ᒫᑯᓯᐅᑉ ᐊᒡᓚᖏᑦ 2
2
ᔩᓱᓯᐅᑉ ᐊᖑᒻᒥᒃ ᓄᑭᖃᖏᑦᑐᒥᒃ ᐋᖅᑭᒃᓯᓂᖓ
ᒫᑎᐅᓯ 9:1-8; ᓘᑲᓯ 5:17-26
1ᐅᓪᓗᐃᑦ ᑕᒪᒃᑯᐊ ᑭᖑᕐᖓᒍᑦ ᔩᓱᓯ ᐅᑎᕐᐳᖅ ᑲᐲᕐᓂᐊᒧᑦ, ᐅᖃᐅᓯᐅᑲᑕᓕᕆᕗᖅ ᐊᖏᕐᕋᕐᓂᖓᓂᒃ. 2ᐃᓄᐃᑦ ᐊᒥᓱᑦ ᑕᕝᕗᓐᖓᕐᐳᑦ ᐃᓂᒃᓮᕈᑦᔨᓪᓗᑎᒃ, ᐅᒃᑯᐊᖓᑕᓘᓐᓃᑦ ᓯᓚᑖ ᐃᓂᒃᓴᖃᕈᓐᓃᕐᐳᖅ; ᔩᓱᓯ ᐊᔪᕆᕐᑐᐃᓕᕐᐳᖅ ᑖᒃᑯᓄᖓ. 3ᐊᖑᑎᑦ ᓯᑕᒪᑦ ᑕᕝᕗᓐᖓᕐᐳᑦ, ᐊᒡᔭᕐᓯᓪᓗᑎᒃ ᐊᖑᒻᒥᒃ ᓄᑭᖃᖏᑦᑐᒥᒃ ᔩᓱᓯᒧᐊᖁᓪᓗᒍ. 4ᐃᓄᖃᓗᐊᕐᓂᖓᓄᑦ ᔩᓱᓯᒧᐊᕐᑎᑦᓱᓐᓇᖏᓐᓇᒥᑦᔪᒃ, ᐃᒡᓘᑉ ᖄᖓᒍᑦ ᐊᖕᒪᕐᐹᑦ, ᔩᓱᓯᐅᑉ ᓇᔪᕐᑕᖓᑕ ᖁᓛᒍᑦ; ᐃᒡᓘᑉ ᖁᓚᖓ ᐊᖕᒪᕇᕋᒥᑦᔪᒃ, ᐊᖑᑦ ᓄᕿᖃᖏᑦᑐᖅ ᓂᖏᑎᑉᐹᑦ ᓇᓚᕕᖕᒥᓃᑎᓪᓗᒍ. 5ᔩᓱᓯᐅᑉ ᐊᖑᑎᑦ ᑕᑯᒐᒥᒋᑦ ᐅᒃᐱᕐᓂᖃᓪᓚᕆᒃᑐᑦ, ᐊᖑᑦ ᓄᑭᖃᖏᑦᑐᖅ ᐅᖃᐅᑎᕚ, “ᐃᕐᓃᒃ ᐊᔪᕐᓂᑎᑦ ᐃᓱᒪᒋᔭᐅᔪᓐᓃᕐᐳᑦ.”
6ᐱᖁᔭᓂᒃ ᐃᓕᓮᔨᑦ ᐃᓚᖏᑦ ᑕᕝᕙᓂ ᐃᒃᓯᕙᖃᑕᐅᔪᑦ, ᐃᓗᒥᒍᑦ ᐃᓱᒪᓕᕐᐳᑦ, 7“ᓱᖕᒪᓄᓇ ᑍᒫᒃ ᐅᖃᓕᕆᕙ? ᑕᒪᓐᓇ ᒎᑎᒥᒃ ᐅᖃᕐᓂᕐᓘᑎᖃᕐᓂᐅᕗᖅ! ᒎᑎ ᑖᓐᓇᑐᐊᑦᓯᐊᖅ ᐊᔪᕐᓂᕐᓂᒃ ᐃᓱᒪᒋᔪᓐᓁᕐᓯᔪᓐᓇᕐᐳᖅ.”
