ᒫᑯᓯᐅᑉ ᐊᒡᓚᖏᑦ 3
3
ᐊᖑᑎᐅᑉ ᑕᓕᖓ ᓄᑭᖃᖏᑦᑐᖅ
ᒫᑎᐅᓯ 12:9-14; ᓘᑲᓯ 6:6-11
1ᑭᖑᓂᖓᒍᑦ ᔩᓱᓯ ᐅᑎᕆᕗᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᑦ, ᑕᕝᕙᓃᑦᑐᖃᕐᐳᕐᓗ ᐊᖑᒻᒥᒃ ᐊᒡᒐᖃᕐᑐᖅ ᓄᑭᖃᖏᑦᑐᒥᒃ.
2ᐃᓄᐃᑦ ᑕᕝᕙᓃᓚᐅᕆᕗᑦ ᖃᐅᔨᓴᕆᐊᕐᓯᒪᓪᓗᑎᒃ ᐊᖑᑦ ᓴᐸᑎᒥ ᐋᖅᑭᖕᓂᐊᕐᒪᖔᒍ, ᐸᓯᒃᖠᕈᑎᒃᓴᕐᓯᐅᕐᓗᑎᒃ. 3ᐊᖑᑦ ᐊᒡᒐᓕᒃ ᓄᑭᖃᖏᑦᑐᓂᒃ ᐅᖃᐅᑎᕚ, “ᒪᐅᖓ ᕾᒋᑦ.” 4ᐃᓄᐃᑦ ᐅᖃᐅᑎᕔᑦ, “ᐱᖁᔭᕗᑦ ᓴᐸᑎᒥ ᐃᑲᔪᖁᔨᕚᑦ ᐋᓐᓂᕐᓯᖁᔨᕙᓪᓘᓐᓃᑦ? ᐃᓅᓯᕐᒥᒃ ᓴᐳᑦᔨᖁᔨᕚᑦ ᑐᖁᑦᓯᖁᔨᕙᓪᓘᓐᓃᑦ?”
ᐃᓄᐃᓪᓕ ᓂᓪᓕᕐᑐᖃᓐᖏᓚᑦ.
5ᐊᕙᑎᒥᓃᑦᑐᑦ ᑕᑯᓴᕐᐰᑦ ᐊᑲᐅᒃᓴᕈᓐᓃᕐᓗᓂ, ᕿᒃᓵᒍᑎᒋᓪᓗᒋᑦ ᐆᒻᒪᑎᖏᑦ ᓯᑎᔪᐊᓘᖕᒪᑕ, ᐊᖑᒻᒧᑦ ᐅᖃᕐᐳᖅ, “ᐊᒡᒐᑎᑦ ᐃᓵᓚᐅᒃᑭᑦ.” ᑕᕝᕙ ᐃᓵᒃᐰᑦ, ᐋᖅᑭᑦᓯᐊᕐᓗᑎᒃ ᖃᓄᐃᖏᑦᔪᓯᕕᓂᕐᒥᒃᑐᑦ. 6ᑕᕝᕙ ᐹᕆᓯᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂᑦ ᐊᓂᒐᒥᒃ ᐃᕉᑕᓯᐅᑉ ᐃᑲᔪᕐᑎᖏᓐᓂᒃ ᐃᓚᖃᕐᓗᑎᒃ ᑲᑎᕗᑦ, ᖃᓄᖅ ᑐᖁᑦᓯᔪᓇᖔᕐᒥ ᔩᓱᓯᒥᒃ.
