒡᔪᐊᑦ ᑲᑎᒪᓕᕆᕗᑦ, ᑖᒃᑯᐊ ᓂᕆᔭᒃᓴᖃᖏᒻᒪᑕ, ᐃᓕᓐᓂᐊᕐᑎᓂ ᕾᖁᕔᑦ ᐅᖃᐅᑎᓪᓗᒋᑦ, 2“ᐅᑯᐊ ᐃᓄᒐᓴᒡᔪᐊᑦ ᐃᓚᑦᓱᒋᕙᒃᑲ, ᐅᕙᑦᑎᓐᓃᓕᕐᒪᑕ ᐅᓪᓗᓂᒃ ᐱᖓᓱᓂᒃ, ᓂᕿᒃᓴᖃᕋᑎᒃ; 3ᐊᖏᕐᕋᖁᒍᒃᑭᑦ ᓱᓇᒥᒡ ᓂᕆᑎᓐᓇᒋᑦ, ᐊᖏᕐᕋᐅᓕᕐᓗᑎᒃ ᓄᑮᕈᑎᓂᐊᕐᐳᑦ; ᐃᓚᖏᑦ ᐅᖓᓯᒃᑐᒥᑦ ᐱᓯᒪᖕᒪᑕ.”
4ᐃᓕᓐᓂᐊᕐᑎᖏᑕ ᑭᐅᕚᑦ, “ᖃᓄᖅ ᑕᒫᓂ ᓱᓇᖃᔪᐃᑦᑐᒥᑦ ᐅᑯᐊ ᐃᓄᒐᓴᐃᑦ ᓂᕆᔭᒃᓴᕐᑖᕋᔭᕐᐹᑦ?”
5ᔩᓱᓯᐅᑉ ᐊᐱᕆᕔᑦ, “ᖃᑦᓯᓂᒃ ᓂᐊᖂᔭᖃᕐᐱᓰ?”
ᑖᒃᑯᐊ ᐅᖃᕐᐳᑦ, “7ᓂᒃ.”
6ᔩᓱᓯᐅᑉ ᐃᓄᒐᓴᒡᔪᐊᑦ ᓄᓇᒧᑦ ᐃᖏᖁᕔᑦ; ᓂᐊᖂᔧᑦ 7 ᑎᒍᕔᑦ, ᖁᔭᓕᔭᕇᕋᒥᓗ ᐊᕕᒡᓗᒋᑦ ᐃᓕᓐᓂᐊᕐᑎᒥᓄᑦ ᑐᓂᕔᑦ ᐃᓄᒐᓴᒡᔪᐊᓄᑦ ᑐᓂᐅᖅᑬᖁᓪᓗᒋᑦ; ᑕᕝᕙ ᐃᓕᓐᓂᐊᕐᑎᖏᑦ ᑍᒤᓕᐅᕐᐳᑦ. 7ᐃᖃᓗᑯᓗᖕᓂᒃᑕᐅᖅ ᐅᓄᖏᑦᑐᓂᒃ ᐱᑕᖃᕆᕗᑦ; ᖁᔭᓕᑦᔪᑎᒋᔭᕇᕋᒥᒋᑦ, ᐃᓕᓐᓂᐊᕐᑎᓂ ᐃᓄᖕᓄᑦ ᑐᓂᐅᖅᑬᖁᒋᕔᑦ. 8ᓂᕆᕗᑦ, ᓈᒻᒪᒃᓯᓪᓗᑎᒃ; ᐃᕕᐅᔭᓂᒡᓗ 7ᓂᒃ ᑕᑍᕗᑦ ᑖᒃᑯᐊ ᐊᒥᐊᒃᑯᖏᓐᓂᒃ ᐊᒡᒍᕐᓯᒪᔪᓂᒃ. 9ᐃᓄᒐᓴᒡᔪᐊᑦ ᐅᓄᕐᓂᖃᓚᐅᕐᐳᑦ 4,000 ᖃᓂᒋᔮᓂ. 10ᔩᓱᓯᐅᑉ ᐃᓄᐃᑦ ᐊᐅᓪᓚᖁᓕᕐᐰᑦ; ᑕᕝᕔᓐᓇᕐᓗ ᐅᒥᐊᒧᑦ ᐃᑭᕗᖅ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ, ᑖᓪᒪᓅᑕᐅᑉ ᖃᓂᒋᔮᓄᐊᕐᐳᑦ.
