ᒫᑯᓯᐅᑉ ᐊᒡᓚᖏᑦ 15
15
ᔩᓱᓯᐅᑉ ᓵᓐᖓᔭᐅᓂᖓ ᐰᓛᑑᓯᐅᑉ ᓵᖓᓂ
ᒫᑎᐅᓯ 27:1-2,11-14; ᓘᑲᓯ 23:1-5; ᔪᐊᓇᓯ 18:28-38
1ᐅᓪᓛᖑᓕᕐᒪᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᑲᑎᒪᖃᑎᖃᓕᕐᐳᑦ ᔫᑎᑦ ᐊᖓᔪᖅᑳᖏᓐᓂᒃ ᐱᖁᔭᓂᒡᓗ ᐃᓕᓮᔨᓂᒃ, ᐃᖅᑲᕐᑐᐃᔨᓕᒫᓂᒡᓗ. ᔩᓱᓯ ᕿᓚᒃᓱᕐᐹᑦ, ᐊᐅᓪᓚᕈᑎᓪᓗᒍ, ᐰᓛᑑᓯᒧᑦ ᐂᑦᑑᑎᒋᕚᑦ. 2ᐰᓛᑑᓯᐅᑉ ᔩᓱᓯ ᐊᐱᕆᕚ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᕐᐳᑎᑦ.”
3ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑕ ᔩᓱᓯ ᐸᓯᓇᓱᐊᕐᐹᑦ ᓱᓇᑐᐃᓐᓇᕐᓄᑦ ᐊᑦᔨᒌᖏᑦᑐᓄᑦ. 4ᐰᓛᑑᓯᐅᑉ ᑕᕝᕙ ᐊᐱᕆᒃᑲᓐᓂᕐᐹ, “ᑭᐅᑦᔪᑎᒃᓴᖃᓐᖏᓚᑏᑦ ᖃᓄᑐᐃᓐᓇᖅ ᐊᒥᓱᓂᒃ ᐸᓯᔭᐅᓇᓱᖕᓂᕐᓄᑦ?”
5ᔩᓱᓯ ᓱᓕ ᑭᐅᓐᖏᓚᖅ, ᑕᕝᕙ ᐰᓛᑑᓯ ᐊᖏᔪᒥᒃ ᑲᒪᓂᐊᕐᐳᖅ.
ᔩᓱᓯᐅᑉ ᑐᖁᑕᒃᓴᓐᖑᕐᑎᑕᐅᓂᖓ
ᒫᑎᐅᓯ 27:15-26; ᓘᑲᓯ 23:13-25; ᔪᐊᓇᓯ 18:39—19:16
6ᖄᖏᕐᑕᐅᕕᒃ ᓇᓪᓕᐅᑎᔭᕌᖓᑦ, ᐰᓛᑑᓯ ᐱᐅᓯᖃᕐᐸᒃᐳᖅ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᓂᑎᑦᓯᕙᒡᓗᓂ, ᐃᓄᐃᑦ ᐊᓂᑎᑕᐅᑯᔭᖓᓐᓂᒃ. 7ᑍᑦᓱᒪᓂ ᑎᒍᔭᐅᓯᒪᔪᖃᓚᐅᕐᐳᖅ ᐸᕋᐹᓯᒥᒃ ᐊᑎᓕᖕᒥᒃ ᑖᓐᓇ ᑎᒍᔭᐅᓚᐅᕐᑐᖅ ᐃᓄᖕᒥᒃ ᑐᖁᑦᓯᓚᐅᕐᒪᑦ ᐱᔮᕆᓪᓗᑎᒃ ᐱᕋᔭᒃᑐᐊᓘᑎᓪᓗᒋᑦ. 8ᐃᓄᒐᓴᒡᔪᐊᓪᓕ ᐰᓛᑑᓯᒧᐊᕐᓗᑎᒃ ᐊᐱᕆᓚᐅᕐᐳᑦ ᐱᔪᒪᔭᒥᖕᓂᒃ ᐱᐅᓯᕆᓲᖓᓂᒃ ᐊᑐᕐᑎᑕᐅᔪᒪᓪᓗᑎᒃ. 9ᑕᕝᕙ ᐰᓛᑑᓯᐅᑉ ᐅᖃᐅᑎᕔᑦ, “ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᐊᐅᓪᓚᕐᑎᑦᓯᖁᕕᓯᓐᖔ?” 10ᖃᐅᔨᒪᑦᓯᐊᕋᓗᐊᕐᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐰᓛᑑᓯᒧᐊᕈᑦᔨᓚᐅᕐᒪᑕ ᔩᓱᓯᒥᒃ ᓵᓐᖓᔭᑑᔪᒪᓂᕐᒧᑦ.
11ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐃᓄᒐᓴᒡᔪᐊᓂᒃ ᐃᓱᒻᒥᕐᑐᐃᓚᐅᕐᐳᑦ ᐸᕋᐹᓯᒥᒃ ᐱᔪᒪᖔᖁᓪᓗᒋᑦ ᑖᓐᓇ ᐊᓂᑎᑕᐅᖔᖁᓪᓗᒍ. 12ᐰᓛᑑᓯ ᐃᓄᖕᓄᑦ ᐅᖃᒃᑲᓐᓂᕆᕗᖅ, “ᖃᓄᕐᓕ ᐅᕙᓐᓄᑦ ᐱᓂᐊᕐᕕᐅᖁᕕᓯᐅᒃ ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᑍᔭᓯ?”
13ᐃᓄᐃᑦ ᕾᒐᓛᕐᓕᕐᐳᑦ, “ᑭᑭᐊᒃᑐᕐᑕᐅᓕ!”
14ᐰᓛᑑᓯᐅᑉ ᐊᐱᕆᕔᑦ, “ᓱᖕᒪᑦ, ᖃᓄᖅ ᐱᐅᖏᑦᑐᒥᒃ ᐱᓯᒪᖕᒪᑦ?”
ᐃᓄᐃᑦ ᓂᐱᖅᑯᕐᑐᓯᒋᐊᒃᑲᓐᓂᕐᓗᑎᒃ ᕾᒐᓛᓕᕐᐳᑦ, “ᑭᑭᐊᒃᑐᕐᑕᐅᓕ!”
15ᐰᓛᑑᓯ, ᐃᓄᒐᓴᒡᔪᐊᓂᒃ ᓈᒻᒪᒋᔭᐅᔪᒪᒐᒥ, ᐸᕋᐹᓯ ᐊᓂᑎᑉᐹ ᑎᒍᔭᐅᓯᒪᕕᖕᒥᑦ; ᔩᓱᓯ ᑏᒐᕐᑐᕐᑕᐅᖁᓚᐅᕐᓗᒍ, ᐂᑦᑑᑎᒋᕚ ᑭᑭᐊᒃᑐᕐᑕᐅᖁᓪᓗᒍ.
ᐅᓇᑕᕐᑐᒃᓮᑦ ᔩᓱᓯ ᒥᑕᐅᑎᒋᕚᑦ
ᒫᑎᐅᓯ 27:27-31; ᔪᐊᓇᓯ 19:2-3
16ᑕᕝᕙ ᐅᓇᑕᕐᑐᒃᓮᑦ ᔩᓱᓯ ᐊᐅᓚᑦᓯᔨᐅᑉ ᐃᒡᓗᕐᔪᐊᖓᑕ ᐊᓃᕐᕕᖓᓄᐊᕈᑎᕚᑦ, ᐅᓇᑕᕐᑐᒃᓴᓕᒫᓪᓗ ᐃᓚᒋᔭᑎᒃ ᑕᕝᕗᖓ ᕾᖁᕔᑦ. 17ᔩᓱᓯ ᐅᓕᒡᔪᐊᒥᒃ ᐊᐅᐸᓪᓚᕆᒃᑐᒥᒃ ᐊᑎᑎᑉᐹᑦ; ᓂᐊᖂᑎᒃᓴᖓᓂᒡᓗ ᑲᑭᓪᓚᐅᑎᓕᖕᓂᒃ ᐱᕐᕅᕗᑦ, ᔩᓱᓯᐅᑉ ᓂᐊᖁᐊᓄᑦ ᐃᓕᕚᑦ. 18ᓂᓪᓕᐅᑎᖃᑦᑕᓕᕐᐹᑦ: “ᓂᕐᑐᕐᑕᐅᓕ ᔫᑎᑦ ᐊᖓᔪᖅᑳᕐᔪᐊᖓᑦ!”
