ᒫᑯᓯᐅᑉ ᐊᒡᓚᖏᑦ 7
7
ᔩᓱᓯᐅᑉ ᐊᔪᕆᕐᑐᐃᓂᖓ ᐃᓄᐃᑦ ᓯᕗᓕᕕᓂᖏᓐᓂᒃ
ᒫᑎᐅᓯ 15:1-9
1ᑕᕝᕙ ᐹᕆᓯᑦ ᑲᑎᑉᕕᒋᒪᑦᔪᒃ ᐱᖁᔭᓂᒡᓗ ᐃᓕᓮᔩᑦ ᐃᓚᖏᑦ ᔨᕉᓴᓕᒻᒥᓐᖔᕐᓯᒪᔪᑦ. 2ᑕᑯᒐᒥᒃ ᐃᓕᓐᓂᐊᕐᑎᖏᑕ ᐃᓚᖏᑦ ᓂᕆᖕᒪᑕ ᐊᒡᒐᖕᒥᖕᓂᒃ ᐅᐊᓴᕐᓯᒪᓇᑎᒃ.
3ᐹᕆᓯᑦ, ᔫᑎᓕᒫᓪᓗ, ᓂᕆᕙᖏᒻᒪᑕ ᐊᒡᒐᖕᒥᖕᓂᒃ ᐅᐊᓴᓚᐅᕋᑎᒃ ᑭᓯᐊᓂ ᐅᐊᓴᓚᐅᕐᓗᑎᒃ ᓯᕗᓕᕕᓂᖏᑕ ᐊᔪᕆᕐᑑᓯᖏᓐᓂᒃ ᒪᓕᒡᓗᑎᒃ; 4ᓂᐅᕕᕐᕕᖕᓃᑦᑐᕕᓂᐅᒍᑎᒃᓗ ᐃᒻᒥᖕᓂᒃ ᐅᐊᓴᓚᐅᖏᓪᓗᑎᒃ ᓂᕆᓯᑐᐃᓐᓇᕐᐸᖏᒻᒪᑕ; ᐊᓯᖏᓐᓂᒃ ᐊᒥᓱᓂᒃ ᐱᐅᓯᖃᕆᕗᑦ ᓯᕗᓕᕐᒥᖕᓂᑦ ᐊᔪᕆᕐᑐᕐᑕᐅᑦᔪᑎᒋᓯᒪᔭᒥᖕᓂᒃ, ᐅᐊᓴᕐᓯᔭᕆᐊᖃᕐᓗᑎᒃ ᑏᑑᑎᓂᒃ, ᓂᕿᓕᐅᕈᑎᓂᒃ, ᓴᕕᕋᔭᖕᓂᒡᓗ ᐴᒍᑕᐅᔨᖓᔪᓂᒃ.
5ᑍᒤᒻᒪᑦ ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᐊᐱᕆᕚᑦ, “ᓱᖕᒪᓄᑯᐊ ᐃᓕᓐᓂᐊᕐᑎᑎᑦ ᒪᓕᓐᖏᓚᑦ ᓯᕗᓕᑦᑕ ᐱᐅᓯᖏᓐᓂᒃ, ᐊᒡᒐᖕᒥᖕᓂᒃ ᓴᓗᒻᒤᓯᒪᓇᑎᒃ ᓂᕆᖕᒪᑕ?”
6 #
ᐂᓮᐊᓯ 29:13. ᔩᓱᓯᐅᑉ ᑭᐅᕔᑦ, “ᐂᓮᐊᓯ ᓇᓚᐅᑦᑍᓪᓗᓂ ᐅᖃᐅᓯᖃᓚᐅᕐᐳᖅ ᑕᒃᑯᕐᒨᕐᑐᓂᒃ ᐃᓕᑦᓯᓐᓂᒃ, ᑎᑎᕋᕐᓯᒪᖕᒪᑦ,
‘ᐅᑯᐊ ᐃᓄᐃᑦ ᖃᓂᕐᒥᖕᓄᑦ ᓂᕐᑐᕐᐹᖓ,
ᐆᒻᒪᑎᖏᑕᓕ ᐅᖓᓯᒋᕚᖓ;
7ᓱᓕᓇᑎᒃ ᑐᒃᓯᐊᕐᕕᒋᕚᖓ,
ᐊᔪᕆᕐᑐᐃᑦᔪᑎᖃᕋᒥᒃ ᐃᓄᐃᑦ ᐊᖅᑭᒃᑕᕕᓂᖏᓐᓂᒃ ᐅᒃᐱᕐᓂᕐᒧᑦ ᑐᓐᖓᕕᐅᓂᕋᕐᑕᒥᖕᓂᒃ.’
