ᒫᑯᓯᐅᑉ ᐊᒡᓚᖏᑦ 5
5
ᔩᓱᓯᐅᑉ ᐊᓂᕐᓂᕐᓗᒃᑕᐅᓯᒪᔪᒥᒃ ᐋᖅᑭᒃᓯᓂᖓ
ᒫᑎᐅᓯ 8:28-34; ᓘᑲᓯ 8:26-39
1ᑕᕝᕙ ᔩᓱᓯ ᐃᓕᓐᓂᐊᕐᑎᖏᓪᓗ ᑕᓯᕐᔪᐊᑉ ᒐᓕᓕᐊᑉ ᐊᑭᐊᓄᑦ ᑎᑭᑉᐳᑦ, ᒋᕌᓴᒥᐅᑦ ᓄᓇᖓᓄᑦ. 2ᐅᒥᐊᒥᑦ ᓂᐅᖕᒪᑦ, ᐊᖑᒻᒧᑦ ᐅᐸᒃᑕᐅᕗᖅ ᐃᓗᕕᖃᕐᕕᖕᓂᓐᖔᕐᑐᒥᑦ ᑖᓐᓇ ᐊᓂᕐᓂᕐᓗᒃᑕᐅᓯᒪᕗᖅ. 3ᐃᓗᕕᕐᓂ ᐃᓂᖃᕐᑐᖅ; ᑭᓇᒧᓪᓘᓐᓃᑦ ᐊᑦᑐᖏᕐᑕᐅᔪᓐᓇᕈᓐᓃᕐᑐᖅ, ᐊᕐᓵᕐᑑᔭᓄᓪᓘᓐᓃᑦ;#5:3 ᕿᓚᐅᖑᔭᓄᓪᓘᓐᓃᑦ 4ᐃᑎᒐᖏᑦ ᐊᒡᒐᖏᓪᓗ ᐊᑦᓱᖏᕐᑕᐅᖃᑦᑕᕐᓯᒪᒐᓗᐊᕐᐳᑦ ᐊᑦᑐᖏᐅᑎᓄ ᓴᕕᕋᔭᖕᓄᑦ, ᐊᕐᓴᕐᑐᔭᓄᓪᓗ,#5:4 ᕿᓚᐅᖑᔭᓄᓪᓘᓐᓃᑦ ᑖᒃᑯᐊᓕ ᕿᒃᑐᕌᖃᑦᑕᕐᐰᑦ, ᓴᕕᕋᔧᓪᓗ ᐃᑎᒐᖏᑕ ᐊᑦᑐᖏᐅᑎᖏᑦ ᓱᕋᒃᑎᕐᐸᒃᓗᓂᒋᑦ; ᓴᓐᖏᓗᐊᕐᓂᖓᓄᑦ ᑭᓇᒧᓪᓘᓐᓃᑦ ᐱᓯᒪᔭᐅᔪᓐᓇᕈᓐᓃᕐᑐᖅ. 5ᐅᓪᓗᒃᑯᑦ ᐅᓐᓄᐊᑯᓪᓗ ᐃᓗᕕᕐᑎᒍᑦ ᐱᓱᑲᑍᓐᓇᖃᑦᑕᕐᑐᖅ ᖃᖅᑲᓂ ᓂᓪᓕᐊᖃᑦᑕᕐᐳᖅ, ᐃᒻᒥᓂᒃ ᑭᓪᓕᐊᖃᑦᑕᕐᓗᓂ ᐅᔭᖅᑲᓄᑦ.