ᐹᕆᓯᑦ ᑲᒪᓇᕐᑐᓕᖁᔨᓂᖓᑦ ᔩᓱᓯᒥᒃ
ᒫᑎᐅᓯ 16:1-4
11 #
ᒫᑎᐅᓯ 12:38; ᓘᑲᓯ 11:16. ᐹᕆᓯᑦ ᐃᓚᖏᑦ ᔩᓱᓯᒧᐊᕐᐳᑦ ᐅᖃᖃᑎᒋᓪᓗᒍ ᐆᒃᑐᕐᐹᑦ, ᕿᓚᖕᒥᑦ ᓇᓗᓁᒃᑯᑕᕐᒥᒃ ᑲᒪᓇᕐᑐᒥᒃ ᓴᖅᑭᑎᑦᓯᖁᓪᓗᒍ. 12#ᒫᑎᐅᓯ 12:39; ᓘᑲᓯ 11:29.ᔩᓱᓯᓕ ᐊᖏᔪᒥᒃ ᐊᓂᕐᓴᐅᒥᓪᓗᓂ ᐅᖃᐅᑎᕔᑦ, “ᓱᖕᒪ ᐅᓪᓗᒥᐅᓕᕐᑐᖅ ᐃᓄᐃᑦ ᑲᒪᓇᕐᑐᓕᖁᔨᕚᑦ? ᓱᓕᔪᒥᒃ ᐅᖃᐅᑎᕙᑦᓯ, ᓇᓗᓁᒃᑯᑕᕐᒥᒃ ᐅᓪᓗᒥᐅᔪᖅ ᐃᓄᐃᑦ ᑐᓂᓯᕕᐅᓂᐊᓐᖏᓚᑦ.”
13ᕿᒪᒃᐰᑦ ᑕᕝᕙ, ᐅᒥᐊᒧᑦ ᐃᑭᒋᕗᖅ ᑕᓯᐅᑉ ᐊᑭᐊᓄᐊᓕᕐᓗᓂ.
ᐹᕆᓯᑦ ᐃᕉᑕᓯᐅᓪᓗ ᐳᕙᓪᓚᖅᑯᑎᖏᑦ
ᒫᑎᐅᓯ 16:5-12
14ᐃᓕᓐᓂᐊᕐᑎᖏᑦ ᓂᐊᖂᔭᒡᒋᕆᐊᒃᓴᖅ ᐳᐃᒍᕐᑐᕕᓂᐅᖕᒪᑕ; ᐊᑕᐅᓯᕐᒥᒃ ᓂᐊᖂᔭᒥᒃ ᐱᓯᒪᒐᓗᐊᕐᐳᑦ ᑕᕝᕙᓂ ᐅᒥᐊᒥ. 15#ᓘᑲᓯ 12:1.ᖃᐅᔨᒪᓇᓱᐊᖁᓪᓗᒋᑦ ᐅᖃᐅᑎᕔᑦ, “ᑲᒪᑦᓯᐊᕆᑦᓯ, ᐅᑦᔨᕐᓱᕐᓗᓯ ᐹᕆᓯᑦ ᐃᕉᑕᓯᐅᓪᓗ ᐳᕙᓪᓚᖅᑯᑎᖏᓐᓂᒃ.”#8:15 ᐳᑦᔪᓯᐅᑎᖏᓐᓂᒃ
16ᐃᓕᓐᓂᐊᕐᑎᖏᑦ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, ᐅᖃᕐᓗᑎᒃ, “ᑍᒫᖑᓇ ᐅᖃᕐᑐᖅ ᓂᐊᖂᔭᖃᖏᓐᓂᑦᑎᓐᓄᑦ.”