8ᑕᕝᕔᓐᓇᖅ ᔩᓱᓯᐅᑉ, ᐊᓂᕐᓂᕐᒥᒍᑦ ᖃᐅᔨᒐᒥᒋᒃ ᓱᓇᒥᒃ ᐃᓱᒪᖕᒪᖔᑕ, ᐅᖃᐅᑎᕔᑦ, “ᓱᖕᒪᑦ ᑕᒪᑐᒥᖓ ᐊᐱᕐᓲᑎᖃᕐᐱᓰ? 9ᓇᓪᓕᐊᓐᓂᒃ ᐅᖃᕐᓗᓂ ᐊᔪᕐᓇᖏᓐᓂᕐᓴᐅᕚ ᐆᒧᖓ ᓄᑭᖃᖏᑦᑐᒧᑦ, ‘ᐊᔪᕐᓂᑎᑦ ᐃᓱᒪᒋᔪᓐᓁᕐᑕᐅᕗᑦ,’ ᐅᕝᕙᓗ ᐅᖃᕐᓗᓂ, ‘ᒪᑭᓪᓗᑎᑦ, ᓇᓪᓚᖓᕖᑦ ᑎᒍᓪᓗᒍ, ᐱᓱᓕᕆᑦ?’ 10ᖃᐅᔨᓂᐊᕋᑦᓯ ᐃᓅᑉ ᐃᕐᓂᖓ ᐱᔪᓐᓇᕐᓂᖃᕐᒪᑦ ᑕᒫᓂ ᓄᓇᒥ ᐊᔪᕐᓂᕐᓂᒃ ᐃᓱᒪᒋᔪᓐᓁᕐᓯᔪᓐᓇᕐᒪᑦ,” ᑖᑦᓱᒧᖓ ᓄᑭᖃᖏᑦᑐᒧᑦ ᐅᖃᕐᐳᖅ, 11“ᐅᖃᐅᑎᕙᒋᑦ, ᒪᑭᑦᑎᑦ, ᓇᓪᓚᖓᕖᑦ ᑎᒍᓗᒍ ᐊᖏᕐᕋᓕᕆᑦ.”
12ᑖᓐᓇ ᒪᑭᑉᐳᖅ, ᑕᕝᕔᓐᓇᖅ ᓇᓪᓚᖓᕕᓂ ᑎᒍᓪᓗᓂᐅᒃ ᑕᕝᕙᓐᖓᑦ ᐊᓂᕗᖅ ᑕᑯᓐᓇᕐᑎᓪᓗᒋᑦ; ᑖᒃᑯᐊ ᑕᒪᕐᒥᒃ ᑲᒪᓂᐊᒻᒪᕆᒃᐳᑦ ᒎᑎ ᓂᕐᑐᕐᓗᒍ, ᐅᖃᕐᐳᑦ, “ᑍᒤᑦᑐᒥᒃ ᑕᑯᓚᐅᕐᓯᒪᖏᒻᒪᕆᒃᐳᒍᑦ!”
ᔩᓱᓯᐅᑉ ᕾᖁᔨᓂᖓ ᓕᕔᒥᒃ
ᒫᑎᐅᓯ 9:9-13; ᓘᑲᓯ 5:27-32
13ᔩᓱᓯ ᐊᒻᒪ ᐊᓂᒋᕗᖅ ᒐᓕᓕᐊᑉ ᑕᓯᖓᑕ ᓯᓈᓄᑦ; ᐃᓄᒋᐊᒃᑐᕐᔪᐊᑦ ᐊᕙᑖᓂᓕᕐᐳᑦ, ᐊᔪᕆᕐᑐᓕᕐᐰᑦ. 14ᐱᓱᒃᓗᓂ, ᑕᑯᓕᕆᕗᖅ ᓕᕔᒥᒃ ᐊᐅᓪᐱᐊᓯᐅᑉ ᐃᕐᓂᖓᓂᒃ ᑖᒃᓰᔧᕕᖕᒥ ᐱᓇᓱᐊᕐᕕᖕᒥᓂ ᐃᒃᓯᕙᔪᒥᒃ, ᔩᓱᓯᐅᑉ ᐅᖃᐅᑎᕚ, “ᒪᓕᓐᖓ.” ᑖᓐᓇ ᒪᑭᓐᓇᒥ ᔩᓱᓯ ᒪᓕᓕᕐᐹ.
15ᑭᖑᓂᖓᒍᑦ ᔩᓱᓯ ᓂᕆᖃᑕᐅᓕᕐᐳᖅ ᑖᑦᓱᒪ ᓕᕔᑉ ᐃᒡᓗᖓᓂ, ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᒥᓱᑦ ᐊᔪᕐᑐᓕᔪᓪᓗ ᐃᒃᓯᕙᖃᑕᐅᒋᕗᑦ ᔩᓱᓯᒧᑦ ᐃᓕᓐᓂᐊᕐᑎᖏᓐᓄᓪᓗ; ᐊᒥᓱᑦ ᒪᓕᓚᐅᕐᒪᑕ. 16ᐱᖁᔭᓂᒃ ᐃᓕᓮᔩᑦ ᐹᕆᓯᐅᔪᑦ, ᑕᑯᒐᒥᒃ ᓂᕆᖃᑎᖃᕐᓂᖓᓂᒃ ᐊᔪᕐᑐᓕᔪᓂᒃ ᕉᒪᒥᐅᓪᓗ ᑮᓇᐅᔧᕐᑎᑦᓯᔨᖏᓐᓂᒃ, ᐃᓕᓐᓂᐊᕐᑎᖏᓐᓄᑦ ᐅᖃᕐᐳᑦ, “ᓱᖕᒪᓄᓇ ᓂᕆᖃᑎᖃᕐᐸ ᕉᒪᒥᐅᑦ ᑮᓇᐅᔧᕐᑎᑦᓯᔨᖏᓐᓂᒃ ᐊᔪᕐᑐᓕᔪᓂᒡᓗ?”