6ᐅᖓᓯᒃᑐᒦᓪᓗᓂ ᔩᓱᓯ ᑕᑯᒐᒥᐅᒃ; ᑕᑦᓱᒧᖓ ᐅᓪᓚᒃᓯᕗᖅ ᓵᖓᓄᐊᕋᒥ ᓰᖅᑯᕐᓗᓂ ᑐᒃᓯᐊᕐᕕᒋᕚ; 7ᕾᒐᓛᕐᓗᓂ ᓂᐱᖁᕐᑐᓪᓗᓂ ᐅᖃᕐᐳᖅ, “ᐅᕙᓐᓅᑦ ᖃᓄᐃᓕᐅᕆᐊᕐᑐᕐᐲᑦ ᔩᓱᓰ, ᒎᑎᐅᑉ ᖁᑦᓯᖕᓂᕐᐹᑉ ᐃᕐᓂᖓ? ᒎᑎᐅᑉ ᓵᖓᓂ ᕿᓄᕕᒋᕙᒋᑦ, ᐋᓐᓂᕐᓯᕐᑍᓕᓐᖓ.” 8ᑖᓐᓇ ᑍᒫᒃ ᐅᖃᕐᐳᖅ, ᔩᓱᓯ ᐅᖃᕐᒪᑦ “ᐊᓂᕐᓂᕐᓘᒃ ᑕᕝᕙᓐᖓᑦ ᐃᓄᖕᒥᑦ ᐊᓂᒋᑦ!”
9ᔩᓱᓯᐅᑉ ᐊᐱᕆᕚ, “ᑭᓇᐅᕖᑦ?”
ᑭᐅᕗᖅ, “ᓕᒋᐅᓂᒥᒃ ᐊᑎᖃᕐᐳᖓ; ᑕᕝᕙᓂ ᐊᒥᓱᐊᓘᒐᑦᑕ!” 10ᑖᑦᓱᒪ ᐊᔪᐃᓐᓇᕐᓗᓂ ᕿᓄᕕᒌᓕᕐᐹ ᐊᓂᕐᓂᕐᓗᐃᑦ ᑕᒫᓐᖓᑦ ᓄᓇᒥᑦ ᐊᐅᓪᓚᕐᑎᑕᐅᖁᓇᒋᑦ.
11ᑕᒫᓂᓕ ᓄᓇᒥ ᖃᓂᒋᔮᓂ ᑰᒃᑰᓯᑕᖃᕐᐳᖅ ᐊᒥᓱᓂᒃ, ᖃᖅᑲᐅᑉ ᓯᕕᖓᓂᖓᓂ ᓂᕆᓇᓱᒃᑐᓂᒃ; 12ᐊᓂᕐᓂᕐᓗᐃᑦ ᔩᓱᓯ ᕿᓄᕕᒋᕚᑦ, “ᑰᒃᑰᓯᓄᐊᖁᓚᐅᕐᑎᒍᑦ.” 13ᑕᕝᕙ ᔩᓱᓯᐅᑉ ᑍᒫᒃ ᐱᖁᕔᑦ. ᐊᓂᕐᓂᕐᓗᐃᑦ ᐃᓄᖕᒥᑦ ᐊᓂᒐᒥᒃ ᑰᒃᑰᓯᓄᑦ ᐃᑎᕐᐳᑦ; ᑰᒃᑰᓯᑦ ᑖᒃᑯᐊ ᐅᓄᕐᑐᐊᓘᕗᑦ ᑲᑎᓪᓗᒋᑦ 2,000 ᖃᓂᒋᔮᓃᑉᐳᑦ, ᐸᖓᓕᒃᓯᒐᒥᒃ ᐃᓐᓈᕈᒃᑯᑦ ᐃᔪᒃᑲᕐᐳᑦ ᑕᓯᕐᒧᑦ, ᐃᒫᓂ ᐃᐱᓪᓗᑎᒃ.