17ᔩᓱᓯᐅᑉ ᖃᐅᔨᒪᒐᒥᒋᑦ, ᐅᖃᐅᑎᕔᑦ, “ᓱᖕᒪᑦ ᐃᓕᑦᓯᓐᓄᑦ ᐅᖃᖃᑎᒌᒃᐱᓰ ᓂᐊᖂᔭᖃᖏᓐᓂᑦᓯᓐᓂᒃ? ᓱᓕ ᖃᐅᔨᒪᓐᖏᓚᓰ ᐅᕝᕙᓗ ᑐᑭᓯᓐᖏᓚᓰ ᐆᒻᒪᑎᓯ ᓯᑎᔪᐊᓘᕚᑦ? 18#ᔨᕆᒤᐊ 5:21; ᐃᓯᑭᐊᓕ 12:2; ᒫᑯᓯ 4:12.ᐃᔨᖃᕐᓗᓯ ᑕᑯᔪᓐᓇᓐᖏᓚᓰ? ᓯᐅᑎᖃᕐᓗᓯᓗ ᑐᓴᕈᓐᓇᓐᖏᓚᓰ? 19ᐃᖅᑲᐅᒪᓐᖏᓚᓰ ᓂᐊᖂᔧᑦ ᑕᓪᓕᒪᑦ ᐊᒡᒍᕋᒃᑭᑦ ᐃᓄᖕᓄᑦ 5,000ᓄᑦ, ᖃᑦᓯᓂᒃ ᐃᕕᐅᔭᓂᒃ ᐊᒥᐊᒃᑯᓂᒃ ᑕᑍᓚᐅᕐᐱᓰ?” ᑖᒃᑯᐊ ᐅᖃᐅᑎᕚᑦ, “12ᓂᒃ ᑕᑍᓚᐅᕐᐳᒍᑦ.”
20“ᓂᐊᖂᔭᓂᒡᓗ 7ᓂᒃ ᐊᒡᒍᐃᒐᒪ ᐃᓄᖕᓄᑦ 4,000ᓄᑦ, ᖃᑦᓯᓂᒃ ᐃᕕᐅᔭᓂᒃ ᑕᑍᓚᐅᕐᐱᓯ ᐊᒥᐊᒃᑯᖏᓐᓂᒃ?”
ᐅᖃᐅᑎᕚᑦ, “7ᓂᒃ ᑕᑍᓚᐅᕐᐳᒍᑦ.”
21ᐅᖃᐅᑎᕔᑦ, “ᓱᓕ ᑐᑭᓯᓐᖏᓚᓰ?”
ᔩᓱᓯᐅᑉ ᑕᐅᑐᖏᑦᑐᒥᒃ ᑕᐅᑐᓕᕐᑎᑦᓯᓂᖓ ᐱᑦᓮᑕᒥ
22ᐱᑦᓮᑕᒧᑦ ᑎᑭᑉᐳᑦ, ᐃᓄᐃᑦ ᐃᓚᖏᑦ ᑕᕝᕗᓐᖓᐅᑦᔨᕗᑦ ᑕᐅᑐᖏᑦᑐᒥᒃ, ᕿᓄᕕᒋᕚᑦ ᑖᑦᓱᒥᖓ ᐊᒃᑐᕐᓯᖁᓪᓗᒍ. 23ᑕᐅᑐᖏᑦᑐᖅ ᑕᓯᐅᕐᓗᒍ ᓄᓇᓖᑦ ᓯᓚᑖᓄᐊᕈᑎᕚ; ᐃᔨᖏᒃ ᓄᕙᒥᑦᑕᓚᐅᕐᓗᒋᒃ ᐸᑎᒻᒥᓚᐅᕐᓗᒍ ᐊᐱᕆᕚ, “ᓱᓇᑐᐃᓐᓇᒥᒃ ᑕᑯᕖᑦ?”
24ᑕᑯᓇᓱᐊᕋᒥ ᐅᖃᕐᐳᖅ, “ᐃᓄᖕᓂᒃ ᑕᑯᕗᖓ; ᑭᓯᐊᓂ ᓇᐹᕐᑑᔮᕐᑐᑦ ᐱᓱᑲᑕᒃᑐᑦ.”
25ᑕᕝᕙ ᐃᔨᖏᒃ ᐊᒃᑐᒃᑲᓐᓂᕐᐹᒃ; ᑕᕝᕙ ᑕᑯᑦᓯᐊᕋᓱᐊᕋᒥ ᐃᔨᖏᒃ ᑕᐅᑐᖕᓂᕆᓚᐅᕐᑕᒥᑐᑦ ᑕᐅᑐᑦᓯᐊᓕᕐᐴᒃ, ᑕᒤᓐᓂᒃ. 26ᑕᕝᕙ ᐊᖏᕐᕋᖁᓕᕐᐹ ᐅᖃᐅᑎᓪᓗᒍᓗ, “ᓄᓇᓕᖕᓄᑦ ᑕᕝᕗᖓ ᐃᑎᕐᑍᓕᒋᑦ.”
