ᒫᑯᓯᐅᑉ ᐊᒡᓚᖏᑦ 1
1
ᔪᐊᓇᓯ ᐹᑉᑎᑎᕆᔨᐅᑉ ᐊᔪᕆᕐᑐᐃᓂᖓ
ᒫᑎᐅᓯ 3:1-12; ᓘᑲᓯ 3:1-18; ᔪᐊᓇᓯ 1:19-28
1ᐅᖃᐅᓰᑦ ᑐᓴᕈᒥᓇᕐᑐᑦ ᐱᒋᐊᕐᓂᖃᕐᐳᑦ ᔩᓱᓯ ᙭ᔅᑑᓯᒥᒃ, ᒎᑎᐅᑉ ᐃᕐᓂᖓᓂᒃ. 2#ᒪᓚᑬ 3:1.ᓲᕐᓗ ᓇᓚᐅᑦᑍᔨ ᐂᓮᐊᓯ ᑎᑎᕋᕐᓯᒪᖕᒪᑦ:
“ᑕᑯᒋᑦ, ᐅᖃᕆᐊᕐᑐᕐᑎᑕᕋ ᓯᕗᓂᕐᓂ ᑎᓕᕙᕋ,
ᐊᖅᑯᑎᒃᓴᕐᓂᒃ ᐋᖅᑭᒃᓱᐃᖁᓪᓗᒍ.
3 #
ᐂᓮᐊᓯ 40:3. ᑖᓐᓇ ᓂᐱᖅᑯᕐᑐᓗᓂ ᐅᖃᓪᓚᒍᒫᕐᐳᖅ ᐃᓄᖃᖏᑦᑐᒥ;
ᐊᑕᓂᐅᑉ ᐊᖅᑯᑎᒃᓴᖓ ᐋᖅᑭᒃᓱᕐᓯᐅᒃ,
ᐃᖏᕐᕋᕕᒋᓂᐊᕐᑕᖓ ᐊᖅᑯᑦ ᑐᑭᓕᐊᕐᓯᑎᓪᓗᒍ.”
4ᔪᐊᓇᓯ ᐹᑉᑎᑎᕆᔨ ᓴᖅᑭᓚᐅᕐᐳᖅ ᐃᓄᖃᖏᑦᑐᒥ, ᐊᔪᕆᕐᑐᐃᓪᓗᓂ ᐹᑉᑎᑦᓯᕙᒡᓗᓂᓗ ᖃᕿᐊᓕᖁᓪᓗᒋᑦ ᐊᔪᕐᓃᑦ ᐃᓱᒪᒋᔪᓐᓁᕐᑕᐅᖁᓪᓗᒋᑦ. 5ᐃᓄᐃᑦ ᐊᒥᓱᑦ ᓄᓇᒥᑦ ᔫᑎᐊᒥᑦ, ᔨᕉᓴᓕᒻᒥᓪᓗ ᑐᓵᔭᕐᑐᕐᐳᑦ ᔪᐊᓇᓯᒥᒃ; ᐊᔪᕐᓂᕐᒥᓂᒃ ᖃᕿᐊᓕᕐᒪᑕ, ᔪᐊᓇᓯᐅᑉ ᐹᑉᑎᑉᐰᑦ ᑰᖕᒥ ᔪᐊᕐᑕᓂᒥ.