14ᐊᖑᑏᑦ ᑰᒃᑰᓯᓂᒃ ᑲᒪᔩᑦ ᕿᒪᒃᓯᕗᑦ, ᐅᖃᕆᐊᕐᑐᕐᓗᑎᒃ ᐃᓄᖕᓄᑦ ᓄᓇᓕᖕᓃᑦᑐᓄᑦ ᐱᕈᕐᓰᕕᖕᓃᑦᑐᓄᓪᓗ. ᐃᓄᐃᓪᓗ ᕾᕗᑦ ᑕᑯᔭᕐᑐᕐᓗᑎᒃ ᖃᓄᐃᓕᐅᕐᑐᖃᕐᓂᕐᒪᖔᑦ. 15ᔩᓱᓯᒧᐊᕋᒥᒃ, ᐊᖑᑦ ᑕᑯᕚᑦ ᐊᓂᕐᓂᕐᓗᒃᑕᐅᓯᒪᓚᐅᕐᑐᖅ, ᐃᒃᓯᕚᓕᕐᑐᖅ, ᐊᓐᓄᕌᕐᓯᒪᓪᓗᓂᓗ ᐃᓱᒪᖃᑦᓯᐊᓕᕐᑐᖅ, ᐃᓄᐃᑦ ᑲᑉᐱᐊᓱᓕᕐᐳᑦ. 16ᖃᐅᔨᓚᐅᕐᑐᑦ ᑕᒪᑐᒥᖓ ᐅᓂᒃᑳᕐᐳᑦ ᐊᖑᑦ ᐊᓂᕐᓂᕐᓗᖕᓄᑦ ᐃᓗᒻᒥᕐᑕᐅᓯᒪᓚᐅᕐᑐᒥᒃ, ᑰᒃᑰᓰᓪᓗ ᖃᓄᐃᓕᓚᐅᕐᒪᖔᑕ.
17ᐃᓄᐃᑦ ᔩᓱᓯᒥᒃ ᑕᕝᕙᓐᖓᑦ ᓄᓇᒥᖕᓂᑦ ᐊᐅᓪᓚᖁᔨᓕᕐᐳᑦ.
18ᐅᒥᐊᒧᑦ ᐃᑭᓕᕐᑎᓪᓗᒍ, ᐊᖑᑎᐅᑉ ᐊᓂᕐᓂᕐᓗᒃᑕᐅᓯᒪᓚᐅᕐᑑᑉ ᕿᓄᕕᒋᕚ, ᒪᓕᒍᒪᓪᓗᓂ.
19ᔩᓱᓯᐅᓪᓕ ᒪᓕᖁᓐᖏᓛ, ᐃᒫᒃ ᐅᖃᐅᑎᓪᓗᒍ, “ᐊᖏᕐᕋᓕᕆᑦ ᐃᓚᓐᓇᕆᔭᕐᓄᑦ, ᐅᖃᐅᑎᓗᒋᑦ ᖃᓄᑎᒋ ᐊᑕᓂᕐᒧᑦ ᐱᓂᐊᕐᕕᐅᓯᒪᓂᕆᔭᕐᓂᒃ, ᖃᓄᑎᒋᓗ ᐱᑦᑎᐊᕐᕕᐅᓂᕆᓯᒪᔭᕐᓂᒃ ᑖᑦᓱᒧᖓ.”
20ᐊᖑᑦ ᕿᒪᕉᑎᒐᒥ ᑎᑲᐳᓖᓯᒧᑦ ᓄᓇᒧᑦ ᖁᓕᓂᒃ ᐃᒡᓗᒐᓴᒡᔪᐊᓕᖕᓂᒃ ᑍᔭᐅᔪᒧᑦ ᐂᕗᖅ, ᐅᓂᒃᑳᕐᕕᒋᓗᒋᑦ ᖃᓄᖅ ᔩᓱᓯᒧᑦ ᐱᓂᐊᕐᕕᐅᓚᐅᕐᓂᕐᒥᓂᒃ; ᑕᒪᕐᒥᒃ ᑐᓴᕐᑐᑦ ᑲᒪᓂᐊᒻᒪᕆᒃᐳᑦ.