17ᔩᓱᓯᐅᑉ ᑐᓴᕋᒥᒋᑦ, ᐅᖃᐅᑎᕔᑦ, “ᖃᓄᐃᖏᑦᑐᑦ ᐋᓐᓂᐊᓯᐅᕐᑎᖃᕆᐊᖃᓐᖏᓚᑦ,#2:17 ᓇᔭᓐᖑᐊᖅ ᖃᓂᒪᔪᓪᓕ ᑭᓯᒥ; ᐃᓗᐊᕐᑐᓂᒃ ᕾᖁᔨᔭᕐᑐᕐᓯᒪᓐᖏᓚᖓ, ᐊᔪᕐᑐᓕᔪᓂᒡᓕ.”
ᓂᕆᑦᑍᓕᓂᕐᒥᒃ ᔩᓱᓯᐅᑉ ᐊᐱᕆᔭᐅᓂᖓ
ᒫᑎᐅᓯ 9:14-17; ᓘᑲᓯ 5:33-39
18ᑍᑦᓱᒪᓂ ᔪᐊᓇᓯ ᐹᑉᑎᑎᕆᔨᐅᑉ ᒪᓕᒃᑎᖏᑦ ᐹᕆᓯᓪᓗ ᓂᕆᑦᑍᓕᓚᐅᕐᐳᑦ; ᐃᓄᐃᑦ ᔩᓱᓯᒧᐊᕐᓗᑎᒃ ᐊᐱᕆᕚᑦ, “ᓱᖕᒪᓂᒃᑯᐊ ᔪᐊᓇᓯ ᐹᑉᑎᑎᕆᔨᐅᑉ ᐃᓕᓐᓂᐊᕐᑎᖏᑦ ᐹᕆᓯᓪᓗ ᐃᓕᓐᓂᐊᕐᑎᖏᑦ ᓂᕆᑦᑍᓕᕙᒃᐹᑦ? ᐃᓕᓐᓂᐊᕐᑎᑎᑦ ᓂᕆᑦᑍᓕᓚᐅᕐᓯᒪᑎᓐᓇᒋᑦ?”
19ᔩᓱᓯᐅᑉ ᐅᖃᐅᑎᕔᑦ, “ᑲᑎᑎᑕᐅᔪᖃᕐᑎᓪᓗᒍ ᓂᕆᔭᕐᑐᖁᔭᐅᓯᒪᔪᑦ ᓂᕆᑦᑍᓕᓲᖑᕚᑦ ᐅᐃᒃᓴᖅ ᑕᕝᕙᓃᑎᓪᓗᒍ? ᖃᐅᔨᒪᕗᓯ ᐅᐃᒃᓴᖅ ᑕᕝᕙᓃᑎᓪᓗᒍ, ᓂᕆᑦᑍᓕᔪᓐᓇᖏᑦᑐᑦ. 20ᐅᓪᓗᐃᑦ ᓇᓪᓕᐅᑎᔪᒫᕐᐳᑦ, ᐅᐃᒃᓴᒥᒃ ᐊᕐᓵᕐᑕᐅᕕᖓᑦ, ᑕᕝᕙ ᓂᕆᑦᑍᓕᓕᕈᒫᕐᐳᑦ.
21“ᐊᓐᓄᕌᑐᖃᕐᒥᒃ ᐃᓚᓯᔪᖃᕐᐸᓐᖏᓚᖅ ᓄᑖᒥᒃ ᐃᕿᔭᑦᑐᒥᒃ; ᐊᓐᓄᕌᑐᖃᖅ ᐃᕿᔭᑦᑐᒥᒃ ᐃᓚᔭᐅᒍᓂ, ᓄᑕᐅᖏᑦᑐᖅ ᐊᓕᒃᑐᕋᔭᕐᒪᒍ, ᐊᓐᓄᕌᑐᖃᕐᓗ ᐊᖏᓂᕐᓴᒥᒃ ᐊᖕᒪᔪᖃᓕᕋᔭᕐᐳᖅ. 22ᐅᐂᓂᒥᒃ ᓄᑖᒥᒃ ᐅᐂᓂᖃᐅᑎᑐᖃᕐᒧᑦ ᐊᒥᕐᒧᑦ ᑯᕕᓯᔪᖃᕐᐸᓐᖏᓚᖅ; ᓄᑖᑉ ᐅᐂᓂᖃᐅᑎᑐᖃᖅ ᐊᒥᖅ ᖄᕐᑎᑐᐃᓐᓇᕐᓂᐊᕐᒪᒍ, ᐅᐂᓂᓗ ᑕᒪᐅᖓᑐᐃᓐᓇᖅ ᑯᕕᒐᔭᑦᐳᖅ, ᐅᐂᓂᖃᐅᑎᑐᖃᕐᓗ; ᑍᒤᒻᒪᑦ ᐅᐂᓂ ᓄᑖᖅ ᑯᕕᔭᐅᔭᕆᐊᖃᕐᐳᖅ ᐅᐂᓂᖃᐅᑎᒧᑦ ᓄᑖᒧᑦ.”