6 #
ᐊᑕᓃᑦ ᐂᑉᐸᖏᑦ 1:8. ᔪᐊᓇᓯ ᐊᓐᓄᕌᖃᓚᐅᕐᐳᖅ ᑳᒥᓕᐅᑉ ᒥᖅᑯᖓᓂᒃ ᐊᓐᓄᕌᓕᐊᕆᓯᒪᔪᒥᒃ, ᐊᒥᕐᒥᒡᓗ ᕿᑎᕈᓯᕐᓯᒪᓪᓗᓂ, ᓂᕿᖃᕐᓗᓂᓗ ᐱᒡᓕᕐᑕᐅᔮᕐᑐᓂᒃ ᐃᒍᑦᓮᓪᓗ ᓰᕐᓇᐅᑎᖏᓐᓂᒃ ᕼᐊᓂᒥᒃ.#1:6 ᐃᒍᑦᓮᑦ ᒪᒪᕐᑐᖏᓐᓂᒃ 7ᐃᓄᖕᓄᑦ ᐊᔪᕆᕐᑐᐃᕗᖅ, ᐅᖃᕐᓗᓂ: “ᐊᖑᑦ ᑭᖑᓂᓐᓂ ᑎᑭᓐᓂᐊᕐᑐᖅ ᐅᕙᓐᓂᑦ ᐊᔪᖏᓐᓂᕐᓴᕐᔪᐊᖑᕗᖅ, ᓇᓗᖅᑯᑎᕗᖓᓗ ᐅᑯᓗᖓ ᐃᑎᒐᒍᑎᖏᑦᑕ ᕿᓚᒃᓯᒪᐅᑎᖏᓐᓂᒃ ᐲᕐᓯᔭᕆᐊᒥᒃ.#1:7 ᐃᑎᒐᒍᑎᖏᓐᓂᒃ ᓯᖐᑦᔮᕐᓯᔭᕆᐊᒃᓴᖅ 8ᐃᒥᕐᒧᑦ ᐹᑉᑎᑉᐸᑦᓯ; ᑖᑦᓱᒪᓕ ᐹᑉᑎᑦᓱᒫᕐᐹᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ.”
ᔩᓱᓯᐅᑉ ᐹᑉᑎᑕᐅᓂᖓ ᐆᒃᑐᕐᓗᒃᑕᐅᓂᖓᓗ
ᒫᑎᐅᓯ 3:13—4:11; ᓘᑲᓯ 3:21-22; 4:1-13
9ᑕᒪᑐᒪ ᑭᖑᓂᖓᒍᑦ ᔩᓱᓯ ᓈᓴᕇᑎᒥᓐᖔᕐᐳᖅ ᒐᓕᓕᐊᒥᑦ, ᔪᐊᓇᓯᒧᓪᓗ ᐹᑉᑎᑕᐅᕗᖅ ᑰᖕᒥ ᔪᐊᕐᑕᓂᒥ. 10ᔩᓱᓯ ᐃᒫᓂᑦ ᖃᑭᖕᒪᑦ, ᕿᓚᖕᒥ ᐊᖕᒪᕐᑐᒥᒃ#1:10 ᐅᒃᑯᐃᕐᑐᒥᒃ ᑕᑯᕗᖅ ᒎᑎᐅᑉ ᐊᓂᕐᓂᖓ ᐊᖅᑲᕐᑐᖅ ᑎᖕᒥᐊᑎᑐᑦ ᑑᕕᑎᑐᑦ ᑖᑦᓱᒧᓐᖓᕐᓗᓂ. 11#ᒨᓯᓯ ᓯᕗᓪᓖᑦ 22:2; ᐃᓐᖏᕈᑦ 2:7; ᐂᓮᐊᓯ 42:1; ᒫᑎᐅᓯ 3:17; 12:18; ᒫᑯᓯ 9:7; ᓘᑲᓯ 3:22.ᓂᐱᒥᒃ ᕿᓚᖕᒥᑦ ᑐᓴᕐᓴᐅᔪᖃᕐᐳᖅ, “ᐃᕐᓂᕆᕙᒋᑦ ᓇᒡᓕᒋᔭᕋ; ᖁᕕᐊᓲᑎᒋᑦᓯᐊᕐᐸᒋᑦ.”
12ᐊᓂᕐᓂᐅᑉ ᑕᕝᕔᓐᓇᖅ ᐊᐅᓪᓚᕈᑎᕚ ᐃᓄᖃᖏᑦᑐᒧᑦ. 13ᐃᓄᖃᖏᑦᑐᒦᓚᐅᕐᐳᖅ ᐅᓪᓗᓂᒃ 40ᓂᒃ, ᓵᑖᓇᓯᒧᑦ ᐱᐅᓐᖏᑐᒧᑦ ᐱᔪᒥᓵᕐᑕᐅᓪᓗᓂ; ᓂᕐᔪᑏᓪᓗ ᓄᔪᐊᕐᑐᑦ ᑕᒫᓃᓚᐅᕆᕗᑦ; ᐂᖏᓖᓪᓕ ᐅᐸᒃᐹᑦ ᐃᑲᔪᕐᓗᒍ.
