ᒫᑯᓯᐅᑉ ᐊᒡᓚᖏᑦ 6
6
ᔩᓱᓯᐅᑉ ᓇᕐᕈᒋᔭᐅᓂᖓ ᓈᓴᕇᑎᒥ
ᒫᑎᐅᓯ 13:53-58; ᓘᑲᓯ 4:16-30
1ᔩᓱᓯ ᑕᕝᕙᓐᖓᑦ ᐊᐅᓪᓚᕋᒥ ᓄᓇᑐᖃᒥᓄᐊᕐᐳᖅ; ᐃᓕᓐᓂᐊᕐᑎᖏᑕ ᒪᓕᒃᐹᑦ. 2ᓴᐸᑎᒥᒃ ᐊᔪᕆᕐᑐᐃᓕᕐᐳᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ; ᐃᓄᐃᑦ ᐊᒥᓱᑦ ᐅᖃᓪᓚᒃᑎᓪᓗᒍ ᑐᓵᔪᑦ ᑕᒪᕐᒥᒃ ᑲᒪᓂᐊᕐᐳᑦ, ᐅᖃᕐᓗᑎᒃ, “ᓇᑭᒻᒪᑯᐊ ᐃᓕᑕᕕᓂᐊᓗᖏᑦ ᖃᓄᕐᖑᓇ ᓯᓚᑦᑐᕐᑐᕕᓂᖅ? ᖃᓄᕐᓗ ᑲᒪᓇᕐᑐᐊᓗᖕᓂᒃ ᐱᓇᓱᐊᖃᑦᑕᕐᐸ? 3ᕿᔪᓕᕆᔨᐅᓐᖏᓛᖅ ᒥᐊᕆᐅᑉ ᐃᕐᓂᖓ ᖃᑕᓐᖑᑎᖏᓪᓗ ᔧᒥᓯ, ᔫᓯᓗ, ᔫᑕᓯᓗ, ᓮᒨᓂᓗ ᓇᔭᖏᓪᓗ ᓇᔪᕐᑎᒋᓐᖏᓚᕘᑦ?” ᑍᒤᒻᒪᑦ ᑲᒪᒋᔪᒪᔪᓐᓃᕐᐹᑦ.
4 #
ᔪᐊᓇᓯ 4:44. ᔩᓱᓯᐅᑉ ᐅᖃᐅᑎᕔᑦ, “ᓇᓚᐅᑦᑍᔪᖅ ᐅᐱᒋᔭᐅᓂᑭᑦᑑᕗᖅ, ᓄᓇᑐᖃᕐᒥᓂ, ᐃᓚᒥᓂ, ᐊᖏᕐᕋᒥᓂᓗ.”
5ᑕᕝᕙᓂ ᑲᒪᓇᕐᑐᓕᔪᓐᓇᓐᖏᓚᖅ ᖃᓄᑐᐃᓐᓇᖅ, ᖃᓂᒪᔪᓪᓕ ᐃᓔᓐᓇᖏᑦ ᐸᑎᒻᒥᕔᑦ ᐋᖅᑭᒃᑕᐅᓪᓗᑎᒡᓗ. 6ᔩᓱᓯ ᑲᒪᓂᐊᕐᐳᖅ, ᐃᓄᐃᑦ ᐅᒃᐱᕈᓱᖏᓐᓂᖏᓐᓂᒃ.