ᓵᐸᑎᒥᒃ ᐊᐱᖅᑯᓯᖃᕐᓂᖅ
ᒫᑎᐅᓯ 12:1-8; ᓘᑲᓯ 6:1-5
23 #
ᒨᓯᓯ ᑕᓪᓕᒪᖏᑦ 23:25. ᑍᑦᓱᒪᓂ ᔩᓱᓯ ᓴᐸᑎᐅᑎᓪᓗᒍ ᐱᓱᓚᐅᕐᐳᖅ ᓂᐊᖂᔭᒃᓴᕐᑕᓕᒃᑯᑦ; ᐃᓕᓐᓂᐊᕐᑎᖏᑦ ᐱᓱᒃᓗᑎᒃ ᓂᐊᖂᔭᒃᓮᑦ ᓄᕗᖏᓐᓂᒃ ᑎᒍᓯᖃᑦᑕᕐᐳᑦ. 24ᐹᕆᓯᑦ ᔩᓱᓯᒧᑦ ᐅᖃᕐᐳᑦ, “ᑕᑯᒋᑦ, ᐃᓕᓐᓂᐊᕐᑎᑎᑦ ᐱᖁᔭᑦᑎᓐᓂᒃ ᒪᓕᒍᓐᓃᕐᐳᑦ ᓴᐸᑎᒥ ᑍᒤᓕᐅᕐᑎᓪᓗᒋᑦ!”
25ᔩᓱᓯᐅᑉ ᐅᖃᐅᑎᕔᑦ, “ᐊᑐᐊᕐᓯᓚᐅᕐᓯᒪᓐᖏᓚᓰ ᑍᕕᑎᐅᑉ ᐱᓂᐊᕐᓂᕆᓚᐅᕐᓯᒪᔭᖓᓂᒃ, ᓂᕿᒃᓴᖃᕈᓐᓃᕋᒥᒃ ᑳᓕᕐᓗᑎᒃ, ᓇᖕᒥᓂᖅ ᐃᓚᒋᔭᖏᓪᓗ? 26#ᒨᓯᓯ ᐱᖓᔪᖏᑦ 24:9.#ᓴᒧᐃᓕ ᓯᕗᓪᓖᑦ 21:1-6.ᑍᕕᑎ ᒎᑎᐅᑉ ᐃᒡᓗᖓᓄᐊᓚᐅᕐᐳᖅ, ᓂᕆᓪᓗᓂ ᓂᐊᖂᔭᓂᒃ ᒎᑎᒧᑦ ᑐᓂᕐᕈᑎᒋᔭᐅᓯᒪᔪᓂᒃ, ᐊᐰᐊᑕ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᑎᓪᓗᒍ, ᐱᖁᔧᑦ ᒪᓕᒡᓗᒋᑦ ᓂᐊᖂᔧᑦ ᑐᓂᕐᕈᓯᕐᑎᑦᓯᔨᓄᑦ ᑭᓯᐊᓂ ᓂᕆᔭᐅᔭᕆᐊᖃᕐᑎᓪᓗᒋᑦ, ᑍᕕᑎᓕ ᓂᕆᓚᐅᕐᐳᖅ ᐃᓚᒥᓄᑦ ᐊᒡᓛᑦ ᑐᓂᓯᓪᓗᓂ.”
27ᔩᓱᓯ ᐅᖃᕐᐳᖅ, “ᓴᐸᑎ ᐋᖅᑭᒃᑕᐅᓯᒪᕗᖅ ᐃᓄᒃ ᐱᑦᔪᑎᒋᓪᓗᒍ; ᐃᓄᒡᓕ ᐋᖅᑭᒃᑕᐅᓯᒪᓐᖏᓚᖅ ᓴᐸᑎ ᐱᓪᓗᒍ; 28ᐃᓅᑉ ᐃᕐᓂᖓ ᐊᑕᓂᐅᖕᒪᑦ ᐊᒡᓛᑦ ᓴᐸᑎᒧᑦ.”
Currently Selected:
ᒫᑯᓯᐅᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