ᔩᓱᓯᐅᑉ ᕾᖁᔨᓂᖓ ᐃᖃᓗᒐᓱᒃᑎᓂᒃ ᓯᑕᒪᓂᒃ
ᒫᑎᐅᓯ 4:12-22; ᓘᑲᓯ 4:14-15; 5:1-11
14ᔪᐊᓇᓯᐅᑉ ᑎᒍᔭᐅᓂᖓᑕ ᑭᖑᕐᖓᓂ, ᔩᓱᓯ ᒐᓕᓕᐊᒧᐊᕐᐳᖅ, ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᒎᑎᒥᒃ ᐊᔪᕆᕐᑐᐃᔪᑎᖃᕐᓗᓂ. 15#ᒫᑎᐅᓯ 3:2.ᐅᖃᕐᓗᓂ, “ᒫᓐᓇ ᓇᓪᓕᐅᑎᕗᖅ, ᒎᑎᐅᑉ ᐊᑕᓂᐅᕕᖓ ᖃᒡᓕᕗᖅ; ᖃᕿᐊᓕᕆᑦᓯ, ᐅᖃᐅᓰᑦ ᑐᓴᕈᒥᓇᕐᑐᑦ ᐅᒃᐱᕆᓯᒋᑦ.”
16ᔩᓱᓯ ᐱᓱᒃᓗᓂ ᒐᓕᓕᐊᑉ ᑕᓯᖓᑕ ᓯᓈᒍᑦ, ᐃᖃᓗᒐᓱᒃᑏᖕᓂᒃ ᒪᕐᕉᖕᓂᒃ ᑕᑯᒐᒥ, ᓮᒨᓂᒥᒃ ᐋᓐᑐᕉᒥᒡᓗ ᓄᑲᕇᖕᓂᒃ ᐃᒫᓂ ᓄᓗᐊᕐᓂᐊᕐᑑᖕᓂᒃ. 17ᔩᓱᓯ ᑖᒃᑯᖕᓄᖓ ᐅᖃᕐᐳᖅ, “ᒪᓕᒃᓯᓐᖓ ᐊᔪᕆᕐᑑᑎᓂᐊᕋᑦᓯᒃ ᖃᓄᖅ ᐃᖃᓗᒐᓱᒃᑐᒃᓴᐅᖕᒪᖔᑦᓯᒃ ᐃᓄᖕᓂᒃ.” 18ᑕᕝᕔᓐᓇᖅ ᓄᓗᐊᒥᖕᓂᒃ ᕿᒤᓪᓗᑎᒃ ᔩᓱᓯᒥᒃ ᒪᓕᒃᓴᕐᐳᒃ.
19ᑕᐅᕗᖓᒃᑲᓐᓂᖅ ᐱᓱᒃᑲᒥ, ᑕᑯᒋᕗᖅ ᓄᑲᕇᖕᓂᒃ, ᔧᒥᓯᒥᒃ ᔪᐊᓇᓯᒥᒡᓗ ᓯᐱᑎᐅᑉ ᐃᕐᓂᖏᖕᓂᒃ, ᑖᒃᑯᐊᒃ ᐅᒥᐊᒥᓃᑉᐴᒃ ᓄᓗᐊᒥᖕᓂᒃ ᐊᓕᒃᓯᒪᓃᔧᓪᓗᑎᒃ. 20ᑕᑯᒐᒥᒋᒃ ᕾᖁᕚᒃ; ᐊᑖᑕᒥᖕᓂᒃ ᓯᐱᑎᒥᒃ ᕿᒤᓪᓗᑎᒃ ᐅᒥᐊᒧᑦ ᐃᓚᑐᐊᖃᓕᕐᑎᓪᓗᒍ ᐱᓇᓱᒃᑎᖁᑎᒥᓂᒃ, ᔩᓱᓯᒥᕐ ᒪᓕᓕᕐᐳᒃ.
ᐊᖑᑎᐅᑉ ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᔫᑉ ᐋᖅᑭᒃᑕᐅᓂᖓ
ᓘᑲᓯ 4:31-37
21ᑲᐲᕐᓂᐊᒧᑦ ᑎᑭᑉᐳᑦ; ᓴᐸᑎᐅᓕᕐᒪᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓄᐊᕐᐳᖅ ᐊᔪᕆᕐᑐᐃᓕᕐᓗᓂ. 22#ᒫᑎᐅᓯ 7:28,29.ᑐᓵᔪᑦ ᑲᒪᓂᐊᕐᐳᑦ ᐊᔪᕆᕐᑐᐃᓂᖓᓂᒃ, ᐱᖁᔭᓂᒃ ᐃᓕᓮᔨᑎᑐᑦ ᐊᔪᕆᕐᑐᐃᖏᒻᒪᑦ; ᐊᔪᕆᕐᑐᐃᖕᒪᓪᓕ ᐱᔪᓐᓇᕐᓯᑎᑕᐅᓯᒪᔪᑎᑐᑦ.