8“ᒎᑎᐅᑉ ᐱᖁᔭᖏᑦ ᕿᒪᒃᐸᓯ, ᐃᓄᐃᑦ ᐃᓕᖅᑯᓯᑐᐃᓐᓇᖏᑦ ᓈᓚᖔᕐᓗᒋᑦ.”
9ᐅᖃᐅᑎᒃᑲᓐᓂᕐᐰᑦ, “ᓯᓚᑐᐊᕿᓯᒪᔪᒥᒃ ᒪᓕᖏᑦᔪᑎᒃᓴᖃᕐᐸᒃᐳᓯ ᒎᑎᐅᑉ ᐱᖁᔭᖏᓐᓂᒃ, ᓇᖕᒥᓂᖅ ᐱᐅᓯᓯ ᓈᓚᒃᑕᐅᑎᖔᕈᒪᓪᓗᒋᑦ. 10#ᒨᓯᓯ ᐂᑉᐸᖏᑦ 20:12; ᒨᓯᓯ ᑕᓪᓕᒪᖏᑦ 5:16; ᒨᓯᓯ ᐂᑉᐸᖏᑦ 21:17; ᒨᓯᓯ ᐱᖓᔪᖏᑦ 20:9.ᒨᓯᓯ ᐅᖃᓚᐅᕐᒪᑦ, ‘ᐊᑖᑍᑦ ᐊᓈᓁᓪᓗ ᐅᐱᒋᑦᓯᐊᒃᑭᒃ, ᓇᓪᓕᐊᓪᓗ ᐊᑖᑕᒥᓂᒃ ᐊᓈᓇᒥᓂᒡᓗ ᐅᖃᕐᓂᕐᓘᑎᓕᒃ ᑖᓐᓇ ᑐᖁᑕᐅᔪᒃᓴᐅᕗᖅ.’ 11ᐃᓕᑦᓯᓕ ᐅᖃᕐᐳᓯ, ‘ᐃᓄᒃ ᓱᓇᑐᐃᓐᓇᕐᒥᒃ ᐊᑖᑕᒥᓄᑦ ᐊᓈᓇᒥᓄᓪᓗ ᐃᑲᔪᕈᑎᒋᔪᓐᓇᕐᑕᒥᓂᒃ ᐱᑕᖃᕐᓗᓂ, ᐅᖃᕐᐸᑦ, ᑰᕐᐸᓐ’ (ᐃᒫᒃ ᑐᑭᖃᕐᑐᖅ, ᐅᓇᓕ ᒎᑎᒧᑦ ᑐᓂᔭᒃᓴᖅ), 12ᑖᓐᓇ ᑕᕝᕙ ᐊᑖᑕᒥᓄᑦ ᐊᓈᓇᒥᓄᓪᓗ ᐃᑲᔪᕈᓐᓃᕐᑎᖃᑦᑕᕐᐸᓯ. 13ᑕᕝᕙ ᑍᒤᓕᐅᕐᓗᓯ ᐱᐅᓯᓯ ᒪᓕᖔᕐᓗᒋᑦ ᒎᑎᐅᑉ ᐅᖃᐅᓯᖏᓐᓂᒃ ᐊᑐᕈᓐᓃᕐᑎᑦᓯᕙᒃᐳᓯ. ᐊᒻᒪᑦᑕᐅᖅ ᐊᓯᖏᓐᓂᒃ ᐊᒥᓱᓂᒃ ᑍᒤᓕᐅᕐᐸᒃᐳᓯ.”
