ᒫᑯᓯᐅᑉ ᐊᒡᓚᖏᑦ 4

ᐊᑦᔨᐅᔪᖅ ᑲᓐᖓᕐᓱᐃᔪᖅ

ᒫᑎᐅᓯ 13:1-9; ᓘᑲᓯ 8:4-8

1 # ᓘᑲᓯ 5:1-3. ᑭᖑᓂᖓᒍᑦ ᒐᓕᓕᐊᑉ ᑕᓯᕐᔪᐊᖓᑕ ᓴᓂᐊᓂ ᐊᔪᕆᕐᑐᐃᓕᕆᕗᖅ. ᐃᓄᒋᐊᒃᑐᕐᔪᐊᑦ ᐊᕙᑖᓂ ᐅᓄᓗᐊᕐᓂᖏᓐᓄᑦ ᐅᒥᐊᒧᐊᕐᐳᖅ, ᑕᕝᕙᓂ ᐃᒃᓯᕙᓕᕐᐳᖅ ᐅᒥᐊᒥ ᐃᒫᓃᑦᑐᒥ, ᐃᓄᒋᐊᒃᑐᕐᔪᐊᓪᓗ ᑕᓯᐅᑉ ᓯᓈᓃᑉᐳᑦ. 2ᐊᑦᔨᐅᔪᓂ ᐊᑐᕐᓗᓂ ᐊᒥᓱᓂᒃ ᐊᔪᕆᕐᑐᕐᐰᑦ; ᐃᒫᒃ ᐅᖃᕐᕕᒋᓪᓗᒋᑦ:

3“ᓈᓚᒋᑦᓯ! ᐊᖑᑎᑕᖃᓚᐅᕐᐳᖅ ᑲᓐᖓᕐᓱᐃᔭᕐᑐᕐᑐᒥᒃ ᐱᕈᕐᓯᐊᒃᓴᓂᒃ. 4ᑲᓐᖓᕐᓱᐃᑎᓪᓗᒍ, ᐃᓚᖏᑦ ᐱᕈᕐᓯᐊᒃᓮᑦ ᐊᖅᑯᒻᒧᑦ ᑲᑕᒃᐳᑦ, ᑎᖕᒥᐊᑦ ᑕᒪᐅᓐᖓᕋᒥᒃ ᐳᑯᓕᕐᐰᑦ. 5ᐃᓚᖏᓪᓕ ᑲᑕᒃᐳᑦ ᐅᔭᕋᓛᓄᑦ ᐃᑦᔪᑭᑦᑐᒧᑦ,#4:5 ᐃᑦᔪᖅ- ᓯᕐᒥᖅ ᐃᑦᔪᑭᑦᑐᒦᓇᒥᒃ ᐱᕈᕐᓯᐊᒃᓮᑦ ᐱᕈᑲᐅᕐᑐᕐᐳᑦ. 6ᓯᕿᓂᖅ ᓄᐃᖕᒪᑦ ᐱᕈᓕᓵᕐᑐᑦ ᐆᑕᐅᕗᑦ ᓯᕿᓂᕐᒧᑦ; ᐱᕈᕐᑐᑦ ᐊᒫᑭᓗᐊᕋᒥᒃ#4:6 ᐂᕋᑭᓗᐊᕋᒥᒃ ᐊᑯᓂᐅᖏᑦᑐᖅ ᐸᓂᕐᐳᑦ. 7ᐃᓚᖏᓪᓕ ᐱᕈᕐᓯᐊᒃᓮᑦ ᑲᑕᒃᐳᑦ ᐅᕐᐲᑦ ᑲᑭᓪᓚᕐᓇᕐᑐᓖᑦ ᐊᑯᕐᖓᓐᓄᑦ, ᑲᑭᓪᓚᕐᓇᕐᑐᑦ ᐱᕈᕋᒥᒃ ᐱᕈᕐᑐᑦ ᐃᐱᑎᑉᐰᑦ, ᐱᕈᕐᕕᐅᔪᓐᓃᕐᖢᑎᒃ. 8ᐃᓚᖏᑦ ᐱᕈᕐᓯᐊᒃᓮᑦ ᑲᑕᒃᐳᑦ ᐃᑦᔪᖃᑦᓯᐊᕐᑐᒧᑦ, ᑖᒃᑯᐊ ᐱᕈᐸᓕᐊᓕᕋᒥᒃ, ᐃᓚᖏᑦ ᐱᕈᕐᕕᐅᓪᓗᑎᒃ 30ᓂᒃ, ᐃᓚᖏᓪᓗ 60ᓂᒃ, ᐃᓚᖏᓪᓗ 100ᓂᒃ.”