23ᐊᔪᕆᕐᑐᐃᑎᓪᓗᒍ ᐃᑎᕐᑐᖃᕐᐳᖅ ᑲᑎᒪᕕᒋᔭᖓᓐᓄᑦ ᐊᖑᒻᒥᒃ ᐊᓂᕐᓂᕐᓗᖕᒧᑦ ᐃᓗᒻᒥᕐᑕᐅᓯᒪᔪᒥᒃ; 24ᕾᒐᓛᓕᕐᐳᖅ, “ᐅᕙᑦᑎᓐᓂᒃ ᖃᓄᐃᓕᐅᕆᐊᕐᑐᕐᐲᑦ ᔩᓱᓯ ᓈᓴᕇᑎᒥᐅᖅ? ᐅᕙᑦᑎᓐᓂᒃ ᐊᓯᕈᐃᔭᕐᑐᕐᐲᑦ? ᖃᐅᔨᒪᕗᖓ ᑭᓇᐅᖕᒪᖔᕐᐱᑦ; ᒎᑎᐅᑉ ᐃᑦᔪᕐᓁᑦᑐᖁᑎᒋᕚᑎᑦ.”
25ᔩᓱᓯᐅᑉ ᐊᓂᕐᓂᕐᓗᒃ ᐃᓂᕐᑎᕐᐹᒃ, ᐅᖃᕐᓗᓂ, “ᓂᐱᖃᓐᖏᓚᐅᕆᑦ, ᐃᓄᖕᒥᑦ ᑕᕝᕙᓐᖓᑦ ᐊᓂᒋᑦ!”
26ᐊᓂᕐᓂᕐᓘᑉ, ᐃᓄᒃ ᐊᐅᓚᑎᒻᒪᕆᓕᕐᐹ ᓂᓪᓕᐊᔪᐊᓘᓪᓗᓂ, ᑖᑦᓱᒪᖓᑦ ᐊᓂᕗᖅ. 27ᐃᓄᓕᒫᑦ ᑲᒪᓂᐊᒻᒪᕆᒃᐳᑦ, ᐃᒻᒥᖕᓄᑦ ᐅᖃᖃᑎᒌᓕᕐᓗᑎᒃ, “ᖃᓄᐃᑦᑐᕐᖑᓈ? ᓄᑖᒥᒃ ᐊᔪᕆᕐᑐᓯᕐᑕᖃᓕᕆᕚ? ᐱᔪᓐᓇᕐᓂᒃᑯᑦ ᐊᓂᖁᔨᕗᖅ ᐊᓂᕐᓂᕐᓗᖕᒥᒃ, ᓈᓚᒃᑕᐅᓪᓗᓂᓗ.”
28ᑕᕝᕔᓐᓇᖅ ᔩᓱᓯᐅᑉ ᐱᓂᐊᕐᓂᖓ ᐊᑯᓂᐅᖏᑦᑐᖅ ᑐᓴᐅᒪᔭᐅᓕᕐᐳᖅ ᒐᓕᓕᐊᑉ ᖃᓂᒋᔭᓕᒫᖓᓂ.
ᔩᓱᓯᐅᑉ ᐋᖅᑭᒃᓯᓂᖓ ᐃᓄᖕᓂᒃ ᐊᒥᓱᓂᒃ
ᒫᑎᐅᓯ 8:14-17; ᓘᑲᓯ 4:38-41
29ᔧᒥᓯ ᔪᐊᓇᓯᓗ ᐃᓚᒋᓪᓗᒋᒃ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓂᑦ ᐊᓂᕗᑦ, ᓮᒨᓂᐅᑉ ᐋᓐᑐᕉᓪᓗ ᐊᖏᕐᕋᖓᓄᑦ ᐂᓪᓗᑎᒃ. 30ᑕᕝᕗᖓᕐᒪᑕ ᐅᖃᐅᑦᔭᐅᕗᖅ ᓮᒨᓂᐅᑉ ᓴᑭᖓ ᐊᕐᓇᖅ ᖃᓂᒪᖕᒪᑦ ᐃᒡᓕᕐᒥ ᓇᓚᓪᓗᓂ, ᐆᑎᕐᓇᕐᑐᒥᒃ ᖃᓂᒪᓪᓗᓂ. 31ᔩᓱᓯᐅᑉ ᐅᐸᒃᓗᒍ ᐊᒡᒐᖏᑎᒍᑦ ᑎᒍᓪᓗᒍ ᐃᖏᑎᑉᐹ, ᐆᑎᕐᓇᕐᑐᒧᑦ ᕿᒪᒃᑕᐅᕗᖅ; ᑖᑦᓱᒪ ᓂᕆᑎᓕᕐᐰᑦ.