ᔩᓱᓯᐅᑉ ᐊᔪᕆᕐᑐᐃᓂᖓ ᑕᓯᐅᑉ ᓯᓈᓂ ᐃᓄᒋᐊᒃᑐᕐᔪᐊᓄᑦ
7ᔩᓱᓯ ᐃᓕᓐᓂᐊᕐᑎᖏᓪᓗ ᒐᓕᓕᐊᒧᑦ ᑕᓯᕐᔪᐊᒧᐊᓕᕐᐳᑦ, ᐃᓄᒋᐊᒃᑐᕐᔪᐊᓂᑦ ᒪᓕᒃᑕᐅᓪᓗᑎᒃ ᒐᓕᓕᐊᒥᓐᖔᕐᑐᓂᑦ; ᔫᑎᐊᒥᓐᖔᕐᑐᓂᓪᓗ, 8ᔨᕉᓴᓕᒻᒥᓐᖔᕐᑐᓂᓪᓗ, ᐂᑐᒥᐊᒥᓪᓗ, ᔪᐊᕐᑕᓂᐅᓪᓗ ᐊᑭᐊᓂᓐᖔᕐᑐᓂᑦ, ᐃᒡᓗᒐᓴᒡᔪᐊᓂᓪᓗ ᑍᕆᒥ ᓮᑐᓂᒥᓪᓗ, ᑕᒪᕐᒥᒃ ᔩᓱᓯᒧᐊᓚᐅᕐᐳᑦ ᑐᓴᓚᐅᕋᒥᒃ ᑖᑦᓱᒪ ᐱᓇᓱᐊᕐᓂᕆᓚᐅᕐᑕᖏᓐᓂᒃ. 9#ᒫᑯᓯ 4:1; ᓘᑲᓯ 5:1-3.ᐃᓕᓐᓂᐊᕐᑎᓂ ᐅᒥᐊᒥᒃ ᐊᑐᐃᓐᓇᕈᐃᖁᓪᓗᒋᑦ ᐅᖃᐅᑎᕔᑦ ᐊᑐᕐᓂᐊᕐᑕᒥᓂᒃ, ᑕᓯᕐᒧᑦ ᐃᓄᖕᓂᑦ ᓯᖏᑕᐅᓂᐊᕋᓱᒋᓪᓗᓂ. 10ᐃᓄᖕᓂᒃ ᐊᒥᓱᓂᒃ ᖃᓂᒪᔪᓂᒃ ᐋᖅᑭᒃᓯᓚᐅᕐᒪᑦ, ᑍᒤᒻᒪᑦ ᖃᓂᒪᔪᑦ ᐃᓄᖕᓂᒃ ᐱᖑᔧᓪᓗᑎᒃ ᔩᓱᓯᒧᐊᕋᓱᐊᕐᐳᑦ ᐊᒃᑐᕈᒪᓪᓗᓂᑦᔪᒃ. 11ᐃᓄᐃᑦ ᐊᓂᕐᓂᕐᓗᑕᐅᓯᒪᔪᑦ ᑖᑦᓱᒥᖓ ᑕᑯᔭᕌᖓᒥᒃ, ᐹᒻᒪᖃᑦᑕᕐᐳᑦ ᕾᒐᓛᓕᕐᓗᑎᒃ, “ᒎᑎᐅᑉ ᐃᕐᓂᕆᕚᑎᑦ.”
12ᔩᓱᓯᐅᑉ ᐊᓂᕐᓂᕐᓗᐃᑦ ᐃᓂᕐᑎᕐᐰᑦ ᐃᓄᖕᓄᑦ ᐅᖃᐅᓯᐅᔪᒪᓇᓂ ᑭᓇᐅᓂᕐᒥᓂᒃ.
ᔩᓱᓯᐅᑉ ᓂᕈᐊᕐᓂᖓ ᐋᐴᓯᑕᓕᖕᓂᒃ 12ᓂᒃ
ᒫᑎᐅᓯ 10:1-4; ᓘᑲᓯ 6:12-16
13ᑭᖑᓂᖓᒍᑦ ᔩᓱᓯ ᖃᖅᑲᒧᑦ ᒪᔪᐊᕐᐳᖅ, ᐊᖑᑎᓂᒃ ᕾᖁᔨᓪᓗᓂ ᓂᕈᐊᕐᑕᒥᓂᒃ; ᑖᒃᑯᐊ ᔩᓱᓯᒧᐊᕐᐳᑦ, 14ᑕᕝᕙ 12 ᓂᕈᐊᕐᐰᑦ, ᓇᔪᕐᑎᒌᓐᓇᕈᒪᓪᓗᒋᑦ, ᑎᓕᔪᒪᓪᓗᒋᑦ ᐊᔪᕆᕐᑐᐃᔭᕐᑐᖁᓪᓗᒋᑦ, 15ᐱᔪᓐᓇᕐᓂᖃᖁᓪᓗᒋᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᓂᕐᒥᒃ: 16ᓮᒨᓂ ᔩᓱᓯᐅᑉ ᐊᑦᑎᕐᐹ ᐲᑦᑐᕉᓯᒥᒃ; 17ᔧᒥᓯᑯᒃ ᔪᐊᓇᓯᑯᒃ ᓄᑲᕇᒃ ᓯᐱᑎᐅᑉ ᐃᕐᓂᖏᒃ, ᔩᓱᓯᐅᑉ ᐊᑎᕐᑖᕐᑎᓚᐅᐹᒃ ᐳᐊᓂᒌᓯᓂᒃ, ᐃᒫᒃ ᑐᑭᓕᒃ, “ᑲᓪᓘᑉ ᐃᕐᓂᖏᒃ”; 18ᐋᓐᑐᕉᓗ, ᐱᓕᑉᐴᓯᓗ, ᐸᑎᐅᓗᒥᐅᓗ, ᒫᑎᐅᓯᓗ, ᑑᒪᓯᓗ, ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ, ᑖᑎᐊᓯᓗ, ᓮᒨᓂᓗ ᑬᓇᓂᒥᐅᖅ,#3:18 ᑬᓇᓂᐊᑦ ᐅᕝᕙᓗ ᐱᑦᑐᕆᐊᑦ ᐃᒫᒃ ᑐᑭᓕᒃ ᓄᓇᒥᓂᒃ ᓯᕐᓈᕐᑎ 19ᔫᑕᓯᓗ ᐃᔅᑲᕆᐊᑦ, ᑖᓐᓇ ᔩᓱᓯᒥᒃ ᐱᔭᐅᑎᑦᓯᓚᐅᕐᑐᖅ.