9ᐅᖃᕆᕗᖅ, “ᑐᓵᔪᓂᒃ ᓯᐅᑎᓖᑦ ᑐᓴᕐᓕᑦ.”

ᐊᑦᔨᐅᔪᑦ ᑖᒃᑯᐊ ᐅᖃᐅᓯᕆᔭᐅᑦᔪᑎᖏᑦ

ᒫᑎᐅᓯ 13:10-17; ᓘᑲᓯ 8:9-10

10ᐃᓄᑑᓕᕐᒪᑦ, ᐃᓚᖏᑦ ᐅᖃᓪᓚᒃᑎᓪᓗᒍ ᑐᓵᖅᑲᐅᔪᑦ ᔩᓱᓯᒧᐊᕐᐳᑦ ᐃᓕᓐᓂᐊᕐᑎᖏᑦ 12 ᐃᓚᒋᓪᓗᒋᑦ, ᐊᐱᕆᓪᓗᑎᒃ ᐊᑦᔨᐅᔪᒥᒃ ᑖᑦᓱᒥᖓ ᑐᑭᓯᓇᕐᓯᑎᑦᓯᖁᓪᓗᒍ. 11ᑭᐅᕔᑦ, “ᐃᓕᑦᓯ ᓇᓗᓇᕐᑐᒥᒃ ᖃᐅᔨᑎᑕᐅᕗᓯ ᒎᑎᐅᑉ ᐊᑕᓂᐅᕕᖓᓂᒃ, ᐊᓯᓯᓕ ᒎᑎᐅᑉ ᐊᑕᓂᐅᕕᖓᑕ ᓯᓚᑖᓃᑦᑐᑦ ᑐᓴᕐᑎᑕᐅᕗᑦ ᐊᑦᔨᐅᔪᑎᒍᑦ; 12#ᐂᓮᐊᓯ 6:9,10.ᑍᒪ,

‘ᐃᔨᒥᖕᓄᑦ ᑕᑯᒐᓗᐊᕐᓗᑎᒃ, ᐃᓕᑕᕐᓯᖁᓇᒋᑦ,

ᓯᐅᑎᒥᖕᓄᓪᓗ ᑐᓵᒐᓗᐊᕐᓗᑎᒃ, ᑐᑭᓯᖁᓇᒋᑦ;

ᑍᒤᓐᖏᒃᑯᑎᒃ ᒎᑎᒧᑦ ᓵᒋᐊᕋᔭᕐᒪᑕ,

ᑖᑦᓱᒪ ᐃᓱᒪᒋᔪᓐᓁᕐᕕᒋᒐᔭᕐᒪᒋᑦ ᐊᔪᕐᓂᖏᓐᓂᑦ.’”