ᐃᓄᖕᒥᒃ ᓴᓗᒪᔪᓐᓃᕐᑎᑦᓯᔪᑦ
ᒫᑎᐅᓯ 15:10-20
14ᑕᕝᕙ ᔩᓱᓯ ᐃᓄᒋᐊᒃᑐᕐᔪᐊᓂᒃ ᕾᖁᔨᒃᑲᓐᓂᕐᐳᖅ, ᐅᖃᐅᑎᓪᓗᒋᑦ, “ᑕᒪᑦᓯ ᓈᓚᒃᓯᓐᖓ, ᑐᑭᓯᓗᓯᓗ: 15ᐃᓅᑉ ᓯᓚᑖᓂᑦ ᐱᔪᖅ ᐃᓅᑉ ᐃᓗᐊᓂᒃ ᓴᓗᒪᔪᓐᓃᕐᑎᑦᓯᔪᓐᓇᓐᖏᓚᖅ; ᐃᓅᓪᓕ ᐃᓗᐊᓂᑦ ᐊᓂᔪᑦ ᑕᒪᒃᑯᐊ ᐃᓄᖕᒥᒃ ᐱᐅᔪᓐᓃᕐᑎᑦᓯᕗᑦ. [ 16ᑐᓵᔪᓂᒃ ᓯᐅᑎᓕᒃ ᐊᑏ ᑐᓴᕐᓕ.]”#7:16 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ. ᑕᑯᓗᒍ ᒫᑯᓯ 4:23
17ᔩᓱᓯ ᐃᒡᓗᒧᑦ ᐃᑎᕐᒪᑦ, ᐃᓄᐃᑦ ᕿᒪᒡᓗᒋᑦ, ᐃᓕᓐᓂᐊᕐᑎᖏᑕ ᐊᐱᕐᓱᕐᐹᑦ ᐊᑦᔨᐅᔪᑦ ᑐᑭᖏᓐᓂᒃ ᑐᑭᓯᓇᕐᓯᑎᑦᓯᖁᓪᓗᒍ. 18ᐅᖃᐅᑎᕔᑦ, “ᐃᓕᑦᓯᑦᑕᐅᖅ ᑐᑭᓯᔪᓐᓇᓐᖏᓚᓰ? ᐃᓅᑉ ᓯᓚᑖᓂᑦ ᐱᔪᖅ ᐃᓅᑉ ᐃᓗᐊᓂᒃ ᐱᐅᔪᓐᓃᕐᑎᑦᓯᔪᓐᓇᓐᖏᓚᖅ, 19ᐅᐱᓐᓇᕋᓂ ᐃᓅᑉ ᐃᓱᒪᖓᓄᐊᖏᓐᓇᒥ, ᐊᕿᐊᕈᖓᓄᐊᕐᐳᓪᓕ, ᐊᓂᓕᕆᓪᓗᑎᒃ ᐱᐅᓯᕐᒥᑐᑦ.” ᑕᒪᑐᒥᖓ ᔩᓱᓯ ᓇᓗᓁᕐᓯᕗᖅ ᓂᖀᑦ ᓂᕆᔭᐅᑦᑍᓕᔭᕆᐊᖃᖏᓐᓂᖏᓐᓂᒃ.
20ᐅᖃᕆᕗᖅ, “ᐃᓅᓪᓕ ᐃᓗᐊᓂᓐᖔᕐᑐᑦ ᑭᓯᒥ ᐃᓄᖕᒥᒃ ᐱᐅᔪᓐᓃᑎᑦᓯᕙᒃᑐᑐᕗᖅ. 21ᐃᓅᑉ ᐃᓗᐊᓂᓐᖔᕐᑐᑦ, ᐃᓅᑉ ᐆᒻᒪᑎᖓᓂᑦ, ᐱᐅᖏᑦᑐᑦ ᐊᓂᕙᒃᐳᑦ, ᓄᓕᐊᕈᒪᓃᑦ, ᑎᒡᓕᒍᒪᓃᑦ, ᑐᖁᑦᓯᔪᒪᓃᑦ, ᐊᓯᓐᓂᐊᕐᓃᑦ, 22ᐱᔪᒪᕕᒡᔪᐊᕐᓃᑦ, ᐱᐅᖏᑦᑐᓕᓃᑦ, ᓴᒡᓗᕿᑦᓯᔪᒪᓃᑦ, ᑲᓐᖑᓇᕐᑐᓕᖃᑎᖃᕐᓃᑦ, ᒥᖕᓂᒍᑦᔨᓃᑦ, ᒎᑎᒥᒃ ᒥᑕᐅᑎᖃᕐᓃᑦ, ᐱᐅᔪᕆᓃᑦ, ᓯᓔᑦᑑᓃᑦ, 23ᑕᒪᒃᑯᐊ ᑕᒪᑦᔭ ᑕᒪᕐᒥᒃ ᐱᐅᖏᑦᑐᑦ ᐃᓅᑉ ᐃᓗᐊᓂᑦ ᐊᓂᔪᑦ ᐃᓄᖕᒥᒃ ᐱᐅᔪᓐᓃᕐᑎᑦᓯᕙᒃᑐᑑᕗᑦ.”