32ᓯᕿᓂᖅ ᓂᐱᖕᒪᑦ, ᐅᓐᓄᒃᑎᓪᓗᒍ, ᖃᓂᒪᔪ ᑕᒪᕐᒥᒃ, ᐊᓂᕐᓂᕐᓗᖕᓄᓪᓗ ᐃᓗᒻᒥᑦᑕᐅᓯᒪᔪᑦ ᔩᓱᓯᒧᐊᕈᑎᕔᑦ. 33ᐃᒡᓗᒐᓴᖕᒥᐅᑦ ᐃᓄᓕᒫᖏᑦ ᐃᒡᓘᑉ ᓯᓚᑖᓂ ᑲᑎᓐᖓᓕᕐᐳᑦ. 34ᖃᓄᑐᐃᓐᓇᖅ ᖃᓂᒻᒪᓯᓖᑦ ᐊᒥᓱᑦ ᐋᖅᑭᒃᐰᑦ, ᐊᓂᕐᓂᕐᓗᖕᓄᓪᓗ ᐃᑎᕐᕕᐅᓯᒪᔪᑦ ᐊᒥᓱᑦ ᐊᓂᑎᑦᓯᕕᒋᕔᑦ; ᐊᓂᕐᓂᕐᓗᐃᑦ ᐅᖃᕐᕕᖃᕐᑎᓐᖏᓔᑦ, ᖃᐅᔨᒪᖕᒪᑕ ᑭᓇᐅᖕᒪᖔᑦ.
ᔩᓱᓯᐅᑉ ᐊᔪᕆᕐᑐᐃᓂᖓ ᒐᓕᓕᐊᒥ
ᓘᑲᓯ 4:42-44
35ᐅᓪᓛᒻᒪᕆᒃᑯᑦ ᖃᐅᒻᒪᓚᐅᕐᑎᓐᓇᒍ ᓱᓕ, ᔩᓱᓯ ᒪᑭᑉᐳᖅ ᐊᓂᓪᓗᓂ ᐃᒡᓗᒥᑦ ᐃᓄᖃᖏᑦᑐᒧᐊᕐᐳᖅ ᐃᓄᑑᓪᓗᓂ, ᑕᕝᕙᓂ ᑐᒃᓯᐊᕐᐳᖅ. 36ᓮᒨᓂ ᐃᓚᒋᔭᖏᓪᓗ ᐃᒡᓗᒥᑦ ᐊᓂᒋᕗᑦ ᕿᓂᓕᕐᓗᑎᒃ ᔩᓱᓯᒥᒃ, 37ᓇᓂᒐᒥᑦᔪᒃ ᐅᖃᐅᑎᕚᑦ, “ᐃᓄᓕᒫᓄᑦ ᕿᓂᕐᑕᐅᓕᕐᐳᑎᑦ.”
38ᔩᓱᓯᐅᑉ ᐅᖃᐅᑎᕔᑦ, “ᓄᓇᓕᖕᓄᑦ ᐊᓯᖏᓐᓄᐊᕐᑐᒃᓴᐅᓕᕆᕗᒍᑦ, ᐊᔪᕆᕐᑐᕆᐊᖃᕐᒥᒐᒃᑭᑦ; ᑕᒪᓐᓇ ᐱᑦᔪᑎᒋᓪᓗᒍ ᑕᒪᐅᓐᖓᕐᓯᒪᒐᒪ.”