ᔩᓱᓯᐅᑉ ᐃᓕᓐᓂᐊᕐᑎᒥᓂᒃ 12ᓂᒃ ᑎᓕᓯᓂᖓ
ᒫᑎᐅᓯ 10:5-15; ᓘᑲᓯ 9:1-6
ᑭᖑᓂᖓᒍᑦ ᓄᓇᓕᖕᓄᐊᕐᐳᖅ ᑕᒫᓂ ᖃᓂᒋᔮᓃᑦᑐᓄᑦ ᐊᔪᕆᕐᑐᐃᓪᓗᓂ. 7ᐃᓕᓐᓂᐊᕐᑎᓂ 12 ᕾᖁᕔᑦ, ᑎᓕᓪᓗᒋᑦ ᒪᕐᕉᓈᕐᑎᓪᓗᒋᑦ, ᐱᔪᓐᓇᕐᓂᕐᑖᕐᑎᓪᓗᒋᓪᓗ ᐊᓂᕐᓂᕐᓗᖕᓂᒃ ᐊᓂᑎᑦᓯᔪᓐᓇᕐᓂᕐᒥᒃ, 8ᐃᒫᒃ ᐅᖃᐅᑎᕔᑦ, “ᓱᓇᑐᐃᓐᓇᕐᒥᒃ ᓇᒃᓴᕐᑍᓕᒋᑦᓯ ᐃᖏᕐᕋᑎᓪᓗᓯ, ᐊᔭᐅᑉᐱᐊᓕᔭᑐᐃᓐᓇᕆᑦᓯ; ᓂᐊᖂᔭᒋᖏᓪᓗᓯ, ᐃᒃᐱᐊᕐᔪᓕᔭᖏᓪᓗᓯ, ᑮᓇᐅᔭᒡᒋᖏᓪᓗᓯᓗ. 9ᐃᑎᒐᒍᓯᕐᓯᒪᓗᓯ, ᐊᓐᓄᕌᒥᒡᓗ ᐊᑎᔭᒃᓴᒡᒋᒃᑲᓐᓂᖏᓪᓗᓯ.” 10ᐃᒫᒃ ᐅᖃᐅᑎᒋᕔᑦ, “ᓇᓪᓕᐊᓐᓄᑐᐃᓐᓇᖅ ᑐᓐᖓᓱᒃᑎᑕᐅᒍᑦᓯ ᑕᕝᕙᓃᒋᑦᓯ ᐃᒡᓗᒥ, ᑕᕝᕙᓐᖓᑦ ᓄᓇᒥᑦ ᐊᐅᓪᓚᓚᐅᖏᓐᓂᑦᓯᓐᓂᑦ. 11#ᐋᐴᓯᑕᓖᑦ 13:51.#ᓘᑲᓯ 10:4-11.ᓄᓇᓕᖕᓄᑦ ᑎᑭᒍᑦᓯ ᐃᓄᖏᓐᓂᑦ ᑐᓐᖓᓱᒃᑎᑕᐅᖏᒃᑯᑦᓯ, ᐃᓕᑦᓯᓐᓂᒡᓗ ᓈᓚᒍᒪᖏᑉᐸᑕ, ᕿᒪᓕᕈᑦᓯᒋᒃ ᐃᑎᒐᓯ ᓴᓃᔭᕐᑕᒃᓴᕆᕙᓯ ᑕᒪᓐᓇ ᓇᓗᓁᒃᑯᑕᐅᓂᐊᕐᒪᑦ ᓈᒻᒪᒋᔭᐅᖏᓐᓂᖏᓐᓂᒃ.”
12ᑕᕝᕙ ᐃᓕᓐᓂᐊᕐᑎᖏᑦ ᐊᐅᓪᓚᕐᐳᑦ ᐊᔪᕆᕐᑐᐃᓪᓗᑎᒃ ᐃᓄᐃᑦ ᐊᔪᕐᓂᕐᒥᖕᓂᑦ ᖃᕿᐊᓕᖁᓪᓗᒋᑦ. 13#ᔧᒥᓯ 5:14.ᐊᓂᕐᓂᕐᓗᖕᓂᒃ ᐊᒥᓱᓂᒃ ᐊᓂᑎᑦᓯᕗᑦ, ᓇᐹᕐᑑᑉ ᐸᐅᕐᖓᖏᑕ ᐅᕐᓱᖏᓐᓄᑦ ᖃᓂᒪᔪᑦ ᐊᒥᓱᑦ ᐅᕐᓱᕐᑎᕐᐸᒃᓗᒋᑦ ᐋᖅᑭᒃᐰᑦ.
ᔪᐊᓇᓯ ᐹᑉᑎᑎᕆᔨᐅᑉ ᑐᖁᑕᐅᓂᖓ
ᒫᑎᐅᓯ 14:1-12; ᓘᑲᓯ 9:7-9
14 #
ᒫᑎᐅᓯ 16:14; ᒫᑯᓯ 8:28; ᓘᑲᓯ 9:19. ᐊᖓᔪᖅᑳᕐᔪᐊᓪᓕ ᐃᕉᑕᓯᐅᑉ ᑕᒪᓐᓇ ᑐᓴᐅᒪᓕᕐᐹ; ᔩᓱᓯᐅᑉ ᐱᓇᓱᐊᕐᓂᖓ ᓇᓂᑐᐃᓐᓇᖅ ᑐᓴᐅᒪᔭᐅᓕᕐᒪᑦ. ᐃᓚᖏᑦ ᐅᖃᖃᑦᑕᕐᒪᑕ, “ᔪᐊᓇᓯ ᐹᑉᑎᑎᕆᔨ ᑐᖁᖓᔪᓂᑦ ᒪᑭᓯᒪᕗᖅ; ᑍᒤᒻᒪᑦ ᐱᔪᓐᓇᕐᓂᖃᕐᐳᖅ ᑲᒪᓇᕐᑐᓂᒃ ᐱᓇᓱᐊᕈᓐᓇᕐᓂᕐᒥᒃ.”