ᔩᓱᓯᐅᑉ ᐱᐅᓪᓯᐹᐱᒥᒃ ᐃᓗᒻᒥᕐᑕᐅᓯᒪᓂᕋᕐᑕᐅᓂᖓ
ᒫᑎᐅᓯ 12:22-32; ᓘᑲᓯ 11:14-23; 12:10
20ᑭᖑᓂᖓᒍᑦ ᔩᓱᓯ ᐊᖏᕐᕋᕐᐳᖅ; ᐃᓄᒐᓴᒡᔪᐊᑦ ᐊᒻᒪ ᑲᑎᓕᕆᕗᑦ, ᐊᒡᓛᑦ ᔩᓱᓯ ᐃᓕᓐᓂᐊᕐᑎᖏᓪᓗ ᓂᕆᔪᓐᓇᕈᓐᓃᕐᐳᑦ. 21ᐃᓚᖏᑦ ᓇᖕᒥᓂᖏᑦ ᑕᒪᑐᒥᖓ ᑐᓴᕋᒥᒃ, ᐅᐸᒍᑎᕗᑦ ᑕᕝᕙᓐᖓᑦ ᐊᓂᑎᑦᓱᒪᓪᓗᒍ, ᐃᓄᐃᑦ ᐅᖃᖃᑦᑕᓕᕐᒪᑕ, “ᔩᓱᓯ ᐃᓱᒤᕈᑎᓂᕋᕐᓗᒍ.”
22 #
ᒫᑎᐅᓯ 9:34; 10:25. ᐱᖁᔭᓂᒃ ᐃᓕᓮᔩᑦ ᐃᓚᖏᑦ ᔨᕉᓴᓕᒻᒥᓐᖔᕐᓯᒪᔪᑦ ᐃᒫᒃ ᐅᖃᕐᐳᑦ, “ᔩᓱᓯᐅᓇ ᐱᐅᓪᓯᐹᐱᒥᒃ ᐃᓗᒻᒥᕐᑕᐅᓯᒪᒐᒥ, ᐊᓂᕐᓂᕐᓗᐃᑦ ᐊᖓᔪᖅᑳᖓᓐᓂᒃ, ᑖᑦᓱᒪ ᐱᔪᓐᓇᓂᕐᑖᕐᑎᓯᒪᔭᖓ ᐊᓂᕐᓂᕐᓗᖕᓂᒃ ᐊᓂᑎᑦᓯᔪᓐᓇᕐᑎᓪᓗᓂᐅᒃ.”
23ᔩᓱᓯᐅᑉ ᐃᓄᐃᑦ ᕾᖁᕔᑦ, ᐊᑦᔨᐅᔪᒥᒃ ᐅᖃᕐᕕᒋᓪᓗᒋᑦ, “ᖃᓄᕐᓕ ᓵᑖᓇᓯ ᐊᓂᑎᑦᓯᔪᓐᓇᕐᐹ ᓵᑖᓇᓯᒥᒃ? 24ᓄᓇᖁᑎᒋᔭᐅᔪᖅ ᐊᖓᔪᖅᑲᐅᕕᖕᓄᑦ ᐊᕕᒃᑐᕐᓗᑎᒃ ᐃᒻᒥᖕᓄᑦ ᐊᑭᕋᕐᑑᑎᓕᕐᐸᑕ, ᑖᒃᑯᐊ ᓄᓇᖃᑎᒌᖑᔪᑦ ᐊᕕᒃᑐᕈᑎᒃ ᐃᓅᖃᑎᒋᒍᓐᓁᓕᓂᐊᕐᐳᑦ. 25ᐃᓚᒌᑦ ᐃᒡᓗᒥᐅᖃᑎᒌᑦ ᐃᒻᒥᖕᓄᑦ ᐊᕕᓪᓗᑎᒃ ᐊᑭᕋᕐᑐᓕᕈᑎᒃ ᑕᕝᕙ ᐃᒡᓗᒥᐅᖃᑎᒌᑦ ᐊᓯᕈᕐᓗᑎᒃ ᓄᖑᓐᓂᐊᕐᐳᑦ. 26ᑍᒫᒃᑕᐅᖅ ᓵᑖᓇᓯ ᐃᒻᒥᓄᑦ ᐊᕕᒃᑐᕐᓗᓂ ᐊᑭᕋᕐᑐᓕᕈᓂ, ᐊᓯᕈᔪᐃᑦᑑᔪᓐᓇᓐᖏᓚᖅ, ᐊᓯᕈᕐᓗᓂᓕ ᓄᖑᒃᑲᔭᕐᐳᖅ.