ᐲᑦᑐᕉᓯᐅᑉ ᔩᓱᓯᒥᒃ ᓇᓗᓁᕐᓯᓂᖓ ᙭ᔅᑑᓯᐅᓂᖓᓂᒃ
ᒫᑎᐅᓯ 16:13-20; ᓘᑲᓯ 9:18-21
27ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᐊᐅᓪᓚᕐᐳᑦ, ᓄᓇᓕᖕᓄᑦ ᓯᓴᕆᐊ ᐱᓕᐰᑉ ᖃᓂᒋᔮᓄᑦ; ᐊᖅᑯᑖᓂ ᐱᓱᒃᓗᑎᒃ ᐃᓕᓐᓂᐊᕐᑎᓂ ᐊᐱᕆᕔᑦ, “ᐃᓄᐃᑦ ᑭᓇᐅᓇᓱᒋᕚᖔ?”
28 #
ᒫᑯᓯ 6:14,15; ᓘᑲᓯ 9:7,8. ᑖᒃᑯᐊ ᑭᐅᕚᑦ, “ᐃᓚᖏᑕ ᔪᐊᓇᓯ ᐹᑉᑎᑎᕆᔨᐅᓇᓱᒋᕚᑎᑦ; ᐃᓚᖏᑕᓕ ᐃᓔᑦᔭᐅᓇᓱᒋᕚᑎᑦ; ᐃᓚᖏᓐᓄᑦ ᓇᓚᐅᑦᑍᔪᓄᑦ ᐃᓚᒋᔭᐅᓇᓱᒋᔭᐅᕗᑎᑦ.”
29 #
ᔪᐊᓇᓯ 6:68,69. ᐊᐱᕆᕔᑦᓕ, “ᐃᓕᑦᓯᓕ ᑭᓇᐅᓇᓱᒋᕕᓯᓐᖔ?”
ᐲᑦᑐᕉᓯᐅᑉ ᑭᐅᕚ, “᙭ᔅᑑᓯᐅᕗᑎᑦ.”#8:29 “᙭ᔅᑑᓯ” “ᒥᓮᐊᓯ” ᐊᑦᔨᒌᖕᒪᑎᒃ ᑐᑭᖃᕐᐳᖅ ᐅᕐᓱᕐᑎᑕᐅᓯᒪᔪᖅ ᓂᕈᐊᕐᑕᐅᓯᒪᓂᕐᒥᓄᑦ
30ᔩᓱᓯᐅᑉ ᐃᓂᕐᑎᒪᕆᒃᐰᑦ ᑭᓇᑐᐃᓐᓇᕐᒧᑦ ᐅᖃᖁᓇᒋᑦ ᑭᓇᐅᓂᕐᒥᓂᒃ.
ᔩᓱᓯᐅᑉ ᐅᖃᐅᓯᖃᕐᓂᖓ ᐋᓐᓂᐊᑎᑕᐅᓂᒃᓴᒥᓂᒃ ᑐᖁᑕᐅᓂᒃᓴᒥᓂᒡᓗ
ᒫᑎᐅᓯ 16:21-28; ᓘᑲᓯ 9:22-27
31ᑕᑉᕙ ᐃᓕᓐᓂᐊᕐᑎᓂ ᐊᔪᕆᕐᑐᕐᐰᑦ ᐃᓅᑉ ᐃᕐᓂᖓ ᐋᓐᓂᐊᑎᑕᐅᔭᕆᐊᖃᕐᓂᖓᓂᒃ ᐊᖏᔪᒥᒃ, ᔪᑎᑦ ᐊᖓᔪᖅᑳᖏᓐᓄᑦ ᓇᕐᕈᒋᔭᐅᒻᒪᕆᒍᒫᕐᓂᒥᓂᒃ ᑐᓂᕐᕈᓯᕐᑎᑦᓯᔨᓪᓗ ᐊᖓᔪᖅᑳᖏᓐᓄᑦ, ᐱᖁᔭᓂᒡᓗ ᐃᓕᓮᔨᓄᑦ, ᑐᖁᑕᐅᔪᒫᕐᓂᒥᓂᒡᓗ, ᐅᓪᓗᐃᑦ ᐱᖓᔪᐊᓐᓂ ᒪᑭᑦᓱᒫᕐᓂᒥᓂᒃ. 32ᑕᒪᑐᒥᖓ ᐊᓐᖏᒍᑎᓇᒋᑦ ᐅᖃᐅᑎᕔᑦ. ᐲᑦᑐᕉᓯᐅᑉ ᓴᓂᕐᕙᖃᑎᒋᓪᓗᒍ ᐃᓂᕐᑎᒻᒪᕆᓕᕐᐹ. 33ᐃᓕᓐᓂᐊᕐᑎᒥᓄᑦ ᕿᕕᐊᕐᓗᓂ, ᐲᑦᑐᕉᓯ ᓱᐊᒃᐹ, ᐅᖃᕐᓗᓂ, “ᓵᑖᓇᓰ ᑐᓄᓐᓄᐊᕆᑦ! ᐃᓱᒪᒋᔧᑦ ᒎᑎᒥᑦ ᐱᖏᒻᒪᑦ, ᐃᓄᖕᒥᓪᓕ ᐱᕗᖅ.”