ᔩᓱᓯᐅᑉ ᑐᑭᓯᓇᕐᓯᑎᑦᓯᓂᖓ ᑲᓐᖓᕐᓱᐃᔫᑉ ᐊᑦᔨᐅᑎᑕᐅᓂᖓᓂᒃ

ᒫᑎᐅᓯ 13:18-23; ᓘᑲᓯ 8:11-15

13ᔩᓱᓯᐅᑉ ᐅᖃᐅᑎᕔᑦ, “ᑕᒪᑐᒥᖓ ᐊᑦᔨᐅᔪᒥᒃ ᑐᑭᓯᓐᖏᓚᓰ? ᖃᓄᕐᓕ ᑕᕝᕙ ᐊᑦᔨᐅᔪᓂᒃ ᓇᓕᐊᓐᓂᑐᐃᓐᓇᖅ ᑐᑭᓯᔪᓐᓇᕐᓂᐊᕐᐱᓰ? 14ᑲᓐᖓᕐᓱᐃᔨ ᑲᓐᖓᕐᓱᐃᕗᖅ ᒎᑎᐅᑉ ᐅᖃᐅᓯᖏᓐᓂᒃ. 15ᐃᓄᐃᑦ ᐃᓚᖏᑦ ᐱᕈᕐᓯᐊᒃᓴᑎᑐᑦ ᐊᖅᑯᑎᒧᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ, ᐅᖃᐅᓯᕐᓂᒃ ᑐᓴᕐᒪᑕ, ᓵᑖᓇᓯᐅᑉ ᑕᕝᕙ ᐅᐸᑦᑕᐅᑎᒋᕔᑦ ᐅᖃᐅᓰᑦ ᑖᒃᑯᓄᖓ ᑲᓐᖓᕐᓲᑎᒋᔭᐅᔪᑦ ᐲᔭᕐᐰᑦ. 16ᐃᓚᖏᑦ ᐃᓄᐃᑦ ᐱᕈᕐᓯᐊᒃᓴᑎᑐᑦ ᐅᔭᕋᓛᓄᑦ ᓄᓇᑭᑦᑐᒧᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ, ᐅᖃᐅᓯᕐᓂᒃ ᑐᓴᕋᒥᒃ, ᑕᕝᕔᓐᓇᖅ ᐃᓚᓕᐅᕆᕗᑦ ᖁᕕᐊᓱᒡᓗᑎᒃ; 17ᐅᖃᐅᓰᑦ ᐊᒫᕐᑖᖏᓐᓇᒥᒃ, ᑲᔪᓯᓂᖃᕐᐳᑦ ᓯᕕᑭᑦᑐᒥᒃ; ᐅᖁᒤᑦᑐᑦ ᐊᑭᕋᕐᑐᕐᑕᐅᓃᓪᓗ ᐱᒋᐊᓕᕐᒪᑕ ᐅᖃᐅᓰᑦ ᐱᑦᔪᑎᒋᓪᓗᒋᑦ, ᑕᕝᕔᓐᓇᖅ ᓴᐱᓕᑲᐅᑎᒋᕗᑦ.#4:17 ᓴᐱᕐᕆᐊᑦᓴᐅᑎᒋᕗᑦ 18ᐃᓚᖏᑦ ᐃᓄᐃᑦ ᐱᕈᕐᓯᐊᒃᓴᑎᑐᑦ ᐅᕐᐱᖕᓄᑦ ᑲᑭᓪᓚᕐᓇᕐᑐᓕᖕᓄᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ; ᑖᒃᑯᐊᖑᕗᑦ ᐅᖃᐅᓯᕐᓂᒃ ᑐᓴᕐᑐᑦ, 19ᐃᓅᓯᐅᑉ ᑕᒪᑐᒪ ᐃᓱᒪᔮᕐᓇᕐᓂᖓᓄᑦ, ᐊᔪᕐᓴᖏᑦᑐᒪᓂᕐᒧᓪᓗ, ᐊᓯᖏᓐᓄᓪᓗ ᐱᔪᒪᕕᒃᔪᐊᕐᓂᕐᓄᑦ ᑎᑭᕝᕕᐅᓕᕋᒥᒃ ᐅᖃᐅᓰᑦ ᐃᐱᑎᑕᐅᕗᑦ ᑕᒪᒃᑯᓄᖓ, ᐱᕈᕐᕕᐅᔪᓐᓇᕐᓯᓇᑎᒃ. 20ᐃᓚᖏᓪᓕ ᐃᓄᐃᑦ ᐱᕈᕐᓯᐊᒃᓴᑎᑐᑦ ᐃᑦᔪᖃᑦᓯᐊᕐᑐᒧᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ; ᑖᒃᑯᐊᖑᕗᑦ ᐅᖃᐅᓯᕐᓂᒃ ᑐᓴᕋᒥᒃ ᐃᓚᓕᐅᕆᔪᑦ ᐱᕈᕐᕕᐅᓕᕐᓗᑎᒃ, ᐃᓚᖏᑦ 30ᓂᒃ, ᐃᓚᖏᓪᓗ 60ᓂᒃ, ᐃᓚᖏᓪᓗ 100ᓂᒃ.”