15ᐃᓚᖏᓪᓕ ᐅᖃᕐᐳᑦ, “ᑖᓐᓇ ᐃᓔᑦᔭᐅᕗᖅ.” ᐃᓚᖏᓪᓕ ᐅᖃᕆᕗᑦ, “ᓇᓚᐅᑦᑍᔫᕗᖅ, ᑍᑦᓱᒪᓂᐊᓗᒃ ᓇᓚᐅᑦᑍᔫᕙᓚᐅᕐᑐᑎᑐᑦ.”
16ᑕᒪᓐᓇ ᐃᕉᑕᓯᐅᑉ ᑐᓴᕋᒥᐅᒃ ᐅᖃᕐᐳᖅ, “ᔪᐊᓇᓯᐅᕗᖅ ᐹᑉᑎᑎᕆᔨ, ᓂᐊᖁᐃᕐᑕᐅᑎᓚᐅᕐᑕᕋ, ᑐᖁᖓᔪᓂᑦ ᒪᑭᓯᒪᓕᕐᐳᖅ.” 17#ᓘᑲᓯ 3:19,20.ᐃᕉᑕᓯᐅᑉ ᔪᐊᓇᓯ ᑎᒍᔭᐅᖁᓚᐅᕋᒥᐅᒃ, ᕿᓚᒃᓱᕐᑕᐅᑎᓪᓗᒍᓗ ᑎᒍᔭᐅᓯᒪᕕᖕᒧᐊᕐᑕᐅᑎᓚᐅᕐᐹ ᐃᕉᑎᐊᓯᒥᒃ ᐱᑦᔪᑎᖃᕐᓗᓂ, ᓄᑲᖓᑕ ᐱᓕᑉᐴᓯᐅᑉ ᓄᓕᐊᕆᒐᓗᐊᕐᑎᓪᓗᓂᐅᒃ; ᓄᓕᐊᕐᑖᕆᓚᐅᕋᒥᐅᒃ. 18ᔪᐊᓇᓯ ᐹᑉᑎᑎᕆᔨᐅᑉ ᐃᕉᑕᓯ ᐅᖃᐅᑎᖃᑦᑕᓚᐅᕐᒪᒍ, “ᐃᓕᖕᓄᑦ ᓈᒻᒪᓐᖏᓚᖅ ᓄᓕᐊᕐᑖᕈᕕᑦ ᓄᑲᕐᐱᑦ ᓄᓕᐊᖓᓂᒃ.”
19ᐃᕉᑎᐊᓯᐅᑉ ᔪᐊᓇᓯ ᑐᖁᑕᐅᑦᔪᑎᒃᓴᕐᓯᐅᖃᑦᑕᓚᐅᕐᐹ. ᑭᓯᐊᓂ ᑐᖁᑕᐅᑎᑦᓱᓐᓇᓚᐅᓐᖏᓛ. 20ᐃᕉᑕᓯᐅᑉ ᔪᐊᓇᓯ ᐃᓕᕋᒋᓚᐅᕐᒪᒍ, ᖃᐅᔨᒪᒐᒥᐅᒃ ᓇᓛᒎᕐᒪᑦ ᐃᑦᔪᕐᓁᑑᓪᓗᓂ, ᑍᒤᒻᒪᑦ ᓴᐳᑎᓯᒪᓚᐅᕐᐹ. ᑐᓵᓕᕌᖓᒥᐅᒃ ᖁᐊᕐᓵᕐᑎᑕᐅᒻᒪᕆᒃᐸᒃᑲᓗᐊᕐᓗᓂ ᐅᖃᓪᓚᓕᕌᖓᑦ; ᓈᓚᒋᐊᖓ ᖁᕕᐊᒋᓪᓗᓂᐅᒃ.