34 #
ᒫᑎᐅᓯ 10:38; ᓘᑲᓯ 14:27. ᔩᓱᓯ ᐃᓄᖕᓂᒃ ᐃᓕᓐᓂᐊᕐᑎᒥᓂᒡᓗ ᕾᖁᔨᕗᖅ ᐅᖃᐅᑎᓪᓗᒋᑦ, “ᐅᕙᓐᓂᒃ ᒪᓕᒍᒪᔪᖅ, ᐃᒻᒥᓂᒃ ᐃᓱᒪᒋᔪᒃᓴᐅᓐᖏᓚᖅ ᓴᓐᓂᖓᔪᓕᖕᒥᓂᒡᓕ ᐃᕐᓱᒡᓗᓂ ᐅᕙᓐᓂᒃ ᒪᓕᒃᑐᒃᓴᐅᕗᖅ. 35#ᒫᑎᐅᓯ 10:39; ᓘᑲᓯ 17:33; ᔪᐊᓇᓯ 12:25.ᓇᓪᓕᐊᑦ ᐃᓅᓯᕐᒥᓂᒃ ᐱᐅᓕᒃᓯᔪᒪᔪᖅ ᐊᓯᐅᔨᓂᐊᕐᐳᖅ; ᓇᓪᓕᐊᓪᓕ ᐃᓅᓯᕐᒥᓂᒃ ᐊᓯᐅᔨᔪᖅ ᐅᕙᓐᓂᒃ ᐱᑦᔪᑎᖃᕐᓗᓂ ᐅᖃᐅᓰᓪᓗ ᑐᓴᕈᒥᓇᕐᑐᑦ ᐱᑦᔪᑎᒋᓗᒋᑦ ᑖᓐᓇ ᐃᓅᓯᕐᒥᓂᒃ ᐱᐅᓕᒃᓯᓂᐊᕐᐳᖅ. 36ᐃᓄᒃ ᓱᓇᒥᒃ ᐱᕙᓪᓕᐅᑎᖃᕋᔭᕐᐹ ᓯᓚᕐᔪᐊᓕᒫᒥᒃ ᐱᖃᓕᕋᓗᐊᕈᓂ ᓇᖕᒥᓂᕐᓗ ᐃᓅᓯᕐᒥᓂᒃ ᐊᓯᐅᔨᓗᓂ? 37ᓱᓇᒥᒃ ᑐᓂᓯᔪᒃᓴᐅᕚ ᐃᓅᓯᖓᑕ ᐅᑎᕐᑎᑕᐅᑦᔪᑎᒃᓴᖓᓂᒃ? 38ᓇᓪᓕᐊᑦ ᐅᕙᓐᓂᒃ ᑲᓐᖑᓲᑎᖃᕐᐸᑦ ᐊᔪᕆᕐᑐᐃᑦᔪᑎᒋᔭᓐᓂᒡᓗ ᐅᕙᓂ ᓯᓚᕐᔪᐊᕐᒥ ᒎᑎᖃᖏᑦᑐᓂ ᐱᐅᖏᑦᑐᓕᔪᓂᓗ, ᐃᓅᑉ ᐃᕐᓂᖓᑕ ᑲᓐᖑᒋᔪᒫᕆᕚ, ᑎᑭᓕᕈᓂ ᐊᑖᑕᖓᑕ ᓂᕐᑐᕐᓇᕐᓂᕐᔪᐊᖓᓂ ᐂᖏᓖᓂ ᐃᑦᔪᕐᓁᑦᑐᑦ ᐱᖃᑎᒋᓗᒋᑦ.”
Currently Selected:
ᒫᑯᓯᐅᑉ ᐊᒡᓚᖏᑦ 8: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