ᐊᕐᓇᐅᑉ ᓮᕈᐱᓂᓯᐊᒥᐅᑕᐅᑉ ᐅᒃᐱᕐᓂᖓ
ᒫᑎᐅᓯ 15:21-28
24ᑕᕝᕙᓐᖓᑦ ᐊᐅᓪᓚᕋᒥ ᐃᒡᓗᒐᓮᑦ ᑍᕆᐅᑉ ᓮᑐᓂᐅᓪᓗ ᖃᓂᒋᔮᓄᐊᕐᐳᖅ. ᐃᒡᓗᒧᑦ ᐃᑎᕋᒥ, ᖃᐅᔨᒪᔭᐅᔪᒪᓐᖏᓚᖅ ᑕᕝᕙᓃᓐᓂᕐᒥᓂᒃ; ᑭᓯᐊᓂᓕ ᐃᔨᕐᓯᒪᔪᓐᓇᓚᐅᓐᖏᓚᖅ. 25ᐊᕐᓇᖅ ᐸᓂᖃᕐᑐᖅ ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᔪᒥᒃ, ᑐᓴᕋᒥ, ᐃᑎᕐᐳᖅ ᐃᑎᒐᖏᓐᓄᑦ ᐹᒻᒪᒃᓗᓂ. 26ᐊᕐᓇᖅ ᒍᕇᑭᐅᕗᖅ, ᓮᕈᐱᓃᓯᐊᒥᑦ ᐱᓯᒪᔪᖅ ᓯᕆᐊᒦᑦᑐᒥ. ᐊᕐᓇᖅ ᕿᓄᓕᕐᐳᖅ ᐊᓂᕐᓂᕐᓗᒃ ᐸᓂᖕᒥᓂᑦ ᐊᓂᑎᑕᐅᖁᓪᓗᒍ. 27ᔩᓱᓯᐅᑉ ᐅᖃᐅᑎᕚ, “ᓯᕗᓪᓕᕐᒥᒃ ᕿᑐᕐᖎᑦ ᓂᕆᑎᑕᐅᖅᑳᕆᐊᖃᕐᐳᑦ, ᓈᒻᒪᖏᒻᒪᑦ ᕿᑐᕐᒊᑦ ᓂᕆᓂᐊᕐᑕᖏᓐᓂᒃ ᐊᕐᓵᕐᓗᒋᑦ ᕿᒻᒥᓄᓪᓗ ᐃᒋᓪᓗᒋᑦ.”
28ᐊᕐᓇᐅᑉ ᑭᐅᕚ, “ᐊᑕᓃᖅ ᓱᓕᕗᑎᑦ; ᑭᓯᐊᓂᓕ ᕿᒻᒥᑦ ᓵᑉ ᐊᑖᓂᑦ ᑲᑕᒐᕐᓂᑯᓂᒃ ᓂᕆᕙᒃᐳᑦ, ᕿᑐᕐᒊᑦ ᑲᑕᒐᕐᑕᖏᓐᓂᒃ.”
29ᐊᕐᓇᖅ ᐅᖃᐅᑎᕚ, “ᑕᒪᓐᓇ ᑭᒡᒍᓯᕆᔧᑦ ᐱᓪᓗᒍ ᐃᒡᓗᖕᓄᑦ ᐊᖏᕐᕋᓕᕆᑦ; ᐊᓂᕐᓂᕐᓗᒃ ᐸᓂᖕᓂᑦ ᐊᓂᓯᒪᓕᕐᒪᑦ.”
30ᐊᕐᓇᖅ ᐊᖏᕐᕋᕐᐳᖅ, ᐸᓂᓂ ᑕᑯᕚ ᐃᒡᓕᕐᒥ ᓇᓚᔪᖅ, ᐊᓂᕐᓂᕐᓗᒃ ᑖᑦᓱᒪᖓᑦ ᐊᓂᓯᒪᓕᕐᑐᖅ.