21ᐃᕉᑍᐊᓯ ᐱᕕᒃᓴᖃᑦᓯᐊᓕᑍᓐᓇᓚᐅᕐᐳᖅ ᐃᕉᑕᓯᐅᑉ ᐃᓅᓕᕐᕕᒃᓯᐅᕐᕕᖓᓂ ᐊᖓᔪᖅᑳᖁᑎᒥᓂᒃ ᓂᕆᑎᑦᓯᓕᕐᒪᑦ ᒐᕙᒪᖁᑎᖏᑕ ᖁᕝᕙᓯᖕᓂᕐᐹᖁᑎᖏᓐᓂᒃ, ᐅᓇᑕᕐᑐᒃᓴᖁᑎᖏᑕᓗ ᐊᖓᔪᖅᑳᒻᒪᕆᖏᓐᓂᒃ, ᒐᓕᓕᐊᒥᐅᓄᓪᓗ ᐊᐅᓚᑦᓯᔨᐅᔪᓂᒃ. 22ᐃᕉᑎᐊᓯᐅᑉ ᐸᓂᖓ ᑕᕝᕗᓐᖓᓚᐅᕐᒪᑦ ᑖᓂᓯᕐᓗᓂᓗ ᓵᖏᓐᓂ, ᑕᒪᓐᓇ ᐃᕉᑕᓯᐅᑉ ᖁᕕᐊᒋᕚ ᓂᕆᔭᕐᑐᕐᑎᓯᒪᔭᖏᑕᓗ ᖁᕕᐊᒋᒋᕚᑦ; ᐊᖓᔪᖅᑳᕐᔪᐊᖅ ᓂᕕᐊᕐᓯᐊᒧᑦ ᐅᖃᕐᐳᖅ, “ᓱᓇᒥᒃ ᐱᑎᑕᐅᔪᒪᒍᕕᑦ ᐱᔪᒪᑉᕕᒋᓚᐅᓐᖓ ᓱᓇᑐᐃᓐᓇᑦᓯᐊᒥᒃ ᐱᔪᒪᔭᕐᓂᒃ ᑐᓂᓯᕕᒋᓂᐊᕐᐸᒋᑦ.” 23ᐃᕉᑕᓯᐅᑉ ᐅᖃᐅᑎᕚ, “ᓱᓕᑦᓯᐊᕐᐳᖓ ᓱᓇᑐᐃᓐᓇᑦᓯᐊᒥᒃ ᐱᔪᒪᔭᕐᓂᒃ ᑐᓂᓯᕕᒋᓂᐊᕐᐸᒋᑦ, ᐊᖓᔪᖅᑲᐅᕕᓐᓃᑦᑐᓕᒫᑦ ᐊᕕᒃᓗᒋᒃ ᐱᔪᒪᒐᔭᕈᕕᒋᑦ ᐱᑎᑦᓱᓐᓇᕐᐸᒋᑦ.”
24ᓂᕕᐊᕐᓯᐊᖅ ᑕᕝᕙᓐᖓᑦ ᐊᓂᕗᖅ, ᐊᓈᓇᒥᓄᑦ ᐅᖃᕆᐊᕐᑐᕐᓗᓂ, “ᓱᓇᒥᒡᓕ ᐱᔪᒪᓂᐊᓕᕐᑐᖓ?” ᐊᓈᓇᖓᑕ ᑭᐅᕚ, “ᔪᐊᓇᓯ ᐹᑉᑎᑎᕆᔨᐅᑉ ᓂᐊᖁᖓᓂᒃ.”
25ᓂᕕᐊᕐᓯᐊᖅ ᑐᐊᕕᕐᓗᓂ ᐅᑎᕐᐳᖅ ᐊᖓᔪᖅᑳᕐᔪᐊᕐᒧᑦ, ᐱᔪᒪᔭᒥᓂᒃ ᐅᖃᕐᐳᖅ, “ᐃᓕᖕᓄᑦ ᑐᓂᓯᕕᐅᔪᒪᕗᖓ ᒫᓐᓇ ᔪᐊᓇᓯ ᐹᑉᑎᑎᕆᔨᐅᑉ ᓂᐊᖁᖓᓂᒃ ᐊᓪᓕᕋᕐᒦᑎᓪᓗᒍ.”#6:25 ᐴᒍᑕᕐᒦᑎᓪᓗᒍ