ᔧᕉᓯᐅᑉ ᐸᓂᖓ ᐊᕐᓇᐅᓪᓗ ᔩᓱᓯᐅᑉ ᐊᓐᓄᕌᖏᓐᓂᒃ ᐊᒃᑐᕐᓯᓂᖓ
ᒫᑎᐅᓯ 9:18-26; ᓘᑲᓯ 8:40-56
21ᔩᓱᓯ ᐅᒥᐊᒃᑯᑦ ᑕᓯᐅᑉ ᐊᑭᐊᓄᑦ ᐅᑎᕐᒥᖕᒪᑦ, ᐃᓄᒐᓴᒡᔪᐊᓂᑦ ᐊᕙᓗᔭᐅᕗᖅ; ᑕᓯᐅᑉ ᓯᓈᓃᑎᓪᓗᒍ ᓱᓕ ᑎᑭᕝᕕᒋᔭᖓᓂ. 22ᔧᕉᓯ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᑕ ᐊᖓᔪᖅᑳᖏᑦᑕ ᐃᓚᖓᑦ, ᑎᑭᑉᐳᖅ; ᔩᓱᓯ ᑕᑯᒐᒥᐅᒃ, ᐃᑎᒐᖏᓐᓄᑦ ᓰᖅᑯᕐᓗᓂ ᐅᑯᕗᖅ. 23ᕿᓄᕕᒋᕚ, ᐅᖃᕐᓗᓂ, “ᐸᓂᑯᓗᒐ ᐊᒃᓱᐊᓗᒃ ᖃᓂᒪᓪᓗᓂ ᑐᖁᑐᐃᓐᓇᕆᐊᖃᓕᕐᒪᑦ. ᕾᓗᑎᑦ ᐸᑎᒻᒥᔭᕐᑐᓚᐅᕈᒃ, ᐋᖅᑭᒃᑯᓂ ᐃᓅᓂᐊᕐᒪᑦ.”
24ᔩᓱᓯᐅᑉ ᒪᓕᓕᕐᐹ. ᐃᓄᒋᐊᒃᑐᕐᔪᐊᓪᓗ ᒪᓕᒃᐳᑦ ᐊᒡᓛᑦ ᓂᓐᓂᐅᕐᑎᓕᕐᓗᒍ ᐊᕙᑎᓕᒫᖓᓂᑦ.
25ᑕᕝᕙᓂ ᐊᕐᓇᕐᑕᖃᕐᐳᖅ ᐊᑯᓂᐊᓗᒃ ᐊᐅᓈᖏᓐᓇᕐᑐᒥᒃ ᐊᕐᕌᒍᓂᒃ 12ᓂᒃ. 26ᐊᑯᓂ ᐊᒃᓱᕈᕈᑎᒋᓯᒪᕚ ᐋᖅᑭᒃᑕᐅᓇᓱᐊᕋᓗᐊᕐᓗᓂ ᐋᓐᓂᐊᓯᐅᕐᑎᒻᒪᕆᖕᓄᑦ, ᐊᕐᓇᐅᑉ ᐱᖁᑎᓕᒫᓂ ᓄᖑᓚᐅᕐᐰᑦ, ᐋᖅᑭᒃᑕᐅᕙᓪᓕᐊᓇᓂᓕ ᐱᐅᔪᓐᓃᕐᐸᓪᓕᐊᑐᐃᓐᓇᕐᐳᖅ. 27ᔩᓱᓯ ᐅᓂᒃᑲᐅᓯᐅᑎᓪᓗᒍ ᑐᓴᕐᓯᒪᓕᕋᒥᐅᒃ, ᐃᓄᒐᓴᒃᔪᐊᑎᒍᑦ ᑭᖑᓂᖓᓂᑦ ᒪᓕᒃᓗᒍ ᐊᓐᓄᕌᖓ ᐊᒃᑐᕐᐹ. 28ᐃᓱᒪᓕᕋᒥ, “ᐊᓐᓄᕌᖏᓪᓘᓐᓃᑦ ᐊᒃᑐᕈᓐᓇᕈᒃᑭᑦ, ᐋᖅᑭᒃᑕᐅᓂᐊᕐᐳᖓ.”