19ᓂᐊᖁᐊᒍᑦ ᕿᔪᖕᒧᑦ ᓱᓪᓗᓕᖕᒧᑦ ᐊᓇᐅᖃᑦᑕᐹᑦ, ᑎᕝᕗᓗᒃᓗᒍ, ᓵᖓᓄᑦ ᓰᖅᑯᕐᐳᑦ, ᐅᑯᕕᒋᓪᓗᒍ. 20ᒥᑕᐅᑎᒋᔭᕇᕋᒥᑦᔪᒃ, ᐅᓕᒡᔪᐊᖅ ᐊᐅᐸᓪᓚᕆᒃᑐᖅ ᐲᕐᐹᑦ ᐊᓐᓄᕌᖏᓐᓂᒃ ᓇᖕᒥᓂᖏᓐᓂᒃ ᐊᑎᑎᒃᑭᕚᑦ. ᑕᓯᐅᕐᐹᑦ ᑕᕝᕙᓐᖓᑦ ᑭᑭᐊᒃᑐᕆᐊᕐᑐᓕᕐᓗᒍ.
ᔩᓱᓯᐅᑉ ᑭᑭᐊᒃᑐᕐᑕᐅᓂᖓ
ᒫᑎᐅᓯ 27:32-44; ᓘᑲᓯ 23:26-43; ᔪᐊᓇᓯ 19:17-27
21 #
ᕉᒪᒥᐅᓄᑦ 16:13. ᐊᖅᑯᑖᓂ ᑲᑎᓯᕗᑦ, ᓄᓇᓕᖕᓄᑦ ᑎᑭᓕᕐᑐᒥᒃ, ᐅᓇᑕᕐᑐᒃᓮᓪᓗ ᐃᓱᒪᓯᐅᖏᑦᓯᐊᕐᓗᒍ ᐊᒡᔭᕐᓯᑎᑉᐹᑦ ᔩᓱᓯᐅᑉ ᓴᓐᓂᖓᔪᓕᒃᓴᖓᓂᒃ; ᑖᓐᓇ ᓮᒨᓂᒥᒃ ᐊᑎᖃᕐᐳᖅ ᓮᕆᓂᒥᐅᑕᖅ, ᐊᓕᒃᓵᓐᑕᕆᐅᑉ ᕉᐸᓯᐅᓪᓗ ᐊᑖᑕᖓ. 22ᔩᓱᓯ ᖃᖅᑲᒧᐊᕈᑎᕚᑦ ᒎᓪᒑᑕᒧᑦ, ᑖᑦᓱᒪ ᖃᖅᑲᐅᑉ ᐊᑎᖓ ᑐᑭᓕᒃ, “ᓂᐊᖁᕕᓂᖅ.” 23ᑕᕝᕙᓂ ᐃᒥᕐᑎᑕᐅᓇᓱᐊᕐᐳᖅ ᐅᐂᓂᒥᒃ ᐃᓚᖃᕐᑐᒥᒃ ᒨᕋᒥᒃ;#15:23 ᒨᕋ ᑐᑭᓕᒃ ᐋᓐᓂᐊᓗᐊᕇᒃᑯᑎᒥᒃ ᐃᓚᓕᒃ ᔩᓱᓯᐅᓪᓕ ᐃᒥᕈᒪᓐᖏᓛ. 24#ᐃᓐᖏᕈᑦ 22:18.ᑭᑭᐊᒃᑐᕇᕋᒥᑦᔪᒃ, ᐊᓐᓄᕌᖏᑦ, ᓇᓚᐅᓵᕈᑎᒧᑦ ᐱᓐᖑᐊᕈᑎᒋᓪᓗᒋᑦ ᐱᑖᕐᑐᒐᕆᕔᑦ. 25ᐅᓪᓛᑯᑦ 9ᒧᐊᕐᑎᓪᓗᒍ, ᔩᓱᓯ ᑭᑭᐊᒃᑐᕐᑕᐅᓚᐅᕐᐳᖅ. 26ᐸᓯᒃᓯᕈᑎᒥᖕᓂᒃ ᓇᓗᓁᕐᓯᓇᓱᐊᕐᓗᑎᒃ ᑎᑎᕋᕐᓯᒪᔪᖃᓚᐅᕐᐳᖅ ᐃᒫᒃ: “ᔫᑎᑦ ᐊᖓᔪᖅᑳᕐᔪᐊᖓᑦ.” 27#ᐂᓮᐊᓯ 53:12.ᐅᓇᑕᕐᑐᒃᓮᑦ ᑭᑭᐊᒃᑐᐃᓚᐅᕆᕗᑦ ᐊᖑᑏᖕᓂᒃ ᒪᕐᕉᖕᓂᒃ ᐱᕋᔮᖕᓂᒃ, ᐂᑉᐹ ᑕᓕᕐᐱᐊᓄᑦ ᐂᑉᐹᓗ ᓴᐅᒥᐊᓄᑦ. [ 28ᑍᒤᓕᐅᕐᑎᓪᓗᒋᑦ ᒎᑎᐅᑉ ᐅᖃᐅᓯᖏᑦ ᓇᓚᐅᑦᓯᓚᐅᕐᐳᑦ ᐃᒤᓕᔪᑦ, “ᐱᐅᖏᑦᑐᓕᔪᓄᑦ ᐃᓚᓕᐅᑦᔭᐅᕗᖅ.”]#15:28 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ. ᑕᑯᓗᒍ ᓘᑲᓯ 22:27