26ᑕᒪᓐᓇ ᐊᖓᔪᖅᑳᕐᔪᐊᑉ ᖁᕕᐊᓱᑎᒋᖏᒃᑲᓗᐊᕐᓗᒍ; ᓂᕕᐊᕐᓯᐊᑉ ᐱᔪᒪᔭᖓᓂᒃ ᕿᐱᓗᒍᓐᓇᓐᖏᓚᖅ ᐅᖃᕕᒋᔭᕇᖅᑲᐅᒐᒥᐅᒃ ᓂᕆᔭᕐᑐᕐᑎᓯᒪᔭᖏᑕ ᓵᖏᓐᓂ. 27ᑍᒤᒻᒪᑦ ᐅᓇᑕᕐᑐᒃᓴᒥᒃ ᑕᕝᕔᓐᓇᖅ ᑎᓕᓯᕗᖅ ᔪᐊᓇᓯᐅᑉ ᓂᐊᖁᖓᓂᒃ ᐂᒃᓕᖁᓪᓗᒍᑦ. ᐅᓇᑕᕐᑐᒃᓴᖅ ᐊᓂᕗᖅ ᑎᒍᔭᐅᓯᒪᕕᖕᒧᑦ ᐅᐸᒃᓗᓂᐅᒃ, ᔪᐊᓇᓯ ᓂᐊᖁᐃᕐᐹ; 28ᓂᐊᖁᖓ ᓇᒃᓴᕐᐹ ᐊᓪᓕᕋᕐᒥ#6:28 ᐊᓪᓕᕋᖅ ᑐᑭᖃᕐᑐᖅ ᐴᒍᑕᖅ ᐅᕝᕙᓗ ᐊᕙᑉᓯᓛᖅ ᐃᓕᓯᒪᑎᓪᓗᒍ, ᑐᓂᓪᓗᒍ ᓂᕕᐊᕐᓯᐊᕐᒧᑦ; ᓂᕕᐊᕐᓯᐊᓪ ᐊᓈᓇᒥᓄᑦ ᑐᓂᕚ. 29ᔪᐊᓇᓯᐅᓪᓕ ᐃᓕᓐᓂᐊᕐᑎᖏᑕ ᑕᒪᓐᓇ ᑐᓴᕋᒥᑦᔪᒃ, ᑕᕝᕗᓐᖓᕐᐳᑦ ᑎᒥᖓ ᐂᓪᓗᒍ, ᐃᓗᕕᕐᕆᐊᕐᑐᕐᓗᒍ.
ᔩᓱᓯᐅᑉ ᓂᕆᑎᑦᓯᓂᖓ 5,000ᓂᒃ
ᒫᑎᐅᓯ 14:13-21; ᓘᑲᓯ 9:10-17; ᔪᐊᓇᓯ 6:1-14
30ᐋᐴᓯᑕᓖᑦ ᐅᑎᕋᒥᒃ ᔩᓱᓯ ᑲᑎᕚᑦ, ᐅᓂᒃᑳᕐᕕᒋᓪᓗᒍ ᐱᓇᓱᐊᕐᓂᕆᓚᐅᕐᑕᒥᖕᓂᒃ ᑕᒤᓐᓂᒃ ᐊᔪᕆᕐᑐᐃᓂᕆᓚᐅᕐᑕᒥᖕᓂᒡᓗ. 31ᔩᓱᓯᐅᑉ ᐅᖃᐅᑎᕔᑦ, “ᐅᕙᒍᑑᓗᑕ ᐊᐅᓪᓚᓚᐅᕐᑕ ᐃᓄᑑᕕᒋᔪᓐᓇᕐᑕᑦᑎᓐᓄᑦ, ᑕᕾᕐᓯᑬᓐᓇᕈᓐᓇᕐᓂᐊᕋᑦᓯ.” ᑕᕝᕙᓂ ᐃᓄᐃᑦ ᐊᒥᓱᑦ ᕾᑲᑕᓗᐊᕐᓂᖏᓐᓄᑦ, ᓂᕆᔪᓐᓇᕐᓯᑎᑕᐅᓚᐅᕈᓐᓃᕐᒪᑕ. 32ᑍᒤᒻᒪᑦ ᐅᒥᐊᒃᑯᑦ ᐊᐅᓪᓚᓕᕐᐳᑦ ᑖᒃᑯᑑᔪᒪᓪᓗᑎᒃ ᐃᓄᖃᖏᑦᑐᒥ.