ᓇᓂᕈᐊᖅ ᖃᑦᑕᐅᔭᐅᑉ ᐊᑖᓃᑦᑐᖅ

ᓘᑲᓯ 8:16-18

21 # ᒫᑎᐅᓯ 5:15; ᓘᑲᓯ 11:33. ᔩᓱᓯᐅᑉ ᐅᖃᐅᑎᕔᑦ, “ᓇᓂᕈᐊᕐᒥᒃ ᐃᑎᕐᓯᔪᖃᓲᖑᕚ ᐃᓕᓪᓗᒍ ᖃᑦᑕᐅᔭᐅᑉ ᐊᑖᓄᑦ, ᐅᕝᕙᓗ ᓯᓂᒃᕕᐅᑉ ᐊᑖᓄᑦ ᓇᓂᕈᐊᑉ ᐃᓂᖓᓄᐊᕐᑕᐅᒐᔭᓐᖏᓛᖅ? 22#ᒫᑎᐅᓯ 10:26; ᓘᑲᓯ 12:2.ᐃᔨᕐᑕᐅᓯᒪᔪᖅ ᓴᖅᑭᑎᑕᐅᔪᒫᕐᐳᖅ ᐃᔨᕐᕕᖃᖏᑦᑐᒧᑦ; ᐊᓐᖏᐊᕆᔭᐅᔪᖅ ᓴᖅᑭᑎᑕᐅᔪᒫᐳᖅ ᖃᐅᒪᔪᒧᑦ. 23ᑐᓵᔪᓂᒃ ᓯᐅᑎᓕᒃ, ᑐᓴᕐᓕ.”

24 # ᒫᑎᐅᓯ 7:2; ᓘᑲᓯ 6:38. ᐅᖃᐅᑎᕔᑦ, “ᑐᓴᕐᑕᑦᓯᓐᓂᒃ ᐃᒃᐱᒍᓱᑦᓯᐊᕆᑦᓯ; ᐊᓯᑦᓯᓐᓄᑦ ᐃᖅᑲᕐᑐᐃᓂᓯ ᒪᓕᒡᓗᒍ ᒎᑎᒧᑦ ᐃᖅᑲᕐᑐᕐᑕᐅᔪᒫᕆᕗᓯ, ᐊᒡᓛᑦ ᖃᐅᔨᓴᕐᑕᐅᒻᒪᕆᖕᓂᕐᓴᐅᓗᓯ. 25#ᒫᑎᐅᓯ 13:12; 25:29; ᓘᑲᓯ 19:26.ᐱᖃᕐᑐᖅ ᑐᓂᓯᕕᐅᒃᑲᓐᓂᕐᓂᐊᕐᐳᖅ; ᐱᖃᖏᑦᑐᕐᓕ ᐊᕐᓵᕐᑕᐅᓂᐊᕐᐳᖅ ᒥᑭᔪᒥᒡᓘᓐᓃᑦ ᐱᖃᕋᓗᐊᕐᐸᑦ.”