29ᑕᕝᕔᓐᓇᖅ ᐊᐅᓈᕐᓂᖓ ᓄᖅᑲᕐᐳᖅ; ᐃᒻᒥᓂᒃ ᐃᓗᒥᒍᑦ ᐃᒃᐱᖕᓂᕐᐳᖅ ᐋᖅᑭᒃᑕᐅᓂᕐᒥᓂᒃ ᖃᓄᐃᑦᔪᑎᒥᓂᒃ. 30ᔩᓱᓯ ᖃᐅᔨᕗᖅ ᐱᔪᓐᓇᕐᓂᖅ ᐃᒻᒥᓂᑦ ᐊᓂᖕᒪᑦ, ᑕᕝᕔᓐᓇᖅ ᐅᑎᒧᑦ ᕿᕕᐊᕐᐳᖅ ᐃᓄᒐᓴᒡᔪᐊᓄᑦ, ᐅᖃᕐᓗᓂ, “ᑭᐊ ᐊᓐᓄᕌᒃᑲ ᐊᒃᑐᕐᒪᒋᑦ?”
31ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᑕᑯᕗᑎᑦ ᐃᓄᒐᓴᒡᔪᐊᑦ ᓂᓐᓂᐅᕐᑎᒻᒪᑎᑦ ᐊᕙᑎᓕᒫᕐᓂᑦ, ᓱᖕᒪ ᐅᖃᕐᐱᑦ, ᑭᐊ ᐊᒃᑐᕐᐹᖓ?”
32ᓱᖁᓯᕋᓂᓕ ᕿᓂᕐᐳᖅ ᑭᓇᒧᑦ ᐊᒃᑐᕐᑕᐅᖕᒪᖔᕐᒥ. 33ᐊᕐᓇᖅ ᖃᐅᔨᒐᒥ ᐋᖅᑭᒃᑕᐅᓂᕐᒥᓂᒃ ᐅᐸᒍᑎᓯᕗᖅ, ᓴᔪᒡᓗᓂ ᐃᓕᕋᓱᖕᓂᕐᒧᑦ ᓵᖓᓄᑦ ᐅᑯᓪᓗᓂ, ᐅᖃᐅᑎᕚ ᖃᓄᐃᓐᓂᓕᒫᒥᓂᒃ. 34ᔩᓱᓯᐅᑉ ᐅᖃᐅᑎᕚ, “ᐸᓃᒃ ᐅᒃᐱᕐᓂᕕᑦ ᐋᖅᑭᒃᐹᑎᑦ; ᐃᓱᒪᔮᖏᓪᓗᑎᑦ ᕿᒪᕉᑎᓕᕆᑦ, ᐋᖅᑭᒃᑕᐅᒐᕕᑦ ᖃᓄᐃᑦᔪᑎᒋᔭᕐᓂᑦ.”
35ᓱᓕ ᐅᖃᓪᓚᒃᑎᓪᓗᒍ, ᐅᖃᕆᐊᕐᑐᕐᑐᒥᒃ ᕾᔪᖃᕐᐳᖅ ᔧᕉᓯᐅᑉ ᐃᒡᓗᖓᓂᓐᖔᕐᑐᒥᒃ ᐅᖃᕐᓗᓂ, “ᐸᓃᑦ ᑐᖁᕗᖅ. ᓱᖕᒪᑦ ᓱᓕ ᐊᔪᕆᕐᑐᐃᔨ ᕾᑎᓐᓇᓱᐊᕐᐱᐅᒃ?”