33ᐃᓄᐃᑦ ᐊᒥᓱᑦ ᑕᑯᒐᒥᒃ ᐊᐅᓪᓚᓕᕐᑐᓂᒃ ᑭᓇᒃᑰᓂᖏᓐᓂᒡᓗ ᐊᐅᓪᓚᓯᔪᑦ ᖃᐅᔨᑐᐊᕋᒥᒃ, ᓇᑭᑐᐃᓐᓇᖅ ᓄᓇᓕᖕᓂᑦ ᐱᓱᓯᕗᑦ ᓄᓇᒃᑯᑦ, ᑐᐊᕕᕐᓗᑎᒃ ᓯᕗᓂᖓᓐᓂᓗ ᐅᐸᒐᓱᐊᕐᑕᖓᓄᐊᕐᐳᑦ.#6:33 ᐂᕕᒋᔭᖓᓄᐊᕐᐳᑦ 34#ᒨᓯᓯ ᓯᑕᒪᖏᑦ 27:17; ᐊᑕᓃᑦ ᓯᕗᓪᓖᑦ 22:17; ᑯᕉᓂᑲ ᐂᑉᐸᖏᑦ 18:16; ᐃᓯᑭᐊᓕ 34:5; ᒫᑎᐅᓯ 9:36.ᔩᓱᓯᓕ ᐅᒥᐊᒥᑦ ᓂᐅᒐᒥ ᐃᓄᖕᓂᒃ ᐅᓄᕐᑐᒻᒪᕆᖕᓂᒃ ᑕᑯᒐᒥ, ᓇᒡᓕᒍᓱᒻᒪᕆᓕᕐᐳᖅ ᑖᒃᑯᓂᖓ, ᓰᐱᑎᑐᑦ ᑍᒤᒻᒪᑕ ᐰᕐᓯᔨᖃᖏᑦᑐᑎᑐᑦ. ᑍᒤᒻᒪᑦ ᐊᔪᕆᕐᑐᓕᕐᐰᑦ ᐊᒥᓱᓂᒃ ᐊᑦᔨᒌᖏᑦᑐᓂᒃ. 35ᐅᓐᓄᓕᕐᒪᑦ, ᐃᓕᓐᓂᐊᕐᑎᖏᑕ ᐅᐸᒃᐹ ᐅᖃᐅᑎᓪᓗᒍ, “ᒫᓐᓇ ᐅᓐᓄᓗᐊᓕᕐᒪᑦ, ᑕᒫᓂ ᐃᓄᖃᖏᑦᑐᒦᑲᑦᑕ; 36ᐃᓄᐃᑦ ᐊᐅᓪᓚᕐᑎᓚᐅᒃᑭᑦ, ᑕᒪᐅᖓ ᖃᓂᒋᔭᒥᖕᓄᑦ ᓄᓇᓕᖕᓄᑦ ᐱᕈᕐᓰᕕᓕᖕᓄᑦ ᓄᓇᓕᖕᓄᓪᓗ ᐂᓂᐊᕐᒪᑕ, ᓇᖕᒥᓂᖅ ᓂᕿᒃᓴᒥᖕᓂᒃ ᓂᐅᕕᕋᓱᐊᕐᓂᐊᕐᒪᑕ.”
37ᔩᓱᓯᐅᓪᓕ ᑭᐅᕔᑦ, “ᐃᓕᑦᓯ ᓂᕆᔭᒃᓴᕐᑖᑎᓕᕐᓯᐅᒃ.” ᐃᓕᓐᓂᐊᕐᑎᖏᑦ ᐅᖃᕐᐳᑦ, “ᓂᐊᖂᔭᕐᑖᕆᐊᕐᑐᖁᕕᑎᒎᑦ ᑮᓇᐅᔭᓂᒃ 200ᓂᒃ ᓯᐅᓪᕕᕆᓂᒃ ᐊᑐᕐᓗᑕ, ᓂᕆᑎᑦᓯᑦᔪᑎᒋᓂᐊᕐᑕᑦᑎᓐᓂᒃ?”
38ᐅᖃᐅᑎᕔᑦ, “ᖃᑦᓯᓂᒃ ᓂᐊᖂᔭᖃᕐᐱᓰ? ᐊᑏ ᑕᑯᔭᕐᑐᓚᐅᕆᑦᓯ,” ᑕᑯᔭᕐᑐᕋᒥᒃ ᐅᖃᐅᑎᕚᑦ, “ᓂᐊᖂᔭᕐᑕᖃᕐᐳᖅ ᑕᓪᓕᒪᓂᒃ ᐃᖃᓗᒃᑕᖃᕐᓗᓂᓗ ᒪᕐᕉᖕᓂᒃ.”
39ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᑎᓕᕔᑦ, ᐃᓄᐃᑦ ᐃᒻᒥᒍᑦ ᑲᑎᓐᖓᐅᕐᓗᑎᒃ ᐃᕐᓯᕙᖃᑎᒌᖁᓪᓗᒋᑦ ᓄᓇᒥ ᐃᕕᒃᓱᒐᓕᖕᒥ. 40ᑕᕝᕙ ᐃᒃᓯᕚᓕᕐᐳᑦ ᑲᑎᓐᖓᐅᕐᓗᑎᒃ, ᐃᓚᖏᑦ 100ᐅᓪᓗᑎᒃ, ᐃᓚᖏᓪᓗ 50ᐅᓪᓗᑎᒃ. 41ᓂᐊᖂᔧᑦ ᑕᓪᓕᒪᑦ ᑎᒍᕔᑦ ᐃᖃᓘᒡᓗ ᒪᕐᕉᒃ, ᕿᓚᖕᒧᑦ ᐋᕐᓗᕐᓗᓂ, ᒎᑎ ᖁᔭᒋᕚ, ᓂᐊᖂᔧᑦ ᐊᒡᒍᕐᐰᑦ, ᐃᓕᓐᓂᐊᕐᑎᒥᓄᑦ ᑐᓂᓪᓗᒋᑦ ᐃᓄᖕᓄᑦ ᑐᓂᐅᖅᑲᐅᑎᒋᔭᐅᖁᓪᓗᒋᑦ; ᐃᖃᓘᒡᓗ ᒪᕐᕉᒃ ᐊᒡᒍᕐᐹᒃ ᑕᒤᓐᓄᑦ. 42ᑕᒪᕐᒥᒃ ᓂᕆᕗᑦ ᑳᒍᓐᓃᕐᓗᑎᒃ. 43ᐃᓕᓐᓂᐊᕐᑎᖏᑦ 12ᓂᒃ ᐃᕕᐅᔭᕐᓂᒃ ᑕᑍᕗᑦ, ᐊᒡᒍᕐᓯᒪᔪᓂᒃ ᐊᒥᐊᒃᑯᒋᔭᐅᔪᓂᒃ ᓂᐊᖂᔭᓂᒃ ᐃᖃᓗᖕᓂᒡᓗ. 44ᐊᖑᑎᑦ ᓂᕆᓚᐅᕐᑐᑦ ᐅᓄᕐᓂᖃᓚᐅᕐᐳᑦ 5,000ᓂᒃ.
ᔩᓱᓯᐅᑉ ᐱᓱᖕᓂᖓ ᐃᒪᐅᑉ ᖄᖓᒍᑦ
ᒫᑎᐅᓯ 14:22-33; ᔪᐊᓇᓯ 6:15-21
45ᐱᔭᕇᑐᐊᕋᒥᒃ ᔩᓱᓯᐅᑉ ᐃᓕᓐᓂᐊᕐᑎᓂ ᐅᒥᐊᒧᑦ ᐃᑭᖁᓕᕐᐰᑦ, ᐊᐅᓪᓚᖁᓪᓗᒋᑦ ᓯᕗᓪᓕᐅᓗᑎᒃ ᐱᑦᓮᑕᒧᐊᖁᓪᓗᒋᑦ, ᑕᓯᐅᑉ ᐊᑭᐊᓃᑦᑐᒧᑦ; ᔩᓱᓯᓕ ᓇᖕᒥᓂᖅ ᐃᓄᒐᓴᒡᔪᐊᓂᒃ ᐊᖏᕐᕋᖁᔨᓕᕐᐳᖅ. 46ᐃᓄᐃᑦ ᐊᐅᓪᓚᕐᑎᑦᑕᕇᕋᒥᒋᑦ, ᖃᖅᑲᒧᑦ ᒪᔪᐊᕐᐳᖅ ᑐᒃᓯᐊᕆᐊᕐᑐᕐᓗᓂ. 47ᐅᓐᓄᒃᑎᓪᓗᒍ, ᐅᒥᐊᖅ ᑕᓯᐅᑉ ᕿᑎᖓᓃᓕᕐᐳᖅ, ᔩᓱᓯᓕ ᐃᓄᑑᕗᖅ ᓄᓇᒥ. 48ᑕᑯᓪᓗᓂᓗ ᐃᓕᓐᓂᐊᕐᑎᒥᓂᒃ ᐊᒃᓱᕈᕐᓗᑎᒃ ᐊᒡᒍᒧᑦ ᐃᐳᓐᓇᓱᐊᕐᑐᓂᒃ, ᐊᓄᕆᒧᑦ ᐊᒡᒍᕋᕋᒥᒃ; ᐅᓪᓛᓐᖑᓕᕐᑎᓪᓗᒍ ᓯᕿᓐᖑᔭᖅ ᓯᑕᒪᓐᖑᕐᑎᓪᓗᒍ ᐅᐸᓕᕐᐰᑦ, ᐃᒪᐅᑉ ᖄᖓᒍᑦ ᐱᓱᒃᓗᓂ. ᐅᒥᐊᑦ ᓴᓂᖅᑯᓐᓂᐊᕐᑑᔭᓕᕐᖢᒋᑦ. 49ᐃᓕᓐᓂᐊᕐᑎᖏᑦ ᑕᑯᒐᒥ ᐃᒪᐅᑉ ᖄᖓᒍᑦ ᐱᓱᒃᑐᒥᒃ ᐃᓅᖏᑦᑐᐊᓗᒥᒃ ᑕᑯᓇᓱᒋᓪᓗᑎᒃ, ᕾᒐᓛᓕᕐᐳᑦ; 50ᑕᑯᒐᒥᑦᔪᒃ, ᐊᖏᔪᒥᒃ ᖁᐊᕐᓵᖓᓕᕐᐳᑦ.