ᐊᑦᔨᐅᔪᖅ ᐱᕈᕐᓯᐊᒃᓴᐅᑉ ᐱᕈᕐᐸᓪᓕᐊᓂᖓ

26ᐅᖃᕆᕗᖅ, “ᒎᑎᐅᑉ ᐊᑕᓂᐅᕕᖓ ᐃᒤᑦᑑᔮᕐᐳᖅ ᐊᖑᑦ ᐱᕈᕐᓯᐊᒃᓮᑦ ᑲᓐᖓᕐᓲᑎᒃᓴᖓᓂᒃ ᑲᓐᖓᕐᓱᐃᔪᖅ ᐱᕈᕐᓰᕕᖁᑎᒥᓂ, 27ᐅᓐᓄᐊᖑᓕᕐᒪᑦ ᓯᓂᓕᕐᐳᖅ ᒪᑭᓪᓗᓂᓗ ᐅᓪᓛᒃᑯᑦ, ᐱᕈᕐᓯᐊᒃᓮᑦ ᑲᓐᖓᕐᓲᑎᒋᓯᒪᔭᖏᑦ ᓄᐃᓕᕐᐳᑦ ᐱᕈᓕᕐᓗᑎᒃ, ᑖᓐᓇ ᖃᐅᔨᒪᓐᖏᓚᖅ ᖃᓄᖅ ᐱᖕᒪᖔᑕ. 28ᓄᓇᕐᔪᐊᑉ ᑕᒪᑐᒪ ᓇᖕᒥᓂᖅ ᓂᕆᑎᒻᒪᒋᑦ ᐱᕈᕐᑎᓪᓗᓂᒋᓪᓗ, ᐱᕈᕐᑐᑦ ᐱᕈᕐᕕᐅᓕᕐᐳᑦ, ᓯᕗᓪᓕᕐᒥᒃ ᐱᕈᓯᒐᒥᒃ ᓄᐃᓕᕐᐳᑦ, ᑭᖑᓂᖓᒍᑦ ᓂᐊᖁᕐᑖᓯᕗᑦ, ᑭᖑᓪᓕᕐᐹᒥᒃ ᓂᐊᖁᖏᑦ ᐱᕈᕐᓯᐊᒃᓴᖃᓕᕐᐳᑦ. 29#ᔪᐃᓕ 3:13.ᐱᕈᕐᑐᑦ ᐱᕈᕇᑦᓯᐊᕐᒪᑕ, ᐊᖑᑎᐅᑉ ᓇᑲᑎᓕᕐᐰᑦ ᓇᑲᑎᕆᑦᔪᑎᒥᓄᑦ, ᐱᕈᕐᑐᓂᒃ ᑲᑎᕐᓱᐃᕕᒃ ᓇᓪᓕᐅᑎᖕᒪᑦ.”

ᐊᑦᔨᐅᔪᖅ ᐱᕈᕐᓯᐊᑉ ᑲᓐᖓᕐᓲᑎᒃᓴᕐᑕᖓ

ᒫᑎᐅᓯ 13:31-32,34; ᓘᑲᓯ 13:18-19

30ᐅᖃᕆᕗᖅ, “ᖃᓄᕐᓕ ᒎᑎᐅᑉ ᐊᑕᓂᐅᕕᖓ ᐊᑦᔨᖃᕐᓂᕋᕈᓐᓇᕐᐸᕗᑦ ᓱᓇᒥᒡᓗ ᐊᑦᔨᐅᔪᒥᒃ ᐊᑐᕈᓐᓇᕐᐱᑕ? 31ᐃᒤᑦᑑᔭᕐᐳᖅ; ᐊᖑᑦ ᐱᕈᕐᓯᐊᒃᓴᐅᑉ ᑲᓐᖓᕐᓲᑎᒃᓴᕐᑕᖓᓂᒃ ᒪᓯᑕᕐᑦᒥᒃ ᑎᒍᓯᒐᒥ ᓄᓇᒧᑦ ᑲᓐᖓᕐᓲᑎᒋᕚ, ᑖᓐᓇ ᓄᓇᕐᔪᐊᕐᒥ ᐱᕈᕐᓯᐊᒃᓴᓂᑦ ᒥᑭᓐᓂᕐᐸᐅᕗᖅ; 32ᑭᖑᓂᖓᒍᑦ ᑖᓐᓇ ᑲᓐᖓᕐᓲᑕᐅᒐᒥ ᐱᕈᕐᐸᓪᓕᐊᓯᕗᖅ ᐱᕈᕐᑐᓕᒫᓂᑦ ᐊᖏᓂᕐᐸᐅᓕᕐᓗᓂ, ᐊᕙᓚᖓᔪᖏᑦ ᐊᖏᒡᓕᕐᒪᑕ, ᑎᖕᒥᐊᑦ ᑕᕝᕙᓂ ᐅᓪᓗᖃᕈᓐᓇᓕᕐᐳᑦ ᑕᕐᕋᓕᓂᖓᓂ.”