29 #
ᐃᓐᖏᕈᑦ 22:7; 109:25;
ᒫᑯᓯ 14:58; ᔪᐊᓇᓯ 2:19. ᐃᓄᐃᑦ ᓴᓐᓂᖓᔪᓕᐅᑉ ᓴᓂᐊᒎᕐᑐᑦ, ᓂᐊᖁᕐᒥᖕᓂᒃ ᐃᓕᕿᑕᒫᕐᓗᑎᒃ ᐅᖃᕐᐳᑦ, “ᑕᑯᒋᑦ! ᑐᒃᓯᐊᕐᕕᒡᔪᐊᕐᒥᒃ ᓯᖁᒥᑦᓯᓂᐊᓚᐅᕐᑐᑎᑦ ᓴᓇᖕᒥᓗᒍ ᐅᓪᓗᓂᒃ ᐱᖓᓱᓂᒃ, 30ᐊᑏ ᐃᓕᖕᓂᒃ ᐱᐅᓕᓕᕆᑦ, ᓴᓐᓂᖓᔪᓕᖕᒥᑦ ᐊᖅᑲᕐᓗᑎᑦ!”
31ᑐᓂᕐᕈᓯᕐᑎᑦᓯᔩᑦᑕᐅᖅ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᔩᓱᓯᒥᒃ ᒥᑕᐅᑎᖃᕆᕗᑦ ᐃᒻᒥᖕᓄᑦ ᐅᖃᖃᑕᐅᑎᓪᓗᑎᒃ, “ᐊᓯᒥᓂᒃ ᐱᐅᓕᒃᓯᓚᐅᕐᐳᖅ; ᐃᒻᒥᓂᒡᓕ ᐱᐅᓕᔪᓐᓇᓐᖏᓚᖅ. 32ᐊᑏ ᒥᓮᐊ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ, ᒫᓐᓇ ᓴᓐᓂᖓᔪᓕᖕᒥᑦ ᐊᖅᑲᕐᓕ, ᑕᑯᓗᑕ ᐅᒃᐱᓕᕐᓂᐊᕋᑦᑕ.” ᑭᑭᐊᒃᑐᕐᑕᐅᖃᑎᒋᓯᒪᔭᖏᒃᑕᑦᑕᐅᖅ ᔩᓱᓯ ᒥᑕᐅᑎᒋᒋᕚᒃ.
ᔩᓱᓯᐅᑉ ᑐᖁᓂᖓ
ᒫᑎᐅᓯ 27:45-56; ᓘᑲᓯ 23:44-49; ᔪᐊᓇᓯ 19:28-30
33ᐅᓪᓗᖅ ᕿᑎᕋᓕᕐᑎᓪᓗᒍ, ᓄᓇᓕᒫᖅ ᑖᕐᑐᕐᔪᐊᕐᒧᑦ ᑎᑭᑕᐅᓚᐅᕐᐳᖅ ᐃᑲᕐᕋᑦ ᐱᖓᓱᑦ ᓈᓪᓗᒋᑦ. 34#ᐃᓐᖏᕈᑦ 22:1.ᓯᕿᓐᖑᔭᖅ 3ᒧᐊᕐᑎᓪᓗᒍ ᔩᓱᓯ ᓂᐱᖁᕐᑐᓪᓗᓂ ᕾᒐᓛᕐᐳᖅ, “ᐃᓗ-ᐃ, ᐃᓗ-ᐃ, ᓛᒪ ᓴᐸᖅ-ᑖᓃ?” ᐃᒫᒃ ᑐᑭᓕᒃ, “ᒎᑎᒐ, ᒎᑎᒐ, ᓲᖅ ᕿᒪᒃᐱᖔ?”