36ᔩᓱᓯ ᐅᖃᐅᓯᕆᔭᖏᓐᓂᒃ ᑲᒪᓇᓂ, ᔧᕉᓯ ᐅᖃᐅᑎᕚ, “ᐃᓱᒫᓗᖏᓪᓗᑎᑦ, ᐅᒃᐱᑐᐃᓐᓇᕆᑦ.” 37ᑕᕝᕙ ᑭᓇᒃᑯᑐᐃᓐᓇᕐᓂᒃ ᒪᓕᖁᔨᔪᓐᓃᕐᐳᖅ ᐲᑦᑐᕉᓯ ᔧᒥᓯᑯᒡᓗ ᔪᐊᓇᓯᑯᒃ ᓄᑲᕇᒃ ᒪᓕᖁᔭᑐᐊᕆᕔᑦ. 38ᔧᕉᓯᐅᑉ ᐃᒡᓗᖓᓄᑦ ᑎᑭᓐᓇᒥᒃ, ᑕᕝᕙᓂ ᑕᑯᕗᖅ ᐅᐃᒪᔮᕐᑐᓂᒃ, ᑐᓵᓪᓗᓂᓗ ᓂᐱᖅᑯᑐᓪᓗᑎᒃ ᕿᐊᔪᓂᒃ. 39ᔩᓱᓯ ᑕᕝᕗᖓ ᐃᑎᕋᒥ, ᐅᖃᐅᑎᕔᑦ, “ᓱᖕᒫᑦ ᐅᐃᒪᔮᕐᐱᓯ ᕿᐊᓪᓗᓯᓗ? ᐅᓇ ᓂᕕᐊᕐᓯᐊᖅ ᑐᖁᖓᓐᖏᓚᖅ ᓯᓂᑐᐃᓐᓇᕐᐳᖅ.”
40ᑖᒃᑯᐊ ᔩᓱᓯᒥᒃ ᓱᓕᔪᕐᓴᖏᓂᕐᒧᑦ ᒥᑕᐅᑎᖃᓕᕐᐳᑦ. ᐃᓘᓐᓇᓕᒫᑎᒃ ᐊᓂᑎᑉᐰᑦ, ᓂᕕᐊᕐᓯᐊᑉ ᐊᑖᑕᖓ ᐊᓈᓇᖓᓗ ᐃᓕᓐᓂᐊᕐᑎᓂᓗ ᐱᖓᓱᑦ ᐃᑎᕈᓐᓇᕐᑎᑕᑐᐊᕆᕔᑦ, ᑕᕝᕗᖓ ᓂᕕᐊᕐᓯᐊᑉ ᓇᔪᕐᑕᖓᓄᑦ ᐃᑎᕐᐳᑦ. 41ᓂᕕᐊᕐᓯᐊᖅ ᐊᒡᒐᖏᑎᒍᑦ ᑎᒍᓪᓗᒍ ᐅᖃᐅᑎᕚ, “ᑕᓕᑕ ᑰᒤ” ᐃᒫᒃ ᑐᑭᓕᒃ, “ᓂᕕᐊᕐᓯᐊᑯᓘᒃ, ᐅᖃᐅᑉᐸᒋᑦ ᒪᑭᑦᑎᑦ.”
42ᑕᕝᕔᓐᓇᖅ ᓂᕕᐊᕐᓯᐊᖅ ᒪᑭᑉᐳᖅ ᐱᓱᑲᑕᓕᕐᓗᓂ; ᑖᓐᓇ ᐊᕐᕌᒍᖃᕐᐳᖅ 12ᓂᒃ, ᑖᒃᑯᐊ ᑕᕝᕔᓐᓇᖅ ᑲᒪᓂᐊᕐᓂᕐᒧᑦ ᑎᑭᑕᐅᓕᕐᐳᑦ.
43ᐃᓂᕐᑎᒻᒪᕆᒃᐰᑦ ᑕᒪᑐᒥᖓ ᐃᓄᐃᑦ ᖃᐅᔨᑎᑕᐅᖁᓇᒋᑦ, ᐅᖃᐅᑎᓪᓗᒋᓪᓗ ᓂᕕᐊᕐᓯᐊᖅ ᓂᕆᑎᑕᐅᖁᓪᓗᒍ.
Currently Selected:
ᒫᑯᓯᐅᑉ ᐊᒡᓚᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