ᑕᕝᕔᓐᓇᖅ ᐅᖃᐅᑎᕔᑦ, “ᖁᐊᕐᓵᖓᓇᓯ, ᐅᕙᖓᐅᕗᖓ; ᐃᕐᓯᓇᓯ.” 51ᐅᒥᐊᒧᑦ ᐃᑭᖕᒪᑦ ᐃᑭᒪᖃᑎᒋᓕᕐᓗᒋᑦ ᐊᓄᕆ ᐃᑯᓪᓚᕐᐳᖅ. ᐃᓕᓐᓂᐊᕐᑎᖏᑦ ᑲᒪᕕᒡᔪᐊᓕᕐᐳᑦ, 52ᓂᕆᑎᑦᓯᓚᐅᕐᓂᖓᓂᒃ ᑐᑭᓯᕚᓪᓕᕈᑎᖃᓚᐅᕐᓂᖏᓐᓇᒥᒃ, ᐆᒻᒪᑎᖏᑦ ᓯᑎᓗᐊᓚᐅᕐᒪᑕ.
ᔩᓱᓯᐅᑉ ᖃᓂᒪᔪᓂᒃ ᐋᖅᑭᒃᓯᓂᖓ ᒋᓂᓴᕇᑎᒥ ᓄᓇᒥ
ᒫᑎᐅᓯ 14:34-36
53ᑕᓯᖅ ᐃᑳᕋᒥᑦᔪᒃ, ᓄᓇᓕᖕᓄᑦ ᑎᑭᑉᐳᑦ ᒋᓂᓴᕆᑎᒧᑦ, ᐅᒥᐊᑎᒃ ᐱᑐᒃᐹᑦ. 54ᐅᒥᐊᒥᑦ ᓂᐅᖕᒪᑕ, ᔩᓱᓯ ᑕᕝᕔᓐᓇᖅ ᐃᓕᑕᕆᔭᐅᕗᖅ. 55ᑐᐊᕕᕐᓗᑎᒃ ᑐᓴᕐᑎᑦᓯᔭᕐᑐᑦᐳᑦ ᓄᓇᓕᖕᓂᒃ ᖃᓂᒋᔭᒥᖕᓃᑦᑐᓂᒃ, ᐃᓄᐃᑦ ᑐᓴᑐᐊᕋᒥᒃ ᔩᓱᓯᐅᑉ ᓇᓃᓐᓂᖓᓂᒃ ᖃᓂᒪᔪᖁᑎᒥᖕᓂᒃ ᑖᑦᓱᒧᓐᖓᐅᑦᔨᕗᑦ ᓇᓚᕕᖏᓐᓃᑎᓪᓗᒋᑦ. 56ᓇᒧᑐᐃᓐᓇᖅ ᑎᑭᑦᑕᕌᖓᑦ; ᓄᓇᓕᖕᓄᑦ, ᐃᒡᓗᒐᓴᖕᓄᓪᓗ, ᐱᕈᕐᓰᕕᖃᕐᑐᓄᓪᓗ, ᐃᓄᐃᑦ ᖃᓂᒪᔪᖁᑎᒥᖕᓂᒃ ᐊᖅᑯᑏᑦ ᐊᖅᑯᓵᒐᓪᓚᕆᐅᓂᖏᓐᓄᑦ ᐂᑎᑦᓯᖃᑦᑕᕐᐳᑦ, ᖃᓂᒪᔪᖁᑎᖏᑦ ᔩᓱᓯᐅᑉ ᐊᓐᓄᕌᖏᑕ ᓯᓂᖓᓂᒡᓘᓐᓃᑦ ᐊᒃᑐᕐᓯᔪᓐᓇᖁᓪᓗᒋᑦ; ᐊᒃᑐᕐᓯᔪᓕᒫᑦ ᔩᓱᓯᐅᑉ ᐊᓐᓄᕌᖓᓂᒃ ᐋᖅᑭᒃᑕᐅᕗᑦ.
Currently Selected:
ᒫᑯᓯᐅᑉ ᐊᒡᓚᖏᑦ 6: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