35ᐃᓄᐃᑦ ᐃᓚᖏᑦ ᑕᕝᕙᓃᑦᑐᑦ ᑐᓴᕋᒥᑦᔪᒃ ᐅᖃᕐᐳᑦ, “ᑕᑯᒋᑦ, ᐃᓔᑦᔭᒥᒃ ᕾᖁᔨᓕᕐᐳᖅ.” 36#ᐃᓐᖏᕈᑦ 69:21.ᐃᓚᖓᑦ ᑕᕝᕙᓃᑦᑐᖅ ᐅᓪᓚᒃᓯᕗᖅ, ᔩᓱᓯᐅᑉ ᓵᖓᓄᐊᕐᓗᓂ ᐳᕙᐅᔭᕐᒥᒃ ᐅᐂᓂᒥᒃ ᐃᑦᓴᒃᑎᕐᓯᒪᔪᒥᒃ ᑎᒍᓯᕗᖅ, ᕿᔪᑯᑖᒧᑦ ᓱᓪᓗᓕᖕᒧᑦ ᐃᓕᓪᓗᓂᐅᒃ ᔩᓱᓯᐅᑉ ᖃᓂᖓᓄᐊᕐᐹ ᐅᖃᕐᓗᓂ, “ᐊᑏ, ᑕᑯᓐᓇᓕᕐᑕ ᐃᓔᑦᔭ ᕾᓂᐊᕐᒪᖔᑦ ᑖᑦᓱᒥᖓ ᐊᖅᑲᕐᑎᑦᓯᒋᐊᕐᑐᕐᓗᓂ.”
37ᔩᓱᓯ ᓂᐱᖅᑯᕐᑐᓪᓗᓂ ᓂᓪᓕᕐᐳᖅ, ᐊᓂᕐᓇᖏᕐᓗᓂ.
38 #
ᒨᓯᓯ ᐂᑉᐸᖏᑦ 26:31-33. ᑐᒃᓯᐊᕐᕕᒡᔪᐊᕐᒦᑦᑐᖅ ᑖᓗᑕᕐᔪᐊᖅ ᐊᓕᒃᐳᖅ ᒪᕐᕉᓕᓪᓗᓂ, ᖁᓛᓂᑦ ᐊᑖᓄᑦ ᑎᑭᓪᓗᒍ. 39ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᓴᓐᓂᖓᔪᓕᐅᑉ ᓵᖓᓂ ᓇᖏᕐᑐᖅ, ᑕᑯᒐᒥ ᔩᓱᓯᐅᑉ ᑐᖁᓕᕐᓗᓂ#15:39 ᑐᖁᓕᕐᓗᓂ, ᐃᓚᖏᓐᓂᑦ ᐊᒡᓚᑐᖃᕐᓂ ᐅᖃᕐᓯᒪᔪᖅ “ᓂᐱᖅᑯᕐᑐᓪᓗᓂ ᓂᓪᓕᕐᓗᓂ ᐊᓂᕐᓇᖏᕐᐳᖅ.” ᖃᓄᐃᓐᓂᖓᓂᒃ. ᐅᖃᕐᐳᖅ, “ᓱᓕᔪᒥᒃ ᐊᖑᑦ ᑖᓐᓇ ᒎᑎᐅᑉ ᐃᕐᓂᕆᕚ!”
40 #
ᓘᑲᓯ 8:2,3. ᐊᕐᓁᑦ ᑕᕝᕙᓃᓚᐅᕆᕗᑦ ᓴᓐᓂᖓᔪᓕᐅᑉ ᐅᖓᓯᒋᔭᖓᓂ ᑕᑯᓐᓈᕐᑐᑦ, ᐅᑯᐊ, ᒥᐊᕆ ᒫᒃᑕᓖᓂ, ᒥᐊᕆ ᔧᒥᓯᐅᑉ ᓄᑲᕐᓯᐅᑉ ᔫᓯᐅᓪᓗ ᐊᓈᓇᖓ, ᓴᓗᒥᓗ. 41ᑖᒃᑯᐊ ᔩᓱᓯᒥᒃ ᒪᓕᓚᐅᕐᑐᑦ ᒐᓕᓕᐊᒦᑎᓪᓗᒍ ᓱᓕ ᐱᔨᑦᓯᕋᕐᐸᒡᓗᒍ; ᐊᕐᓁᓪᓗ ᐊᓯᖏᑦ ᐊᒥᓱᑦ ᔩᓱᓯᒥᒃ ᒪᓕᓚᐅᕐᒥᔪᑦ ᔨᕉᓴᓕᒻᒧᐊᕐᑎᓪᓗᒍ ᑕᕝᕙᓃᓚᐅᕆᕗᑦ.