27“ᓇᓪᓕᐊᑦ ᓲᖑᔪᕐᔪᐊᑉ ᐃᒡᓗᖓᓄᑦ ᐃᑎᕐᓗᓂ ᐱᖁᑎᖏᓐᓂᒃ ᐊᕐᓵᕐᓯᔪᓐᓇᓐᖏᓚᖅ, ᑭᓯᐊᓂ ᓲᖑᔪᕐᔪᐊᖅ ᕿᓚᒃᓱᖄᕐᓗᒍ; ᑭᖑᕐᖓᒍᑦ ᐃᒡᓗᖓᑕ ᐱᖁᑎᖏᓐᓂᒃ ᐊᕐᓵᓕᕋᔭᕐᐹ.
28“ᓱᓕᔪᒥᒃ ᐅᖃᐅᑎᕙᑦᓯ, ᐃᓄᐃᑦ ᐊᔪᕐᑐᓕᓂᕐᓂᑦ ᒎᑎᒥᒡᓘᓐᓃᑦ ᐅᖃᕐᓂᕐᓗᒃᓯᒪᒐᓗᐊᕐᐸᑕ ᐃᓱᒪᒋᔪᓐᓁᕐᕕᐅᔪᒫᕐᐳᑦ; 29#ᓘᑲᓯ 12:10.ᑭᓯᐊᓂᓕ ᓇᓪᓕᐊᑦ ᐅᖃᕐᓂᕐᓘᑎᖃᕐᐸᑦ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᑖᓐᓇ ᐃᓱᒪᒋᔪᓐᓁᕐᕕᐅᓂᐊᓐᖏᓚᖅ, ᐊᔪᕐᑐᓕᖕᒪᑦ ᐸᓯᔭᒃᓴᐅᓐᓇᕐᑐᒥᒃ ᐃᓱᖃᖏᑦᑐᒧᑦ.” 30ᐃᓄᐃᑦ ᐃᓚᖏᑦ ᐅᖃᓚᐅᕐᒪᑕ, “ᔩᓱᓯᐅᓇ ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᔪᖅ.”
ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ
ᒫᑎᐅᓯ 12:46-50; ᓘᑲᓯ 8:19-21
31ᑕᕝᕙ ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ ᑕᕝᕗᓐᖓᕐᐳᑦ; ᐃᒡᓘᑉ ᓯᓚᑖᓂᓪᓗᑎᒃ ᑖᒃᑯᐊ ᐅᖃᐅᑦᔭᐅᖁᕚᑦ, ᕾᖁᓪᓗᒍ. 32ᐃᓄᒋᐊᒃᑐᓪᓕ ᐊᕙᑖᓂ ᐃᒃᓯᕙᔪᑦ, ᔩᓱᓯᒧᑦ ᐅᖃᕐᐳᑦ, “ᐊᓈᓁᑦ ᖃᑕᓐᖑᑎᑎᓪᓗ ᓯᓚᒦᑉᐳᑦ, ᐃᓕᖕᓂᒃ ᕾᖁᔨᓪᓗᑎᒃ.”
33ᔩᓱᓯᐅᑉ ᑭᐅᕔᑦ, “ᑭᓇ ᐊᓈᓇᒐ ᑭᓇᒃᑯᓪᓘ ᖃᑕᓐᖑᑎᒃᑲ?” 34ᐊᕙᑎᒥᓂᒃ ᐃᒃᓯᕙᔪᑦ ᐃᓄᐃᑦ ᑕᑯᓴᕐᓗᒋᑦ ᐅᖃᕐᐳᖅ, “ᑕᑯᒋᑦ ᐅᕝᕙᐅᑯᐊ ᐊᓈᓇᒃᑲ ᖃᑕᓐᖑᑎᒃᑲᓗ! 35ᓇᓪᓕᐊᑦ ᒎᑎᐅᑉ ᐱᔪᒪᔭᖓᓂᒃ ᐊᑐᕐᑐᖅ ᑖᓐᓇ ᖃᑕᓐᖑᑎᒋᕙᕋ, ᓇᔭᒋᓪᓗᒍᓗ ᐊᓈᓇᒋᕙᕋ.”
Currently Selected:
ᒫᑯᓯᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