39 #
ᒫᑎᐅᓯ 4:23; 9:35. ᑍᒤᒻᒪᑦ ᐃᖏᕐᕋᓚᐅᕐᐳᖅ ᒐᓕᓕᐊᒦᑦᑐᓕᒫᓄᑦ ᓄᓇᓕᖕᓄᑦ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐊᔪᕆᕐᑐᐃᕙᒡᓗᓂ, ᐊᓂᕐᓂᕐᓗᖕᒥᑦ ᐃᑎᕐᑕᐅᓯᒪᔪᑦ ᐃᓄᐃᑦ ᐊᓂᑎᑦᓯᕕᒋᕔᑦ.
ᔩᓱᓯᐅᑉ ᐊᖑᒻᒥᒃ ᐋᖅᑭᒃᓯᓂᖓ
ᒫᑎᐅᓯ 8:1-4; ᓘᑲᓯ 5:12-16
40ᐊᖑᑦ ᓯᕘᕋᒋᔭᐅᔪᒥᒃ ᐸᕐᑎᕐᑐᖅ ᔩᓱᓯᒧᐊᕐᐳᖅ, ᓵᖓᓄᑦ ᓰᖅᑯᕐᓗᓂ ᔩᓱᓯᒧᑦ ᐃᑲᔪᕐᑕᐅᔪᒪᓪᓗᓂ ᐅᖃᕐᐳᖅ, “ᐱᔪᒪᒍᕕᑦ, ᐸᕐᑎᕈᓐᓃᕐᑎᑦᓱᓐᓇᕐᐸᕐᒪ.”
41ᔩᓱᓯᐅᑉ ᓇᓪᓕᒋᓕᕐᐹ, ᐃᓴᒃᓗᒍ ᐊᒃᑐᕐᓗᓂᐅᒃ, ᐅᖃᐅᑎᕚ, “ᐱᔪᒪᕗᖓ, ᐸᕐᑎᕈᓐᓃᕆᑦ.” 42ᑕᕝᕔᓐᓇᖅ ᐊᖑᑦ ᓯᕘᕋᒋᔭᐅᔪᒥᒃ ᐸᕐᑎᕈᓐᓃᕐᐳᖅ. 43ᔩᓱᓯᐅᑉ ᕿᒪᕉᑎᖁᓚᐅᕋᓂᐅᒃ ᐃᓂᕐᑎᓪᓚᕆᒃᓗᒍ ᐅᖃᐅᑎᕚ, 44#ᒨᓯᓯ ᐱᖓᔪᖏᑦ 14:1-32.“ᑕᒪᓐᓇ ᑭᓇᑐᐃᓐᓇᕐᒧᑦ ᐅᖃᐅᓯᕆᑦᑍᓕᒍᒃ; ᑐᒃᓯᐊᕐᕕᒡᔪᐊᒥᓕ ᑐᓂᕐᕈᓯᕐᑎᑦᓯᔨᒧᑦ ᐂᓕᕆᑦ, ᑖᑦᓱᒧᖓ ᖃᐅᔨᓴᕐᑕᐅᓂᐊᕋᕕᑦ; ᐃᓄᓕᒫᓄᑦ ᖃᐅᔨᔭᐅᖁᓪᓗᑎᑦ ᐋᖅᑭᒃᑕᐅᑦᓯᐊᕐᓂᕐᓂᒃ, ᒨᓯᓯᐅᑉ ᑐᓂᔭᐅᖁᔭᖓᓂᒃ ᑐᓂᕐᕈᓯᕐᓂᐊᕐᐳᑎ.”
45ᐊᖑᑦ ᕿᒪᕉᑎᒐᒥ ᐅᖃᕐᑍᓕᒪᖏᑦᓯᐊᕐᓗᓂ ᐅᖃᖃᑦᑕᕐᐳᖅ, ᐅᖃᓗᐊᕐᓂᖓᓄᑦ ᔩᓱᓯ ᓴᖅᑭᔮᑦᓯᐊᕐᓗᓂ ᓄᓇᓕᖕᓄᐊᕈᓐᓁᓪᓕᕗᖅ, ᐃᓄᖃᖏᑦᑐᒥ ᑭᓯᐊᓂ ᐃᓂᖃᕈᓐᓇᓕᕐᐳᖅ; ᐃᓄᐃᑦ ᔩᓱᓯᒧᐊᕐᐳᑦ ᓇᑭᑐᐃᓐᓈᕐᓯᒪᔪᑦ.
Currently Selected:
ᒫᑯᓯᐅᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