ᔩᓱᓯᐅᑉ ᑐᓵᖏᑦᑐᒥᒃ ᑐᓵᓕᕐᑎᑦᓯᓂᖓ
31ᑕᕝᕙ ᓄᓇᐅᑉ ᑍᕆᐅᑉ ᖃᓂᒋᔭᖓᓂᑦ ᐊᐅᓪᓚᕐᐳᖅ, ᓮᑐᓂ ᐊᖅᑯᓵᕐᓗᒍ ᑕᓯᕐᔪᐊᒧᐊᕐᐳᑦ ᒐᓕᓕᐊᑉ ᒥᒃᓵᓃᑦᑐᒧᑦ, ᓄᓇᓖᑦ ᑎᑲᐳᓖᓯᑦ ᖁᓕᓂᒃ ᐃᒡᓗᒐᓴᒡᔪᐊᓕᖕᓂᒃ ᑍᔭᐅᔪᑦ ᓄᓇᖓᓄᑦ. 32ᐋᑦᓯᕕᐅᕗᖅ ᑐᓵᓇᓂ ᐅᖃᕈᓐᓇᖏᑦᑐᒥᒃ; ᔩᓱᓯ ᕿᓄᕕᒋᕚᑦ ᐸᑎᒻᒥᓯᖁᓪᓗᒍ ᑖᑦᓱᒥᖓ. 33ᐃᓄᒐᓴᒡᔪᐊᓂᑦ ᕿᒪᕉᑎᑎᓪᓗᒍ ᐃᓄᑑᖃᑎᒋᓕᕐᐹ, ᐊᒡᒐᓂ ᓯᐅᑎᖕᒐᓄᐊᕐᐰᑦ, ᐊᒡᒐᖕᒥᓄᑦ ᑎᕗᐊᓚᐅᕐᓗᓂ, ᐅᖃᖓ ᐊᒃᑐᕐᐹ; 34ᕿᓚᖕᒧᑦ ᐋᕐᓗᕐᐳᖅ, ᐊᓂᕐᓴᐅᒥᓪᓗᓂ, ᐊᖑᒻᒧᑦ ᐅᖃᕐᐳᖅ, “ᐃᐸᐸᑕ,” ᐃᒫᒃ ᑐᑭᓕᒃ, “ᐊᖕᒪᕆᑦ.”
35ᓯᐅᑎᖏᒃ ᑕᕝᕔᓐᓇᖅ ᑐᓵᔪᓐᓇᓕᕐᐴᒃ, ᐅᖃᖓᑕ ᐅᖃᕈᓐᓇᖏᑦᔪᑎᖓ ᐲᕐᐳᖅ, ᐅᖃᕈᓐᓇᓯᐊᓕᕐᓗᓂ. 36ᔩᓱᓯᐅᑉ ᐃᓄᐃᑦ ᐃᓂᕐᑎᕐᐰᑦ ᑭᓇᑐᐃᓐᓇᒧᑦ ᐅᖃᐅᓯᖃᖁᓇᒋᑦ; ᐃᓂᕐᑎᕋᓗᐊᕐᒪᒋᑦ ᑲᑦᓱᖕᒊᓪᓗᑎᒃ ᐅᖃᐅᓯᖃᓕᒃᑲᓐᓂᑐᐃᓐᓇᕐᐳᑦ. 37ᑕᒪᑐᒥᖓ ᑐᓴᕐᑐᑦ ᑲᒪᒻᒪᕆᒃᐳᑦ ᐅᖃᕈᓐᓇᕐᑕᖏᑕ ᐅᖓᑖᓄᑦ, ᐅᖃᕐᓗᑎᒃ, “ᖃᓄᐊᓗᖏᓐᓇ ᓱᓇᑐᐃᓐᓇᕐᓂᒃ ᐊᔪᓐᖏᓚᖅ; ᐊᒡᓛᑦ ᑐᓵᖏᑦᑐᑦ ᑐᓴᓕᕐᑎᑉᐰᑦ ᐅᖃᕈᓐᓇᖏᑦᑐᓪᓗ ᐅᖃᕈᓐᓇᕐᓯᑎᓪᖢᒋᑦ.”
Currently Selected:
ᒫᑯᓯᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