ᔩᓱᓯᐅᑉ ᐃᓗᕕᕐᑕᐅᓂᖓ
ᒫᑎᐅᓯ 27:57-61; ᓘᑲᓯ 23:50-56; ᔪᐊᓇᓯ 19:38-42
42ᐅᓐᓄᓕᕐᑎᓪᓗᒍ ᐅᓪᓗᖅ ᑖᓐᓇ ᐅᐸᓗᖕᒊᔭᕐᕕᐅᖕᒪᑦ, ᖃᐅᒃᐸᑦ ᓴᐸᑎᐅᓂᐊᓕᕐᒪᑦ, 43ᔫᓯᐱ ᐊᕆᒪᑎᐊᒥᐅᖅ ᑎᑭᑉᐳᖅ, ᑖᓐᓇ ᐱᔪᓐᓇᑦᓯᐊᕐᓂᖓᓄᑦ ᐅᐱᒋᔭᐅᑦᓯᐊᕐᑐᖅ ᐃᓚᒋᔭᐅᔪᖅ ᐃᖅᑲᕐᑐᐃᔨᐅᕙᒃᑐᓄᑦ, ᑖᓐᓇ ᓂᕆᐅᖕᓂᖃᕆᕗᖅ ᒎᑎᐅᑉ ᐊᑕᓂᐅᕕᖓᓂᒃ, ᑖᓐᓇ ᓯᕘᕋᓇᓂ ᐰᓛᑑᓯᒧᐊᓚᐅᕐᐳᖅ, ᕿᓄᕕᒋᓪᓗᒍ ᔩᓱᓯᐅᑉ ᑎᒥᖓᓂᒃ. 44ᐰᓛᑑᓯ ᑐᓴᕋᒥ ᔩᓱᓯᐅᑉ ᑐᖁᔭᕇᕐᓂᖓᓂᒃ ᖁᐊᕐᓵᕐᐳᖅ; ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ ᕾᖁᔨᓪᓗᓂ ᐊᐱᕆᓪᓗᒍ, ᔩᓱᓯ ᑐᖁᔭᕇᕐᒪᖔᑦ. 45ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐅᖃᐅᓯᕆᔭᖏᓐᓂᒃ ᑐᓴᕋᒥ ᑐᖁᓂᕋᕐᒪᒍ, ᐰᓛᑑᓯᐅᑉ ᔩᓱᓯᐅᑉ ᑎᒥᖓ ᔫᓯᐱᒧᑦ ᐱᔭᐅᖁᓕᕐᐹ. 46ᔫᓯᐱ ᖃᓪᓗᓈᕐᑕᒥᒃ ᐃᒻᒧᑎᒃᓴᒥᒃ ᓇᒃᓴᕋᒥ, ᔩᓱᓯᐅᑉ ᑎᒥᖓ ᓴᓐᓂᖓᔪᓕᖕᒥᑦ ᐊᖅᑲᕐᑎᓪᓗᒍ ᐃᒻᒧᓯᕐᐹ, ᐃᓗᕕᒃᓴᒧᐊᕐᓗᒍ ᑖᓐᓇ ᐃᓗᕕᒃᓴ ᕾᕐᑐᑯᑦ ᐃᓗᓕᐅᕐᑕᐅᓯᒪᔪᖅ; ᐃᓗᕕᐅᑉ ᐹᖓ ᐅᔭᕋᒡᔪᐊᕐᒥᒃ ᐊᒃᓴᑳᑎᑦᓯᓪᓗᓂ ᒪᑐᕚ. 47ᒥᐊᕆ ᒫᒃᑕᓖᓂᓕ, ᒥᐊᕆᓗ ᔫᓯᐅᑉ ᐊᓈᓇᖓ ᑕᑯᓐᓈᕐᐳᒃ ᔩᓱᓯᐅᑉ ᑎᒥᖓ ᓇᒧᑦ ᐃᓕᔭᐅᖕᒪᖔᑦ.
Currently Selected:
ᒫᑯᓯᐅᑉ ᐊᒡᓚᖏᑦ 15: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