33ᐃᓄᖕᓂᒃ ᐊᔪᕆᕐᑐᐃᕗᖅ ᐊᑦᔨᐅᔪᓂᒃ ᐊᑐᕐᓗᓂ, ᐊᑦᔨᐅᔪᑦ ᑖᒃᑯᐊ ᐊᓯᖏᓐᓂᒃ ᐊᒥᓱᓂᒃ ᐊᔪᕆᕐᑐᐃᑦᔪᑎᖃᕆᕗᖅ, ᐅᖃᓪᓚᒡᕕᒋᕔᑦ ᑐᑭᓯᔪᓐᓇᕐᑕᖏᑎᒍᑦ; 34ᐊᑦᔨᐅᔪᑦ ᐊᓯᐊᒍᑦ ᐅᖃᓪᓚᒃᕕᒋᓐᖏᓔᑦ, ᐃᓕᓐᓂᐊᕐᑎᓂ ᐃᓚᑐᐊᕆᓕᕌᖓᒥᒋᑦ, ᐅᖃᐅᓯᕆᖅᑲᐅᔭᒥᓂᒃ ᐊᑦᔨᐅᔪᓂᒃ ᑕᒤᓐᓂᒃ ᓇᓗᓁᕐᓯᕕᒋᖃᑦᑕᕐᐰᑦ.

ᔩᓱᓯᐅᑉ ᐃᑯᓪᓚᕐᑎᑦᓯᓂᖓ ᐊᓄᕆᒥᒃ

ᒫᑎᐅᓯ 8:23-27; ᓘᑲᓯ 8:22-25

35ᐅᓪᓗᒥ ᑕᕝᕙᓂ ᐅᓐᓄᖕᒪᑦ, ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᑕᓯᐅᑉ ᐊᑭᐊᓄᐊᓚᐅᕐᑕ.” 36ᐃᓄᒋᐊᒃᑐᕐᔪᐊᑦ ᕿᒪᒃᓗᒋᑦ, ᐃᓕᓐᓂᐊᕐᑎᖏᑦ ᐅᒥᐊᒧᐊᕐᐳᑦ ᔩᓱᓯᐅᑉ ᐃᒃᓯᕙᕕᒋᔭᖓᓄᑦ. ᐅᒥᐊᖑᖃᑎᖏᑦᑕᐅᖅ ᒪᓕᒃᑭᕗᑦ. 37ᐊᓄᕆᕐᔪᐊᕐᒧᑦ ᑎᑭᑕᐅᕗᑦ, ᒪᓪᓕᓕᕐᑐᐊᓘᖕᒪᑦ ᐅᒥᐊᖅ ᖃᓪᓕᕋᕐᑕᕐᑕᐅᓕᕐᒪᑦ, ᐃᒻᒪᒃᐸᓪᓕᐊᓕᕐᓗᓂ. 38ᔩᓱᓯ ᐅᒥᐊᑉ ᐊᖁᐊᓂ ᓯᓂᒃᐳᖅ, ᐊᑭᓯᕐᓯᒪᓪᓗᓂ; ᐃᓕᓐᓂᐊᕐᑎᖏᑕ ᑐᐹᕐᓗᒍ ᐅᖃᐅᑎᕚᑦ, “ᐊᔪᕆᕐᑐᐃᔩ ᖃᓄᐃᒃᓴᓐᖏᓚᑏᑦ ᑐᖁᑐᐃᓐᓇᕋᓗᐊᕈᑦᑕ?”

39ᑐᐸᒐᒥ ᐊᓄᕆ ᐃᓂᕐᑎᕐᐹ, ᐃᒪᕐᒧᑦ ᐅᖃᕐᐳᖅ, “ᐃᑯᓪᓚᕐᓗᑎᑦ ᓄᖅᑲᕆᑦ!” ᐊᓄᕆ ᐃᑯᓪᓚᕐᐳᖅ, ᐃᒪᖅ ᐃᑯᓪᓕᐊᒻᒪᕆᓕᕐᓗᓂ. 40ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᓱᖕᒪᑦ ᑲᑉᐱᐊᓱᒃᐱᓯ? ᓱᓕ ᐅᒃᐱᕐᓂᖃᓐᖏᓚᓰ?”

41ᑖᒃᑯᐊ ᑲᒪᕗᑦ ᐊᖏᔪᒥᒃ, ᐃᒻᒥᖕᓄᑦ ᐅᖃᖃᑦᑕᐅᑎᓪᓗᑎᒃ, “ᖃᓄᐃᑦᑑᒐᒥᐅᓇ, ᐊᓄᕆᐅᑉ ᐃᒪᐅᓪᓗ ᓈᓚᒍᓐᓇᕐᑕᖓ!”

Currently Selected:

ᒫᑯᓯᐅᑉ ᐊᒡᓚᖏᑦ 4: EAIB

Highlight

Compare

Copy